Mika Wone Mbuku Mika yi, eebe mbanak pekkaga’lek logonet, aa’nduk pekkoorak yi o.
At Ala nen yoge kagak yoraga Mika nogo, awi alom o Yekura aakumi Iterali wone lengganogo yorogo menggam o ame pa’nggwe nogome logonet, it Yekura mendek wone yorage nagagerak. At Yetaya wonage logonet, yorage nagagerak ti eyom paga at Mika kunduk yorage nagagerak. At nen aakumi Yekura mendek yorage logonet, “Kit kinoreewi inabuwa mbaka’lek maluk eerogo piinet nogwe paga Ala nen aaninggin kinoba kwippinagagin o,” yinuk, yorage, at Amot nen it aakumi Iterali mendek o omarip paga pa’nggwe wonogwe yorage nagagerak nogo ndak-ndak, “Kit aakumi o Yekura wonogwe nogo aaninggin kit kinoba kwippinagagin o,” yinuk, yorage, at Mika wone yorage logonet, peebi eeriyak iniki lunik wonogwe nogo, kin paga yorage, eeke nagagerak. At Mika nen yorage nagagerak mbuku yi paga liippuurak nogo yi aret.
Ambi, peebi Ala nen aakumi nggween paga wonogwe abok aret at abu’me piinok, ndegeninake kagak inale’nggen logorak wone yorage (4:1-4), • Ambi, at Ndawut ombooluk paga nen ambi kin age logomenggerik, aakumi o Yekura menggaarak iniki ugun tayenak logowak nduk, eerogo piya woroorak wone yorage (5:2-4), eereegerak. Eeko logorak it aap Ala nen yorage kagak Iterali yorogo nogogwaarak Pasal 6 ayat 8 paga mbanak wonage nogo yi aret: “Nit eeko logorak ninombake nogo ti, a’me nggelok eeppiinet nugwi, aakumi inabuwa mbako logorak ninikilom mbakwi, ndi, niniki tebeppatinuk ninogoba Ala mugurok nogwe, eeko logorak ninombake nogo ti aret o,” yinuk, yorogo nogogwaarak ti aret.
______________________
MIKA WONE
1
1 Aap Yotam kunduk, Akat kunduk, Kitikiya kunduk, it Yekura mendek inoweewi inendagembogut a’nuk, wone lengganogo yoragak eekwi iigak, o Tamariya inom, kota Yerutalem inom, eeppuurak nogo, Aliku ALA nen aap o Mereyet mendek Mika nogo, abi paga yoge nagagerak nogo yi aret.
O Tamariya inom, Yerutalem inom, eeppiyoorak wone
2 At Aliku kinogoba Ala awi alik leenak menggim logonet, “Ndogop eekwi kiigirak o,” yinuk, yokkiraawak nduk, Kit yi aakumi ndi aakumi abok aret yi wae. Kinaruk konenggwi, O nggween inom, o nggween paga wonogwe inom, abok aret yi wae. Kinaruk liirogon konenggwi, Eeko logonip o.
3 At Aliku ALA nogo abet aret at menggim nen wundi wage, Wambi wa’nuk, puut-puut paga iyok pit wage, Eeke agaarik o.
4 Kundali kani nen tigi-tigi eerogo pege menggi kwak, Puut-puut paga nen niyo taga-taga wambit nage menggi kwak, At iyok pit nage kagak, puutpuut amburu a’nuk, taga-taga wambit nage, Aluk-aluk nggogu-nggogu wambit wage, Eeke agaarik o.
5 Ti apit eeke nogo ti, at Yakup nen Ala wone taganogo pereegerak paga, Iterali paga wiganak inomaluk paga, aret eeke agaarik o. At Yakup nen Ala wone taganogo pege menggim nogo ngge o? Lek o. O Tamariya aret nogo lek a? Ndi, it Yekura mendek inomaluk eeko menggam tiyarogon nogo ngge o? Lek o. O kota Yerutalem aret nogo lek a?
6 “Togop aret me, an nen o Tamariya yigirik-noonom eerogo pege, Eyo anggur yariyak negen eerogo pege, It inayugum langgunogo o kobappaga yagabit eerogo mbo wuppege, At anggween alom wurabak nogo, kin eerogo pit nage, Eerigin o.
7 Inagugiwak nogo yigirogo pege, Inagugi awi wurik me, kumi eeginako logonet, onggo pugu time wonage nogo, kani kunogo pege, Inagugi ogut eerogo pugu nogo, kalenak-pugunik eerogo pege, Ndi, kumi wurinako logonet, onggo pugu nogo abok aret kuwak eerogo pegak eereegwaarak me, Aap kumi eeginako logonet, onggo pugu nogo ti, ti mendek eeko logonet, wogorogo logowak nduk, teppiige, Eerigin o,” yinuk, Aliku ALA nen aret yegerak me, yokkiragi o.
Yekura Yerutalem imbirak eeppiyoorak paga le yereegerak wone
1:1 2End. 15:32-38, 16:1-20, 18:1-20:21, 2Mbin. 27:1-7, 28:1-32:33
8 Togop aret eerigin me, an niniki puru ari logonet, leenggu maake, Niyogogut yum nggonenogo mbo punuk, nayum yirik lek nagap mbelanak nage, Mba’ngge ku agan nege menggi kwak, towe wu oone agan nege menggi kwak, an togop aret nege, Eerigin o.
9 It Tamariya mendek inawin nogo obeelom aga’lek it Yekura mendek inoba lenggennari nage, An mendek wonogo menggam o Yerutalem nogome tu unggwi nogo menggam paga muk ari nage, eekerak wonage agaarik o.
10 Wone ti, ninom wim mbanak o Nggat wonogwe nogo yorogwe, Inigen iigak le yogwe, Eeriyak mage o. Ndi, o Mbet-Le-Apera time liirubu paga lagak-mbagak yogo logonip o.
11 Kit o Tapit monggotak yi wae. O nda wokkiren nogwe iigak, kinagap mbelanak kinenggali mbakak namunggup o. It o Taanan menggaarak nogo, inawi kota nen wundi woroorak inagabiti mbarugun o. It aakumi o Mbet-Kayeten wonogwe nogo nen le yogwe konenggwi kenok, Time kunduk nineebe op logorak lek kogo o, yinuk, mbarumunggup o.
12 Aliku ALA nen maluk eeppiyoorak o Yerutalem tu unggwi wogo menggam muk ari wagaarak wonage me, It o Marot menggaarak nen, Yeenggwa niraawak lak, ao, yinuk, iniki lunik wonogo agaarik o.
13 Kit Lakit monggotak yi wae. Iterali maluk eerit nogwe iinok, kit iyaalok pigaganeegutak paga O kota Tiyon Aagaluk nogo maluk eeke mamunggolagagerak me, Kinaguda nggweendo wim eeka nogo paga keele mbarenogo pinip o.
14 Togop aret me, kit Yekura mendek yi wae. It kota Moreteyet Nggat wonogwe nogo peebi iigo logomunggup lek me, “Kiniki yungguppegak nagup o,” yinuk, kinamendek wogoraanip o. It aakumi o kota Akitip wonogwe nogo nen it Iterali inoweewi inendagembogut yeenggwaaraagun lek inambokan laganugun o.
15 Kit aakumi o Mareteya monggotak yi wae. At Ala nen aap ambi tebenogo pinagawak nduk nappi woraagin me, Iterali inoweewi inendage tiyanak nogo, ndo endage Arulam nogome kumaa’nari nagun o.
16 Kinapuri inabuwa nen le yogo logonet, kineeruwak-kinamboro puluk ko eerogo mbanggwi, Kinapuri mbo pinaganuk keele maageren mbo piya nagun me, Towe wam pili nengga eeruwak lek puluk ko aago kwak kineeruwak togop aret eerogo mbanggologwe, eeko logonip o.
2 Aap tebenogo piigwi nogo yoragagerak wone
1 It aakumi maluk eeriyak koonogo pugwi, It nogo yogo menggam windak logonet, “Maluk ndogop eeko logowok o,” yinuk, koonggwi, Eeppunuk, O kilim nagake kagak, inayuk warak me, eebe aret eeko menggaarak ti iya me, inabuwa o.
2 It nen aakumi ineyabu eerak uugwe mba’nuk kologwe, Inawi wurik uugwe mba’nuk tebenggologwe, Inawi wurik inom, inoreewi ineyate pugu inom, ndinggologwe, Eeko menggaarak.
3 Togop aret eeko menggaarak me, Aliku ALA nen ari logonet, “An nen it aakumi yi, maluk eerogo piyoorak koonogo pege me, inoba kwippiige neegak, kole mbaganggwi, Ne ti, maluk eerogo piyoorak eyom aret me, An iya! mbakak mbaganggwi, Eeriyak meek aret kaagun o.
4 Ne ti eyom paga it aakumi nen, Op togon eeppinagagi, yinuk, yorogo logogun o. Nineebe lek eerogo pinanege, ninanggween mbanogo wogorage, Ndinggolage nagagerik, it aap tebenogo pinanugwi nogo wogorage, eereegerak o, Yinuk, yogwe nogo inomaani mbanggo logonet, Kayik a! yinuk, le ndawi paga inanep pogo logogun o,” yinuk, Aliku ALA nen yegerak me, yokkiragi o.
5 Togop me, kit Aliku ALA apuri kinenggela’me it ambi nen yugum paga wakkanuk, nggween kuli mbanogo wokkiroorak lek aret kaamunggup o.
6 “Nit ninenggali eerogo pinaniyak lek me, Ndogop eerigin o, yinuk, it yoraga nen, Ala ndogop yegerak o, yinuk, yo’nirage, Ala nen, Ndogop eeppinagagin, yegerak o, yinuk, yo’nirage, Eeriyak mage o,” Yinuk, yogo menggaarak.
7 Yakup paga wiganak kit yi wae. “Aliku ALA iniki liippega’lek anini nen perak togon eeppiige, At togoti mendek eeppiige, eeke menggerak o,” yinuk, yuurak op mbakop? “Aap ambit ambi iniki abe koonak logonet, obeelom eerit nage nogo nen, Ala wone ti, obeelom aret o, yinuk, mbake menggerak.
