YOWEN

Mbuku Yowen yi, eebe mbanak pekkaga’lek logonet, aa’nduk pekkoorak yi o.

At Yowen nogo, Ala nen yoge kagak yorage nagagerak kwe, wone yorage kagak tahun mande eereegerak nogo liiru mbanak lek me, nineenggo’lek aret o. Yetut awo nda’naga’lek kagak it aakumi o Peritiya mendek inoweewi inendagembogut logonet, yi o ndi o tebenogo piinok, wone lengganogo yoragak eekwi iigak, wone mbuku yi paga mbanak wonage nogo at Yowen nen aakumi Iterali yorage nagagerak.

At Ala nen yoge kagak yoraga Yowen nen mbuku liiru mbangge logonet, aakumi o Peritiya menggam o kibi alik negen age, wurin alik negen aago wogo logonet, yi mendek ndi mendek yarak pup eerogo nunggwi, eeriyak nogo yorage nagagerak.

Ti eeriyak nogo, ne age yobok Ala wage ti eyom paga aakumi Ala mbake ndak-ndak eekkologolik maluk eeko nogogwaarak kenok, aaninggin mondok alik negen inoba kwippiya woraagin nogo, wakkagak yoragagerak. At Ala nen, “Aakumi inomaluk mbo punuk, iniyokan neya woraawak o,” yinuk, Yowen yoge kenok, at Yowen nen aakumi yorage nagagerak.

Ala nen at apuri maluk eekwi nogo, lek eerogo piinok, ale’nggen inoba piige, inamendek yarak paga inom, ineebe paga inom, obeelom eerogo piige, eeriyak nogo yorage nagagerak.

Wone iya lombok eeriyak Yowen yoreegerak nogo ti, “Komologwe-wologwe tawe inom, aap inanggok inom, elege mbuulogwe inom, inalitak lombok Aberiniki wogoriminggirak inikime logonet, iya eeriyak mendek eeko logogun o,” yinuk, yoreegerak Pasa l 2 ayat 28-29 mbanak ti, Nappiigak pasal 2 ayat 17-21 a’me aret agagerak kenok, liiru mbanak wonage o.
_______________
YOWEN WONE
1 Iterali ineyabu yarak wurin nen lek eerogo nunggugwaarak wone

1 Aliku ALA nen aap Petuwen aput Yowen wone yoge mbareegi, yoragagerak nogo yi aret.

2 “Aap Iterali inoweewi kit yi wae. Wone yokkirage yi, kinaruk konenggo logonip o. Kit aakumi o yime monggotak abok aret yi wae. Kinaruk logonip o. Kit wonogwe yi eyom paga inom, kinombomini wonogogwaarak ti eyom paga inom, yogondak eeke yogobi ambi eereegerak yogwe koneneegutak ilik?

3 Lek aret me, yi arit wage nogo, kinapurilogwe mbininogo yorogo logonip o. Yorogwe kiinok, it kinapurilogwe nen it inapurilogwe kunduk mbininogo yorogwe, Ndi, it nen inapuri peebi ndappiigwi nogo mbininogo yorogwe, Eerit wundi wogo logowak o.

4 Yibila kombogonak yi mendek ndi mendek uwiirogo nunggwi, Nenok, nogwe iigak, it wurin kole nogo mendek woraanuk, ando pereegwaarak nogo uwiirogo nunggwi, Nenok, nogwe iigak, lelembu kombogonak woraanuk, ando pugu nogo uwiirogo nunggwi, Nenok nogwe iigak, yalitom woraanuk, ando pugu nogo uwiirogo nunggwi, Eereegwaarak o.

5 Kit niyo kumili aganaka mendek nengga yi wae. Kineenik a’nuk le yikkologwe, Kit anggur amburu nengga yi wae. Leenggu maakwi, Eeko logonip o. Anggur amburu ngget toolak nunggwi kiigak, kinambeme nen ndinogo nappegaarak me, Kit le yikkologo logonip o.

6 It aakumi ambi mendek mondok inomaawi ineebe ineenggi lingginiyak meek, Ineyak singa eyak kwak, Ineyak singa kooli eyak nggorek kwak, Wogo logonet, o an wonage minggim mondok kwi’nari unggwogogwaarak o.

