TAKARIYA

Takariya Wone Mbuku Takariya yi, eebe mbanak pekkaga’lek logonet, aa’nduk pekkoorak yi o.

Mbuku Takariya yi, alom mbere yereegerak mbanak wonage:

• Ambi, Pasal 1-8 kuli ti, Yetut awo nda’naga’lek kagak, tahun lima ratus dua puluh nen tahun lima ratus delapan belas kuli age ti paga peebi eeriyak obagari negen yorage nagagerak nogo mbanak wonage.

Obagari negen yorage nagagerak nogo ti, abinggaanggo paga yoge logonet, 1 o Yerutalem ogobakkigiriyak inom, 3 Ala awi wurik maluk eerogo pereegwaarak obaane’me wuriyak inom, 2 it Ala apuri inoba mbeenogo patiyak inom, abok aret abinggaanggo paga mban yoge kenok yorage, ndi, peebi aap endagembogut Ala koonogo pereegerak woroorak nogo, obagari negen yorage, eeke nagagerak.

• Ndi, Pasal 9-14 yi paga mbanak wonage nogo ti, 1 at Ninagap Ndaka peebi o nggween paga kin ari woroorak wone nogo inom, 2 o peebi age yobok paga ninowak looniyak wone nogo inom, yoragagerak liiru mbanak wonage o.

Takariya wone -1 pasal 1-8 ti, at abinggaanggo paga yoge kagagerak wone mbanak wonage

1 Inomaluk mbo punuk woroorak yoreegerak wone

1 Aap Ndariyut endagembogut a’nuk, wone lengganogo yorage kagak, tahun ambi eeppunuk, ambi eeke tut 7 penembunuk, ambi penenak paga Aliku ALA nen at yoge kagak yoraga aap Iro ombooluk Mberekiya aput Takariya nogo wone yoreegerak.

2 Aliku ALA nen at yoge logonet, “Naliku an ALA nanini alik negen it kombomini inoba wonagagirak o.

3 Togop aret me, At Omaawi Lombok Menggerak Aliku ALA nen wone ndogop yegerak o, yinuk, it aakumi yoroorak nogo yi aret o. At Omaawi Lombok Menggerak Aliku ALA nen ari logonet, It iniyokan yungguninuk woraanuk, ina koonogo pe’neyaawak o. Ina koonogo pe’neegwi iinok, Nomaawi Lombok Minggirak Naliku an ALA nen nena koonogo pegiyaagin o, yinuk, Nomaawi Lombok Minggirak Naliku ALA nen aret yagi o.

4 It aap an Ala nen yorage neegak yoraga nen aa’nduk togon it kombomini yorogo logonet, At Omaawi Lombok Menggerak Aliku ALA nen, Ineraambe maluk menggaarak inom, maluk eerit nugu menggaarak inom, mbo punuk, an mu’neren woraawak, yegerak o, yinuk, yorogo nogogwaarak kwe, it nen an noone inaruk konenggwi, liippugwi, eeriyak ineebi mbako nogogwa kwak, it togop eeko logogwaarik o, yinuk, Naliku ALA nen aret yagi o.

5 It kombomini nogo, yogondak nggeeme wonogo agaarik? Ndi, it an nen yorage neegak yorogo nogogwaarak nogo, kangga’- lek ineenik mondok-mondok wonogo agaarik ya?

6 An noone ari, wone lengganogo pege, eeke nagagirak nogo, it wone yorage neegak, yoraga nayeloman mini nen yorogo logowak nduk, wone lengganogo yoragagirak nogo, kombomini ndak-ndak eeppiige neyareegwaarak, ilik, lek a? Ti eeke neenok, inomaluk mbo punuk, yogo logonet, Nit nineraambe maluk logonet eerit nugwi, nit maluk lombok eerit nugwi, eeko monggoorak nogo, at Omaawi Lombok Menggerak Aliku ALA nen onggo eeppinaniyak kooneegerak nogo ndak-ndak eeppinanege me, op aret, yereegwaarak nogo lek a? yinuk, yoret,” yegerak me, yokkiragi o, yoragagerak.

Aap ambi kuda paga kwi’ndak wage kagagerak wone
7 Aap Ndariyut endagembogut a’nuk, wone lengganogo yorage kagak, tahun ambi eeppunuk, ambi eeke tut 10 penembunuk, ambi tut endage Tiyebat penenak tanggal 24 paga, at Aliku ALA nen aap Iro ombooluk aap Mberekiya aput Takariya yoreegerak nogo yi aret.

8 Ne ambi oonikiya nabinggaanggo paga kage logonet, aap ambi kuda maangga kunik amborowak paga kwi’ndak eyo nggonggoondu yigeebu ambet paga wonage nogo, enggela’- me mi’ndak wonage kagak, ambokan yi kuda ndi kuda ando maangga kunik, ando maangga amu kunik, ando yanggwi kunik, eerak wonogwe iigirak o.

9 Iige nagarik, an nen, “Nogoba o. Kuda iigirak ti, wone eebe ngge o?” Yoge mbaki, at nimbirak wone mbangge malayikat nogo nen an yo’- nege logonet, “Wone eebe nogo, ari kaamunggun o.”

10 Yo’nege mbaki, aap eyo nggonggoondu enggela’me mi’ndak wonagaarak nogo nen ari logonet, “O nggween paga yime maloppiinet nogo logowak nduk, Aliku ALA nen it yi abok aret nappiya wagaarak o,” yinuk, yoge kagarak.

11 It inigen kagaarak nogo nen at Aliku ALA nen nappi wagaarak eyo nggonggoondu enggela’me mi’ndak wonage nogo yogo logonet, “Nit o nggween paga yime abok aret maloppiinet nugu logonet it aakumi abok aret iniki ugun tayenak inale’nggen paga wonogwe iigoorak o.”

12 Yogo mbaka, Aliku ALA nappi wagaarak malayikat nogo nen ari logonet, “Komaawi Lombok Menggendak Kaliku ALA wae. O Yerutalem menggaarak inom, o Yekura kotakota wonogwe inom, kanini inoba piige keegak, tahun 70 eereegerak ti, inabuwa mbaka’lek wonage keegak, ne mande ari nagin o,” yinuk, yoge kagarak.

13 Yoge mbaki, Aliku ALA nen oone yanggorogon yoge, iniki eyak wappiyoorak wone yoge, eeke kagarak o.

14 Kage mbaki, at malayikat an yo’nege nogo nen ari logonet, “Wone yorage logorak nogo yi aret o. At Omaawi Lombok Menggerak Aliku ALA nen ari logonet, O Yerutalem inom, puut Tiyon inom, niniki kundugu lombok eeke logonet, obeelom eerogo pigin kwe,

15 it yi aakumi ndi aakumi nen, Nit ugun obeelom aret wonogwe, mbakwi nogo, an nanini lombok inoba kwippiyoorak mbake agaarik o. Aa’nduk nanini mbuuluk eeppiyoorak mbareegirak kwe, eerit nugwi ti paga nanini nggwok lombok inoba kwippiyoorak mbake agarik, yegerak o.

16 Togop aret me, Aliku ALA nen yegerak nogo yi aret. An nen o Yerutalem ne ambinom nena koonogo pegiige logonet, inabuwa mbake, an nawi obaane’me time wuruwak nduk, eeppiige, ndi, keele wakkagak paga o Yerutalem ngginogo nappege, eerigin o, yinuk, at Omaawi Lombok Menggerak Aliku ALA nen aret yegerak yoret o.

17 Ndi, ambi yoroorak nogo yi aret. At Omaawi Lombok Menggerak Aliku ALA nen ari logonet, An nawi kota-kota paga yi mendek ndi mendek ambik abe mban kalo logonak ngginu-ngginu wangge kagak, Naliku ALA nen it Tiyon mendek iniki eyak wappiige, ndi, an name o Yerutalem logokit nduk unde eekkolage, eerigin, yegerak, yoret o,” yinuk, yo’- nege kagarak.
1:1 Eta. 4:24-5:1, 6:14 1:8 Wayu 6:2-4

Eyak 4 inom, aap mbuti paga eeka ineebe 4 inom, abi kagagerak wone
18 Ti’nuk, an nenegen tiya ari nagarik, eyak 4 wonage kagarak.

19 Kage nagarik, at malayikat an nimbirak wone mbangge nogo yoge logonet, “Eyak yi, wone eebe ngge o?” Yoge mbaki, at nen wone onggo an yo’nege logonet, “Eyak yi nen it aakumi Yekura mendek inom, Iterali mendek inom, Yerutalem mendek inom, mappiyareegwaarak nogo aret kagan o.”

20 Yo’nege mbaki, Aliku ALA nen aap mbuti mendek paga eeka ineebe 4 titi’nereegerak.

21 Titi’nege mbaki, an nen at yoge logonet, “Aap yi, nano eeruwak nduk wagaarak mbaken?” Yoge mbaki, at nen an yo’nege logonet, “Lek o. It Yekura mendek ambi pilak yogwe iyo, eyak 4 to aago yi aret kwe, eyak yi nogo inagabiti mbakwi, ndi, eyak to ari kwak, yi aakumi ndi aakumi inomaawi paga o Yekura tebenogo piinok, ineebe nappiyaawak nduk, eereegwaarak nogo yigirogo piigwi, eeruwak nduk, wagaarak ineebe 4 nogo ti aret o,” yinuk, yo’nege kagarak.

2 Keele wakkagak ambi abi paga kagagerak wone

1 Ti’nuk, nenegen tiya ari nagarik, aap ambi keele wakkagak eenggime porogo wonage kagarak.

2 Kage nagarik, “Kat nggeeme nage agandik o?” Yoge mbaki, at nen an yo’nege logonet, “An o Yerutalem ambe ngge kuli, irip ngge kuli, keele paga wakkaakit nduk nage agarik o.”