8 Togop kwe, it inom wim mbanak nen eeko mengga kwak, an napuri inoweewi nogo mi’nogo logonet, Inawuri nen wim eeppunuk, iniki ugun ale’nggen paga iname wogwe me, inayum abe nggorek nogo nggorok togon eerogo kologwe,
9 It an napuri inakuwi inawi iniki kundugu wonogwe iigak kwe, piyanogo wumbiigwi, It inapuri mbuulogwe nale’nggen inoba piyoorak mbake neegak kwe, kologwe iyo, mondokmondok non mbanogo piigwi, Eeko agaarik o.
10 It o yime it yonggonggologo logorak lek maluk eerogo pereegwaarak obeelom eerogo pigin lek pulunik aret me, mi’na’nuk nayok a!
11 Aap pilit pugunogo inambokan lagangga ambi nen wage logomenggerik, ari logonet, An perak, anggur amburu inom, kumili aganaka amburu inom, ndonggok togon nonggo logorak yokkirage logogin o, Yinuk, yoraga nogo mendek it inobam aret me, inenggela’me logonet yoragak yuurak op aret o,” yinuk, yegerak me, yokkiragi o.
Inagap ndariyak koonogo pereegerak wone
12 “It Yakup mendek ti, an nen abet aret kuwak eerogo piige, Iterali mendek yumbunik nogo, abet aret ambit me piya wage, Eeke logominggirik, Ndomba kuwak eerogo anggenogona piigo mengga kwak piya wage, Ndomba kuwak aago inagari’- ngga nenet nogo menggam wogoren nugu mengga kwak, wogoren nege, Eeriminggirak me, O time aakumi mban yebet aago logogun o.
13 Aap yugum pak langgungga nogo kwak a’nuk, naa’nduk tu pak langgunogo punuk, wundi nage, Inowe nendagembogut Naliku ALA naa’nduk a’nuk nage neegak, nawuri nambokan wogwe, Eerugun o,” yinuk, Aliku ALA nen aret yegerak me, yokkiragi o, yoragagirak.
3 Inarum waka inom, pilit yaga inom, mberiragagerak wone
1 Ti yorage nagagirik, wone ambinom an yorage logonet, “It Yakup mendek inoweewi kit yi wae. It Iterali mendek inarum monggotak kit yi wae. Kit a’me nggelok eeko logorak kineenu ariyak op kwe,
2 Obeelom eeriyak kineebi mbakwi, maluk eeriyak kinikilom mbakwi, eeko logonet, An mendek ineenik ngge-ngge inagabolo mbelanogo piigwi negen eekwi, Inowak kalenak-pugunik eerogo piigwi kwak eekwi, Eeko monggotak o.
3 An nowe-nawot inagabolo mbelanogo piigwi, inowak kalenogo piigwi, Wam kuwalina mbanogo lako mengga kwak, Wam enggaanggum nggariknggarek eerogo togolowa’na lako mengga kwak, It ineebe togop aret eerogo piinok, nonggo monggotak o,” yinuk, yoragagirak.
4 “Yeenggwa niru o,” yinuk, Aliku ALA yoriyak eyom ari woramenggerak yorumonggotak kwe, at nen kinoone konengge, Maluk eeko monggotak me, ne ti eyom paga kit tamban eekwi nogo, at etenggen kumaappatinuk wonage, Eeke logogin o.
5 Aliku ALA nen ari logonet, “It aakumi nen, Ndogop eeke kaamunggup o, yinuk, an napuri iniki nomonogo piya nogwe nogo perak, Inambi wogorogwe iinok, Kiniki tayenak ugun aret logomunggup o, yinuk, yorogwe, Ndi, wogoraga’lek iinok, Kinawim nen kinoori unggwi woraagun o, yinuk, yorogwe, Eeko menggaarak me,
6 Inabinggaanggo ambinom kogwe iyo, o apit kwak eerogo piige, Tili paganemenggaarak kwe, irip narogo piige, Eeriyak eyom panggoni woraagin o. Ndogop eeke kaamunggup o, yinuk, yaga nogo oonegen kilu yi nage logonet, o yumaak age menggi kwak, eerogo piinet unggwage, O liingge kwe, yipit-apit eerogo piige menggi kwak eerogo piige, Eerigin me,
7 It inabinggaanggo paga yoraga nogo inenggali age, Tili pagangga nogo inagabiti age, Eeko logonet, Ala yoremenggaarak nogo onggo yoraga’lek kenok, inuut kuru agan wangge logogin o,” yinuk, yegerak me, yokkiragi o.
8 Togop kwe, an perak, it Yakup mendek Ala wone taganogo pit nugwi, It Iterali mendek maluk eerit nugwi, eekwi nogo Inaruk wake logokit nduk, Aliku ALA Aberiniki paga nomaawi lombok eerogo panege, A’me nggelok eeppiinet nage logonet, nagabiti lek yoranet nage logokit nduk, eeppanege, Eeke agaarik o.
9 It aap Yakup paga wiganak inoweewi kit yi wae. It Iterali paga wiganak inarum monggotak yi wae. Wone yi, kinaruk konenggo logonip o. Aakumi a’me nggelok eeppiinet noorak wone kineebi mbakwi, Obeelom eerit noorak wone nogo yaga-taga eerogo pit nogwe,
10 Aakumi maluk eeka’lek ugun iigak kwe, inoorogo piinet nogo logonet, o Tiyon wukwi, Aakumi inawu yowaarogo o kota Yerutalem wukwi,
11 Wu kolaawok nduk, maluk eekaarak nogo yiluk-yiluk inowak loonggwi, Onggo wokkiraawak nduk, Ala unde nen wone mamunirogwe, Wu waawok nduk, Nabinggaanggo paga, Ndogop eekkinake kagaarak o, yinuk, yorogwe, Eeko monggotak kwe, Aliku ALA endage kumbunuk kinoone yogo logonet, “Aliku ALA ninenggela’me wonage nogo lek a? Wonage aret me, Maluk eeppinanigin mondok lek aret o,” yinuk, yogo monggotak o.
12 Togop aret yogo monggotak me, o Tiyon ti, yabu kabunogo nippit nogo mengga kwak age, O kota Yerutalem ti, nggween yigirik-noonom eerak logonak negen age, Ndi, puut Ala awi wurik menggim ti, alok-palok mban kunogo pege, Eerigin o.
4 Aakumi iniki ugun tayenak menggam wone
1 O age yobok paga Aliku ALA awi puut paga wurik wonage nogo, Yi puut ndi puut tiyarogon wonogwe ti, tebenak kagak, puut ti mban tiyanak wonage, Puut-puut mbuulogwe teberogon wonage nogo enggela’me puut ti mban tiyak ari, Eerigin o, yinuk, koonogo pigin me, Yi aakumi ndi aakumi puut ti paga niyo nage mban menggi kwak togop aret unggwi wogo logogun o.
2 Aakumi inanebunu lombok apit aret wogo logomenggaarik, yogo logonet, “Eeko logorak wone yugu nogo o Tiyon nen wundi wage, Aliku ALA ari menggerak nogo o Yerutalem nen wundi wage, Eeke me, Aliku ALA eerit nage menggerak nogo, nit ndak-ndak eerit nogo logorak mamunninake logowak nduk, Nit Aliku ALA abuut paga lagi nogwe, Yakup ogoba Ala awi wurik me unggwi nogwe, Eeriyak me, lagi nawok o,” yinuk, yogo logogun o.
3 Yi aakumi ndi aakumi inawone mbanogo inowak loongge, Aakumi inanebunu lombok nda koorok inendage warak wonogwe nogo, Wone inoba aremenggaarak kenok, amburu mbangge, Eerigin me, Inawooluwak nogo yabu tege eerogo pugwi, Aap inooka ndut nogo tawi pooka eerogo pugwi, Eerugun o. Aakumi ambi mendek nen aakumi alik mendek tebenogo piyaawok nduk, inawooluwak waganggwi, Wim eekak yuurak inawuri mamunirogwe, Eerugun mondok lek o.
4 Inalitik-inalitak inageyo anggur alome kwi’ndak wonogwe, Inageyo wuli alome iniki ugun tayenak wonogwe, Eekwi iigak, “Aap ambi nen inogut nggigik yuwak nduk, eeppiyaagin lek aret o,” yinuk, At Omaawi Lombok Menggerak Aliku ALA nen aret yegerak me, yagi o.
5 Aakumi inanebunu lombok inagugi inendage tiyappunuk eerit nogo logogun kwe, Nit perak, ninogoba Aliku Ala endage tiyappunuk, mondokmondok eerit nogo logogun o.
Iterali mbo piya nogogwam nen wogoren woroorak wone
3:12 Yer. 26:18 4:3 Yet. 2:4, Yow. 3:10 4:4 Tak. 3:10
6 Aliku ALA nen ari logonet, “Ne ti eyom paga an nen it inendop yilugu negen nogo kuwak eerogo piya wage, It mbo piya nogogwaarak wonogwe nogo, ambit me wonggonogo piya wage, Aaninggin-paaninggin inoba piyareegirak nogo, kuwak eerogo piya wage, Eerigin o.
7 It inendop yilugu negen eegu yumbunik wonogwe nogo, inendop abe awi wiganggo logowak nduk, eerogo piige, Ndi, it aakumi wumbiyareegwaarak nogo, inanebunu wakaa’- ngget lombok logowak nduk, eerogo piige, Eeke logominggirik, Naliku an ALA nen aret puut Tiyon paga logonet, inowe nendagembogut a’nuk, Ne ti paga nen nok, mondokmondok wone lengganogo yorage logogin o.
8 Ndomba wari wogwe iyo, nggayo paga inarum wonage, Tiyon aagalogwe yugum pak wurogo pereegi kwak puut Tiyon wonage, Eerak wonage O Yerutalem ti, Aa’nduk it yi aakumi ndi aakumi at abu’me piinok, wonagagerak kwak obaane’me ndak-ndak eerogo pege, Aap endagembogut o Yerutalem at paga logonet, wone lengganogo yorage nagagi kwak yorage logowak nduk, koonogo pege, Eerigin o,” yinuk, Aliku ALA nen aret yegerak me, yokkiragi o.