7 Kwi’nari unggunuk, nageyo anggur yarak abu lek eerogo pugwi, Nageyo wuli nogo obate mbanogo pugwi, Eeppunuk, Agabolo mbelanogo mbo pereegwaarak me, Eno’mbak agabolo mbelanak lan ari kagak mbaganeegwaarak.

8 Togop me, kolaga ambi ogonggelo imbirak awo lambumbiigaarak imbirak iniki kunik nogo, Woronogo punuk kangge kenok, purok yikut eeppunuk, aleenggu maake menggi kwak, Kit leenggu maako logonip o.

9 Gandum ake pi wogwe, anggur amburu ake kilirogo pugwi, eekwi nogo, Aliku ALA awi wurik me nen muk lek agaarak o. Ndi, it aap Ala eebe unde nen Aliku ALA enggaanom paga ake liirogon eeka nogo leenggu maako agaarik o.

10 Yabu yarak nogo maluk age, Nggween nogo abu mbuk aret age, Gandum yarak nogo lek age, Anggur anggen awo yugu nogo mbuk age, Eyo tayitun anggen yugu lek me, amburu tooka’lek wonage, Eekerak wonage agaarik o.

11 Kit aap yabu eeka yi wae. Kiniki puru yogwe, Kit aap anggur awi yaka yi wae. Kinaleenggu maakwi, Eeko logonip o. Yarak anggen kole agaarak nogo, abu lek eerogo pegaarak me, gandum inom, waabuk kwak jelai inom, Lek agaarak paga kiniki wakkologo logonip o.
__________________________
1:6 Wayu 9:8. 1:15 Yet. 13:6
12 Eyo anggur awi yarak abu mbuk age, Eyo wuli muk teebat eerogo pege, Eyo delima inom, apel inom, nggabu inom, yi eyo ndi eyo yarak abok aret mbuk age, Eekerak me, It aakumi inale’nggen abu lek agaarak wonogo agaarik o.

13 Kit aap Ala unde yi wae. Kinayum maluk nibinik mendek yippunuk, kiniki wakkologwe, Kit aap Ala ake warogo wogogo menggam yabu eekwi yi wae. Leenggu maakwi, Eeko logonip o. Gandum anggen yigirik ake puurak inom, anggur amburu toolak ake kiliriyak inom, Kinogoba Ala awi wurik me ambinom pi wogo logogun lek me, Kit an nogoba Ala enggaanom paga yabu eekwi yi, Kinayum maluk nibinik mendek yippunuk, Ala awi wurik me unggwogo logomonggotik, Le yogwe kiigak nogo ambit yumunggup o.

14 Maluk eeka’lek logonet, kinambe mage negen eeppunuk, logonip o, yinuk, yorogwe, Ala alut eeriyak kuwak ari woraawak nduk, yorogwe, Eeko logonip o. It aap kinoweewi kinarum menggaarak inom, It aakumi o yime wonogwe abok aret inom, Kinogoba Aliku Ala awi wurik me kuwak ari wa’nuk, inoone nggwok paga Aliku Ala yoruwak nduk inayonggo piyaanip o.

15 Ne ti nogo ti, aakumi inamineeri ne agan noorak aret me, iya! At Aliku ALA eeriyak eyom muk koorok panggoni wagaarak o. At Omaawi Lombok Menggerak wage logonet, nit aakumi lek eerogo pinanege, Yi mendek ndi mendek mondok lek eerogo pege, Eeriyak eyom aret ari wage agaarik o.

16 Ninigen lo yogwe niigak, ninambi wonok nogwe iigwi, Ninogoba Ala awi wurik me, ninale’nggen yogwe, ndawi lubuk yogwe, eekwi nogo lek age kogwe, Eekoorak nogo lek a?

17 Nggween inikime woloonak lombok me, anggen awi yarak nogo mbuk arit unggwage, Anggen mbanogo kuwak eerogo pogo menggam we aret wonage, Gandum anggen yega’lek mbuk arit unggwegerak me, pogo menggam mi-mi wanggerak wonage, Eerak aret agaarik o.