3 Yo’nege mbaki, at malayikat nimbirak wone mbanggwi nogo an mbo paninuk nage me, malayikat alik ambi at imbirak laambuna’nuk,

4 at yoge logonet, “O kota Yerutalem ti, aakumi ineebe inom, inaanggumi inom, ambik lombok wigannarit nogo logogun me, o kota yagat wurik lek we tene wonage logogin o.

5 We tene aret wonage me, yagat yendok-wandok wurik kani wunuk ari menggi kwak ti, an neebe aret wonage, ndi, akem time eya eerak kenok, aakumi nen, Wi! ugwi ti, an neebe aret wonage, eeke logogin, Aliku ALA nen yegerak o, yinuk, wulaga tawe ti, mbe agan yori nak o,” yinuk, at yoge kagarak.

Mbo piya nogogwaarak iniyokan woroorak wiiragagerak wone
6 Aliku ALA nen ari logonet, “O wiya agi-ogu nen, aru-ogwe nen, nage menggim nogome mappinagareegirak me, kit o omarip paga pa’nggwe wonogwe nogo woraanip o! Woraanip o!

7 Kit o Mbaben pinagi nogogwaarak wonogwe ti, woraanip o. Time nen kinagap ndakko’nok o Tiyon woraanip o,” yinuk, Aliku ALA nen yorage kagarak.

8 At Omaawi Lombok Menggerak Aliku ALA nen yegerak nogo yi aret. “Aakumi nen it an napuri mbaaniigwi iinok, an nenegen aret ndaganggwi, yegerak me, at Abu Tiyanak Menggerak nogoba nen it yi aakumi ndi aakumi tebenogo pinagareegwaarak nogo, maluk eerogo piyaakit nduk, nappani wagaarak o.

9 Togop me, an neenggi omaawi paga it ineebe nggwi eerogo inoorogo piige, inayeloman mini nen inagugun wonok ndi yuwak nduk, eerogo piige, eeke neenok, at Omaawi Lombok Menggerak Aliku ALA nen an abet aret nappani wagaarak ineenu arugun o,” yinuk, ari kagarak o.
10 Aliku ALA nen ari logonet, “Togop me, O Tiyon aagalogwe kit yi wae. An wage logominggirik, kinenggela’me logogin me, kinale’- nggen mbakwi, kinale’nggen nen keekok yogwe, eeko logonip o.

11 Ne ti eyom paga yi aakumi ndi aakumi abok aret Naliku ALA ninom lambumbunuk, it an napuri arugun me, an it inenggela’me aret logogin o. Ti eeke neenok, at Omaawi Lombok Menggerak Aliku ALA nen an nappani wagaarak kineenu arumunggup o.

12 Naliku an ALA nen nggween alik leenak abeenok o Yekura nogo unde eekkolage, ndi, o Yerutalem aa’nduk miippunuk, wonagagi kwak an name logokit nduk, unde eekkolage, eerigin o.
13 Togop me, yi aap ndi aap kit yi wae. Naliku ALA nalik leenak minggim nen muk mi’nagarak wonage me, nenggaanom paga kinabolok lek puk aret logonip o,” yinuk, yorage kagarak me, yokkiragi o.

3 Ala unde inowe Yotuwa nogo abi paga kagagerak wone

1 Ti’nuk, aap Ala unde inowe Yotuwa nogo, Aliku ALA nen nappi wagaarak malayikat owagam mi’ndak wonage, ndi, Tile nogo, Ndogop eekendak o, yinuk, yoruwak nduk, at eben abeenok paga mi’ndak wonage, eerak wonogwe nogo titi’negerak.

2 Titi’nege mbaki, Aliku ALA nen at Tile nogo yoge logonet, “Kat Tile yi wae. Kani arowa nengge kero, kiinogo wumbogo mengga kwak, at aap yi, togop aret wonage kagak, kat Tile yagandak paga Naliku an ALA nen aret mbekkege, kota Yerutalem leenogo pateegirak Naliku an ALA nen mondok onggo eeppagage, eerigin o,” yinuk, yoge kagarak.

3 Yoge kagak, Yotuwa nogo ayum mili yirik malayikat owagam mi’ndak wonagaarak me,

4 at malayikat nogo nen at ake eeka taati mi’ndak wonogwe nogo yorage logonet, “Ayum mili yirik ti, nggoorogo pinip o.” Yoragaarak nggoorogo pogo mbaka, at Yotuwa yoge logonet, “Kat komaluk nogo, an nen abu mbo nappege nagarik, kayum abu abe ngget mendek yirippagage yi, ket o.”

5 Yoge mbaki, an nen, “Yum mili lek abe kero anobak paga perenogo pinip o.” Yorage mbaki, Aliku ALA nappi wagaarak malayikat nogo taati mi’ndak wonage kagak, yum mili lek abe nogo anobak paga perenogo pugwi, eebe yum yirippugwi, eekwi iigirak o.

6 Eekwi iige mbaki, Aliku ALA nen nappi wagaarak malayikat nogo nen Yotuwa kini wuppege logonet,

7 “At Omaawi Lombok Menggerak Aliku ALA nen yegerak nogo yokkiri o. An nen eeriyak at yoge nogo ndak-ndak eerit nage, ndi, nake eeke logonet, Yogop eeke logot o, yinuk, yorage nogo, at ndak-ndak eeke, eeke kenok, an nawi wurik me unde wonage, an nawi wurik oore’nggam eekwi nogo inarum wonage, eeke logogin o. Ndi, it an nake eekwi nowagam mi’ndak wonogwe yi, at inom nake eeke logowak nduk, mippigin o.

3:1 Eta. 5:2, Wayu 12:10 3:2 Yur. 9

8 Aap Ala unde inowe at Yotuwa inom, it at oreewi inom, kwi’ndak wonogwe ti inom, peebi eeri woroorak wakkagak it aret me, wone yi, liirogon konenggo logowak o. An nayeloman endage, Agarip o, yogo logorak nogo nappi woraagin o.

9 Ndi, yugum kere’li-kere’lo eerak Yotuwa owagam pigirak ti, liippuwak o. Yugum ambit ti paga irip-irip obogum kunik 7 aret me, yugum ti paga ayo waganogo pege, ndi, ne ambit paga aret it o yime menggaarak nogo inomaluk lek eerogo pege, eerigin o, yinuk, Nomaawi Lombok Minggirak Naliku an ALA nen aret yagi o.

10 Ne ti eyom paga inalitik-inalitak inoreewi inayonggo piigwi iinok, wogo logomenggaarik, inageyo anggur inom, inageyo wuli inom, alome time kwi’- ndak iniki ugun aret logogun o, yinuk, Nomaawi Lombok Minggirak Naliku an ALA nen aret yagi o,” yinuk, yegerak me, yokkigi o, yinuk, at Yotuwa yoge kagarak.

4 Ndi wuninogo pegak inom, eyo tayitun mbere inom, abinggaanggo kagagerak wone
1 Aap ambi nogo yege me, eenik eeppogo mengga kwak, at nimbirak wone mbanggoorak malayikat nogo iyokan ne ambi neya wage nagaarik, an neenik eeppaninuk,

2 yo’nege logonet, “Kat nano kenegen kage agandik?” Yo’nege mbaki, an nen at yoge logonet, “Ndi wuninogo pegak ambi mbuti emas paga mban ogobakkigirik me, yigani tookak irip paga kwippugu ti paga ndi wuninggak 7 wonage, ndi, ndi wuninggak 7 alitik-alitak ti paga keele 7 mban pugu wonage,

3 ndi, yigani tookak eeben peenok-peenok paga eyo tayitun ogut aago nabenak wonage, eerak wonage kagarak,” yogirak.

4 Yoge nagarik, at nimbirak wone mbangge malayikat nogo yoge logonet, “Nogoba o. Eerak abok yi, wone eebe ngge o?”

5 Yoge mbaki, at nen an yo’nege logonet, “Eerak yi, wone eebe kat keenggo’lek ya?” Yo’nege mbaki, an nen, “Nogoba o. An neenggo’lek aret o.”

6 Yoge mbaki, at nen an yo’nege logonet, “At Aliku ALA nen at Terubaben yoriyak yo’negerak nogo yi aret. At alilaakwi paga, at omaawi paga, eerigin lek o. Ata, an Naberiniki paga eeppege neegak eerigin o, yinuk, at Omaawi Lombok Menggerak Aliku ALA nen aret yegerak, yoru o.

7 Togop me, puut nggorek kat yi wae. An nomaawi ambik, mbake keegak, at Terubaben wage logonet, kat yanggunogo paganuk, kobappaga eerogo pagagin o. Kobappaga eerogo paganuk, yugum aa’nduk lombok ogowa kwippege kagak, aakumi keekok yogo logonet, Ala ale’nggen koba wonage o. Ala ale’nggen koba wonage o, yinuk, at yorugun o,” yinuk, puut nogo yoge kagarak o.

8 Kage mbaki, Aliku ALA nen an yo’nege logonet,

9 “At Terubaben nen an nawi yi, ogowa kwippit nagagerak me, at nen aret eebe obaga aret wurogo pigin o. Ti wurogo pege kenok, it an napuri nen, At Omaawi Lombok Menggerak Aliku ALA nen abet aret Takariya wone yo’niraawak nduk, nappi wagaarak kogo o, yinuk, yugun o.

