Mbuku Urut yi, eebe mbanak pekkaga’lek logonet, aa’nduk pekkoorak yi o.
Aakumi iniki worokot nen eeko nogogwaarak mbuku Owak Loongga paga mbanak wonage ti eekwi eyom paga kwe endage Urut eeke nagagerak wone mbuku Urut liiru mbanak yi aret.
Kwe Urut nogo awi Mowap mendek me, aap Iterali mendek waganeegerak. Waganeegerak kwe, ogonggelo kangge mbareegi, at eenggelo anebunu Iterali mendek aret me, Ala mugurok nage kenok, at imbirak liirogon aret Iterali inogoba Ala mugurok nage nagagerak. Togop eeke logonet, ogonggelo aa’nduk kambeegerak nogo, oreewi mendek ambi waganeegerak ti paga aap Iterali inowe endagembogut iya lombok Ndawut nogo owogolo aret agagerak.
Mbuku Owak Loongga liiru mbanak nogo ti, Ala apuri Iterali nen Ala mbo pogo mbareegwa, aaninggin mondok iya inoba kwi’nagagerak nogo aret. Ndi, mbuku Urut liiru mbanak yi perak, kwe endekem mendek aret kwe, agugi eeke nagagerak nogo mbo punuk, iniki Ala abet mbareegerak paga Ala apuri Iterali mendek inom agagerak nogo liiru mbanak wonage.
Urut URUT WONE –
1 Urut Nawomi imbirak eereegwaarak wone
1 Ne ambi paga it aap wone owak loongga mendek nen aakumi Iterali inarum wonogwe iigak, it Iterali wonogwe me time mbi noogelo ambik agagerak. Mbi noogelo age mbareegi, aap ambi akwe inom, apuri mbere inom, inawi Yekura o Mbe’lekem nen aakumi Mowap mendek iname luulu logowok nduk, nogogwaarak.
2 Aap ti endage Elimelek, ndi, at akwe endage Nawomi. Apurilogwe wologwe mbere nogo ambi endage Makolon, ndi, ambi endage Kiliyon. It ti, aap Eparata mendek inawi Yekura o Mbe’lekem aret wonogogwaarak kwe, o Mowap time logowok nduk, nogogwaarak.
3 Nogo nogogwaarik, time wonogwe me, kwe Nawomi ogonggelo aap Elimelek nogo kangge mbareegi, kwe Nawomi nogo aagalogwe wologwe mbere nogo inom inalik wonogogwaarak.
4 Wonogo logonet, wologwe nogo inakuwi kumi Mowap mendek wogonabeegwaarak me, kwe ambi ti endage Orapa, ndi, ambi ti endage Urut, kologogwaarak wonogwe iigak, tahun 10 eeppunuk,
5 Makolon kunduk, Kiliyon kunduk, time aret kambeegwaarak. Kwe Nawomi nogo ogonggelo inom, aagalogwe mbere nogo inom, kanggo mbareegwa, inagalo nogo mban alik wonagagerak.
6 Ti’nuk, at Aliku ALA nen apuri Iterali liippiige logonet, inambi wogoragagerak kwe Nawomi nogo aruk konengge nagagerik, kumi eenggelomini nogo inom aap Mowap iname nen iniyokan woroorak nduk, pipuk eereegwaarak.
7 Pipuk eeko nogogwaarik, iname time mbo punuk, o Yekura woraawok nduk, kwe Nawomi eenggelomini inom tu paga ari wogo nogogwaarik,
8-9 kwe Nawomi nogo nen eenggelomini nogo yorage logonet, “Kit kinalitak aret kiname kinagalomini- kinogobamini iya nanip o. Iya namonggotak wonogwe kiigak, kit kinogonggelomini kanggaarak nogo obeelom eeppiigwi, ndi, an kunduk, obeelom eeppanugwi, eeko nogotak nogo ndak-ndak at Aliku ALA kinabuwa nen obeelom eeppinagage, ndi, kinogonggelomini wokkiramenggerak kinom obeelom aret logomunggup nduk, eeppinagage, eeke logowak o.” Yorage nagagerik, inagandin eyak mbaninake mbareegi, it kumi nogo inoone nggwok paga le yogo logonet,
10 “Lek o, nineenggelo. Kat kogonikaagi wonogwe me, time ninom aret nawok o.”