18 Ninaanggumi mbi abu nen yinggwe-yanggwe agan nogwe, Inagari’ngga mbanogo nenet noorak lek kenok, lembu-tapi ambi me lingga nagak eerit nugwi, Ninandomba kunduk, mbi abu nen inoone nggininu-ngganinu agan nogwe, Eeko agaarik o.

19 Togop me, Kaliku Ala wae. Tapi-ndomba inagari’ngga nenet nogo menggam nogo kani nen wiyanogo pit nage, Yi eyo ndi eyo yabume yarak wonage nogo, kani omoonuk nen nenet nage, Eekerak kenok, Noone nggwok paga yokkege agarik o.

20 Niyo nage menggim abok aret porok yi’nage, Inagari’ngga mbanogo nenet nogo menggam karume time kani nen pup eerogo nengge, Eekerak me, Ndiimbu-nggwiya kunduk, Eeppinanuwak lak, ao, yinuk, kat pekkeego logonet, iniki tat warit nogo agaarik o.

2 Ne Aliku ALA woroorak aberak logorak yoragagerak wone
1 O Tiyon time oone nggwok eeka trompet nogo oone pu eekwi, At abuut alik leenak nogo paga nen punu negen agan nugwi iinok, kuum-keek yogwe, Eeko logonip o. Aliku ALA woroorak ne muk panggoni wage, Koorok aret panggo yegerak wonage, Eekerak me, Aakumi o yime wonogwe abok aret inaganak wako logowak o.

2 Ne ti eyom o mondok apit lombok age logonet, iniki miin eerogo piinet nage, Ndugwi apit eerogo pege kenok, o yumaak eerogo pege, Eerigin o. O kilim nagake logonet, puutpuut kin eerogo pit nage menggi kwak, Ne ti eyom paga wim eeka inomaawi ambik lombok ineebe apit aago o aa’nduk nen wogwe inigen iyoolik nogo mendek wogwe, Ndi, peebi nen togop ambi wogwe iyaagun lek nogo mendek wogwe, Eekwi iyaagun o.

3 It ti wogwe iigak, inaame nggwe yi mendek ndi mendek kani nenet nage, Inambokan kani omoonuk wunuk agan wage, Eerigin o. It inaame nggwe o nggween ti, o Eren kwak kogwe kwe, Wogo logonet, ambi mbo nagun lek, tigitogon lek eerogo pit woraagun me, Inambokan karu eerilek kwak aremenggerak kaagun o.

4 It inenete ti, kuda kwak me, kuda aakumi kwi’ndak mbe agan wogo mengga kwak wogwe,

5 Nggweendo wim eeka iyogobit oone mbogu-mbogu agan wogo mengga kwak wogwe, Tekani nengge-nengge nenet nage menggi kwak, Aap kalu-kalu wim eeriyak nduk ndegen-ndegen aago wogo mengga kwak, It ti, puut-puut paga ku’mboka’mbo agan wogwe, Eerugun me,
6 Yi aakumi ndi aakumi inigen iinok, inaganak ngginuk ari, Inagap nggilaame nik togon eerogo piige, Eerigin o.

7 It aap wim eeka nen mbe agan nogo mengga kwak, mbe agan wogwe, It aap ineegin warak kwak pak wurik paga mbo lagit wogwe, Agi-ogu aga’lek tu ambit ti paga mban lo agan wogwe, Eerugun o.

8 It tu pelen-pelen naga’lek tu inalitak koonak mban wogwe, Inaru non mbanak kagak poloninuk wogwe, Oolo mbannaga’lek mondok kunik-kunik aret wogwe, Eeko agaarik o.

9 Aberak lek me, o kota oba kwi’- nogwe, Yugum pak wurik paga lagit nanuk ambime wanggak eerit inawi wurik me unggwit nogwe Aap kote kiraaka kwak tu pugagi mbanak me nen unggwit nogwe, Eeko agaarik o.