3:7 Unde 8:35, Pel. 17:8, Yeti. 44:15-16, Tak. 6:15 3:8 Yer. 23:5, 33:15, Tak. 6:12 3:10 Mika 4:4 4:3 Wayu 11:4 4:6 Eta. 5:2 4:10 Wayu 5:6 4:11 Wayu 11:4

10 Togop me, It elaambirik wukwi yi, aret wurugun lek kogo o, yinuk, meek mbakwi ti, taani o? Keele wakkagak aap Terubaben eenggime wonage inigen kogo logonet, inale’- nggen mbako logogun o,” yinuk, yo’nege kagarak. Ndi, “Ndi wuninggak 7 ti, Aliku ALA enegen o nggween paga yime abok aret looge wonage nogo aret o.”

11 Yo’nege mbaki, an nen at malayikat nogo yoge logonet, “Ndi, ndi wuninogo pegak ogobakkigirik eeben peenok-peenok paga eyo tayitun mbere nabenak ti, wone eebe ngge o?”

12 Yoge nagarik, ambinom at kin wakkage logonet, “Tayitun amburu toologo ndi paga mambit naga mbuti emas paga ogobakkigirik mbere eraanu, eyo tayitun eno’mbak mbere nogo ti, wone eebe ngge o?”

13 Yoge mbaki, at nen an yo’nege logonet, “Eyo tayitun eno’mbak mbere nogo, wone eebe kat keenggo’lek ya?” Yo’nege mbaki, an nen, “Nogoba o. Wone ti, eebe an neenggo’lek aret o.”
14 Yoge mbaki, at nen an yo’nege logonet, “Eno’mbak mbere nogo ti, o nggween yi abok aret unde menggerak Aliku ALA ake eeko logowak nduk, amburu eerogo mippiyareegerak aap mbere yi aret o,” yinuk, yo’nege kagarak.

5 Mbuku pirik-perek aago wonok nage abinggaanggo paga kagagerak wone

1 Ti’nuk, ne ambi nena tiya ari nagarik, mbuku pirik-perek aago o oolo ya’i wonok nage nenegen kagarak.
2 Kage mbaki, at nen an yo’nege logonet, “Nano mendek kenegen kage agandik?” Yo’nege mbaki, an nen at yoge logonet, “Mbuku pirik-perek aago irip nggorek metet 10, ndi, eebe tabak ti, metet 5 negen wonage me, o oolo ya’i wonok nage kagarak o.”

3 Yoge mbaki, at nen an yo’nege logonet, “Mbuku pirik-perek aago abeenok paga mbanak nogo ti, aap yogoot kumaaka o yime nen inenggaawak lek eerogo piyoorak wone mbanak wonage, ndi, abeenok paga it aap pilit kagak, Abet aret o, yinuk, kumbuk mbanggwi nogo, o yime nen inenggaawak lek eerogo piyoorak wone mbanak wonage, eerak me, kenegen kagandak yi ti, pulunogo piyoorak wone nogo aret mbanak me, o yime abok aret wigannarit nage logogin o.

4 At Omaawi Lombok Menggerak Aliku ALA nen ari logonet, Pulunogo piyoorak wone yi, nappiminggirak it aap kumaaka inawi wurik me inom, it aap an nendage kumbunuk, pilit kagak, Abet aret o, yinuk, kumbuk mbangga inawi wurik me inom, unggwi nanuk, it inawi yinik-minik eerogo pege logonet, eyo inom, yugum inom, pup eerogo pigin, yegerak me, yokkigi o,” yinuk, yo’nege kagarak.

Kwe ambi muun yarak me yonggolak abinggaanggo kagagerak wone
5 Ti’nuk, at nimbirak wone mbangge malayikat nogo nen wage nagaarik, an yo’nege logonet, “Ti nano kin age kaanok nduk, kena tiya yinuk pekket o.”

6 Yo’nege mbaki, an nen, “Ti nano?” Yoge mbaki, at nen an yo’nege logonet, “Wakkagak muun yarak aret o.” Yo’nege nagaarik, ambi yo’nege logonet, “Yi ti, aakumi o yime wonogwe inomaluk nogo aret yonggolak kagan o.”

7 Yo’nege nagaarik, abit mbuti timah mili paga eerak nogo ponggonogo pege mbaki, muun yarak nogo me kwe ambi yonggolak kwi’ndak wonage kagarak.
8 Kage neegak, at nen an yo’nege logonet, “Yi maluk ndi maluk wakkagak kwe yi aret o,” yinuk, ari kagak, kwe nogo pilak yikit nduk eeke me, uut tebenogo pege nagaarik, abit mbuti timah mili paga eerak nogo narogo pege kagarak.

9 Ti’nuk, nena tiya ari nagarik, kumi mbere ina’naabit towe nggin ina’naabit aago kwak me, ina’naabit wiganogo punuk, o wiya wake kagak, it kumi nen muun yarak nogo wonok, mbogut agi kagak, nggween ogu kagak, o oolo ya’i pi laganggwi iigirak.

10 Iige nagarik, at nimbirak wone mbangge malayikat nogo yoge logonet, “Muun yarak wonok nogwe ti, nggeeme pi nogo agaarik o?”

11 Yoge mbaki, at nen, “Kwe ti, awi wurogo puwak nduk, o Mbaben pi nogo agaarik o. At awi time abu wurogo punuk, muun yarak logowam time aret logowak nduk pugun o,” yinuk, an yo’nege kagarak.

6 Nggweendo 4 eerak abinggaanggo paga kagagerak wone

1 Ti’nuk, ne ambi nenegen tiya ari nagarik, puut mbere mbuti tembaga mban ninggirogo pugume, aru-ogwe wonogwe iigak, oolo taati nggweendo 4 wundi wogwe iigirak.

2 Nggweendo aa’nduk wundi wage kagarak nogo ti, kuda maangga kunik nen nikkenok wundi wogwe, ambokan wundi wage kagarak nogo ti, kuda mili nen nikkenok wundi wogwe,

3 ambokan wundi wage nogo ti, kuda yanggwi nen nikkenok wundi wogwe, nggweendo ambokan age wobok wundi wage kagarak ti, kuda winibegek eerak nen nikkenok wundi wogwe, eekwi me, it kuda abok ti, inomaawi ambik wonogwe iigirak.

4 Iige nagarik, an nen at nimbirak wone mbangge malayikat nogo kin wakkage logonet, “Nogoba o. Yi eekwi iigirak ti, wone eebe ngge o?”

5 Yoge mbaki, at malayikat nen an yo’nege logonet, “Kenegen iigendak ti, at o yi abok aret unde menggerak enggaanom paga ake eeko menggaarak ineebe 4 nogo, o wiya agiogu nen, aru-ogwe nen, warit wage menggim time nogo menggaarak it aret.

6 Nggweendo kuda mili nen nikkenok nogwe nogo, o omarip paga pa’nggwe nage, nggweendo kuda yanggwi nen nikkenok nogwe nogo, oonegen kilu yi nage menggim pa’- nggwe nage, ndi, nggweendo kuda winibegek eerak nen nikkenok nogwe nogo, o ame pa’nggwe nage, eerugun o,” yinuk, yo’nege kagarak.

7 It kuda ti, abok aret inomaawi ambik me, o yime abok aret yombonit noorak, “Mbet-mbet nawi,” nduk eekwi iigak, at malayikat nogo nen, “O yime abok yombonit nugu logonip o,” yorage mbaki, wundi nanuk, o nggween yi abok aret yombonit nugwi iigirak.

8 Yombonit nugwi iigak, at nen an yo’nege logonet, “O omarip paga pa’nggwe nagaarak ti, it o omarip paga pa’nggwe wonogwe nanini eeppiyoorak mbake nogo, nini tayenogo panegaarak ti ket o,” yinuk, yo’nege kagarak o. Nggare-nggare Yotuwa yirippuurak wone 9 Aliku ALA nen an yo’nege logonet,

6:2 Wayu 6:4-5 6:3 Wayu 6:2 6:5 Wayu 7:1 6:12 Yer. 23:5, 33:15, Tak. 3:8

10 “It aap o Mbaben mbo piya nogogwaarak iniyokan wagaarak aap Kelerayi inom, Tobiya inom, Yeraya inom, it abok nen Ala wogoriyak mbareegwaarak nogo wagangge logomenggendik, wonok o yogondak aret aap Tepaniya aput Yotiya ame nak o.

11 Nage logomenggendik, mbuti perak inom, mbuti emas inom, wonok namenggendak nogo paga nggare-nggare ogobakkigirogo punuk, aap Yotarak aput Ala unde inowe Yotuwa nogo anobak paga yirippumunggun o.

12 Yirippege logomenggendik, At Omaawi Lombok Menggerak Aliku ALA nen yegerak nogo yi aret o, yinuk, at yoge logonet, Aap ambi endage, Agarip, toonak nogo at yi aret o. At wonage logowam nen agarip ndarogo wunake, Aliku ALA awi wurogo pege, eeke logogin o.

13 Aliku ALA awi wurogo pege, at endage tiyanak kenok, aakumi nen, Wi! ugwi, endagembogut a’nuk wone lengganogo yorage logowam logonet wone lengganogo yorage, eeke logorak nogo at aret o. Togop me, at Aliku ALA unde wonage logonet, endagembogut a’nuk, wone lengganogo yorage logogin o. At mban Ala unde logonet eeke, at mban endagembogut a’nuk, wone lengganogo yorage, eeke logogin me, wone ambi aga’lek abe mban logonet, eeke logogin, yegerak, yoru o.

14 It aap Kelerayi inom, Tobiya inom, Yeraya inom, aap Tepaniya aput Yotiya inom, inendage ki logowak nduk, nggare-nggare mendaaremenggendak nogo ti, Naliku an ALA nawi wurogo pemenggam time mondok-mondok logogin o.