11 Yoreegwaarak kwe, Nawomi nen it yorage logonet, “Neenggelomini o. Nonggop nduk ninom noorak yo’nogo ogotik? Kit kinogonggelomini kolaamunggup nduk, naagalogwe peebi ambi ndariyak nomba’nuk, yogo ogotik?
12 Togop eeriyak meek me, kiname nanip o, naagalogwe. An abu kweegelo kagak, nogonggelo ambi wagin lek abet aret kwe, Op aret ndarigin, mba’nuk, oonikiya yi paga aret an nogonggelo kolage logominggirik, naagalogwe aap aret ndaganake neenok,
13 tawe ogwe iigak, kit kinogonggelomini alik mbet-mbet kolaga’- lek it torinako logorak op mbakop? Togop eeriyak meek aret me, naagalogwe o. Kit perak, obeelom logonet eerit nogo logorak op aret kwe, an perak, Ala nen ale-pale eerogo panegerak niniki abu andi lombok wonage me, obeelom eeppaniyak meek me, nanip o, naagalogwe.”
14 Yorage mbareegi, inoone nggwok paga le yogo logonet, at Orapa nogo nen eenggelo nogo linggik-kambuk eerogo agandin eyak mbangge nagagerik, ame aret nagagerak kwe, at Urut nogo perak, “Nimbirak aret noorak o,” yinuk, perenggolage mbareegi,
15 at Nawomi nen at yoge logonet, “Koregelo nogo muk owe-awot inom, ayuk wuko menggaarak inagugi inom, wonogwe me nogome nage me, kat koregelo kimbirak aret nanip o.”
16 Yoreegerak kwe, Urut nen ari logonet, “An nen kat mbo pagage, nimbirak noorak neebi ari, eeruwak nomba’nuk, kat nen koone nabenak mban yo’nirugun o. Kat, Noorak, mbake keenok, an kunduk time aret nage, Time nogo yikit, mbake keenok, an kunduk time aret nogo yege, kat kogoni- kaagi kunduk, an nogoni-naagi aret age, ndi, kat kogoba Ala kunduk, an nogoba Ala aret age, eerigin o.
17 Ndi, kat ambime kangge keenok, an kunduk time aret kangge neenok, time aret nggween taambanugun o. Togop aret eeriyak me, neebe kambunuk nogo menggam nage logonet perak, nimbirak ninalitak aret nagun kwe, nineebe nineenik wonogo logonet, ninalitak ogwe kenok perak, Ala nen an maluk lombok eeppaniyak op aret o,” yoreegerak.
18 At Nawomi nen Urut nogo imbirak woroorak iniki nggaruk togon koonggerak yelok kage nagagerik, wone yoge nagagerak nogo puk aret a’nuk,
19 imbirak o Mbe’lekem aret wogogwaarak. O Mbe’lekem unggwi wogo mbareegwa, aakumi o kota time mendek abok aret inogut na’nuk, it kumi abok aret yogo logonet, “Yi Nawomi nogo aret mbakop?”
20 Yereegwaarak kwe, at nen it yorage logonet, “At Omaawi Lombok Menggerak nogo nen ale-pale eerogo panegerak me, an nendage Nawomi ti, yo’nirugup o. Nendage, Ale-Pale Aago, aret yo’ninip o.
21 Neenggime yebet aago wonok wundi nagagirak kwe, at Aliku ALA nen, Kwe yi maluk o, yinuk, ari, ndi, at Omaawi Lombok Menggerak nen aaninggin alik lombok noba kwippanege, eeke nagaarik, neenggime lek aret wo’neren unggwi wagaarak me, kit nen nendage, Nawomi, nonggop nduk, yo’nogo ogotik o?” yinuk, yoragagerak.
22 Kwe Nawomi eenggelo Mowap mendek Urut nogo imbirak o Mowap nen o Mbe’lekem unggwi wogogwaarak nogo ti, waabuk negen jelai anggen iyaalok mbanggwi nogo eyom aret -21unggwi wogogwaarak.