10 It unggwi nogwe iigak, nggween ndipuk eeke, Mbogut nuk-nuk eeke, Oonegen inom, tut inom, yumaak eerogo pege, Laaluguragan abinak eeke menggerak nogo lek age, Eeke agaarik o.
11 Aliku ALA awuri ineegin warak inaame nggwe a’nuk oone ngguurubu kwak wone lengganogo yorenet nage, At awuri aap wim eeka ineebe ambik aago nogo yorage, It at yorage konenggwi nogo, inomaawi ambik aret me yorage, Eeke agaarik o. Aliku ALA woroorak ne ti, mondok iya aakumi inamineeri ne agan nage nogo mendek aret me, Aap ta nen ko wappunuk logorak mbakop? Lek aret o.

Inomaluk abet aret mbo puurak yoragagerak wone
12 Aliku ALA nen ari logonet, Ne yogondak yi aret inambe mage negen eeppunuk leenggu maakwi, Iniki wakkologwe, eeko logonet, Iniki mbere lek ambit eeppunuk, iniyokan yungguninuk, an neya wogo logowak o, Yinuk, yegerak o.

13-14 Togop me, kinambogoyum nibinogo patiyak ti mage o. Ata, kiniki wakkologo logonip o. At Ala ti, oone yanggorogon yo’nirage, ninabuwa mbake, Iniki aan aganggenggwi lek liippunuk eeppinanege, Iniki kunik lombok ee’ninabit unggwage, Eekwi onggo aaninggin ninoba pinanege logonet, Yi eeppigi ao, yinuk, mbake, Eeke menggerak me, At ena koonogo pekkiige logomenggerik, kinabuwa nen ale’- nggen nggwok lombok kinoba pinagage logonet, Gandum anggen yigirik ake puurak inom, anggur amburu ake kiliriyak inom, Kinogoba Aliku Ala nen wokkirage kagak eerukwak, Kinomaluk mbo punuk, kiniyokan yungguninuk kinogoba Aliku Ala owagam wa’nip o.

15 O Tiyon time oone nggwok eeka trompet nogo oone pu eekwi, Maluk eeka’lek kinambe mage negen eeppunuk logonip o, yinuk, yorogwe, Ala alut eeriyak kuwak ari woraawak nduk, yorogwe, Eeko logonip o.

16 Aakumi yi abok aret kuwak eerogo piigwi, Kuwak eeppiinok, Ala inikilom mbaruwak nduk nggomoorogo piigwi, It aap inoweewi inom, elege mbuulogwe inom, elege ngget ndarak awo inelak nunggwi inom, abok aret kuwak eerogo piigwi, Eeko logonip o. It aap tawe inakuwi inom lambumbiyoorak nogo inago ogoorak me nen wundi wogwe, It komologwe tawe aap inom lambumbiyoorak nogo inago ogoorak me nen wundi wogwe, Eeruwak o.

17 It aap Aliku ALA enggaanom paga eeko menggaarak Ala unde nogo, Ake warogo wogogak ogobakkigirik kagak, Ala awi wurik me tu unggwogo menggam kagak, Oolo time logonet, leenggu maakwi, It nen, Kaliku ALA wae. Keyate kwak kapuri kiniki kundugu nogo, aakumi inenggela’me wonogwe iinok, Inabok nggarik-nggarek agan nugwi, Miyuk-meya eerogo piigwi, It inogoba Ala nggeeme wonage o? yinuk, it-it agan nugwi, Eekwi iyo, Kapuri inaana’le mbangge logot o, yinuk, yokkugwi, Eeruwak o.

Inomaluk mbo pugwi iinok eeppiyoorak yoragagerak wone
18 Ti eekwi iinok, at Aliku ALA anggween maluk eerogo pemenggaarak nogo kage logomenggerik, Yi eerogo pegaarak neebi a, yinuk, mbake, At apuri inabuwa nggwok lombok mbake, Eerigin o.

19 Mbake logomenggerik, at Aliku ALA nen wone onggo yorage logonet, Yogondak an nen gandum inom, anggur amburu ngget toolak inom, eyo tayitun amburu inom, Wokkiraminggirak nunggwi paga ndonggoppinagage kaamunggup o. Kit nen yi aakumi ndi aakumi inenggela’me nugwi kiinok, It aap maluk mendek nugwi yi o, yinuk, ambinom yokkirogo logowak nduk eerogo pinagagin lek o.

