1 Mbininegwaarak 28:9
9 Yorage nagagerik, aput Talomo yoge logonet, “Ndi, kat naput Talomo wae. At Aliku ALA nen yi aakumi ndi aakumi inikime maloppiige, Ndogop eerikit, koonggwi nogo, Nonggop nduk koonggwi, yinuk, eenu age, eeke menggerak me, kat nen Aliku ALA kwaake keenok, kimbirak lambunumunggun kwe, at mbo pege keenok perak, at nen kat mondok-mondok mbo pagagin o. Togop me, kogoba an nogoba Ala ti, An nogoba aret o, mbake logomenggendik, kiniki nen, Ala ake eeke logokit o, yinuk, kiniki-keebe nggaruk togon Ala wogo'nuk, ake eeke logomunggun o.
10 At mban alut eeko logowam awi wuriyak Aliku ALA nen an aret leenogo panegerak kagi, mba'nuk, liippunuk, kogogumbuk logonet, eeke logot o,” yinuk, yoreegerak.
20 Ti'nuk, at Ndawut nen at aput Talomo nogo ambinom yoge logonet, “Kat kogogumbuk kiniki mondok nu'lek eeppatinuk logonet, eerit nage logomunggun o. Aliku Ala ti, an nogoba Ala aret me, at nen teppagage, eraangge mbo paganuk mbagangge, eerigin lek kimbirak keegak, Aliku ALA awi wuremenggenom eeko logorak ti age worok togon aret eerumunggun me, kagabiti mbake, anggon eekkake, eeriyak mage o.
21 Ala awi wuremenggenom eeko logorak ti, it aap Ala unde inom, Lewi mendek inom, inawuri lombok aago pipuk eerak wonogwe, ndi, it aap ando yi eeriyak ndi eeriyak kani warak nogo, iniki nen kat yeenggwa kogo logorak togon wonogwe, ndi, it aakumi inoweewi inom, aakumi ugun mendek inom, abok aret wone lengganogo yorage keenok, eeko logorak kunduk, wonogwe mban aret o,” yinuk, yoreegerak.
Ala awi wuriyak nduk yi mendek ndi mendek kuwak eereegwaarak wone
pasal 29:
1 Yoge nagagerik, at Ndawut nen it aakumi kuwak ogogwaarak nogo abok aret yorage logonet, “O nggwok abe wuriyak nogo ti, aakumi inawi wuriyak lek Aliku Ala awi lombok wuriyak me, aaninggin ambik wonage. Ndi, at Ala nen an naput Talomo miirogo pereegerak nogo, yi eeriyak ndi eeriyak liippega'lek eebe awo tawe me,
2 nogoba Ala awi wuriyak nduk, yi mendek ndi mendek an unde minggirak kuwak eerogo pigirak ti, mbuti emas paga eeriyak kenok mbuti emas pipuk eerogo pege, mbuti perak paga eeriyak kenok mbuti perak pipuk eerogo pege, mbuti tembaga paga eeriyak kenok mbuti tembaga pipuk eerogo pege, mbuti abe mbuti paga eeriyak kenok, mbuti abe mbuti pipuk eerogo pege, eyo paga eeriyak kenok eyo pipuk eerogo pege, yugum paga nabeniyak kenok yugum onggo nggwok mendek inom, kere'li-kere'lo aago mendek inom, etenggen alitik-alitak inom, yugum abu abe meenggen mendek inom, ti mendek ambik aret kuwak eerogo pege, eekirak o.
3 Ndi, Nogoba Ala awi wuriyak, uugwe lombok mbake minggirak me, yi mendek ndi mendek pipuk eerogo pigirak nogo, oba lunogo an nogoba Ala awi wuriyak ake an namendek lombok mbuti emas inom, perak inom, pereegirak nogo ti,
4-5 Ala awi wuko logonet, kobat nabenggwi, yi mendek ndi mendek mbuti perak-emas paga ogobakkigikwi, ndi, it aap mbuti perak-emas paga yi mendek ndi mendek ineenggi amburu paga ogobakkigikwi, eeko logowak nduk, mbuti emas abu obeelom Opit mendek aaninggin seratus ribu inom, mbuti perak abu kigirikwe aaninggin seratus tujuh puluh ribu inom, ti muk pipuk eerogo pigirak me, o yogondak aap ambi ta nen Aliku ALA ake iniki ale'nggen nen wogoriyak mbake kenok, wogoriyak aret o.”
6 Yorage mbareegi, it aakumi ndarak ndegek inoweewi inom, aap Iterali inanebunu lombok inarum menggaarak inom, it aap ineegin warak ineebe seribu lombok inoweewi inom, 100 lombok inoweewi inom, it aap endagembogut ake yabu eeko menggaarak inom, abok aret iniki ale'nggen nen,
7 Ala awi wuriyak ake pogo logonet, mbuti emas aaninggin dua ratus lima puluh ribu pugwi, mbuti perak aaninggin tiga ratus empat puluh lima ribu pugwi, mbuti tembaga aaninggin enam ratus sepuluh ribu pugwi, mbuti abe mbuti aaninggin tiga juta empat ratus lima puluh ribu pugwi,
8 ndi, it aap yugum onggo nggwok nogo mendek wonage kenok, waganogo at Aliku ALA awi wuriyak me, ake pugu pogo menggam unde aap Nggeroton mendek endage Yekiyen nogo wogogwi, eereegwaarak.