2 Urut jelai anebengge me, Mbowat imbirak abuk ogogwaarak wone
1 Nawomi ogonggelo Elimelek owe-awot ambi eenggi warak lombok nagawan indo endage Mbowat aret wonagagerak.
2 Kwe Mowap mendek Urut nogo nen Nawomi yoge logonet, “Aakumi waabuk negen jelai anggen mbanit nogo logonet, inambokan wambemenggerak nogo nabuwa nen, Anebenggolet, yo’niruwak nduk, yabume na o.”Ari mbareegi, Nawomi nen at yoge logonet, “E o. Nak o, neenggelo.”
3 Yoge mbareegi, nage nagagerik, anggen mbanggwi iigak, wangge nogo inambokan anebenggo’net nage nagagerak. Anebenggo’net aap anebunu Elimelek mendek endage Mbowat anggween paga lik togon aret ari nagagerak.
4 Ari nanuk, anebenggolage me, aap Mbowat nogo o Mbe’lekem nen nage nagagerik, it waabuk negen jelai mbanggo menggaarak nogo keyage wappiige logonet, “At Aliku ALA kinom aret wonage o.” Yorage mbareegi, it nen at yogo logonet, “Ninogoba kat kunduk, Aliku ALA ale’nggen koba logowak o.”
5 Yogo mbareegwa, at Mbowat nen at ayeloman waabuk negen jelai anggen mbanggo menggaarak inarum wonage nogo yoge logonet, “Kwe yi, ta apuluk o?”
6 Yoge mbareegi, at eyabu eeko menggaarak unde nogo nen, “Kwe Mowap mendek Nawomi imbirak aap Mowap iname nen wagaarak nogo yi aret o.
7 Kwe yi, wage nagaarik, Waabuk negen jelai mbanogo mippit nogwe iigak, wangge kenok, an inambokan anebenggo’net na ilik? yo’nege mbaki, E o, yoge mbaki, puk aga’lek anebenggolage tit kagak o kuubondendok nen nok, yogondak yi aret ari wage nagaarik, we ne ambiriluk mban ooliya wurik me yonggonggolage nagaarik, eeke ti o.”
8 Yoge mbareegi, at Mbowat nen Urut nogo yoge logonet, “Nayinggelo o. An wone yokkege yi, liirogon konenu o. Aakumi alik ineyabume waabuk negen jelai anebenggola nage, ndi, yime nen alik me nage, eerugun o. Ata, an nayeloman kumi wonogwe yime kinom logot o.
9 It yabu yarak me waabuk negen jelai anggen mbanit nogwe kenegen iige logomenggendik, it kumi nogwe ti, inambokan aret nage logomunggun o. Ndi, it aap yabu eeko menggaarak nogo nen kat maluk eeppagukwak an muk yoragarak me, kat niyo abu eekkake kenok, it yabu eeko menggaarak nogo nen niyo toologo pugwi iinok mban na nagak yumunggun o.”
10 Yoge mbareegi, Urut nogo abu’- me tebe yinuk, ena nggween paga wu’na’nuk yoge logonet, “An ti, kwe nggiru aret kwe, nonggop nduk an nabuwa mbake logonet, liippanegen o?”
11 Ari mbareegi, at Mbowat nen kwe nogo yoge logonet, “Kogonggelo kangge mbaki, keenggelo obeelom eeppege logonet, kagalo-kogoba inom, nggween kat nda’nagaginom inom, abok aret nonggoti eerogo mbo piinok, aakumi kat keenggo’lek mendek wonogwe iigak wagandak nogo, an abok aret konenggirak me,
12 at Aliku ALA nen eekendak nogo onggo wokkege, ndi, towe aagalogwe kanggwi iyo, a’naabit abu’me tebembiinok menggi kwak, at Aliku Iterali inogoba Ala abu’me ari wagandak wonage me, onggo nggwok lombok kalo logonogo wokkege, eerigin o.”