9 Kit nonggop nduk, kinoone nggwok paga le yogo ogotik? Aap endagembogut eebe kinenggela’me wonage lek nduk, yogo ogotik ya? Ndi, kit panggombinagarak lek kenok, kwe aagaluk enegen paganak yagan wake menggi kwak, o yogondak andi nen kinoone nggwok paga yogo ogotik ya?
10 O Tiyon aagalogwe kit yi wae. Yogondak kineebi mbakak o kota yime nen endekem wundi nanuk, yabu nggulaame logorak agaarak me, Kwe enegen paganak yagan wake menggi kwak, kineebe yagan yobak-nggolak yogo logonip o. Kit o Mbaben aret namunggup o. Time nen aret kinagap ndake, time nen Aliku ALA nen kinawim ineenggi paga nen wondet eerogo pinagage, Eerigin o.
11 Togop aret eerigin kwe, o yogondak nen yi aakumi ndi aakumi ambik lombok nen tebenogo pinagawak nduk, kuwak eeppunuk yogo logonet, It maluk eerogo piyaawak o.
O Tiyon aagalogwe maluk eerogo piigwi iinok, inagi’ndok kanggo logowam ninigen loorogo logowok o, yinuk, yogwe kwe,
12 At Aliku ALA eeriyak mbake menggerak nogo ineenggo’lek wonogwe, Gandum wonok agabolo mbelanggo menggam pi wogo mengga kwak at nen kuwak eerogo piyoorak kooneegerak me, aret eeke yogwe nogo, it kobak wonogwe, Eeko agaarik o.
13 “O Tiyon aagalogwe kit yi wae. Mi’nogo logomonggotik, gandum negen ti, kiniyok paga agabolo mbelanggo logonip o. An nen tapi eyak to aago mbuti owak kwak kinomaawi eerogo pinagage, Ndi, kiniyok mbuti tembaga kwak eerogo pinagage, Eeke neenok, Kit nen yi aakumi ndi aakumi ambik lombok yigirik-noonom eerogo piigo logomunggup o,” yinuk, yokkirage kagarak o. Ndi, it aakumi yigirogo piigo logonet, inamendek kugun wamonggotak nogo, wonok, “Aliku ALA ake o,” yinuk pi wogwe, It inageerok ti, at o nggween yi abok aret unde menggerak ninogoba nogo ake leenogo pugwi, Eeko logomunggup o.
14 Togop me, o kota omaawi pipporogo menggendak kat yi wae. Ninawim nen wanggeppinaninuk wonogwe me, kawuri wim eeka kuwak eeppiige logot o. It nen aap Iterali ninowe ninarum wonage nogo, yawi mbanak paga agandin tela eerogo warugun o.
5 Metiyat nen Iterali inagap ndari woraagin wone
5:2 Mat. 2:6, Ya. 7:42
1 Togop aret kwe, “O Mbe’lekem-Eparata kat yi perak, It Yekura inanebunu mendek inenggela’me kat mbuuluk aret kwe, kat paga nen at ambi o aa’nduk iyaalok togon wonagagerak nogo, It Iterali inarum logowak nduk, mippigin o,” yinuk, yokkege kagarak.
2 Togop aret eerigin me, kwe aagaluk nda’narigin yugu nogo aret nda’nage, Ndi, at oreewi Iterali ando mbo piya nogogwaarak wonogwe nogo, iniyokan Iterali inom lambuni wogwe, Eeriyak eyom awo aga’lek kagak it Iterali mbo piyamenggerak logogun o.
3 It Iterali inarum logorak woraagin nogo ti, mi’naremenggerak Aliku ALA omaawi eeppege kagak At ogoba Aliku Ala endage mondok iya abu abe me, ayuk wuke logonet, Ndomba ndegeninako mengga kwak, at apuri ndegeninake logogin o. At endage tiyanak menggerak nogo wiganinuk, o irip-irip time ari nagin me, apuri iniki ugun nu’lek aret logogun o.
4 At eebe paga iniki ugun tayenak nu’lek aganaka aret logogin o. Wondet eerogo piige, maluk eerogo piige, eeriyak wone It aakumi o Atiyut mendek nen nit ninanggween tebenggola unggwogwe, Ninobak wurik nogo langgunogo punuk, unggwi wogwe, Eeruwok nduk, eekwi iinok, Ndomba ndegeninako mengga kwak ninoweewi ineebe 7 ilik, 8 a, pilak yogo logonet, inoba kwi’naruwak nduk, mippiyaagun o.
5 Mippiyamonggoorak inawooluwak paga it o Atiyut mendek kaliirubu pup eerogo piigwi, Inawooluwak nutik it o Nimorot mendek kunogo piinet nogwe, Eerugun me, Ninawi tebenggola unggwogwe, Ninanggween kuli pugu kagak, obaga mbo unggwi wogwe, Eekwi iinok, At nogo nen nit Atiyut mendek ineenggime nen ndinninabigin o.
6 Aliku ALA nen miinanggen nappi woramenggerak luurogo pege, mayu iri’ngga paga wangge, eeke nogo nen, “Nit wanggwi nogo aakumi nen niyaawak nduk, torinako logowok o,” yogwe, Ndi, “Lek ogwe niyaawak nduk, torinako logowok,” yogwe, Eekulik alik en wangge, lek age, Eeke menggi kwak, At Yakup mendek ando yumbunik nogo ti, yi aakumi ndi aakumi inenggela’me togop aret logogun o.
7 Singa ndiimbu-nggwiya eyonggaame mendek inenggela’- me wonage menggi kwak, Singa awooluk kambin-ndomba inenggela’me unggwi nanuk, Yimbik togon eerogo nappiige, nibinik-ndelenak eerogo nenet nage, Eeke me, Ambeme nen ndiniyak meek menggi kwak, At Yakup mendek ando yumbunik nogo, togop aret aakumi inanebunu lombok inenggela’- me wonogwe, Yi aakumi ndi aakumi ambik inenggela’me arit namenggaarak wonogwe, Eeko logogun o.
8 Kit Iterali kinawim kinom nambuko logonet, tebenogo piigwi, Kinom ogoorak nogo lek eerogo piigwi, Eeppunuk, “Nineegin tiyak yigi o,” yinuk, keekok piyanggogo logomunggup o.
9 Aliku ALA nen ari logonet, “Ne ti eyom paga an nen inaguda inenggela’me wonogwe nogo lek eerogo piige, Inanggweendo wim eeka nogo pup eerogo piige,
10 Inawi kota-kota lek eerogo pege, Ineebe op logowam inobak wurik nogo ndengganogo pege,
11 Tili paganggwi paga pugu’ndalek eerogo piigo menggaarak nogo, lek eerogo pege, Inaguguruwo paga iniyok yilunogo piigo menggaarak nogo, lek eerogo pege, Eerigin o.
12 Inagugi ogut ogobakkigirik nogo lek eerogo pege, Inagugiwak inenggela’me wonage nogo, yigirogo pege, Eerigin me, It ineenggi paga eerak ti, ayuk wuko logonet, alut eeko logogun lek aret o.
13 Inenggela’me inagugi arelen yinogo pugu nogo, kinogo mbo pege, Inawi kota-kota wurik nogo yinikminik eerogo pege, Eerigin o.
14 Yi aakumi ndi aakumi noone koneniyak ineebi mbakwi nogo onggo nanini eeppiige, Nanini kani negen wunuk ari logonet, eekwi onggo inoba kwippiige, Eeke logogin o,” yinuk, yegerak me, yokkiragi o.
6 Iterali inawone mbaniyak wone
1 At Aliku ALA nen ari yi, kinaruk konenggo logonip o. Aliku ALA nen ari logonet, “It an napuri mi’nogo logomenggaarik, puut-puut tiyarogon inenggaanom paga, Kat togop eekendak o, yinuk, an yo’nugwi, Puut-puut teberogon konenggwi iigak, Ndogop eeppinanegendak o, yinuk, yo’nugwi, Eeko logowak o.
2 Naliku ALA nen it an napuri eekaarak ambi yorage, It Iterali ambi eekaarak paga inawone mbangge, Eeke me, Kit puut-puut yi wae. Naliku an ALA nen napuri eekaarak yorage yi, konenggwi, Nggween alom wurabit nagagerak itok negen wonage kit yi wae. An yorage yi, kinaruk konenggwi, Eeko logonip o.
3 Napuri o. An nen kit nano eeppinagareegirak o? An ngge eeppinagareegirak paga an ari koneniyak anggon eekkinake? Wone onggo mbet yo’ninip nda!
4 An o Metit nen wokkiren wundi wage, Aakumi inayeloman mini eeppinaganuk wonogwe me, wondet eerogo pinagage, Kit wokkiren woraawak nduk, Muta inom, Karun inom, Miriyam inom, kinowagam nappiya wage, Eereegirak o.
5 Napuri o. It aap Mowap mendek inowe endagembogut Mbalak nen pulunogo pinagawak nduk koongge mbareegi, Aap Mbeyot aput Mbileyam nen wone nogo abut laganogo onggo at yoreegerak nogo abekwi, Naliku an ALA nen abe koonak mban eeke minggirak kineenu arumunggup nduk, o Titim paga nen nok, o Nggilagan wogwe kiigak, nano agagerak nogo abekwi, Eeko logonip o,” yinuk, yokkirage kagarak me, yagi o.
6 Togop me, nit Aliku ALA owagam nogwe, At tiyarogon menggerak Ala abu’me tebe yinuk, alut eerit unggwogwe, Eeko logonet, Nano wonok ungguurak? Tapi aagalogwe ndarak kagak tahun ambi eerak warogo ake kani kuniyak nogo mendek wonok at owagam ungguurak op ilik?
7 Ndomba ngguunok ineenggi lingginiyak meek ambik lombok iri wogwe paga, Eyo tayitun amburu yi niyo ndi niyo yenggenak kwak ineenggi lingginiyak abu meek wogori wogwe paga, Aliku ALA inikilom mbarigin mbakop? Ndi, Ala wone taganogo pereegurak onggo ninapuri manggu ndarak nogo at ake piya wogwe, Nit maluk eekoorak paga ndaganako menggam nen ndarak nogo ake piya wogwe, Eeriyak op mbakop? Lek aret o.