15 Yi aakumi ndi aakumi o nda nen wogo logogun nogo nen Naliku an ALA nawi ti, it inom aret wurugun o. Wukwi iinok, it aakumi nen, At Omaawi Lombok Menggerak Aliku ALA nen aret aap Takariya nappi wagaarak kogo o, yinuk, yogo logogun o. Ndi, kogoba Naliku an ALA nen wone yokkege minggirak nogo liirogon konembunuk eeke keenok, wone ti ariyak nogo a’me aret age kaamunggun o,” yinuk, yo’nereegerak o.

7 Inambe mage negen logonet, eeko logorak wone
1 Aap Ndariyut endagembogut a’nuk wone lengganogo yorage kagak, tahun kenagan eeppunuk, ambi eeke tut 8 penembunuk, ambi penenak tut Kitelewe tanggal 4 paga Aliku ALA nen wone aap Takariya yoreegerak.

2-3 Aakumi o Mbeten mendek nen aap Taretet inom, Eregem- Melek inom, inawuri apit aago inom, nogo nen, “Nit yi tahun ndi tahun paga tut 4 penembunuk ambi penenak paga mbi nengga’lek ninambe mage negen logonet, niniki wakkologo nogogurak nogo ndak-ndak eeko logorak ilik, lek a? yinuk, Aliku ALA ninabuwa nen yo’niraawak o,” yinuk, it at Omaawi Lombok Menggerak Aliku ALA awi wurik me at eebe unde logonet eeko menggaarak inom, Ala nen yorage kagak yoraga inom, yoraawak nduk, nappiyareegwaarak.

4 Nappiyareegwaarak yora nogo mbareegwa, at Omaawi Lombok Menggerak Aliku ALA nogo nen it yoroorak yo’nereegerak nogo yi aret.

5 “Aakumi o time menggaarak abok aret inom, it aap an neebe unde inom, yorage logonet, Tahun 70 eeke kagak, tut 4 penembunuk, ambi penenak paga inom, ti’nuk, tut 6 penembunuk ambi penenak paga inom, mbi nengga’lek inambe mage negen logonet, iniki wakkologo nogogwaarak nogo ti, At abet aret nit liippinanuwak, mba’nuk, mbi nengga’lek inambe mage negen logonet, iniki wakkologo nogogwaarak ilik, lek a?

6 It inale’nggen nen mbi nunggwi, niyo nunggwi, eeko nogogwaarak nogo ti, it inalitak inaanogum ake aret eeko nogogwaarak nogo lek a?

7 O Yerutalem wonogwe inom, Yerutalem enaagan-ambokan kota-kota wonogwe inom, wone ambi aga’lek iniki ugun inale’nggen paga wonogwe, ndi, o karu nggwok o ame pa’nggwe wonage inom, oonegen kilu yi nage menggim puut teberogon nggelok-nggobok me inom, aakumi inawi time wuppatinuk wonogwe, eekwi iigak, it aa’nduk Naliku an ALA nen yorage neegak yoraga nogo nen wone ti mendek yorage neenok, yorogo nogogwaarak nogo lek a? Yorogo nogogwaarak aret, yegerak, yoret o,” yinuk, an yo’nereegerak.

8 Aliku ALA nen ne ambinom wone an Takariya yo’nereegerak.

9 Yo’nereegerak nogo it aakumi yorage logonet, “At Omaawi Lombok Menggerak Aliku ALA nen yegerak nogo yi aret. Eekaatak a’me nggelok mban eeppiigwi, it mban-mban nabuwa-kabuwa eekko’net nogwe, eeko logowak o.

10 Kumi nanu inom, elege moono inom, aakumi nggiru inom, ineenggi lek inom, tebenogo piigwi, it mban-mban at ambi maluk eeppegak eeriyak koonogo pugwi, eerugwaarik, yegerak me, yokkiragi o,” yinuk, yoragagirak o.

11 Yoragagirak kwe, wone ti, liippunuk nineebi mbakwi, inogogumbuk logonet, wone ti, inambokan mbo punuk, inaruk nakkologwe, eereegwaarak o.

12 Iniki yugum moolingget kwak kumbunuk, eeko logorak wone yugu inom, at Omaawi Lombok Menggerak Aliku ALA yereegerak Aberiniki nen it aap Ala yorage kagak yoraga nen yoragak yuwak nduk, o aa’nduk yorogo nogogwaarak nogo inom, nen, “Koneniyak nineebi o,” yinuk, yereegwaarak me, at Omaawi Lombok Menggerak Aliku ALA nen anini iya lombok inoba kwippiyareegerak.

13 At Omaawi Lombok Menggerak Aliku ALA nen ari logonet, “It wiirage neenok, Ninaruk koneniyak nineebi o, mba’nuk mbo pereegwaarak me, it nen nggino yo’nugwi iinok, an naruk koneniyak neebi o, yinuk, mbo pereegirak o.

14 O wiya nombok kombok warit wage logonet, yi mendek ndi mendek wonok mappege menggi kwak, it ineebe togop aret yi aakumi ndi aakumi inambik inenggela’me mappiyareegirak. Mappiige mbareegi, it wonogo menggam inanggween paga time o wogo eerogo pereegwaarak me, aakumi ambiriluk ambi yinggwi-unggwogwe eeka’lek aret agaarik o. O abe aret kwe, o wogo aret eerogo pereegwaarak nogo ti aret o,” yinuk, an yo’nereegerak.

8 Yerutalem aa’nduk wonagagi kwak eerogo puurak wone

1 At Omaawi Lombok Menggerak Aliku ALA nen wone ambinom yo’nereegerak.

2 At Omaawi Lombok Menggerak Aliku ALA nen an yo’nege logonet, “An nen o Tiyon niniki kunik lombok mbake minggirak me, alik eerit nage kenok, Ao, lombok mbake, ndi, niniki aganggen kerek togon obeelom eeppiyoorak mbake minggirak me, it ambi nen at maluk eeppugwi iinok, kani aganggen kwak nanini lombok mbake, eeke minggirak o,” yinuk, yo’nege,

3 At Aliku ALA nen an yo’nege logonet, “An niyokan o Tiyon wage logominggirik, o kota Yerutalem enggela’me time aret logogin o. Time wonage neegak, o Yerutalem endage ti, Kota Liirogon Eeka o, yogwe, ndi, Nomaawi Lombok Minggirak Naliku ALA nabuut nogo endage, Puut Alik Leenak o, yogwe, eeko logogun o,” yinuk, yo’nege,

4 At Omaawi Lombok Menggerak Aliku ALA nen an yo’nege logonet, “Aa’nduk aap inanggok inom, kumi inanggok inom, aakelo-kweegelo ogogwaarak me, inalitik-inalitak waanggun luk o Yerutalem tu paga kwi’- narit nogo nogogwa kwak, it peebi togop aret eerit nogwe,

5 o kota tu paga tu paga wologwe-komologwe yagabit eerit nugu logonet, yini kunit nugwi, eeko logogun o,” yinuk, yo’nege,

6 At Omaawi Lombok Menggerak Aliku ALA nen an yo’nege logonet, “Ti eeppiyoorak nogo ti, it aakumi ando yumbunik nogo nen, Iya eeriyak mendek ti abet aret eekwi iyaamun, ilik, lek a? mbaremenggaarak kwe, it nen eeriyak iya mbakwi ti, an eeriyak iya mbakeelik o,” yinuk, at Omaawi Lombok Menggerak Aliku ALA nen aret yo’nege,

7 At Omaawi Lombok Menggerak Aliku ALA nen an yo’nege logonet, “An napuri oonegen lagi wage menggim pa’nggwe wonogwe inom, oonegen kilu yi nage menggim pa’- nggwe wonogwe inom, an nen inagap ndagaren-

8 o Yerutalem logowak nduk, iniyokan piya woraagin o. Piya wage logominggirik, it an napuri ogwe, ndi, an it inogoba age, eeko logomonggoorik, eeppiyoorak yoragagirak nogo liirogon eeppiige, abe koonak mban eeppiige, eeke logogin,” yo’- nege,

9 At Omaawi Lombok Menggerak Aliku ALA nen an yo’nege logonet, “Nomaawi Lombok Minggirak Naliku an ALA nawi wuriyak ogowa kwippit nogwe iigak, it an nen yorage neegak yoraga nen yorogo nogogwaarak inaruk koneneegwaarak nogo, yogondak eebe age yobok togon wuriyak ineenggi omaawi eekkologo logowak o.

10 Ti wuriyak awo eeka’lek kagak, aakumi yabu eekwi onggo inom, inaanggumi yabu eeppiigwi onggo inom, wogoroorak lek aret o. Ndi, inom wat-wat yogo logowak nduk, eerogo piyareegirak me, it iname yinggwi-unggwogwe eekwi nogo nen, Ninawim nen eeppinani wogwe iyo, yinuk, iniki aaninggin wonogogwaarak kwe,

11 yogondak it eegu yumbunik yi perak, an nen aa’nduk it aakumi eeppiige nagagi kwak, it togop eeppiige logogin lek o,” yinuk, at Omaawi Lombok Menggerak Aliku ALA nen aret yo’nege,

12 “Anggen yaremenggaarak nogo abe lagangge, eyo anggur nogo anggen abe yege, inanggween amburu eerogo pemenggerak paga anggen abe mbanggologwe, mbogut paga nen mayu wuppi wage, eeruwak nduk, eeppiyaagin o. Yi mendek ndi mendek abok aret ti, an napuri eegu yumbunik yi, ineyate kwak unde logowak nduk, eeppiyaagin o.