13 Yoge mbareegi, at Urut nen at yoge logonet, “An nogo ti, kat kayeloman mini kumi nogo ndak-ndak lek aret wonage neegak kwe, an kayeloman nabuwa lombok nombake logonet, koone yanggorogon yo’nege, niniki eyak wappanege, eekendak me, mondok-mondok togop aret eeppanege logot o, nayinggelo,” yoreegerak.
14 Ndi, mbi nonggo menggam aret age mbareegi, Mbowat nen at yoge logonet, “Oroti waganogo anggur amburu ale negen mendek paga labunogo nanok nduk, mok o.” Yoge mbareegi, it waabuk negen jelai anggen mbanggo menggaarak nogo inom kwi’nage mbareegi, at Mbowat nen waabuk negen jelai anggen worarak wogoge mbareegi, Urut nogo ndonggok togon nengge nagagerik, ando ndinogo nggerenggolagagerak.
15-16 Abu aret nengge nagagerik, ambi anebenggolaakit nduk, mi’na’nuk, nage mbareegi, at Mbowat nen ayeloman mini yabu eeko menggaarak nogo wone lengganogo yorage logonet, “Waabuk negen jelai anggen mbanggo logonet, ando kwe yi, anebenggolaawak nduk, kiniki nen ando nggiginogo wuppegak eeko logonip o. Ndi, wambemenggerak wagangge kenok, mage yogwi, ndi, kwe yi, anggen mbanak mippumonggotak kweyak togon wangge nogo wagangge kenok kunduk, enggali wakwi, eeriyak mage o.” yinuk, yoragagerak.
17 Kwe Urut nogo yabu yarak me anebenggolage tit kagak, o kiyoma aret age mbareegi, anebenggolagagerak nogo menenogo togolowak eno korok togon 22 liter negen aret yonggokkolagagerak.
18 Yonggokkolage nagagerik, ko’nok ame kota nogome aret wage mbareegi, eenggelo nogo nen yonggoleegerak nogo enegen kagagerak. Kage mbareegi, Urut mbi nengge logonet, ando ndonggoppege kenok, nggereneegerak nogo wogoreegerak.
19 Wogoge mbareegi, eenggelo nogo nen at yoge logonet, “O ngga nen anebenogo wagangge, ndi, yogondak aap ta eyabu aago me eeke, eekendak? Eeke keegak, aap liippagagerak nogo Ala nen ale’nggen oba pege logowak o.” Ari mbareegi, eenggelo Urut nen eekerak nogo tigitogon aret mbininogo yoge logonet, “O yogondak aap eyabu eekirak nogo ti endage Mbowat aret.”
20 Yoge mbareegi, Nawomi nen eenggelo yoge logonet, “At Aliku ALA nen aakumi kanggwi inom, ineenik wonogwe inom, abok aret inabuwa mbake menggerak me, at ale’nggen aap ti, oba pege
_____________________________________________________________
2:2 Unde 19:9-10, Pel. 24:19
logowak o.” Ari nagagerik, wone ambi ari logonet, “Aap ti, nit ninayinggelo aret me, ninawone koonogo nineebe-ninanggween onggo mbanogo pinaniyak ambi at aret o.”
21 Yoge mbareegi, kwe Mowap mendek Urut nogo nen, “Aap nayinggelo ti nen an yo’nege logonet, Neyabu eeppanugo menggaarak nen waabuk negen jelai anggen mbanggwi ti, kinom mbanit nage keegak, age yobok ari nawak o, yinuk, yo’negerak.”
22 Yoge mbareegi, kwe Nawomi nen eenggelo Urut nogo yoge logonet, “Aakumi inalik ineyabu yarak me eeri nage kenok, it nen maluk eeppagukwak, kumi Mbowat ayeloman mini yabu eekwi me time kinom eeri noorak op aret o.”
23 Yoge mbareegi, Urut nogo kumi Mbowat eyabu eeko menggaarak nogo inom wonage logonet, waabuk negen jelai inom, gandum inom, mbanit nogwe iigak, age yobok aret ari nagagerak. Ndi, ti eeko logonet, Urut nogo -32eenggelo imbirak aret wonagagerak.
3 Urut Mbowat imbirak jelai anggen menenggo menggam lambuneegwaarak wone
1 Ti’nuk, ne ambi paga at Urut eenggelo Nawomi nen Urut yoge logonet, “Neenggelo o. Kiniki kwi’- ndak ale’nggen logonok nduk, o ambi kwaakkiri ilik?