20 It wim eeka ambik aago o omarip paga pa’nggwe nen woramenggaarak nogo ti, kit wonogwe me nen wumbiinok, Pelek iranet o karume eerilek paga nda time piya nage logonet, Inaa’nduk nogwe nogo ti, niyo yenggenak laut oonegen lagi wage menggim pa’nggwe wonage me nogome nappiige, Ndi, inambokan age wobok nogwe nogo ti, niyo yenggenak laut oonegen kilu yi nage menggim pa’nggwe wonage me nogome nappiige, Eerigin o. Eeke neenok, Ineebe kambit namenggaarak nogo pili ogwe, Inobari ndi wuke, Eerigin o, yinuk, yegerak me, yokkiragi o. At Aliku ALA nen abet aret mondok iya tit eereegerak me,

21 Kat nggween yi wae. Kagabiti mbariyak ti mage o. Ata, kale’ nggen mbake, ndawi lubuk ari, eeke logot o. Aliku ALA nen abet aret mondok iya tit eereegerak o!

22 Kit ndiimbu-nggwiya yi wae. Iri’ngga mbanogo nenet nogo monggo’nom mili lagangge, Yi eyo ndi eyo anggen yit nage, Eyo wuli inom, eyo anggur inom, kineenggi warak logorak anggen luurogo yege, Eerigin me, Kinagabiti mbarugup o.

23-24 Kit aakumi o Tiyon wonogwe yi wae. Kinogoba Aliku Ala nen a’me nggelok eeppinagage logonet, Aa’nduk eereegi kwak, o kibi wonagaatik mayu nappi wage, O loongge nagaatik, mayu wuppi wage, Eeppinagagin me, Gandum agabolo mbelanggo menggam
______________________________________________________________________
2:4-5 Wayu 9:7-9. 2:10 Wayu 8:12 2:11 Wayu 6:17
anggen mban yagabit age, Anggur amburu mburunogo tooko menggam anggur amburu inom, eyo tayitun amburu inom, Eno korok yinuk, kilu-kilu wangge, Eerigin me, Kiniki ale’nggen mbakwi, Kinogoba Aliku Ala eeppinagamenggerak ti paga ndawi lubuk yogwe, Eeko logomunggup o.

25 Aliku ALA nen ari logonet, An nawuri wim eeka ambik aago inenggela’me nappiya woraminggirak yibila inom, wurin inom, lelembu inom, yalitom inom, nogo nen Inamindik-inamendek uwiirogo nenet nogwe iigak, yi tahun ndi tahun eereegerak nogo, an nen obaane’me awi yagiyaagin o.

26 Ti eerogo piminggirak paga yi mendek ndi mendek ka’lekpa’let aremenggerak me, nonggo logonet, ndonggoppiyaagin o. It liippuwak nduk, an iya tit eerubok mendek eeke neenok, inogoba Naliku Ala an nendage tiyappogo logogun me, It an napuri ti, ambinom inenggali mbakak nugu logogun mondok lek o.

27 Ti eeke neenok, an it Iterali mendek inenggela’me wonage, Ndi, inogoba alik ambi wonage lek inogoba Naliku Ala nalik aret wonage, Eeke nogo ineenu arugun o. It an napuri ti, ambinom inenggali mbakak nugu logogun mondok lek o, yinuk, yegerak me, yokkiragi o.

Ne Ala woroorak eyom panggoni wage kagak ariyak wone
28 Ti eeppege logominggirik, yi aakumi ndi aakumi abok aret Naberiniki inoba wuppi woraagin o. Wuppi wage logominggirik, inapuri wologwe-komologwe yorage neegak, an ari nogo yoranet nugwi, Inogobamini inanggwok nen inabi kogwe, Inapuri wologwe tawe nen inabinggaanggo kogwe, Eeko logogun o.

29 Peebi ti eyom paga it an nayeloman mini kumi inom, aap inom, it kunduk abok aret Naberiniki inoba wuppi woraagin o.

30 Agi mbogut paga nen tam warak mendek eeke, Ogu nggween paga nen eerubok mendek eeke, Eeke logonet, Inamiya inom, kani omoonuk inom, ka’luk aagi inom, eerigin o.