13 It Yekura mendek inom, Iterali mendek inom, yi aakumi ndi aakumi inenggela’me wonogwe iigak pulunogo piigo nogogwaarak kwe, yogondak perak, inagap ndarogo piyaminggirak nugwi iigak, aakumi inale’nggen inoba piigo logogun me, inagabiti mbaka’lek ineenggi omaawi paga eerit nogo logowak o,” yinuk, yo’- nege,

14 At Omaawi Lombok Menggerak Aliku ALA nen yo’nege logonet, “O aa’nduk it inombomini nen an noone taganggo mbareegwa, nanini mbake logonet, inabuwa mbaka’lek maluk eerogo piyoorak, koonogo punuk, eeppiyareegi kwak,

15 yogondak o kota Yerutalem inom, o Yekura inom, ambinom obeelom eerogo piyoorak, koonggirak me, inagabiti mbarugwaarik o, yinuk, Nomaawi Lombok Minggirak Naliku an ALA nen aret yagi o.

16 Togop aret me, it eeko logorak nogo yi aret. It-it wone pilit lek abet mendek mban yogwe, inowak loonggo menggam inowak loonggo logonet, eekaatak a’me nggelok mban eeppiigwi, Wone ti abu liirogon yaga o, yinuk, yuwak nduk, eeppiigwi, eeko logowak o.

17 At ambi nen oreeluk ambi maluk eerogo puurak koonggwi, pilit kagak, Abet aret o, yinuk, kumbuk mbaniyak inikilom mbakwi, eekwi ti, abok aret an neebi lombok mbake me, eerugwaarik o,” yinuk, Aliku ALA nen aret yo’nege, eereegerak.

18 At Omaawi Lombok Menggerak Aliku ALA nen wone ambinom an yo’nereegerak.

19 At Omaawi Lombok Menggerak Aliku ALA nen an yo’nege logonet, “Tut kenagan penembunuk, ambi penenak paga, tut 4 penembunuk ambi penenak paga, tut 6 penembunuk, ambi penenak paga, tut 9 penembunuk, ambi penenak paga, mbi nengga’lek inambe mage negen logonet, it Yekura mendek eekwi nogo ti, inale’nggen mbakwi, inale’nggen nen lubuk yogwe, inale’nggen nen laago nggwok lakwi, eeko logogun me, pilit yaga’lek abet mban yuurak iniki kunik eekkologwe, iniki ambit lambunik logorak inikilom mbakwi, eeko logowak,” yo’nege,

20 At Omaawi Lombok Menggerak Aliku ALA nen an yo’nege logonet, “Yi aakumi ndi aakumi inom, o kota-kota ambik lombok me, aakumi wonogo menggaarak inom, o yime kuwak ari wogwe,

21 o kota ambime menggaarak nen kota alik ambime wonogwe me nanuk yorogo logonet, Nit Aliku ALA ale’nggen ninoba pinanege, at Omaawi Lombok Menggerak Aliku ALA ari konenggwi, eeruwok nduk nogwe me, Ninom nawi o, yinuk, yorogwe iinok wogwe, eerugun me,

22 aakumi inanebunu lombok inom, yi aakumi ndi aakumi inanebunu lombok inomaawi ambik inom, at Omaawi Lombok Menggerak Aliku ALA ari konenggwi, ndi, Aliku ALA ale’nggen ninoba pinanu o, yinuk, yogwi, eeruwak nduk, o Yerutalem wogo logogun o,” yinuk, yo’nege,

23 At Omaawi Lombok Menggerak Aliku ALA nen an yo’nege logonet, “Ne ti eyom paga yi aap ndi aap inanebunu alitak inom, inoone alitak inom, ineebe 10 nen aap Yakuri mendek ambi ayum nggorek ineenggi mondok omaawi pipporogo logonet, Kit Ala kinom wonogwe ninaruk konenggoorak me, kit ninom noorak uugwe mbako ogoorik o, yinuk, yorogo logogun o,” yinuk, an yo’nege, eereegerak ti aret.

PASAL 9-14 TI, AT METIYAT WAGE KENOK, EEKO LOGORAK WONE MBANAK

9 iterali inom wim mbanak maluk onggo eeppiyoorak wone 8:16 Epe. 4:25

1 aliku ala nen abinggaanggo paga yoreegerak nogo yi aret o. Kota-kota Aram inom, Iterali inanebunu lombok inom, ti Aliku ALA amendek aret me, it teppiige logonet, O Kararak maluk eeppiinet nok, o Ndamitik aret puk ari nagin o.

2 O Kararak kuli paga o Kamat wonage nogo inom, o Tirut Tiyon imbirak iniki warak lombok aret wonogwe kwe, it inom, inoba kwippiyaagin o.

3 O Tirut ti, yugum pak omaawi lombok wurogo pake, Mbuti perak ti, liirubu aa’ngga kwak logonogo pit nage, Mbuti emas ti, tu paga nogo logonet, purok amok mbanogo pegaatak kwak kuwak eerogo pege, Eereegerak kwe,

4 Aliku ALA nen at eenggi lek eerogo punuk, niyo laut unde logonet, endage tiyanak menggerak nogo lek eerogo pege, O kota ti, kani nen nenet nage logowak nduk, eerogo pege, Eerigin o.

5 Ti eeke nogo, o Atekelon nen enegen kage logonet, agabiti mbake, O Nggata ti, andi nen yagan yobak-nggolak wake, Ndi, o Ekeron kunduk, at iniki lunik wonage nogo lek age kenok, at togop aret yagan yobak-nggolak wake, Eerugun o. It Nggata mendek inowe endagembogut nogo lek age, O Atekelon nogome aakumi lek o wogo age, Eerigin o.

6 Ndi, aakumi inanebunu nenggelak- kenggelak ndarak mendek nogo, o Atorot ye mbambatinuk wonogo logogun o. It aakumi Pilitin mendek iniki tiyappakwi ti, lek eerogo pege,

7 Wam amiya mburunogo inamberagin wako menggaarak nogo lek eerogo pege, Mbi mage yugu kagak nunggwi paga ineyak kun nggelok ari nogo waganogo mbo pege, Eerigin o.
Ti eeginabit nage logonet, ando teppiyaminggirak nogo ti, ninogoba Ala amendek aret eerogo piyaagin me, It aakumi Yekura mendek ndarak logok mengga kwak ogwe, Ndi, it Ekeron mendek ti, it aakumi Yebut mendek mengga kwak ogwe, Eerugun o.

8 Togop kwe, at Aliku ALA ari logonet, “It aap wim eeka nen o yi, unggwi wogwe, wundi nogwe, eeko logonet, an nawi wurik maluk eerogo pukwak, nawi wurik arum logogin o. Arum logonet, nenegen wonage me, it tebenogo piiga ambi nen an napuri tebenogo piya unggwogo logogun lek o,” yinuk, yegerak o.

Aap endagembogut o Tiyon woroorak wone

9 O Tiyon aagalogwe kit yi wae. Kinale’nggen nen lubuk yogwe. O Yerutalem aagalogwe kit yi wae. Kinale’nggen nen kina’mit piyanggogwe, Eeko logonip o. A’me nggelok eeppinagit nage, kinagap ndake, Iniki yanggonak logonet yokkirage, Eeke menggerak kinowe endagembogut nogo keledai awo ndarak amborowak paga kwi’- ndak kiya wage ti, kinigen kaanip o.

10 At nen yi nggweendo ndi nggweendo o Eparayim wonage inom, Yi kuda ndi kuda wim eeka o kota Yerutalem wonage inom, lek eerogo pege, Yigin agale wurik mbanogo pege, Eeppunuk, Kiniki ugun ale’nggen mbako logonip o, yinuk, yi aakumi ndi aakumi yorage logogin o. At wone lengganogo yorage logowam wiganit niyo nggwok yenggenak laut ambi kuli nen nok, ambi kuli ari nage, Niyo Eparat nen nok, o nggween irip-irip ndak wa’narit nage, Eeke logogin o.

Iterali aa’nduk wonogogwa kwak eeppiyoorak wone

11 Aliku ALA nen ari logonet, “Kit perak, ninom wone abuk nggaruk togon koonogo punuk, abet mbaruwok nduk amiya kilirogo pereegurak ti paga Nggween kabunik niyo lek menggi kwak, It kit mendek keele maageren mbo piya nogogwam wonogwe me nen wondet eerogo wumbiya woraagin o.

12 Aap keele maarak logonet, kiniki lunik monggotak kit yi wae. Kineebe op logowam kiniyokan woraamunggup o. Kit aa’nduk obeelom wonogogutak kwak obaane’me obeelom eeppinagage logonet, Ambinom mondok iya lombok obeelom eerogo pinagagin o, yinuk, o yogondak yi aret yokkiragi o.

13 Neegin miike logonet, yomok ari menggi kwak, it Yekura mendek ti, togop aret eerogo piige, Ndi, neegin yomonogo maale nambuke minggi kwak ti, it Eparayim mendek togop aret eerogo piige, Eerigin o. Kat o Tiyon yi wae. Kat o Yunani yi wae. Kat o Tiyon kaagalogwe wologwe ti, pilak yinuk, kat o Yunani kaagalogwe wologwe kinom wim eeriyak nduk pipuk eerogo piinok, Kat Tiyon ti, it aap wim eeka awooluwak negen eerogo pagagin o,” yinuk, Aliku ALA nen o ti nogo yoge kagagerak.