8 Nit aakumi yi, obeelom eeko logorak ti, Aliku ALA nen muk yo’niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a’me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.
Iterali maluk eekwi onggo eeppiyoorak wone
6:4 Wund. 4:10-16, 12:50-51, 15:20 6:5 Lin. 22:2-24:25, Yot. 3:1-4:19.
6:16 1End. 16:23-28, 29-34, 21:25-26
9 It aap iniki warak lombok wonogwe nen Aliku ALA endage konenggwi iinok, inagabiti mbako menggaarak me, Aliku ALA nen o kota yoge nogo kinaruk konenggo logonip o. Aliku ALA nen kota nogo yoge logonet, “Kat maluk onggo eeppagarak nduk, At mbim mbanak eenggime porogo wonage nogo, Nappi wagarak wage me, kiniki liippege logot o.
10 O kota maluk eeko menggam kat yi, It aap maluk mendek nen maluk eeppiinet nogo logonet, inamindik-inamendek onggo nggwok kame pateegwaarak wonage nogo, kobak eerogo pege, Ndi, wakkagak togolowak endak lek kagak, Ndak aga o, yinuk, wogorogwe pulunik nogo, an mari eerogo pege, Eeriyak op mbaken?
11 Aap wi-wi aganaka wakkagak yugum mbuulogwe inom wonok wa’nuk, Aaninggin ndak-ndak lek kagak, Ndak-ndak aga o, yinuk, yaga nogo, eekwi iigak, teppiyoorak op mbaken?
12 It aap ineenggi warak o kota kat paga wonogwe nogo inoone omaawi paga aakumi tebenogo piinok, inageerok waganggwi, Aakumi kat paga menggaarak nen pilit mban agan nugwi, Aakumi inambokan laganggo logonet, inoone pilit mban pugunit nugwi, Eeko menggaarak me,
13 An nen kat kooriyak nduk eeke, Kat maluk eeke paga kenggaawak lek eerogo pagakit nduk eeke, Eeke agarik o.
14 Kambi namenggendak kwe, ndonggoppaga’lek aret wonage, Mbi abu nen kiniki nggaruk-nggaruk mban eekkake, Eerigin o. Kat nen yi mendek ndi mendek kuwak eerogo patemenggendak nogo, an nen it wooluwak nutik wogwe nogo wogoraagin me, Yi mendek ndi mendek kuwak eerogo patemenggendak nogo abeelik-abeelek eerogo pigin o.
15 Kat nen anggen yumbunogo nappemenggendak kwe, anggen mbanggolage, Eyo tayitun anggen aambiranogo pemenggendak kwe, amburu koba mbenenogo pake, Anggur anggen aambiranemenggendak kwe, amburu toologo nengge, Eeka’lek aret logomunggun o.
16 Kat nen aap endagembogut Omiri nen wone lengganogo pereegerak nogo mugurok nage, Aap Akap apuri wiganak abok aret nen eerit nogo nogogwaarak nogo, ndak-ndak eerit nage, It eeriyak koonogo pugwi nogo kinom eerit nage, Eeke menggendak me, Keebe pup eerogo
pagagwi, Kaagalogwe, Ha! yinuk, inagi’- ndok kanggwi, Yi aakumi ndi aakumi abok aret meek eerogo pagagwi, Eeruwak nduk, Eeppiyaagin o,” yinuk, yokkege nogo karuk kone-ngge logot o.
7 Iterali inobaabut maluk agagerak kenok yoragagerak wone
1 An ti, nabuwa o! Anggur anggen irip me agaatak mbanggwi kwak, an anggen naakit nduk kwaarit nege kwe, togo’mbet yugu mban kage, Wuliinggen abe amburu warak, “Naakit lak, ao,” mbake kwe, lek kage, Eeke me,
2 It aap Ala mugurok nogwe nogo, o yime inenggaawak lek aret iige, Aap iniki abe koonak ambiriluk ambi lek aret kage, Eeke agarik o. It abok aret aakumi inooriyak nduk, enaarak negen wonogwe, Towe yilunggagak yum yugu wonok nugu mengga kwak, it ambi nen inoreeluk ambi wariyak nduk eerit nugwi, Eeko agaarik o.
3 Maluk eeriyak abu ineenu paga eerit nugu agaarik o. Inarum waka inoweewi nen, “Onggo pinip,” yorogwe, Inowak loongga nen inawone abe mbanuwak nduk, onggo waganggwi, It aap inayuk warak nen it eeriyak mbakwi nogo mban wone lengganogo yorogwe, Eeko logorak wone yugu abe koonak kagak nomok-komok eerogo pugwi, Eeko agaarik o.
4 It aap ti abok aret ineraambe maluk lombok wonogwe kwe, inenggela’me ambiriluk ambi eraambe mbuuluk obeelom negen wonage nogo ti, alok kwak wonage, Ndi, it abok iniki nggolawe wonogwe kwe, it inenggela’me ambiriluk ambi iniki mbuuluk abe koonak wonage nogo ti, poondo alok kwak wonage, Eerak aret menggaarak o. It inigen wokkiren nega woroorak yokkirogo menggaarak nogo, ne muk ari wagaarak wonage, At Ala pekkiya woroorak ne nogo, muk ari wagaarak wonage, Eerak aret me, O yogondak naalop-kaalop eeginaburak abu aret agaarak o.
5-6 Aap aput wulaga nen ogoba meek eerogo pege, Apuluk kolaga nen mi’nage logonet, agalo imbirak ogookkologwe, Enggelo nen enggelo imbirak ogookkologwe, Aap ambi inom wim mbanak ti, owe-awot aret wonogwe, Eerugun me, Kinom monggotak kiniki inoba panggombugwi, “Ninore aret o,” yinuk, it inoba panggonak wonogwe, Eeriyak mage o. Ndi, kwe ambi kinaawi paga windak aruk konengge kero, kinoone yogwe nogo liippogo logonip o.
7 Togop aret kwe, an nogo, an nen at Ala yoge nogo aruk konenigin me, Aliku ALA yeenggwa niri wage kero, nenegen wonage, Niniki lunik nagap ndaka ninogoba Ala nogo neya wage kero, tokkage, Eeke agarik o.
Ala nen inagap ndariyak wone
8 Ninawim mbanak kit yi wae. Nit yigeebu wanggoorak wonogwe kwe, mi’nogwe, Nit o apit aago paga wonogwe kwe, Aliku ALA nen eya eerogo pinanege, Eerigin me, Nit eeppinanegerak paga, “Op eeppiigi,” yinuk, ninagi’ndok kambuurak mage o.
9 Nit Ala abet aret maluk eeppogoorak me, Aliku ALA ninawone mbangge, “Eekaarak onggo ndogop eeppiyoorak o,” yinuk, a’me nggelok eerogo pinanege, Eeka’lek kagak, At anini eeppinanege nogo, “Op aret o,” yinuk, waganggo logogun o. Nit o apit me nen wo’niren o eya paga pinani wage, A’me nggelok eeppinanege, Eeke kaagun o.
10 “Kit kinogoba Aliku Ala nogo ngge o?” yinuk, yo’nirogogwaarak ninawim nogo nen nit ee’ninake ti, Inigen niigo logomenggaarik, inenggali nen inete wandinik logonet, nogo logogun o. It tebenogo piinok, purok tu paga iniyok amok mbanggo mengga kwak, togop eeppiige iyaagun o.
11 Kat Yerutalem yi wae. Kayugum pak obaane’me wurogo pege, Kanggween kuli pugu ambe wigak togon eerogo pege, Eeriyak eyom panggoni woraagin o.
12 Ne ti eyom paga aakumi o Atiyut nen nok, o Metit kotakota kuli inom, O Metit nen nok, niyo Eparat kuli inom, Niyo nggwok yenggenak laut ambime nen nok, laut ambime kuli inom, Puut ambime nen nok, puut ambime kuli inom, abok aret kat Yerutalem aret keya unggwi wogo logogun o.
13 Aakumi o yime menggaarak nogo nen maluk eerit nogo nogogwaarak paga o yi, o wogo aret arigin o.
Iterali inabuwa mbareegerak wone
14 Kaliku ALA wae. Keyate negen kapuri kiniki kundugu ndomba kuwak aago kwak logonet, Eyonggaame iri’ngga abu mili nenet nugu menggam wonogwe nogo, yawi paga teeriren nege logot o. O aa’nduk togon iri’ngga mbanogo nenet nogo nogogwam O Mbatiyan paga, o Nggileyat paga, nenet nugu logowak nduk, teppiyet o.
15 O maan togon kat o Metit nen wogoren wundi wage logonet, eereegindak nogo kwak, Eerubok mendek ambi eeke keyaawak nduk, eerumunggun o.
16 Ti eeremenggendak paga yi aakumi ndi aakumi inigen kogo logomenggaarik, “Nit ninomaawi paga eeriyak meek kogo o,” yinuk, Inenggali nen inoone ambi yaga’- lek inaruk logu negen eeppunuk logogun o.
17 Waalo liirubu paga amuli yenan-menan eerit nege menggi kwak, Yi waalo ndi waalo inaanogum paga tu agan nggween paga nugu mengga kwak, It togop aret iname nen inaganak warit wundi woraanuk, inagabiti mbakak Kaliku inogoba Ala kowagam wogwe, Kat paga inaganak warit wogwe, Eerugun o.
18 Keyate kwak kapuri kiniki kundugu ando yumbunik nogo, maluk eekwi iinok, inomaluk lek eerogo pege, Kat koone yugu taganogo pugwi iinok, mbo punuk, mari eerogo pege, Eeke menggendak kat Ala kwak ambi ta wonage? Lek aret o. Kanini mondok-mondok ninombaka’lek ninabuwa lombok ninombake logorak kinikilom mbake menggendak me,
19 Aa’nduk ninabuwa mbake nagagindak nogo ndak-ndak, yogondak ambinom ninabuwa mbake logonet, Ninomaluk kumaarogo kiyok libik-lebek eerogo pege, Nit maluk eeko nogogurak nogo abok aret niyo nggwok yenggenak laut nogo oolo kiiniki paga lombok mbo wuppege, Eerumunggun o.
