Mbuku Amot yi, eebe mbanak pekkaga’lek logonet, aa’nduk pekkoorak yi o.
At Amot nogo, Ala nen yoge kagak yoraga aa’nduk age nagagerik, Ala yoge kagak yorage nagagerak nogo mbinik-mbenak eerogo liiru mbareegwaarak. At awi alom o Yekura wonagagerak kwe, Iterali mendek wone yorage nagagerak.
Ne ti eyom paga aakumi ineenggi warak lombok logonet, inale’nggen paga wonogwe, Ala wone mbanggo menggam kuwak eeriyak nogo ti, iya lombok mbakwi, eeko logonet, it Iterali wonogo menggam time iniki ugun tayenak aret wonogogwaarak. Togop wonogogwaarak kwe, at Amot nen iige logonet, it aakumi ineenggi warak nen it ineenggi lek nogo wi-wi eeginako logonet, inamendek waganogo it iname mban kuwak eerogo pakwi paga it mban ineenggi warak logonet, inale’nggen paga wonogwe iyareegerarak.
Ti eekwi paga Ala wone mbaniyak kuwak eeko menggam abet aret kuwak eeri nogo nogogwaarak kwe, iniki abe paga kuwak eekwi lek o. Ata, “Nit obeelom eekwi,” ninombaruwak nduk, eekwi iyareegerak. Togop eekwi iinok, at Amot nogo Ala nen wone yogetak nogo teppega’lek mondok telanogo yorage, “Ala nen kit aaninggin kinoba kwippinagagin o,” yinuk, yorage, eeke nagagerak.
Amot nen it yorage logonet, “Abe li’lak mban eekwi nogo ti, niyo wurik negen kinoba wage logogin o,” yinuk, yorage, it aakumi Iterali eegu piyareegwaarak nogo, “Ala nen iniki kunik eekkinabigin o,” yinuk, yorage, eeke nagagerak ti, pasal 5 ayat 15 paga wonage o.
--------------------------------
AMOT WONE
1 1 O mi awo waga’lek kagak tahun mbere eeppunuk, ambi awo eeke paga at aap Utiya aakumi Yekura mendek inowe endagembogut a’nuk wone lengganogo yorage, ndi, at aap Yowat aput Yerobeyam nogo, aakumi Iterali mendek inowe endagembogut a’nuk wone lengganogo yorage, eekwi iigak, aap ndomba ndegeninaka o Tekowa mendek ambi endage Amot nogo nen it Iterali mendek eeppiyoorak abi paga kage nagagerik, yoragagerak nogo yi aret o.
Aakumi inanebunu alik mendek aaninggin inoba piyoorak wone
2 At Amot nen ari logonet, “Singa oone nggwok ari menggi kwak Aliku ALA o Tiyon paga nen oone nggwok ari, O ngguurubu eeke menggi kwak, Yerutalem nen oone ari, Eeke logonet, It aap ndomba ndegeninaka nen inandomba inagari’ngga nenet nugu logowak nduk piigo menggam nogome mbuk age, Iri’ngga o puut Karemen paga wonage nogo teebat neyo-neyo nage, Eeke agaarik o,” yinuk, yereegerak o.
It Tiriya mendek eeppiyoorak wone
3 Aliku ALA nen ari logonet, “It aakumi o Ndamitik menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. Eyo mbanak paga paku kumbunuk, woromo anggen yigiko mengga kwak, it aakumi Ndamitik mendek nen togop aret inogogumbuk lombok logonet, It Nggileyat mendek inoorit nogogwaarak paga-
4 Aap Katayen wonage menggim kani nen lek eerogo nengge, Yugum pak wurik me aap endagembogut Mben-Karat awi wurik nogo kani nen lek eerogo nengge, eeruwak nduk, Kani kunik nappi woraagin o.
5 O kota Ndamitik pak ambe mbanak tu omaawi narak nogo yigirogo pege, It aakumi o Awen Kobappaga wonogwe nogo lek eerogo piige, At aap aakumi Mbet-Eren mendek abu’me piinok ambim mbanak eenggime porogo menggerak nogo lek eerogo pege, Eeke neenok, It aakumi o Aram menggaarak nogo kugun wogoren o Kit mbo piya nagun o,” yinuk, Aliku ALA nen aret yegerak o.