Aliku ALA kin ari woroorak wone
14 Ti eeke kenok, Aliku ALA nen at apuri inirimbaga kin ari wage logonet, O kimbik pindanogo pege menggi kwak, at omaale namburogo nappigin o. At Itok Menggerak Aliku ALA nen oone nggwok eeka trompet nogo oone pu eeke, O ame pa’nggwe nen o wiya nombok-kombok eerit wage enggela’me at wage,

15 Ndi, nogwe iigak, at Omaawi Lombok Menggerak Aliku ALA nen it ineebe op logowak nduk, nobarogo piige, Eerigin o. Togop aret eerigin me, at apuri nen it inawim nogo ineebe lek eerogo piigwi, It yugum anggen keele paga nggelembunuk nambukwi nogo paga tebenogo piigwi, Anggur amburu nenok ugun agan nugu mengga kwak kumili-kumili negen agan nugu logonet, aakumi ugun inoorogo piinet nogwe, Togolowak amiya eno korok togon toolak wonok Ala ake warogo wogogo menggam ogobakkigirik unggut-unggut kilirogo pit nogo mengga kwak Aakumi inoorit nogwe paga inamiya togop aret wambit nage, Eeke logogin o.

16 Aap ndomba ndegeninaka nen andomba ndegeninake menggi kwak, ne ti paga at Aliku inogoba Ala nen apuri inagap ndarigin o. Nggare-nggare yugum abinak mendek nabenak kere’li-kere’lo eeke menggi kwak, It at apuri Aliku ALA anggween paga logonet, togop aago aret logogun o.

17 Ti aago logogun nogo ti, abu abe kigirikwe lombok me, iya! Gandum nunggwi paga inapuri wologwe mbet-mbet tawe ogwe, Anggur amburu ngget toolak nunggwi paga inapuri komologwe inagabolo piyok togon tawe ogwe, Eerugun o.

10 Aliku ALA nen mban o mayu wogorage menggerak wone

1 O mayu nggwok woraawak nduk, Aliku ALA nen ndugwi kuwak eerogo pege, It aakumi inalitak inake mayu nggwok wogorage, Mayu wogoramenggerak paga yi mendek ndi mendek yarak nogo obeelom eerogo pege, Eeke menggerak me, Yi mendek ndi mendek agarit larit nage eyom paga mayu woraawak nduk, Aliku ALA nggino yogo logonip o.

2 Inagugi nen yorogwe nogo ti, abe yorogwe lek pilit pugunogo yorogwe, Aap tili pagangga nen inoone yogwe nogo, maluk aret age, It aap inabinggaanggo paga inigen kagaatak yorogwe nogo, mbeyok ari, Eeke menggerak me, Ti mendek wone yogwe ti, iniki eyak wappiyoorak lek kagak we aanom warogo aret yorogo menggaarak o. Aap ndomba ndegeninaka eebe lek kenok, ndomba ineebenowak ko eerogo piige menggi kwak, It aakumi ti, togop aret mak aago nugu menggaarak o.

9:9 Mat. 21:5, Ya. 12:15 9:10 Nda. 72:8 9:11 Wund. 24:8 10:2 Mat. 9:36, Mrk. 6:34


Aap inambik ineenggime nen wondet eerogo piyoorak wone

3 At Aliku ALA nen ari logonet, “Nomaawi Lombok Minggirak Naliku an ALA nen nandomba it Yekura paga wiganak nogo liippiige, Wim eeko logonet, kuda agabiti mbaka’lek nege kenok, Wi! ugu mengga kwak eerogo piige, Eerigin me, It aap ndomba ndegeninaka kwak napuri inarum wonogwe ti, nanini lombok inombake, It aakumi inoweewi ti, maluk onggo inoba kwippiige, Eerigin o.

4 Eerogo piige neenok, it Yekura paga yugum ogowa pugu kwak ari wogwe, Ooliya eyak wurabak kwak wogwe, Wim nambuka yigin kwak wogwe, Wone lengganogo yoraga nogo abok aret kin ari wagak yogwe, Eerugun o.

5 It lambuk togon wim kalu-kalu kwak eerit nogo logonet, Aakumi iniyok tu paga purok amok mbanogo pit nugu mengga kwak, aakumi togop aret eerogo piinet nugwi, Naliku ALA ninom wonage me, It wim eerit nogo logonet, inawim kuda paga kwi’na’nuk nugwi nogo, tebenogo piinet nugwi, Eeko logogun o.

6 It Yekura paga wiganak mendek nogo inomaawi eeppiige, It aap Yutup paga wiganak mendek inagap ndarogo piige, Eerogo piige logominggirik, Inabuwa nen wogoren iniyokan iname piya woraagin o. Piya wage logominggirik, Naliku inogoba Ala an aret a’nuk, wonage logogin o. Ndi, an mbo piyareegirak kwe, mbo piyoolik negen eerogo piyaagin me, It nggino yo’nugwi iinok, inoone konengge logogin o.

7 It Eparayim mendek aap wim kalu-kalu kwak ogwe, Anggur amburu nenok, inale’- nggen mbakwi kwak, iniki ale’nggen mbakwi, eekwi nogo, Inapuri nen inigen iigo logomenggaarik, it kunduk, inale’- nggen mbakwi, At Aliku ALA nen eerogo piigerak ti iya, yinuk, inale’nggen nen ndawi lubuk yogwe, Eeko logogun o.

8 An abet aret wondet eerogo piyaagin o. Wondet eerogo piige logominggirik, Woraawak nduk neenggi walok yorage, kuwak eerogo piige, Eeke neenok, It aa’nduk wonogogwa kwak, ineebe ambik lombok arugun o.

9 An nen it ineebe waganogo yi aakumi ndi aakumi inenggela’- me nappiyaminggirak kwe, O nda time wonogo logonet, an abe’nako logogun o. It inapuri inom ineebe op aret logomenggaarik, ti’nuk, iniyokan iname woraagun o.

10 O Metit nen iniyokan wogoren wage, O Atiyut nen kuwak eerogo piya wage, Eeke logominggirik, O Nggileyat inom, o Libanon inom, time piinet nagin me, It o time logorak tenak ambi lek yagabit aret arigin o.

11 Niyo kole yenggenak laut kilaarak- mogonik eeke kenok, wunda noorak inagabiti mbako mengga kwak, Iniki aaninggin wonogwe iinok, an nen iniki tayenogo piige, Niyo Nin porok yegetak me, iniki te wunda nogo mengga kwak, eerogo piige, Eerigin o. It Atiyut mendek nen, Nit iya o, yinuk, iniki tiyappatit nugwi nogo, an nen tebenogo piige, Ndi, it Metit mendek inambim mbanak ineenggime logonet,inabu’me piinok menggam nogo omaawi lek eerogo pege, Eerigin o.

12 Naliku ALA an aret me, an napuri inomaawi eeppiige neenok, An nendage kumbunuk, inale’- nggen paga eerit nogo logogun o,” yinuk, Aliku ALA nen aret yegerak o.

11 Aap inanini ambik lek eerogo piyoorak wone

1Kat o Libanon yi wae. Kani nen kageyo nggabina nawak nen karungga paarogo patit nak o.

2 Kat eyo kilu-kilu yi wae. Eyo nggabina abe tawe nogo kani nenet nage logonet, ndugundugu nagaarak me, leenggu maake, Kit eyo teno o Mbatan wonogwe yi wae. Eyonggaame eyo abu abe wonage nogo lek agaarak me, leenggu maakwi, Eeko logonip o.

3 Inandomba inagari’ngga mili nenet nogo menggam abu lek agaarak kenok, it ndomba ndegeninaka nen le yogwe nogo kinaruk konenggwi, Niyo Yoraran ambet paga iri’- ngga mili logonak lek eerogo pegaarak kenok, it singa inoone nggwok agan nugwi nogo kinaruk konenggwi, Eeko logonip o.

It ndomba ndegeninaka mbere nen eeriyak wone
4 At Aliku nogoba Ala nen an yo’- nege logonet, “Ndomba wariyak ake leenak ti, ndegeninake logot o.

5 It aap nen ndomba ti, onggo kumbunuk wakwi kwe, maluk eekwi ti, aaninggin inoba piiga’lek wonogwe, ndi, it kunggoloorak nogo nen kunduk, yogo logonet, Nineenggi warak eekkologwe me, Aliku ALA wa! yinuk, yogwe, eekwi iigak, it ndomba ti, ndegeninaka aret kwe, inabuwa mbaka’lek aret wonogo agaarik o.

6 Naliku an ALA nen kunduk, aakumi o nggween yi paga wonogwe ti, ambinom inabuwa mbarigin lek aret o. An nen abet aret it-it maluk eekkologo logowak nduk eeppiige, it inoweewi inendagembogut ineenggime aruwak nduk eerogo piige, eerigin me, it nen maluk eerogo piinet nogwe iigak, an nen ineenggi me nen ndininabigin lek aret o,” yinuk, Aliku ALA nen aret yo’- nereegerak o.

7 Yo’nege mbareegi, an nen it ndomba kunogo wariyak nduk leenak nogo, ndegeninabit nege nagagirak. Ndegeninabit nege logonet, ndomba ndegeninakak waanggun mbere wagangge nagagirik, ambi endage, Inabuwa Nen Wogoraga, toonogo pege, ndi, ambi endage, Inom Kunik Eeka, toonogo pege, eeke nagagirik, wogoren nege nagagirak.

8 Wogoren nege logonet, tut ambi owak eerogo punuk, ambi penenak paga it ndomba ndegeninaka ineebe kenagan nogo wumbiyareegirak. Wumbiige mbareegi, it ndomba nogo nen an pe’neyoorak ineebi nombakwi iige nagagirik, ambinom ndegeninaburak anggon ee’nake kenok,

9 it yorage logonet, “An nen ambinom ndegengginaburak neebi me, kambuurak kenok kanggwi, kineebe lek ariyak kenok lek ogwe, eeko logonip o. Ndi, it eegu yumbunogo piyamonggotak nogo nen at ambi enggaanggum nenggak, at ambi enggaanggum nenggak, eeko logowak o,” yinuk, yoragagirak.