20 O maan iyaalok togon kat nen ninombomini kinom wone abuk nggaruk togon koonogo punuk, kumbuk mbaneegindak nogo ndak-ndak, Kat nen Yakup yoreegindak nogo liirogon eeppege, Abarakam yoreegindak nogo abuwa mba’nuk, ndak-ndak eeppege, Eerumunggun o.
Mika 7:6 Mat. 10:35-36, Luk. 12:53
Ambi, peebi Ala nen aakumi nggween paga wonogwe abok aret at abu’me piinok, ndegeninake kagak inale’nggen logorak wone yorage (4:1-4), • Ambi, at Ndawut ombooluk paga nen ambi kin age logomenggerik, aakumi o Yekura menggaarak iniki ugun tayenak logowak nduk, eerogo piya woroorak wone yorage (5:2-4), eereegerak. Eeko logorak it aap Ala nen yorage kagak Iterali yorogo nogogwaarak Pasal 6 ayat 8 paga mbanak wonage nogo yi aret: “Nit eeko logorak ninombake nogo ti, a’me nggelok eeppiinet nugwi, aakumi inabuwa mbako logorak ninikilom mbakwi, ndi, niniki tebeppatinuk ninogoba Ala mugurok nogwe, eeko logorak ninombake nogo ti aret o,” yinuk, yorogo nogogwaarak ti aret.
______________________
MIKA WONE
1
1 Aap Yotam kunduk, Akat kunduk, Kitikiya kunduk, it Yekura mendek inoweewi inendagembogut a’nuk, wone lengganogo yoragak eekwi iigak, o Tamariya inom, kota Yerutalem inom, eeppuurak nogo, Aliku ALA nen aap o Mereyet mendek Mika nogo, abi paga yoge nagagerak nogo yi aret.
O Tamariya inom, Yerutalem inom, eeppiyoorak wone
2 At Aliku kinogoba Ala awi alik leenak menggim logonet, “Ndogop eekwi kiigirak o,” yinuk, yokkiraawak nduk, Kit yi aakumi ndi aakumi abok aret yi wae. Kinaruk konenggwi, O nggween inom, o nggween paga wonogwe inom, abok aret yi wae. Kinaruk liirogon konenggwi, Eeko logonip o.
3 At Aliku ALA nogo abet aret at menggim nen wundi wage, Wambi wa’nuk, puut-puut paga iyok pit wage, Eeke agaarik o.
4 Kundali kani nen tigi-tigi eerogo pege menggi kwak, Puut-puut paga nen niyo taga-taga wambit nage menggi kwak, At iyok pit nage kagak, puutpuut amburu a’nuk, taga-taga wambit nage, Aluk-aluk nggogu-nggogu wambit wage, Eeke agaarik o.
5 Ti apit eeke nogo ti, at Yakup nen Ala wone taganogo pereegerak paga, Iterali paga wiganak inomaluk paga, aret eeke agaarik o. At Yakup nen Ala wone taganogo pege menggim nogo ngge o? Lek o. O Tamariya aret nogo lek a? Ndi, it Yekura mendek inomaluk eeko menggam tiyarogon nogo ngge o? Lek o. O kota Yerutalem aret nogo lek a?
6 “Togop aret me, an nen o Tamariya yigirik-noonom eerogo pege, Eyo anggur yariyak negen eerogo pege, It inayugum langgunogo o kobappaga yagabit eerogo mbo wuppege, At anggween alom wurabak nogo, kin eerogo pit nage, Eerigin o.
7 Inagugiwak nogo yigirogo pege, Inagugi awi wurik me, kumi eeginako logonet, onggo pugu time wonage nogo, kani kunogo pege, Inagugi ogut eerogo pugu nogo, kalenak-pugunik eerogo pege, Ndi, kumi wurinako logonet, onggo pugu nogo abok aret kuwak eerogo pegak eereegwaarak me, Aap kumi eeginako logonet, onggo pugu nogo ti, ti mendek eeko logonet, wogorogo logowak nduk, teppiige, Eerigin o,” yinuk, Aliku ALA nen aret yegerak me, yokkiragi o.
Yekura Yerutalem imbirak eeppiyoorak paga le yereegerak wone
1:1 2End. 15:32-38, 16:1-20, 18:1-20:21, 2Mbin. 27:1-7, 28:1-32:33
8 Togop aret eerigin me, an niniki puru ari logonet, leenggu maake, Niyogogut yum nggonenogo mbo punuk, nayum yirik lek nagap mbelanak nage, Mba’ngge ku agan nege menggi kwak, towe wu oone agan nege menggi kwak, an togop aret nege, Eerigin o.
9 It Tamariya mendek inawin nogo obeelom aga’lek it Yekura mendek inoba lenggennari nage, An mendek wonogo menggam o Yerutalem nogome tu unggwi nogo menggam paga muk ari nage, eekerak wonage agaarik o.
10 Wone ti, ninom wim mbanak o Nggat wonogwe nogo yorogwe, Inigen iigak le yogwe, Eeriyak mage o. Ndi, o Mbet-Le-Apera time liirubu paga lagak-mbagak yogo logonip o.
11 Kit o Tapit monggotak yi wae. O nda wokkiren nogwe iigak, kinagap mbelanak kinenggali mbakak namunggup o. It o Taanan menggaarak nogo, inawi kota nen wundi woroorak inagabiti mbarugun o. It aakumi o Mbet-Kayeten wonogwe nogo nen le yogwe konenggwi kenok, Time kunduk nineebe op logorak lek kogo o, yinuk, mbarumunggup o.
12 Aliku ALA nen maluk eeppiyoorak o Yerutalem tu unggwi wogo menggam muk ari wagaarak wonage me, It o Marot menggaarak nen, Yeenggwa niraawak lak, ao, yinuk, iniki lunik wonogo agaarik o.
13 Kit Lakit monggotak yi wae. Iterali maluk eerit nogwe iinok, kit iyaalok pigaganeegutak paga O kota Tiyon Aagaluk nogo maluk eeke mamunggolagagerak me, Kinaguda nggweendo wim eeka nogo paga keele mbarenogo pinip o.
14 Togop aret me, kit Yekura mendek yi wae. It kota Moreteyet Nggat wonogwe nogo peebi iigo logomunggup lek me, “Kiniki yungguppegak nagup o,” yinuk, kinamendek wogoraanip o. It aakumi o kota Akitip wonogwe nogo nen it Iterali inoweewi inendagembogut yeenggwaaraagun lek inambokan laganugun o.
15 Kit aakumi o Mareteya monggotak yi wae. At Ala nen aap ambi tebenogo pinagawak nduk nappi woraagin me, Iterali inoweewi inendage tiyanak nogo, ndo endage Arulam nogome kumaa’nari nagun o.
16 Kinapuri inabuwa nen le yogo logonet, kineeruwak-kinamboro puluk ko eerogo mbanggwi, Kinapuri mbo pinaganuk keele maageren mbo piya nagun me, Towe wam pili nengga eeruwak lek puluk ko aago kwak kineeruwak togop aret eerogo mbanggologwe, eeko logonip o.
2 Aap tebenogo piigwi nogo yoragagerak wone
1 It aakumi maluk eeriyak koonogo pugwi, It nogo yogo menggam windak logonet, “Maluk ndogop eeko logowok o,” yinuk, koonggwi, Eeppunuk, O kilim nagake kagak, inayuk warak me, eebe aret eeko menggaarak ti iya me, inabuwa o.
2 It nen aakumi ineyabu eerak uugwe mba’nuk kologwe, Inawi wurik uugwe mba’nuk tebenggologwe, Inawi wurik inom, inoreewi ineyate pugu inom, ndinggologwe, Eeko menggaarak.
3 Togop aret eeko menggaarak me, Aliku ALA nen ari logonet, “An nen it aakumi yi, maluk eerogo piyoorak koonogo pege me, inoba kwippiige neegak, kole mbaganggwi, Ne ti, maluk eerogo piyoorak eyom aret me, An iya! mbakak mbaganggwi, Eeriyak meek aret kaagun o.
4 Ne ti eyom paga it aakumi nen, Op togon eeppinagagi, yinuk, yorogo logogun o. Nineebe lek eerogo pinanege, ninanggween mbanogo wogorage, Ndinggolage nagagerik, it aap tebenogo pinanugwi nogo wogorage, eereegerak o, Yinuk, yogwe nogo inomaani mbanggo logonet, Kayik a! yinuk, le ndawi paga inanep pogo logogun o,” yinuk, Aliku ALA nen yegerak me, yokkiragi o.
5 Togop me, kit Aliku ALA apuri kinenggela’me it ambi nen yugum paga wakkanuk, nggween kuli mbanogo wokkiroorak lek aret kaamunggup o.
6 “Nit ninenggali eerogo pinaniyak lek me, Ndogop eerigin o, yinuk, it yoraga nen, Ala ndogop yegerak o, yinuk, yo’nirage, Ala nen, Ndogop eeppinagagin, yegerak o, yinuk, yo’nirage, Eeriyak mage o,” Yinuk, yogo menggaarak.
7 Yakup paga wiganak kit yi wae. “Aliku ALA iniki liippega’lek anini nen perak togon eeppiige, At togoti mendek eeppiige, eeke menggerak o,” yinuk, yuurak op mbakop? “Aap ambit ambi iniki abe koonak logonet, obeelom eerit nage nogo nen, Ala wone ti, obeelom aret o, yinuk, mbake menggerak.
8 Togop kwe, it inom wim mbanak nen eeko mengga kwak, an napuri inoweewi nogo mi’nogo logonet, Inawuri nen wim eeppunuk, iniki ugun ale’nggen paga iname wogwe me, inayum abe nggorek nogo nggorok togon eerogo kologwe,
9 It an napuri inakuwi inawi iniki kundugu wonogwe iigak kwe, piyanogo wumbiigwi, It inapuri mbuulogwe nale’nggen inoba piyoorak mbake neegak kwe, kologwe iyo, mondokmondok non mbanogo piigwi, Eeko agaarik o.