2 It kumi kat kinom at ake yabu eeko nogotak aap Mbowat nogo ti, nit ninayinggelo mendek nogo lek a? Ninayinggelo aret me, oonikiya yi paga waabuk negen jelai anggen menenggo menggam nogome at aret menengge me, nanok nduk,
3 kanggo’mo wakkolage, amburu obari abe mendek eekkolage, kayum abe kigirikwe lombok yirikkolage, eeppunuk, at waabuk negen jelai anggen menengge me, time nage logomenggendik, enegen keege kero, kumaarak keegak, at nen niyo inom, mbi inom, abu nenok,
4 ilin nggeeme nogo yege nogo kat mondok liippunuk, at windak wonage me time nage logomenggendik, nogo yum iyok paga lenggenak nogo pilaappunuk, winnage keenok, at nogo nen eeriyak wone nogo yokkege kaamunggun o.”
5 Yoge mbareegi, at Urut nen ari logonet, “Yo’negendak nogo abok ndak-ndak aret eerikit o.”
6 Yoge nagagerik, eenggelo nen wone lengganogo yoreegerak nogo ndak-ndak aret eerikit nduk, waabuk negen jelai anggen menenggo menggam time aret nagagerak.
7 Nagagerak wonage kagak, at Mbowat nogo mbi inom, amburu inom, abu aret nengge nagagerik, ale’nggen eeke mbareegi, waabuk negen jelai anggen menenak logonogo pugume irip me time winnagagerak nogo yege me, kwe Urut nogo mbawok aret owagam nage nagagerik, yum Mbowat iyok paga lenggenak nogo pilaappege nagagerik, winnagagerak.
8 Winnage mbareegi, nogo iniki mbere eeke paga at Mbowat nogo ogut nage nagagerik, ena logu yinuk, kwe ambi iyok irip me windak wonage kage nagagerik, yoge logonet,
9 “Kat ta o?” Ari mbareegi, at nen, “An kayeloman Urut aret o. Kat nen ninawone koonogo nineebe-ninanggween onggo mbanogo pinaniyak nayinggelo kat aret me, kayum yi, mbiganogo ando an lenggenogo panu o.”
10 Yoge mbareegi, at yoge logonet, “Nayinggelo o. At Aliku ALA nen ale’nggen koba pagage logogin o. Kat nen aap tawe ineenggi warak inom, ineenggi lek inom, kwaarinabit noolik an aret neya wagandak me, aa’nduk neya wagandak nogo ti, nabuwa mbuuluk negen nombakendak kwe, o yogondak yi paga perak, nabuwa nggwok lombok nomba’nuk, wagandak keegi o.
11 Togop aret me, nayinggelo o. Kagabiti mbarugun o. Ninoreewi ninawi kota yime abok aret nen, Kwe yi abu obeelom aret, ineenu wonogwe me, yo’negendak nogo abok aret an ndak-ndak eerigin o.
12 Kat nen, Ninawone koonogo nineebe- ninanggween onggo puurak nayinggelo kat aret, yo’negendak ti, abet aret kwe, an we tayorogon negen o. Kayinggelo kineebe-kinanggween onggo puurak alom me liirogon lombok ti wonage o.
13 Togop me, oonikiya yogondak yi paga yime logot o. Ndi, ko’lu kuubondendok at nen, An nen aret onggo pikit o, ari kenok, at nen puurak op aret me, kineebe-kinanggween onggo puwak o. Ndi, at nen, An puurak neebi, ari kenok perak, An nen aret pikit o, yinuk, Aliku ALA eenik menggerak endage paga yokkege me, o awo wigangga’lek me, nogo ambinom yu o.”
_______________________________________________
2:20 Unde 25:25,/ 3:12 Urut 2:20
14 Yoge mbareegi, iyok irip me time aret nogo yege nagagerik, aakumi inete liippiyoorak meek, o awo weerikit nduk eeke kagak, at Mbowat nen yoge logonet, “Kwe ambi waabuk negen jelai anggen menenggo menggam wagaarak ineenu arukwak, aakumi abu yoroobok o.”