31 An kinogoba Naliku Ala woroorak eyom pi wa’nakwi, Aakumi inamineeri ne agan nage, Eekwi iigak, Oonegen apit age, tut inamiya negen age, eerigin o.

32 Eeke mbaremenggi, aap ambi nen, Kaliku ALA wae, yinuk, an nendage kunogo yo’neremenggerak kenok, agap ndarigin o. It ando teppiyamenggaarak puut Tiyon wonogwe inom, o Yerutalem wonogwe inom, Naliku ALA nen leenogo piyaagin o, Yinuk, Naliku ALA nen yereegirak nogo ndak-ndak agap ndarigin o, yinuk, yegerak me, yokkiragi o.

3 Iterali ineebi mbakwi nogo aaninggin inoba piyoorak wone
1 At Aliku ALA nen ari logonet, Ne ti ariyak age eyom paga o Yerutalem inom, Yekura inom, aa’nduk obeelom wonogogwa kwak eerogo piige logonet,

2-3 It yi aakumi ndi aakumi nen an napuri nogo aakumi inanebunu lombok inenggela’me mak eerogo piinok, Nanggween napuri wogoragagirak nogo tumbukkologwe, Ninayeloman mini logorak ta age kaamun? yinuk, yugum wakkogwe, Iterali inapuri wologwe nogo terak wuginakak aruwak nduk, eerogo piigwi,
_________________________________________________________________________
2:31 Mat. 24:29, Mrk. 13:24-25, Luk. 21:25, Wayu 6:12-13 2:28-32 Nap. 2:17-21
Anggur amburu neenok, kumili kunuwak nduk Iterali inapuri komologwe nogo anggur amburu onggo mbanogo wogorogwe, Eeko nogogwaarak me, Yi aakumi ndi aakumi abok aret kuwak eerogo piinok, wogoren o Yotapat Kobappaga piya wangge logominggirik, It an neyate kwak napuri Iterali eeppiigo nogogwaarak paga inawone mbambunuk, eereegwaarak onggo aaninggin inoba kwippiyaagin o.

4 An ngge eeppiigirak paga it Tirut mendek inom, Tiron mendek inom, o Pilitin paga menggaarak abok aret inom, nogo nen an ninom wone yuurak eeko agaarik? An ngge eekirak me, onggo eeppaniyak nduk eeko agaarik o? An ambi eekirak paga eeppaniyak mbakwi iinok, it eeko nogogwaarak onggo an logonuk lek mbet-mbet aret melak togon inoba kwippiyaagin o.

5 It aakumi ti nen aret an namendek mbuti emas inom, namendek mbuti perak inom, namindik-namendek abu abe onggo mondok iya lombok nogo inom, wonok it inagugi ayuk wurit nogo menggam pit nogwe,

6 it aakumi o Yekura menggaarak inom, o Yerutalem menggaarak inom, Iname logorak lek o nda time logorak nappiyaawok, mba’nuk, it aakumi Yunani mendek inoba kuninakwi, eereegwaarak me yagi o.

7 Napuri aakumi inoba kuninabeegwaarak inenggela’me wonogwe me time nen wogoren piya wage logominggirik, it eeppiyareegwaarak onggo ndak-ndak yogondak inoba kwippiige neyaagun o.
8 It inapuri wologwekomologwe nogo, aakumi Yekura mendek inoba kuniminggirak me, ti’nuk, it Yekura mendek nen inapuri ti, waganogo aakumi Teba mendek o nda time wonogwe nogo inoba kuninabugun o, yinuk, Aliku ALA nen aret yegerak me, yagi o.

Ala apuri ale’nggen inoba piyoorak wone
9 Wone yi, yi aakumi ndi aakumi yoranet noorak nogo yi aret. Wim eeriyak nduk, li’luk eeppunuk wonogwe, It aap wim wakaa’ngget abok aret mi’nogwe, Eeko logonip o. It aap wim eeka abok aret panggo yi wa’nuk, wim eeri unggwogwe,

10 Yabu tege wooluwak ngget kenenggwi, Kinowaruk nogo wooluwak paga kunggwi, It aap ineebe ndeyak mendek nen, Nit wim wakaa’ngget aret aruwi o, yinuk, yogwe,

11 Yi aakumi ndi aakumi o ilin-ilin wonogwe abok aret mbet-mbet wogo logomenggaarik, o kobappaga time kuwak eeri wogwe, Eeko logowak nduk, Yoranet nogo logonip o. Kaliku ALA wae. Kawuri wim eeka wogoren mbet wura mok o.