10 It o yime it yonggonggologo logorak lek maluk eerogo pereegwaarak obeelom eerogo pigin lek pulunik aret me, mi’na’nuk nayok a!
11 Aap pilit pugunogo inambokan lagangga ambi nen wage logomenggerik, ari logonet, An perak, anggur amburu inom, kumili aganaka amburu inom, ndonggok togon nonggo logorak yokkirage logogin o, Yinuk, yoraga nogo mendek it inobam aret me, inenggela’me logonet yoragak yuurak op aret o,” yinuk, yegerak me, yokkiragi o.
Inagap ndariyak koonogo pereegerak wone
12 “It Yakup mendek ti, an nen abet aret kuwak eerogo piige, Iterali mendek yumbunik nogo, abet aret ambit me piya wage, Eeke logominggirik, Ndomba kuwak eerogo anggenogona piigo mengga kwak piya wage, Ndomba kuwak aago inagari’- ngga nenet nogo menggam wogoren nugu mengga kwak, wogoren nege, Eeriminggirak me, O time aakumi mban yebet aago logogun o.
13 Aap yugum pak langgungga nogo kwak a’nuk, naa’nduk tu pak langgunogo punuk, wundi nage, Inowe nendagembogut Naliku ALA naa’nduk a’nuk nage neegak, nawuri nambokan wogwe, Eerugun o,” yinuk, Aliku ALA nen aret yegerak me, yokkiragi o, yoragagirak.
3 Inarum waka inom, pilit yaga inom, mberiragagerak wone
1 Ti yorage nagagirik, wone ambinom an yorage logonet, “It Yakup mendek inoweewi kit yi wae. It Iterali mendek inarum monggotak kit yi wae. Kit a’me nggelok eeko logorak kineenu ariyak op kwe,
2 Obeelom eeriyak kineebi mbakwi, maluk eeriyak kinikilom mbakwi, eeko logonet, An mendek ineenik ngge-ngge inagabolo mbelanogo piigwi negen eekwi, Inowak kalenak-pugunik eerogo piigwi kwak eekwi, Eeko monggotak o.
3 An nowe-nawot inagabolo mbelanogo piigwi, inowak kalenogo piigwi, Wam kuwalina mbanogo lako mengga kwak, Wam enggaanggum nggariknggarek eerogo togolowa’na lako mengga kwak, It ineebe togop aret eerogo piinok, nonggo monggotak o,” yinuk, yoragagirak.
4 “Yeenggwa niru o,” yinuk, Aliku ALA yoriyak eyom ari woramenggerak yorumonggotak kwe, at nen kinoone konengge, Maluk eeko monggotak me, ne ti eyom paga kit tamban eekwi nogo, at etenggen kumaappatinuk wonage, Eeke logogin o.
5 Aliku ALA nen ari logonet, “It aakumi nen, Ndogop eeke kaamunggup o, yinuk, an napuri iniki nomonogo piya nogwe nogo perak, Inambi wogorogwe iinok, Kiniki tayenak ugun aret logomunggup o, yinuk, yorogwe, Ndi, wogoraga’lek iinok, Kinawim nen kinoori unggwi woraagun o, yinuk, yorogwe, Eeko menggaarak me,
6 Inabinggaanggo ambinom kogwe iyo, o apit kwak eerogo piige, Tili paganemenggaarak kwe, irip narogo piige, Eeriyak eyom panggoni woraagin o. Ndogop eeke kaamunggup o, yinuk, yaga nogo oonegen kilu yi nage logonet, o yumaak age menggi kwak, eerogo piinet unggwage, O liingge kwe, yipit-apit eerogo piige menggi kwak eerogo piige, Eerigin me,
7 It inabinggaanggo paga yoraga nogo inenggali age, Tili pagangga nogo inagabiti age, Eeko logonet, Ala yoremenggaarak nogo onggo yoraga’lek kenok, inuut kuru agan wangge logogin o,” yinuk, yegerak me, yokkiragi o.
8 Togop kwe, an perak, it Yakup mendek Ala wone taganogo pit nugwi, It Iterali mendek maluk eerit nugwi, eekwi nogo Inaruk wake logokit nduk, Aliku ALA Aberiniki paga nomaawi lombok eerogo panege, A’me nggelok eeppiinet nage logonet, nagabiti lek yoranet nage logokit nduk, eeppanege, Eeke agaarik o.
9 It aap Yakup paga wiganak inoweewi kit yi wae. It Iterali paga wiganak inarum monggotak yi wae. Wone yi, kinaruk konenggo logonip o. Aakumi a’me nggelok eeppiinet noorak wone kineebi mbakwi, Obeelom eerit noorak wone nogo yaga-taga eerogo pit nogwe,
10 Aakumi maluk eeka’lek ugun iigak kwe, inoorogo piinet nogo logonet, o Tiyon wukwi, Aakumi inawu yowaarogo o kota Yerutalem wukwi,
11 Wu kolaawok nduk, maluk eekaarak nogo yiluk-yiluk inowak loonggwi, Onggo wokkiraawak nduk, Ala unde nen wone mamunirogwe, Wu waawok nduk, Nabinggaanggo paga, Ndogop eekkinake kagaarak o, yinuk, yorogwe, Eeko monggotak kwe, Aliku ALA endage kumbunuk kinoone yogo logonet, “Aliku ALA ninenggela’me wonage nogo lek a? Wonage aret me, Maluk eeppinanigin mondok lek aret o,” yinuk, yogo monggotak o.
12 Togop aret yogo monggotak me, o Tiyon ti, yabu kabunogo nippit nogo mengga kwak age, O kota Yerutalem ti, nggween yigirik-noonom eerak logonak negen age, Ndi, puut Ala awi wurik menggim ti, alok-palok mban kunogo pege, Eerigin o.
4 Aakumi iniki ugun tayenak menggam wone
1 O age yobok paga Aliku ALA awi puut paga wurik wonage nogo, Yi puut ndi puut tiyarogon wonogwe ti, tebenak kagak, puut ti mban tiyanak wonage, Puut-puut mbuulogwe teberogon wonage nogo enggela’me puut ti mban tiyak ari, Eerigin o, yinuk, koonogo pigin me, Yi aakumi ndi aakumi puut ti paga niyo nage mban menggi kwak togop aret unggwi wogo logogun o.
2 Aakumi inanebunu lombok apit aret wogo logomenggaarik, yogo logonet, “Eeko logorak wone yugu nogo o Tiyon nen wundi wage, Aliku ALA ari menggerak nogo o Yerutalem nen wundi wage, Eeke me, Aliku ALA eerit nage menggerak nogo, nit ndak-ndak eerit nogo logorak mamunninake logowak nduk, Nit Aliku ALA abuut paga lagi nogwe, Yakup ogoba Ala awi wurik me unggwi nogwe, Eeriyak me, lagi nawok o,” yinuk, yogo logogun o.
3 Yi aakumi ndi aakumi inawone mbanogo inowak loongge, Aakumi inanebunu lombok nda koorok inendage warak wonogwe nogo, Wone inoba aremenggaarak kenok, amburu mbangge, Eerigin me, Inawooluwak nogo yabu tege eerogo pugwi, Aap inooka ndut nogo tawi pooka eerogo pugwi, Eerugun o. Aakumi ambi mendek nen aakumi alik mendek tebenogo piyaawok nduk, inawooluwak waganggwi, Wim eekak yuurak inawuri mamunirogwe, Eerugun mondok lek o.
4 Inalitik-inalitak inageyo anggur alome kwi’ndak wonogwe, Inageyo wuli alome iniki ugun tayenak wonogwe, Eekwi iigak, “Aap ambi nen inogut nggigik yuwak nduk, eeppiyaagin lek aret o,” yinuk, At Omaawi Lombok Menggerak Aliku ALA nen aret yegerak me, yagi o.
5 Aakumi inanebunu lombok inagugi inendage tiyappunuk eerit nogo logogun kwe, Nit perak, ninogoba Aliku Ala endage tiyappunuk, mondokmondok eerit nogo logogun o.
Iterali mbo piya nogogwam nen wogoren woroorak wone
3:12 Yer. 26:18 4:3 Yet. 2:4, Yow. 3:10 4:4 Tak. 3:10
6 Aliku ALA nen ari logonet, “Ne ti eyom paga an nen it inendop yilugu negen nogo kuwak eerogo piya wage, It mbo piya nogogwaarak wonogwe nogo, ambit me wonggonogo piya wage, Aaninggin-paaninggin inoba piyareegirak nogo, kuwak eerogo piya wage, Eerigin o.
7 It inendop yilugu negen eegu yumbunik wonogwe nogo, inendop abe awi wiganggo logowak nduk, eerogo piige, Ndi, it aakumi wumbiyareegwaarak nogo, inanebunu wakaa’- ngget lombok logowak nduk, eerogo piige, Eeke logominggirik, Naliku an ALA nen aret puut Tiyon paga logonet, inowe nendagembogut a’nuk, Ne ti paga nen nok, mondokmondok wone lengganogo yorage logogin o.
8 Ndomba wari wogwe iyo, nggayo paga inarum wonage, Tiyon aagalogwe yugum pak wurogo pereegi kwak puut Tiyon wonage, Eerak wonage O Yerutalem ti, Aa’nduk it yi aakumi ndi aakumi at abu’me piinok, wonagagerak kwak obaane’me ndak-ndak eerogo pege, Aap endagembogut o Yerutalem at paga logonet, wone lengganogo yorage nagagi kwak yorage logowak nduk, koonogo pege, Eerigin o,” yinuk, Aliku ALA nen aret yegerak me, yokkiragi o.
9 Kit nonggop nduk, kinoone nggwok paga le yogo ogotik? Aap endagembogut eebe kinenggela’me wonage lek nduk, yogo ogotik ya? Ndi, kit panggombinagarak lek kenok, kwe aagaluk enegen paganak yagan wake menggi kwak, o yogondak andi nen kinoone nggwok paga yogo ogotik ya?