15 Yoge nagagerik, “Kayum kanobak paga perenak ti, ndoonggolet o,” yinuk, yoreegerak ndoonggolage mbareegi, waabuk negen jelai anggen menenak ne 6 paga yonggorege nagagerik, anobak paga punuk, wage kagak, Mbowat nogo ame kota aret wagagerak.
16 Ndi, kwe Urut nogo eenggelo owagam wage mbareegi, Nawomi nen yoge logonet, “Neenggelo o. Nonggop mban eekendak o?” Ari mbareegi, aap Mbowat imbirak wone mbaneegwaarak nogo apit aret mbininereegerak.
17 Mbininege nagagerik, ambi yoge logonet, “Mbowat nen, Keenggime lek, we nagun o. Keenggelo nugut-nagut ari kero, yi wamen o, yinuk, waabuk negen jelai anggen ne 6 paga yonggologo wo’negerak yi aret me, kolet o,” yinuk, wogoreegerak.
18 Wogoge mbareegi, Nawomi nen eenggelo yoge logonet, “Neenggelo o. Kayinggelo ti, kawone koongga’lek puk arigin lek, yogondak mbet-mbet aret koonigin me, wone koonemenggerak yo’niraga’lek kagak, we luulu tokkogo logowok o,” yinuk, yoreegerak.
4 Aap Mbowat nogo nen kwe Urut kolagagerak wone
1 At Mbowat nogo wage nagagerik, o kota tu unggwogo menggam nogome aret kwi’nari wagagerak. Kwi’ndak taati wonage me, at Urut awone koonogo onggo mbaniyak yereegerak nogo aret wage enegen kage nagagerik, “Wulaga yi wae. Yime kwi’- nari mok o.” Yoge mbareegi, wage nagagerik, imbirak aret kwi’nagagerak.
2 Kwi’nage mbareegi, at Mbowat nen it aap o kota time mendek aap inoweewi 10, “Woraanip o,” yorage nagagerik, “Kit yime kwi’nari woraanip o,” yorage mbareegi, time aret kwi’nari wogogwaarak.
3 Kwi’nari wogo mbareegwa, at Mbowat nogo nen aap kwe Urut awone koonogo onggo mbaniyak nogo yoge logonet, “Kwe Nawomi nogo aap Mowap wonogwe me nen wage nagaarik, nit ninoweeluk aap Elimelek anggween nogo onggo kunggolaakit ari me,
4 aakumi kwi’ndak wonogwe yi inom, aakumi nit mendek inoweewi yi inom, inenggaanom paga kat kunggoloorak mbake ilik, lek a? ari keyaakit nduk, Mok, yokkigirak me, kunggoloorak mbake kenok, aret kunggolet o. Ndi, kunggoloorak keebi mbake keenok perak, an neenu arikit nduk, yo’niru o. It aakumi inambik kunggoloorak lek oweeluk alom me liirogon kat aret kuniyak koba wonage me, kunu o. Ndi, kat kunggoloorak meek mbake keenok, an aret kuniyak noba aruwak o.” Yoge mbareegi, “An aret kunggolaakit o,” yoreegerak.
5 Yoge mbareegi, at Mbowat nen ari logonet, “Kwe Nawomi nggween kungge nogo ti, kwe Mowap mendek Urut ogonggelo kambeegerak nogo anggween aret kungge me, ogonggelo kambeegerak endage ki logowak nduk, anggween kunggolage logonet, akwe ti inom onggo puurak ariyak me, nonggop eerumunggun o?”
6 Yoge mbareegi, aap kwe Urut awone koonogo onggo mbaniyak kin wokkage nogo nen ari logonet, “Togop kenok, an lombok neyate nogo paga wone ambi age kero, an kuniyak meek me, kat aret kunu o,” yoreegerak.
7 O maan aakumi Iterali inanggween it-it kunggologo logonet, “Abu aret onggo punuk, inanggween ti kunggolagaarak,” abet mbaruwak nduk, aap anggween unde nogo nen iyok ogut nggoorogo aap nggween kunggolage nogo wogorogo nogogwaarak me,
8 aap Urut awone koonogo onggo mbaniyak kin wokkage nogo nen, “Kat aret kunggolet o,” yoge nagagerik, iyok ogut nggoorogo Mbowat wogoreegerak.