10 Yorage nagagirik, nowaanggun endage, Inabuwa Nen Wogoraga, nogo woppunuk, “Yi aakumi ndi aakumi abok ninom wone abuk nggaruk togon koonogo pereegirak nogo lek aga o,” yinuk, kalenogo pereegirak.

11 Ne ti paga aret kalenogo pereegirak me, it ndomba wariyak ake leenak inigen iigak kalenogo pege mbareegi, “Yi eekerak ti, Aliku ALA nen aret eekerak kogo o,” yinuk, ineenu ogogwaarak.

12 Ineenu ogo mbareegwa, an nen it yorage logonet, “An nen kinake yabu eeke nagagirak onggo wo’niriyak op aret mbakwi kiinok, wo’nugwi, ndi, wo’niriyak lek mbakwi kenok, mbo pugwi, ee’nip o.” Yorage mbareegi, it onggo wu mbuti perak we 30 iluk wo’nereegwaarak.

13 Wo’nogo mbareegwa, Aliku ALA nen an yo’nege logonet, “Wu ti, an nawi wurik me at aap nggween nggabok paga togolowak ogobakkigika wonageme time, mbo mambi nak o.” Yo’nege mbareegi, yabu eeke nagagirak wu mbuuluk we mbuti perak 30 iluk wo’nereegwaarak nogo, wonok at Aliku ALA awi wurik me aap nggween nggabok paga togolowak ogobakkigika wonage me nogome mbo mambi nagagirak.

14 Ti eeke nagagirik, waanggun ore endage, Inom Kunik Eeka, nogo woppunuk, “It Yekura Iterali imbirak iniki kunik nogo lek aga o,” yinuk, kalenogo pereegirak.

15-16 Kalenogo pege mbareegi, Aliku ALA nen an yo’nege logonet, “Ne yogondak yi paga aret an nen aap ndomba ndegeninaka ambi an napuri o yime wonogwe nogo ndegeninake logonet, ndomba lek ogwe iinok liippiige, inaagalogwe kobak ogwe iinok kwaarinake, inawin ogwe iinok nggerembiige, ineebe obeelom logorak liirogon unde wogonake, eeka’lek ndomba amok warak kero, inoorogo nengge logonet, iniyogobit inom longgonogo punuk, nengge logorak nogo mendek mippigin me, it aap ndomba abe ndegeninakwi lek kwak a’nuk, eerit nage logot o.

17 Aap andomba liirogon ndegeninake lek mbo piinok, mbagangge ti, we aanom warogo wonage me, abuwa o! Wooluwak paga at eenggi polonogo waremenggaarak me, eenggi nggunak ari, Enegen abeme waremenggaarak me, enegen mondok mbuk age, Eeruwak o,” yinuk, an yo’nereegerak.

12 It Yerutalem mendek inagap ndarigin wone

1 It Iterali eeppiyoorak Aliku ALA nen yereegerak nogo yi aret. O mbogut mbiganogo pege, nggween alom wurabit nage, aakumi ogobakkigirogo piinok, iniki warak eerogo piige, eereegerak Aliku Ala nen ari logonet,

2 “An nen abet aret o Yerutalem togolowak amburu toolak kwak eerogo piminggirak me, it yi aakumi ndi aakumi at enaagan-ambokan wonogwe nogo nen amburu toolak ti, na wogwe iinok, kumili kunik kwak agan nogo logogun o. O Yerutalem maluk eerogo puwok nduk, kwi’nari unggwogo logonet, o Yekura kota-kota kunduk maluk eerogo pugun o.

3 Yi aakumi ndi aakumi o yime menggaarak abok aret kuwak eeppunuk, o Yerutalem tebenggolaawok nduk, eekwi ti eyom paga, an nen o kota Yerutalem yugum aaninggin nonggop piyanubok kwak eerogo piminggirak me, it yi aakumi ndi aakumi abok aret nen, Piyakkaawi, yinuk, eeremenggaarak kwe, nggelenogo patugun o.

4 Ne ti eyom paga an nen it kuda abok aret ambime lingga nagak, ambime lingga nagak, eerit nugu logowak nduk, eerogo piige, aap at paga kwi’ndak wogwe nogo, kumili-kumili eerogo piige, eerigin o,” yinuk, Aliku ALA nen aret yegerak o. “It Yekura paga wiganak mendek an nenegen wogonake logogin kwe, it yi aakumi ndi aakumi inaguda nogo perak, inigen mbuk eerogo piyaagin o.

5 Ti eerogo piige neenok, it Yekura mendek inoweewi nogo inikime nen yogo logonet, at Omaawi Lombok Menggerak Aliku ti, it Yerutalem mendek inogoba Ala aret me, it Yerutalem mendek ti, inomaawi ambik iigo o, yinuk, yogo logogun o.

6 Kani wurik logonogo punuk, kani wuninogo pogo mengga kwak, gandum owak mippit nanuk, ndi wuninogo enggela’- me pogo mengga kwak, ne ti eyom paga an nen it Yekura mendek inoweewi togop aret eerogo piige neenok, it aakumi inaagan-inambokan wonogwe nogo abok aret kani wuninogo piigwi iinok, tigitogon aret nenet nagin kwe, o Yerutalem perak, wonage menggi kwak enaani aret logogin o.

7 Ndawut paga wiganak inom, it o Yerutalem menggaarak inom, inendage abu tiyanak me, it Yekura paga wiganak inendage mbuuluk tebenak lek it inendage tiyanak ndak-ndak kaawak nen, it Yekura mendek aa’nduk ineegin tiyak yuwak nduk, Naliku ALA nen eerogo piyaagin o.

8 Ne ti eyom paga Naliku ALA nen it Yerutalem wonogwe nogo, inarum wonage logonet, it aakumi inomaawi lek abu ndeyak wonogwe nogo, at Ndawut omaawi wonagagi kwak eerogo piige, ndi, at Ndawut paga wiganak nogo ti, Ala kwak, Aliku ALA ayonggo malayikat inaa’nduk a’nuk, nogo nogogwa kwak, eerogo piige, eerigin o.

9 Ne ti eyom paga it yi aakumi ndi aakumi abok aret o Yerutalem tebenggolaawok nduk, eekwi iinok, an nen lek eerogo piyaagin,” yegerak o.

At wakwi iinok, aleenggu maariyak wone

10 “An nen at Ndawut paga wiganak inom, it Yerutalem wonogwe inom, aakumi inabuwa mbakwi, inake tamban eekwi, eeko logowak nduk, inikime mambiige neenok, it an ndanuk togon nooremenggaarak nogo nen inigen neego logomenggaarik, aap ambi apuluk ambolom ndarak kangge kenok, abuwa nen aleenggu maake menggi kwak an nale yogwe, aap aput manggu ndarak kangge kenok, iniki wakkolage menggi kwak, an paga iniki wakkologwe, eerugun o.

11 Ne ti eyom paga aap Karat-Irimon o Megiro kobappaga time aleenggu nggwok maareegwa kwak, it kota Yerutalem wonogwe nogo togop aret an naleenggu nggwok lombok maarugun o.

12 O time aakumi Iterali ndarak ndegek lombok leenggu maako logonet, inakuwi-inapuri inom inalik a’nuk, leenggu maako logogun o. Aap Ndawut paga wiganak akweapuri inom inalik ogwe, aap Natan paga wiganak akwe-apuri inom inalik ogwe,

13 aap Lewi paga wiganak akwe-apuri inom inalik ogwe, aap Timeyi paga wiganak akwe-apuri inom inalik ogwe,

14 it ando ndarak ndegek togop aret inakuwi-inapuri inom inalik ogwe, eeko logomenggaarik, leenggu maako logogun o,” yinuk, Aliku ALA nen aret yegerak o.

13 Inagugi inom, pilit wone yaga inom, lek eeppiyoorak wone

1 At Omaawi Lombok Menggerak Aliku ALA nen ari logonet, “Ne ti paga it aap Ndawut paga wiganak inom, it o Yerutalem wonogwe inom, nen maluk eekwi, an mbo paninuk alik mugurok nogwe, eeko nogogwaarak nogo, mili kookwi kwak, lek eerogo pogo logowak nduk, it inake niyo eneeri ambi warak eerogo pigin o.

11:12-13 Mat. 26:15, 27:9-10 12:10 Ya. 19:37, Wayu 1:7


2 Ne ti paga an nen o time inagugi inendage kunggo logomenggaarak nogo, inendage ambi kungga’lek logowak nduk, lek eerogo pigin me, abeko logogun lek aret,” yegerak o. “It aap piliret, Ala nen yo’negerak, yaga inom, kugi ayuk wuko logorak mbaka inom, o ti paga wonogwe nogo, ineebe abok lek eerogo piyaagin me,

3 aap ambi nen, Ala nen yo’nege kenok, yokkiragi o, yinuk, ari kenok, at ndaremenggaarak agalo-ogoba nen aret at yogo logonet, Aliku ALA endage kumbunuk yagandak ti, maluk aret yagandak me, kat kambuurak aret o, yinuk, at ndaremenggaarak agalo-ogoba lombok nen aret ndanuk togon warogo pemenggaarak kambigin o.

4 Ne ti paga it aap, Nabinggaanggo ndogop kagarak o, yinuk, yorogo nogogwaarak abok aret inenggali arugun me, it aap Ala nen yorage kagak yoraga inayum nggorek unta eeruwak paga penggaarak yiko nogogwaarak nogo, pilit kagak abet mbaruwak nduk, yiko nogogwaarak me, it ambinom yikkologo logogun lek aret o.