12 O Yotabat Kobappaga time an kwi’na’nuk, Aakumi inanebunu lombok o ilinilin nen kuwak ari woramenggaarak nogo inawone mbanogo inowak loonigin me, Aakumi inanebunu lombok mi’nogwe, Mi’na’nuk o Yotabat Kobappaga time ari wogwe, Eeruwak o.

13 Anggur anggen aambiranggo menggam abu yagabit age, Amburu tooko menggam eno korok yinuk, kilu-kilu wangge, Eeke ti kwak, It aakumi maluk mondok iya lombok eerit nogwe me, Anggen abu kole agaarak nogo mbaniyak nduk paloowi yomonogo nappugwi,
Anggur anggen aambirani wogwe, Eeruwak nduk, yoret, yegerak o.
_______________________________________________________________________
3:4-8 Yet. 23:1-18, Yeti. 26:1-28:26, Amot 1:9-10, Tak. 9:1-4, Mat. 11:21-22, Luk. 10:13-14 3:10 Yet. 2:4, Mika 4:3 3:13 Wayu 14:14-16, 19-20, 19:15

14 Aliku ALA nen aakumi inowak looniyak ne abu aret koorok panggoni wagaarak me, Inowak loonggo logowam kobappaga nogome aakumi ambik, ineebe apit aago kuwak eeri woraagun o.
15 Oonegen inom, tut inom, abinak lek age, Laaluguragan abok aret inabi’nak nogo lek age, Eerigin o.
16 Aliku ALA abuut Tiyon paga nen singa oone nggwok ari menggi kwak oone nggwok ari, O ngguurubu eeke menggi kwak o Yerutalem nen oone ari, Eeke kenok, Mbogut-nggween na’ndo-wa’ndo eerigin kwe, At Aliku ALA perak, apuri nobarogo piinok wonage, It Iterali mendek yugum pak negen wurogo piinok wonage, Eerigin o.

17 Aliku ALA nen ari logonet, Togop eeke neenok, it nen Naliku inogoba Ala an nogo, nabuut alik leenak Tiyon paga minggirak ineenu arugun o. Ndi, Yerutalem ti, o abu alik leenak lombok arigin me, It aakumi inambik nen o time ambinom tebenggola wogo logogun mondok lek aret o.

18 Ne ti eyom paga puut-puut yabume eyo anggur amburu nggi-nggi wambit nage, Ndi, puut-puut teberogon inaanggumi inagari’ngga abe mban mbanogo nenet nugwi paga inelak amburu tene-tene wambit nage, O Yekura nggelok-nggobok me abok aret niyo nage nogo porok yaga’lek nage mban wonage, An nawi wurik me nen niyo eneeri kila-kila wungge logonet, o Titim Kobappaga time miin eerogo pit nage, Eeke logogin o.

19 Togop eerigin kwe, it Metit mendek inom, Erom mendek inom, nen inogogumbuk logonet, It Yekura mendek maluk eeppiinet nogwe, It Yekura mendek maluk eeka’- lek iigak, inanggween paga inamiya kilirogo piinet nogwe, Eeko nogogwaarak paga O Metit time yi oone ndi oone lek age, Ndi, o Erom time eerilek karume aret age, Eerigin o.

20 It Yekura mendek nen inanggween Yekura paga mondok-mondok wonogwe, Inagota Yerutalem wonogwe iigak, nda’narit wundi wogwe, Eeko logogun o,

21 Ndi, it nen maluk eeppiigo nogogwaarak an onggo eeppiiga’lek nogo, ti eyom paga eeppiige logogin o, yinuk, yegerak me, yokkiragi o. Aliku ALA ti, o Tiyon mondokmondok logogin o,” yinuk, wone yoragagerak ti aret.
_____________
3:16 Amot 1:2