9 Wogoge mbareegi, at Mbowat nen it aap inoweewi nogo inom, aakumi time wonogwe nogo inom, yorage logonet, “Kit apit kinenggaanom paga aret aap Elimelek inom, aap Kiliyon Makolon imbirak inom, inamendek abok aret kwe Nawomi eenggime nen an kunggolage logonet,
10 oweawot nen aap Makolon endage kobak ogwe, ndi, o kota inendage mbanak menggaarak nogome at endage mbanak lek age, eerukwak, endage ki logowak nduk, akwe togwe pereegerak kwe Mowap mendek endage Urut nogo, An nakwe me, yinuk, inom aret kolage me, kit abok kineenu a’nip o.”
11 Ari mbareegi, aakumi ambik tu unggwogo menggam wonogogwaarak nogo inom, aap inoweewi nogo inom, nen yogo logonet, “Nit apit ninenggaanom paga aret yagandak me, kwe Leya kunduk, kwe Araken kunduk, nen aakumi Iterali ineebe wiganogo piyareegwaarak nogo ndakndak, at Aliku ALA nen kwe kame woraagin ti, togop aret eeppuwak o. Eeppege kenok, it aakumi o Eparata mendek nen, Aap nagawan indo yi, Wi, yogwe, ndi, o Mbe’lekem mendek nen kendage nggwok aret wiganit nogwe, eeko logowak o.
12 Kwe Tamat nen aap Yekura obaane’me Peret ndareegerak paga nen ineebe nggwok wigak yereegwaarak nogo ndak-ndak, at Aliku ALA nen kwe tawe yi paga nen kapuri togop aret wokkiruwak o,” yinuk, yoreegwaarak.
13 Ti’nuk, aap Mbowat nen kwe Urut nogo kolage nagagerik, akwe aret age mbareegi, at Aliku ALA nen obeelom eeppege kagak, abila age nagagerik, aagaluk aap aret ndareegerak.
14 Ndake mbareegi, it kumi nen Nawomi yogo logonet, “Aliku ALA nen mbo pagulik aap ambi kawone koonogo keenggelo kimbirak kineebe-kinanggween onggo mbaniyak nduk, koonggerak paga kowooluk ndakerak me, o yogondak Aliku ALA endage tiyappuwok o. Aakumi Iterali inenggela’me nen wulaga ti, endage nggwok aret logowak o.
15 Kaagalogwe 7 ndarak wonage nen iya mbariyak kwe, meek o. Keenggelo kabuwa mbake logonet, iniki kunik eekkake nogo nen kowooluk ambi ndakerak me, yogondak ale’- nggen eeppagage, ndi, kwe kanggok age keegak, ndegenggake, eeke logogin me, iya o.”
16 Yogo mbareegwa, kwe Nawomi nogo nen wulaga nogo wagangge nagagerik, ogome porogo wonage, ndegengge, eeke nagagerak.
17 Ndi, it kumi time mendek nen, “Nawomi owooluk aap aret ndakerak o,” yinuk, endage Obet aret tooneegwaarak. At Obet nogo nen apuluk Itayi ndareegerak. Ndi, Itayi nen Ndawut aret ndareegerak.
Ndawut ombomini nda’narit wogogwaarak inendage mbanak wone
18 Aap Peret apuri wiganak inendage nogo yi aret o. Peret nen Ketoron ndake,
19 Ketoron nen Aram ndake, Aram nen Aminarap ndake,
20 Aminarap nen Nakaton ndake, Nakaton nen Talomon ndake,
21 Talomon nen Mbowat ndake, Mbowat nen Obet ndake, 22 Obet nen Itayi ndake, ndi, Itayi nen Ndawut aret ndake, eerit wundi wogogwaarak.
______________________________________________________
4:7-8 Pel. 25:9. 4:10 Pel. 25:5-6 4:11 Wak. 29:31 4:12 Wak. 38:27-30