9 It aakumi nogo inoweewi inamendek ili yuulik iniki ale'nggen nen, “Aliku ALA ake wogori o,” mba'nuk, nggaruk togon wogogwi iinok, it iniki ale'nggen mbakwi, ndi, at endagembogut Ndawut kunduk, togop aret iniki ale'nggen ambik age, eereegwaarak.
At Ndawut nen Ala alut eereegerak wone
10 At Ndawut nen aakumi kuwak eerak nogo abok inenggaanom paga Aliku ALA alut eeke logonet, “Kaliku nogoba ALA wa! Ninombo Iterali ogoba kat aret o.
Aa'nduk nen nok, peebi kuli, Kendage mondok-mondok tiyappogo logowak o.
11 Kaliku nogoba ALA o. Mbogut-nggween unde wonage kat aret me,
Yi aap ndi aap iigak, Kat mondok iya, komaawi ambik, Kendage tiyanak, kayuk warak,
Aakumi nen wiigugo agaarik o. Kaliku nogoba ALA o.
Yi aap ndi aap inabu'me piinok, Wonogo menggam tebenak iigak,
Kat kabu'me piinok, Wonage menggenom abu tiyanak aret o.
Yi mendek ndi mendek abok tebenak iigak, Kalik mban tiyanak inarum wonage o.
12 Yi mendek ndi mendek kat mban unde wonage me, Aakumi ineenggi warak eeppiige,
Aap inayuk warak logorak eeppiige, Eeke menggendak o.
Kat mban keenggi omaawi wonage, Yi mendek ndi mendek porogo wonage,
Eeke menggendak me, Aakumi inendage tiyappiige, Yi aap ndi aap inomaawi eeppiige, Eeke menggendak o.
13 Togop aret me, nogoba Ala o. Yogondak, Wa, lombok yokkugwi,
Kat kendage tiyanak mondok iya me, Kalut eekwi, Eeko ogoorik o.
14 An inom, aakumi an napuri yi inom, niniki nen yi mendek ndi mendek ninili yuulik iya negen wokkogoorak yi, nit meek aret niigak kwe, kat wokkiruwok nduk, eerogo pinanggendak o. Yi mendek ndi mendek abok aret kat nen wo'nirage menggendak me, kat kamendek aret wokkogo o.
15 Nit ninombomini maan wonogogwaarak pogom, nit yi, kenegen keegak, aap alik mendek nggiru negen aret wonogo ogoorik o. Ndi, nit nda'nogogurak eyom ari nage ti, inagalu'mak pogom aret wonage me, nit nen ambi eya mbanugun lek aret o.
16 Kaliku ninogoba Ala wae. Kendage mondok alik leenak nogo, tiyappagago logowam kawi wuriyak yi mendek ndi mendek mondok iya lombok kuwak eerogo pi wogoorak yi, abok aret kat nen wo'niragandak kamendek nogo aret pi wogo o.
17 Nogoba Ala o. Aakumi inabut mbangge, it iniki abe paga kiri wogwe iinok, kinikilom inombake, eeke menggendak neenu me, yi mendek ndi mendek kuwak eerogo pi wagarak yi, niniki abe paga ale'nggen logonet, kake pege, ndi, it aakumi kat kapuri yi kunduk, iniki ale'nggen paga inamendek kuwak eerogo pi wogwe iige nagarik, an togon niniki ale'nggen mbake, eeke agarik o.
18 Ninombomini Abarakam, Itak, Iterali, inogoba Kaliku ALA wae. It kapuri iniki nen kake pi woroorak uugwe mbakaarak nogo, mondok-mondok uugwe mbakwi, ndi, Ninogoba Ala kat mban mondok-mondok mukkeren noorak koonggwi, eeko logowak nduk, eeppiige,
19 ndi, an naput Talomo nogo nen, Eerikit aret, mba'nuk iniki aganggen kerek togon, Yogop ee'nu ndogop ee'nu, wone yugu inom, eeko logorak wone inom, wone lengganak inom, nggirik-nggerok porogo logonet eerit nage, o nggwok abe wuriyak an nen yi mendek ndi mendek kuwak eerogo pigirak nogo paga wuke, eeke logowak nduk, eeppege, eeru o,” yinuk, tamban eereegerak.
20 Tamban eeke nagagerik, at Ndawut nen aakumi apit kuwak aago nogo yorage logonet, “Aliku kinogoba Ala endage tiyappogo logonip o,” yorage mbareegi, it aakumi abok nen inombomini inogoba Aliku Ala endage tiyappogo logonet, abu'me tebe yinuk, alut eekwi, inowe endagembogut abu'me tebe yinuk, ayuk wukwi, eereegwaarak.
28 At Ndawut nogo ti, eenggi warak lombok endage mondok tiyanak logonet, eenik nggorek wonagagerik, anggok a'nuk, iniki tayenak logonet, kangge mbareegi, obaane'me aput Talomo aret endagembogut agagerak.
Tidak ada komentar:
Posting Komentar