It Pilitin mendek eeppiyoorak wone
1:1 2End. 14:23-29, 15:1-7, 2Mbin. 26:1-23 1:2 Yow. 3:16 1:3-5 Yet. 17:1-3, Yer. 49:23-27,
Tak. 9:1 1:6-8 Yet. 14:29-31, Yer. 47:1-7, Yeti. 25:15-17, Yow. 3:4-8, Tep. 2:4-7, Tak. 9:5-7
6 Aliku ALA nen ari logonet, “It aakumi o Nggata menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It aakumi Nggata mendek nen aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,
7 An nen o Nggata kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o.
8 Aakumi o Atorot wonogwe nogo lek eerogo piige, At aap it Atekelon mendek abu’me piinok, ambim mbanak eenggime porogo menggerak nogo lek eerogo pege, Aakumi o Ekeron menggaarak nogo, an neenggi omaawi paga yigirogo piige, Eerit nage logonet, It aakumi Pilitin mendek eegu yumbunogo piyaminggirak nogo ambit iluk ambi teppigin lek abok aret inenggaawak lek eerogo piyaagin o,” yinuk, Aliku Itok Menggerak ALA nen aret yegerak o.
It Tirut mendek eeppiyoorak wone
9 At Aliku ALA nen ari logonet, “It aakumi o Tirut menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. Ninom kunik logorak wone yugu nogo kobak eerogo punuk, It aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,
10 An nen o kota Tirut yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It Erom mendek eeppiyoorak wone
11 Aliku ALA nen ari logonet, “It aakumi o Erom menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Erom mendek ti nen inawuri inabuwa mbaka’lek wooluwak nutik muguren nogwe, Inanini mi’nagak mban eekwi, Kani kunik wunuk mban ari menggi kwak inawuri inanini mban eeppiinet nogwe, Eeko nogogwaarak me,
12 An nen o Teman kani nappi woraminggirak paga, o Mbotera yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It Amon mendek eeppiyoorak wone
1:9-10 Yet. 23:1-18, Yeti. 26:1-28:19, Yow. 3:4-8, Tak. 9:1-4, Mat. 11:21, Luk. 10:13-14 1:11-12 Yet. 34:5-17, 63:1-6, Yer. 49:7-22, Yeti. 25:12-14, 35:1-15, Oba. 1-14, Mal. 1:2-5 1:13-15 Yer. 49:1-6, Yeti. 21:28-32, 25:1-7, Tep. 2:8-11
13 Aliku ALA nen ari logonet, “It aakumi o Amon menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Amon mendek nen inanggween nggwok aruwak nduk, kuli pugu kagak ya langgok eerogo pogo logonet, Kumi o Nggileyat mendek inabila wonogwe nogo, inaagalogwe kilirik-ndowanak eerogo wumbiinet nogo nogogwaarak me,
14 An nen o Araba yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o. Wim inoba kwi’nari unggwogwe eyom paga kumi-wa’le inoone ya-kwa agan nogwe, O wiya oone pu warit wage menggi kwak, wim eeko logonet, keekok piyanggogwe, Eekwi iigak,
15 It inowe endagembogut inom, at awuri inom eeko menggaarak inom, ambugwi aret wogoren mbo piya nagun o, yinuk, Aliku ALA nen wone yi abok aret yegerak me, yagi o,” yinuk, yoragagirak.
2 It Mowap mendek eeppiyoorak wone
1 Aliku ALA nen ari logonet, “It aakumi o Mowap menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Mowap mendek nen aap Erom mendek inowe endagembogut meek eerogo pogo logonet, owak nenenak kani kuneegwaarak wun aret agagerak me,
2 O Mowap time kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o. Wim inoba kwi’nari unggwogwe eyom paga kumi-wa’le inoone ya-kwa agan nogwe, Oone nggwok eeka trompet nogo oone pu eekwi, Eekwi iigak, It Mowap mendek nogo yagwandagwa agan nogo logonet, inoorak kambit nogo logogun o.