10 O Tiyon aagalogwe kit yi wae. Yogondak kineebi mbakak o kota yime nen endekem wundi nanuk, yabu nggulaame logorak agaarak me, Kwe enegen paganak yagan wake menggi kwak, kineebe yagan yobak-nggolak yogo logonip o. Kit o Mbaben aret namunggup o. Time nen aret kinagap ndake, time nen Aliku ALA nen kinawim ineenggi paga nen wondet eerogo pinagage, Eerigin o.
11 Togop aret eerigin kwe, o yogondak nen yi aakumi ndi aakumi ambik lombok nen tebenogo pinagawak nduk, kuwak eeppunuk yogo logonet, It maluk eerogo piyaawak o.
O Tiyon aagalogwe maluk eerogo piigwi iinok, inagi’ndok kanggo logowam ninigen loorogo logowok o, yinuk, yogwe kwe,
12 At Aliku ALA eeriyak mbake menggerak nogo ineenggo’lek wonogwe, Gandum wonok agabolo mbelanggo menggam pi wogo mengga kwak at nen kuwak eerogo piyoorak kooneegerak me, aret eeke yogwe nogo, it kobak wonogwe, Eeko agaarik o.
13 “O Tiyon aagalogwe kit yi wae. Mi’nogo logomonggotik, gandum negen ti, kiniyok paga agabolo mbelanggo logonip o. An nen tapi eyak to aago mbuti owak kwak kinomaawi eerogo pinagage, Ndi, kiniyok mbuti tembaga kwak eerogo pinagage, Eeke neenok, Kit nen yi aakumi ndi aakumi ambik lombok yigirik-noonom eerogo piigo logomunggup o,” yinuk, yokkirage kagarak o. Ndi, it aakumi yigirogo piigo logonet, inamendek kugun wamonggotak nogo, wonok, “Aliku ALA ake o,” yinuk pi wogwe, It inageerok ti, at o nggween yi abok aret unde menggerak ninogoba nogo ake leenogo pugwi, Eeko logomunggup o.
14 Togop me, o kota omaawi pipporogo menggendak kat yi wae. Ninawim nen wanggeppinaninuk wonogwe me, kawuri wim eeka kuwak eeppiige logot o. It nen aap Iterali ninowe ninarum wonage nogo, yawi mbanak paga agandin tela eerogo warugun o.
5 Metiyat nen Iterali inagap ndari woraagin wone
5:2 Mat. 2:6, Ya. 7:42
1 Togop aret kwe, “O Mbe’lekem-Eparata kat yi perak, It Yekura inanebunu mendek inenggela’me kat mbuuluk aret kwe, kat paga nen at ambi o aa’nduk iyaalok togon wonagagerak nogo, It Iterali inarum logowak nduk, mippigin o,” yinuk, yokkege kagarak.
2 Togop aret eerigin me, kwe aagaluk nda’narigin yugu nogo aret nda’nage, Ndi, at oreewi Iterali ando mbo piya nogogwaarak wonogwe nogo, iniyokan Iterali inom lambuni wogwe, Eeriyak eyom awo aga’lek kagak it Iterali mbo piyamenggerak logogun o.
3 It Iterali inarum logorak woraagin nogo ti, mi’naremenggerak Aliku ALA omaawi eeppege kagak At ogoba Aliku Ala endage mondok iya abu abe me, ayuk wuke logonet, Ndomba ndegeninako mengga kwak, at apuri ndegeninake logogin o. At endage tiyanak menggerak nogo wiganinuk, o irip-irip time ari nagin me, apuri iniki ugun nu’lek aret logogun o.
4 At eebe paga iniki ugun tayenak nu’lek aganaka aret logogin o. Wondet eerogo piige, maluk eerogo piige, eeriyak wone It aakumi o Atiyut mendek nen nit ninanggween tebenggola unggwogwe, Ninobak wurik nogo langgunogo punuk, unggwi wogwe, Eeruwok nduk, eekwi iinok, Ndomba ndegeninako mengga kwak ninoweewi ineebe 7 ilik, 8 a, pilak yogo logonet, inoba kwi’naruwak nduk, mippiyaagun o.
5 Mippiyamonggoorak inawooluwak paga it o Atiyut mendek kaliirubu pup eerogo piigwi, Inawooluwak nutik it o Nimorot mendek kunogo piinet nogwe, Eerugun me, Ninawi tebenggola unggwogwe, Ninanggween kuli pugu kagak, obaga mbo unggwi wogwe, Eekwi iinok, At nogo nen nit Atiyut mendek ineenggime nen ndinninabigin o.
6 Aliku ALA nen miinanggen nappi woramenggerak luurogo pege, mayu iri’ngga paga wangge, eeke nogo nen, “Nit wanggwi nogo aakumi nen niyaawak nduk, torinako logowok o,” yogwe, Ndi, “Lek ogwe niyaawak nduk, torinako logowok,” yogwe, Eekulik alik en wangge, lek age, Eeke menggi kwak, At Yakup mendek ando yumbunik nogo ti, yi aakumi ndi aakumi inenggela’me togop aret logogun o.
7 Singa ndiimbu-nggwiya eyonggaame mendek inenggela’- me wonage menggi kwak, Singa awooluk kambin-ndomba inenggela’me unggwi nanuk, Yimbik togon eerogo nappiige, nibinik-ndelenak eerogo nenet nage, Eeke me, Ambeme nen ndiniyak meek menggi kwak, At Yakup mendek ando yumbunik nogo, togop aret aakumi inanebunu lombok inenggela’- me wonogwe, Yi aakumi ndi aakumi ambik inenggela’me arit namenggaarak wonogwe, Eeko logogun o.
8 Kit Iterali kinawim kinom nambuko logonet, tebenogo piigwi, Kinom ogoorak nogo lek eerogo piigwi, Eeppunuk, “Nineegin tiyak yigi o,” yinuk, keekok piyanggogo logomunggup o.
9 Aliku ALA nen ari logonet, “Ne ti eyom paga an nen inaguda inenggela’me wonogwe nogo lek eerogo piige, Inanggweendo wim eeka nogo pup eerogo piige,
10 Inawi kota-kota lek eerogo pege, Ineebe op logowam inobak wurik nogo ndengganogo pege,
11 Tili paganggwi paga pugu’ndalek eerogo piigo menggaarak nogo, lek eerogo pege, Inaguguruwo paga iniyok yilunogo piigo menggaarak nogo, lek eerogo pege, Eerigin o.
12 Inagugi ogut ogobakkigirik nogo lek eerogo pege, Inagugiwak inenggela’me wonage nogo, yigirogo pege, Eerigin me, It ineenggi paga eerak ti, ayuk wuko logonet, alut eeko logogun lek aret o.
13 Inenggela’me inagugi arelen yinogo pugu nogo, kinogo mbo pege, Inawi kota-kota wurik nogo yinikminik eerogo pege, Eerigin o.
14 Yi aakumi ndi aakumi noone koneniyak ineebi mbakwi nogo onggo nanini eeppiige, Nanini kani negen wunuk ari logonet, eekwi onggo inoba kwippiige, Eeke logogin o,” yinuk, yegerak me, yokkiragi o.
6 Iterali inawone mbaniyak wone
1 At Aliku ALA nen ari yi, kinaruk konenggo logonip o. Aliku ALA nen ari logonet, “It an napuri mi’nogo logomenggaarik, puut-puut tiyarogon inenggaanom paga, Kat togop eekendak o, yinuk, an yo’nugwi, Puut-puut teberogon konenggwi iigak, Ndogop eeppinanegendak o, yinuk, yo’nugwi, Eeko logowak o.
2 Naliku ALA nen it an napuri eekaarak ambi yorage, It Iterali ambi eekaarak paga inawone mbangge, Eeke me, Kit puut-puut yi wae. Naliku an ALA nen napuri eekaarak yorage yi, konenggwi, Nggween alom wurabit nagagerak itok negen wonage kit yi wae. An yorage yi, kinaruk konenggwi, Eeko logonip o.
3 Napuri o. An nen kit nano eeppinagareegirak o? An ngge eeppinagareegirak paga an ari koneniyak anggon eekkinake? Wone onggo mbet yo’ninip nda!
4 An o Metit nen wokkiren wundi wage, Aakumi inayeloman mini eeppinaganuk wonogwe me, wondet eerogo pinagage, Kit wokkiren woraawak nduk, Muta inom, Karun inom, Miriyam inom, kinowagam nappiya wage, Eereegirak o.
5 Napuri o. It aap Mowap mendek inowe endagembogut Mbalak nen pulunogo pinagawak nduk koongge mbareegi, Aap Mbeyot aput Mbileyam nen wone nogo abut laganogo onggo at yoreegerak nogo abekwi, Naliku an ALA nen abe koonak mban eeke minggirak kineenu arumunggup nduk, o Titim paga nen nok, o Nggilagan wogwe kiigak, nano agagerak nogo abekwi, Eeko logonip o,” yinuk, yokkirage kagarak me, yagi o.
6 Togop me, nit Aliku ALA owagam nogwe, At tiyarogon menggerak Ala abu’me tebe yinuk, alut eerit unggwogwe, Eeko logonet, Nano wonok ungguurak? Tapi aagalogwe ndarak kagak tahun ambi eerak warogo ake kani kuniyak nogo mendek wonok at owagam ungguurak op ilik?
7 Ndomba ngguunok ineenggi lingginiyak meek ambik lombok iri wogwe paga, Eyo tayitun amburu yi niyo ndi niyo yenggenak kwak ineenggi lingginiyak abu meek wogori wogwe paga, Aliku ALA inikilom mbarigin mbakop? Ndi, Ala wone taganogo pereegurak onggo ninapuri manggu ndarak nogo at ake piya wogwe, Nit maluk eekoorak paga ndaganako menggam nen ndarak nogo ake piya wogwe, Eeriyak op mbakop? Lek aret o.
8 Nit aakumi yi, obeelom eeko logorak ti, Aliku ALA nen muk yo’niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a’me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.
Iterali maluk eekwi onggo eeppiyoorak wone
6:4 Wund. 4:10-16, 12:50-51, 15:20 6:5 Lin. 22:2-24:25, Yot. 3:1-4:19.