5 Inalitak nen yogo logonet, An ti, wulaga mbuuluk paga nen nanggween paga yabu eeppunuk, nawu nukkolage minggirak me, an Ala nen yorage kagak yoraga nogo mendek lek o. An yabu eeka aret o, yinuk, yogo logogun o.

6 Aap ambi nen it aap ti ambi yoge logonet, Ndi, keebe paga kawin kunik wonage ti, ngga nen eekkakerak o? Yoge kenok, at nen onggo yoge logonet, Lek o. Nawin kunik ti, noreewi iname wonage me eerogo panegaarak o, yinuk, yoraagin,” yegerak o.

Ndomba ndegeninaka wako mbaremengga, ma’narugun wone

7 At Omaawi Lombok Menggerak Aliku ALA nen ari logonet, “Kat wooluwak yi wae. Nandomba ndegeninaka mippereegirak nogo wake, At nimbirak kunik wonage nogo, polok togon warogo pege, Eerenok nduk, Kat wooluwak yi, pilak yu o. Pilak yinuk, nandomba ndegeninaka wake keenok, it ndomba ti, ma’narugun o. An napurilogwe ndeyak mendek iigak kwe, inoorogo piyaagin,” yegerak o.

8 Aliku ALA nen ari logonet, “Inoorogo piinet nage logonet, o yime abok aret nandomba ineebe kenagan wonogwe iinok, Mbere inooriminggirak kanggwi, ambi teppege, eerit nage logogin o.

9 It mbere inooke logonet, ambi teppigin nogo ti, mbuti perak at mendek mban aruwak nduk, kani paga worako mengga kwak, Mbuti emas etenggen yelok kaawak nduk, kani paga worako mengga kwak, It togop aret eerogo piyaagin o. Ti eeke neenok, it nen an nendage kunogo nggino yo’nugwi iinok, naruk konembunuk, yorage logogin o. It an napuri aret o, ari neenok, it nen kunduk, Aliku ALA ti, ninogoba aret o, yinuk, yogo logogun,” yegerak o.

13:7 Mat. 26:31, Mrk. 14:27

14 O age yobok Aliku ALA eegin tiyak yuurak wone

14:8 Yeti. 47:1, Ya. 7:38, Wayu 22:1 14:11 Wayu 22:3 14:16 Unde 23:39-43

1 Kinigen kiigak, kinamendek kugun waganogo tumbukkologo logorak eyom Aliku ALA nen koonogo pereegerak nogo aret ari woraagin o.

2 Ne ti paga it o Yerutalem tebenogo puwak nduk, aakumi inanebunu lombok abok aret at nen kuwak eerogo piyamenggerak o kota ti paga kwi’nari unggwogo logonet, o wurik me unggwit nanuk, inamendek kabelogo kologwe, kumi kwa yogwe iigak eeginabit nogwe, eeko logomenggaarik, it kota time wonogwe ando nogo, kugun wogoren o nda piya nogo logonet, it ando o kota time logowak nduk, mbo piyaagun o.

3 Ti eekwi iinok, Aliku ALA wundi nanuk, wim eekwi iinok eeke menggi kwak, it yi aakumi ndi aakumi ti, inom wim perenggolaagin o.

4 Ne ti paga at iyok o Yerutalem oonegen wundi wage menggim pa’nggwe puut Tayitun paga pi wambi wage kagak, puut Tayitun ti, oonegen wundi wage menggim pa’nggwe nen nok, oonegen kilu yi nage menggim pa’nggwe nggoguk ari mbaremenggi, puut peenok nggaganak langgo na'nok o omarip paga pa’nggwe ari nage, peenok nggaganak nogo langgo na'nok o ame pa’nggwe ari nage, eeke kagak, oolo time kobak kole aret nonggologo pigin o.

5 Ti eeke kenok, o kobak nonggologo pemenggerak ti, kota Yerutalem nen nok, o Atat kuli ari nagin me, aap Yekura mendek inowe endagembogut Utiya wonage eyom paga, o mi nuk-nuk eeke kenok, mbaganeegutak togop nogo aret tu ti paga mbaganumunggup o. Mbaganggwi kiigak, Aliku an nogoba Ala nogo, it kikak naka’lek alik leenak menggaarak abok aret inom wambi woraagun o.

6 Wogwe ne ti eyom paga oonegen eya inom, tut eya inom, laaluguragan eya inom, logogin lek aret kwe, eya eerak mban logogin o.

7 Ne ti alik lombok eerogo pigin me, o weege, o kiip age, eeke nogo lek age logonet, o liingge mban aret logogin o. Ti eeriyak nogo ti, Aliku ALA eenu menggerak o.

8 Ne ti paga niyo ineenik aganake logorak o Yerutalem paga nen wungge logomenggerik, mogonogo ando oonegen lagi wage menggim pa’nggwe laut paga kuni nage, ando oonegen kilu yi nage menggim pa’nggwe laut paga kuni nage, eeke kagak, o kibi age, o mayu wage, eeke logogin o.

9 Aliku ALA nogo o nggween paga yime abok aret inowe endagembogut a’nuk, wone lengganogo yorage logogin o. Ne ti paga inogoba ambit Aliku ALA aret arigin me, at endage mban yogo logogun o.

10 O Nggeba nen nok, kota Yerutalem ambokan o ame pa’nggwe kota Irimon kuli nggween ti abok aret, o Araba-Yoraran kobak nabunogo pereegi kwak eerogo pigin kwe, o kota Yerutalem perak, tu unggwogo menggam endage, Mbeniyamin, kuli nen nok, tu unggwogo menggam endage, Aa’nduk, kuli nen nok, tu unggwogo menggam, Unggu’me, kuli nen nok, o nggorek wurik Kananen kuli nen nok, aap endagembogut ake anggur aambiranggo menggam kuli, tiyarogon menggerak ndak-ndak aret eerogo pigin o.

11 O kota Yerutalem ti, aa’nduk maluk eerogo pogo nogogwa kwak ambinom eerogo pugun lek mondok nu’lek aret logogin me, o kota time aakumi iniki ugun tayenak wonogo logogun o.

12 Aliku ALA nen it yi aakumi ndi aakumi abok aret o Yerutalem mendek inom wim namburiyak nduk unggwi woraagun nogo, kugilingga inoba piyaagin nogo yi aret. It awo ineenik nugwi iigak, inagabolo nggono nggono wangge, inigen alome pili age, inamili pili a’nuk inambeme inobari ndi wuke, aganake logorak mendek inoba kwippiyaagin ti aret.

13 Ne ti paga Aliku ALA nen it aakumi ti, iniki naga’nuk kobak eerogo piige kenok, inalitik-inalitak inoreewi inom ineenggi pippit a’nuk, wat-wat yogo logogun o.

14 It Yekura mendek kunduk, it Yerutalem mendek inom wim nambuko logogun o. It aakumi inaagan-inambokan wonogwe nogo abok aret inamendek mbuti emas inom, mbuti perak inom, yum inom, ineenggi lingginiyak meek mondok iya lombok kuwak eekkologo logogun o.

15 Kugilingga ti mendek nen kuda inom, kuda mendek bagal inom, unta inom, keledai inom, inaanggumi inawooliyana wonogwe nogo abok aret inoba kwi’narigin o.

16 Togop aret eeke kenok, it yi aakumi ndi aakumi o Yerutalem wim eeri unggwogo logonet, yumbunogo piyamenggaarak wonogwe nogo, abok aret nen yi tahun ndi tahun paga inowe endagembogut at Omaawi Lombok Menggerak Aliku ALA nogo alut eekwi, inawooliya wurit wogogwaarak aberogo laago lariyak nogo lakwi, eeko logogun o.

17 Ndi, it yi aakumi ndi aakumi o nggween paga yime logogun nogo, inowe endagembogut at Omaawi Lombok Menggerak Aliku ALA alut eeruwok nduk, o Yerutalem wogwe lek iinok perak, it menggam o mayu wambi waga’lek aret logogin o.

18 Ndi, it Metit mendek nogo inom laago lari wogwe lek iinok, it menggam kunduk mayu waga’lek aret logogin mban. It yi aakumi ndi aakumi nen it Iterali mendek inawooliya wurit wogogwaarak aberogo laago lariyak o Yerutalem wogwe lek iinok, Aliku ALA nen kugilingga inoba kwippiyaagin nogo, o Metit mendek kunduk inoba kwippiyaagin o.

19 Ti eerogo piyaagin nogo ti, it Metit mendek inom, yi aakumi ndi aakumi abok aret inom, Iterali mendek inawooliya wurit wogogwaarak aberogo laago lariyak nogo, inom lari wogwe lek iinok, aaninggin inoba kwippiyoorak nogo ti aret.

20 Ne ti paga oone lobale eekak kuda paga pugunik nogo paga, Aliku ALA ake leenak o, yinuk, ayo waganogo pugwi, ndi, kuwali-kuwali Aliku ALA awi wurik me wonage nogo ti, togolowak alik leenak ake warogo kani kunggo menggam enaame pugwi kwak, pugwi, eerugun o.

21 Yi togolowak ndi togolowak lakak o kota Yerutalem wonage inom, o Yekura wonage inom, abok aret at Omaawi Lombok Menggerak Aliku ALA ake leenak logogin me, it aakumi abok aret Ala ake warogo wogoruwok nduk, woraanuk, togolowak ti, waganogo ti paga lako logogun o. Ndi, ne ti paga aap yi mendek ndi mendek kunit nega nogo, at Omaawi Lombok Menggerak Aliku ALA awi wurik me time inamendek kunggo logogun mondok lek aret o.

Takariya wone 14