6:16 1End. 16:23-28, 29-34, 21:25-26
9 It aap iniki warak lombok wonogwe nen Aliku ALA endage konenggwi iinok, inagabiti mbako menggaarak me, Aliku ALA nen o kota yoge nogo kinaruk konenggo logonip o. Aliku ALA nen kota nogo yoge logonet, “Kat maluk onggo eeppagarak nduk, At mbim mbanak eenggime porogo wonage nogo, Nappi wagarak wage me, kiniki liippege logot o.
10 O kota maluk eeko menggam kat yi, It aap maluk mendek nen maluk eeppiinet nogo logonet, inamindik-inamendek onggo nggwok kame pateegwaarak wonage nogo, kobak eerogo pege, Ndi, wakkagak togolowak endak lek kagak, Ndak aga o, yinuk, wogorogwe pulunik nogo, an mari eerogo pege, Eeriyak op mbaken?
11 Aap wi-wi aganaka wakkagak yugum mbuulogwe inom wonok wa’nuk, Aaninggin ndak-ndak lek kagak, Ndak-ndak aga o, yinuk, yaga nogo, eekwi iigak, teppiyoorak op mbaken?
12 It aap ineenggi warak o kota kat paga wonogwe nogo inoone omaawi paga aakumi tebenogo piinok, inageerok waganggwi, Aakumi kat paga menggaarak nen pilit mban agan nugwi, Aakumi inambokan laganggo logonet, inoone pilit mban pugunit nugwi, Eeko menggaarak me,
13 An nen kat kooriyak nduk eeke, Kat maluk eeke paga kenggaawak lek eerogo pagakit nduk eeke, Eeke agarik o.
14 Kambi namenggendak kwe, ndonggoppaga’lek aret wonage, Mbi abu nen kiniki nggaruk-nggaruk mban eekkake, Eerigin o. Kat nen yi mendek ndi mendek kuwak eerogo patemenggendak nogo, an nen it wooluwak nutik wogwe nogo wogoraagin me, Yi mendek ndi mendek kuwak eerogo patemenggendak nogo abeelik-abeelek eerogo pigin o.
15 Kat nen anggen yumbunogo nappemenggendak kwe, anggen mbanggolage, Eyo tayitun anggen aambiranogo pemenggendak kwe, amburu koba mbenenogo pake, Anggur anggen aambiranemenggendak kwe, amburu toologo nengge, Eeka’lek aret logomunggun o.
16 Kat nen aap endagembogut Omiri nen wone lengganogo pereegerak nogo mugurok nage, Aap Akap apuri wiganak abok aret nen eerit nogo nogogwaarak nogo, ndak-ndak eerit nage, It eeriyak koonogo pugwi nogo kinom eerit nage, Eeke menggendak me, Keebe pup eerogo
pagagwi, Kaagalogwe, Ha! yinuk, inagi’- ndok kanggwi, Yi aakumi ndi aakumi abok aret meek eerogo pagagwi, Eeruwak nduk, Eeppiyaagin o,” yinuk, yokkege nogo karuk kone-ngge logot o.
7 Iterali inobaabut maluk agagerak kenok yoragagerak wone
1 An ti, nabuwa o! Anggur anggen irip me agaatak mbanggwi kwak, an anggen naakit nduk kwaarit nege kwe, togo’mbet yugu mban kage, Wuliinggen abe amburu warak, “Naakit lak, ao,” mbake kwe, lek kage, Eeke me,
2 It aap Ala mugurok nogwe nogo, o yime inenggaawak lek aret iige, Aap iniki abe koonak ambiriluk ambi lek aret kage, Eeke agarik o. It abok aret aakumi inooriyak nduk, enaarak negen wonogwe, Towe yilunggagak yum yugu wonok nugu mengga kwak, it ambi nen inoreeluk ambi wariyak nduk eerit nugwi, Eeko agaarik o.
3 Maluk eeriyak abu ineenu paga eerit nugu agaarik o. Inarum waka inoweewi nen, “Onggo pinip,” yorogwe, Inowak loongga nen inawone abe mbanuwak nduk, onggo waganggwi, It aap inayuk warak nen it eeriyak mbakwi nogo mban wone lengganogo yorogwe, Eeko logorak wone yugu abe koonak kagak nomok-komok eerogo pugwi, Eeko agaarik o.
4 It aap ti abok aret ineraambe maluk lombok wonogwe kwe, inenggela’me ambiriluk ambi eraambe mbuuluk obeelom negen wonage nogo ti, alok kwak wonage, Ndi, it abok iniki nggolawe wonogwe kwe, it inenggela’me ambiriluk ambi iniki mbuuluk abe koonak wonage nogo ti, poondo alok kwak wonage, Eerak aret menggaarak o. It inigen wokkiren nega woroorak yokkirogo menggaarak nogo, ne muk ari wagaarak wonage, At Ala pekkiya woroorak ne nogo, muk ari wagaarak wonage, Eerak aret me, O yogondak naalop-kaalop eeginaburak abu aret agaarak o.
5-6 Aap aput wulaga nen ogoba meek eerogo pege, Apuluk kolaga nen mi’nage logonet, agalo imbirak ogookkologwe, Enggelo nen enggelo imbirak ogookkologwe, Aap ambi inom wim mbanak ti, owe-awot aret wonogwe, Eerugun me, Kinom monggotak kiniki inoba panggombugwi, “Ninore aret o,” yinuk, it inoba panggonak wonogwe, Eeriyak mage o. Ndi, kwe ambi kinaawi paga windak aruk konengge kero, kinoone yogwe nogo liippogo logonip o.
7 Togop aret kwe, an nogo, an nen at Ala yoge nogo aruk konenigin me, Aliku ALA yeenggwa niri wage kero, nenegen wonage, Niniki lunik nagap ndaka ninogoba Ala nogo neya wage kero, tokkage, Eeke agarik o.
Ala nen inagap ndariyak wone
8 Ninawim mbanak kit yi wae. Nit yigeebu wanggoorak wonogwe kwe, mi’nogwe, Nit o apit aago paga wonogwe kwe, Aliku ALA nen eya eerogo pinanege, Eerigin me, Nit eeppinanegerak paga, “Op eeppiigi,” yinuk, ninagi’ndok kambuurak mage o.
9 Nit Ala abet aret maluk eeppogoorak me, Aliku ALA ninawone mbangge, “Eekaarak onggo ndogop eeppiyoorak o,” yinuk, a’me nggelok eerogo pinanege, Eeka’lek kagak, At anini eeppinanege nogo, “Op aret o,” yinuk, waganggo logogun o. Nit o apit me nen wo’niren o eya paga pinani wage, A’me nggelok eeppinanege, Eeke kaagun o.
10 “Kit kinogoba Aliku Ala nogo ngge o?” yinuk, yo’nirogogwaarak ninawim nogo nen nit ee’ninake ti, Inigen niigo logomenggaarik, inenggali nen inete wandinik logonet, nogo logogun o. It tebenogo piinok, purok tu paga iniyok amok mbanggo mengga kwak, togop eeppiige iyaagun o.
11 Kat Yerutalem yi wae. Kayugum pak obaane’me wurogo pege, Kanggween kuli pugu ambe wigak togon eerogo pege, Eeriyak eyom panggoni woraagin o.
12 Ne ti eyom paga aakumi o Atiyut nen nok, o Metit kotakota kuli inom, O Metit nen nok, niyo Eparat kuli inom, Niyo nggwok yenggenak laut ambime nen nok, laut ambime kuli inom, Puut ambime nen nok, puut ambime kuli inom, abok aret kat Yerutalem aret keya unggwi wogo logogun o.
13 Aakumi o yime menggaarak nogo nen maluk eerit nogo nogogwaarak paga o yi, o wogo aret arigin o.
Iterali inabuwa mbareegerak wone
14 Kaliku ALA wae. Keyate negen kapuri kiniki kundugu ndomba kuwak aago kwak logonet, Eyonggaame iri’ngga abu mili nenet nugu menggam wonogwe nogo, yawi paga teeriren nege logot o. O aa’nduk togon iri’ngga mbanogo nenet nogo nogogwam O Mbatiyan paga, o Nggileyat paga, nenet nugu logowak nduk, teppiyet o.
15 O maan togon kat o Metit nen wogoren wundi wage logonet, eereegindak nogo kwak, Eerubok mendek ambi eeke keyaawak nduk, eerumunggun o.
16 Ti eeremenggendak paga yi aakumi ndi aakumi inigen kogo logomenggaarik, “Nit ninomaawi paga eeriyak meek kogo o,” yinuk, Inenggali nen inoone ambi yaga’- lek inaruk logu negen eeppunuk logogun o.
17 Waalo liirubu paga amuli yenan-menan eerit nege menggi kwak, Yi waalo ndi waalo inaanogum paga tu agan nggween paga nugu mengga kwak, It togop aret iname nen inaganak warit wundi woraanuk, inagabiti mbakak Kaliku inogoba Ala kowagam wogwe, Kat paga inaganak warit wogwe, Eerugun o.
18 Keyate kwak kapuri kiniki kundugu ando yumbunik nogo, maluk eekwi iinok, inomaluk lek eerogo pege, Kat koone yugu taganogo pugwi iinok, mbo punuk, mari eerogo pege, Eeke menggendak kat Ala kwak ambi ta wonage? Lek aret o. Kanini mondok-mondok ninombaka’lek ninabuwa lombok ninombake logorak kinikilom mbake menggendak me,
19 Aa’nduk ninabuwa mbake nagagindak nogo ndak-ndak, yogondak ambinom ninabuwa mbake logonet, Ninomaluk kumaarogo kiyok libik-lebek eerogo pege, Nit maluk eeko nogogurak nogo abok aret niyo nggwok yenggenak laut nogo oolo kiiniki paga lombok mbo wuppege, Eerumunggun o.
20 O maan iyaalok togon kat nen ninombomini kinom wone abuk nggaruk togon koonogo punuk, kumbuk mbaneegindak nogo ndak-ndak, Kat nen Yakup yoreegindak nogo liirogon eeppege, Abarakam yoreegindak nogo abuwa mba’nuk, ndak-ndak eeppege, Eerumunggun o.
Mika 7:6 Mat. 10:35-36, Luk. 12:53
Mbuku Mika
BalasHapus