3 Aap inowe endagembogut inom, at awuri inom eeko menggaarak inom, abok aret lek eerogo inoorigin o,” yinuk, Aliku ALA nen aret yegerak o.
It Yekura mendek eeppiyoorak wone
4 Aliku ALA nen ari logonet, “It aakumi o Yekura menggaarak nogo ti, ne kenagan mban maluk eerulik ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Yekura mendek nogo Naliku an ALA nen eeko logorak wone yorage nagagirak nogo, taganogo mbo pugwi, An wone lengganogo yorage nagagirak nogo, pipporogo wonaga’lek tayoppugwi, Eeko logonet, It inombomini inagugi abe mendek lek, pilit kagak ayuk wuko nogogwaarak nogo aret mugurok nogo logonet, Nomo agan nogo nogogwaarak me,
5 An nen o Yekura yime kani nappi woraminggirak paga o Yerutalem yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It aakumi Iterali mendek eeppiyoorak wone
6 Aliku ALA nen ari logonet, “It aakumi o Iterali menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Iterali mendek nen aap iniki abe koonak inanomat mbanak inoba wonage nogo, Lek aruwak nduk ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo, lek aruwak nduk, ineebe yum nibinik paga onggo kuninakwi,
7 Iniyok paga liirubu aa’ngga eerogo pogo mengga kwak it aakumi ambi eekkoloorak meek nogo mendek togop aret eerogo piigwi, It aakumi tebenogo piigaarak nogo inawone liirogon mbangga’lek yaga-taga eerogo piigwi,
2:1-3 Yet. 15:1-16:14, 25:10-12, Yer. 48:1-47, Yeti. 25:8-11, Tep. 2:8-11
Aput-ogoba imbirak nen kwe tawe ambiret terak eerit nugwi paga an nendage alik leenak nogo maluk eerogo pugwi,
8 Inawu wogorogwe iinok, inayum nogoyum laalu porogo logorak waganggaatak nogo paga inagugi inake warogo wogorogo menggam eraanu time lenggenogo punuk, nogo yit nugwi, Wone taganogo pugwi iinok, onggo anggur amburu waganggaatak nogo, inagugi awi wurik me time nunggwi, Eeko menggaarak.
9 Eyo nggabina nggorek menggi kwak, Eyo teno omaawi ambik menggi kwak, It aakumi Amori mendek togop aret wonogwe iigak kwe, An naa’nduk nage logonet, ineebe lek eerogo piige, Eyo anggen ira’nggu’me yugu inom, omanggen wurabak inom, lek eerogo pege, Eereegirak o.
10 It aakumi Amori mendek wonogo menggam unde eeppatinuk logowak nduk, o Metit nen wogoren wundi wage, Tahun 40 eeke kagak, o karume wogoren nege,
11 An yorage neegak yoraga aruwak nduk, inapuri ando leenogo mippiige, Inapuri wologwe tawe inenggela’- me nen kumbuk mbambunuk nake leenak logowak nduk leenogo piige, Eereegirak o. Ti eereegirak nogo ti, it Iterali nogo nen, At nen abet aret ee’ninabeegerak nombakwi ilik?” yinuk, Aliku ALA nen aret yegerak o.
12 “Ti eereegirak kagak, it aap nake leenak logorak kumbuk mbaneegwaarak nogo, Anggur amburu nawak nduk inoone omaawi paga yorogwe, It an yorage neegak yoraga nogo, Wone yo’niroorak lek o, yinuk, yorogwe, Eereegwaarak o.
13 Togop me, nggweendo gandum anggen mbanak yebet ee’nuk nage me, aaninggin nen aan lebe eerogo pege menggi kwak, An togop aret eerogo piyaagin o.
14 It aap tu inogowa ambik wonogwe nogo, mbet-mbet kole mbaganggwi, It aap inomaawi ambik wonogwe nogo, inomaawi paga panggombunuk wonogwe, It aap wim wakaa’ngget nogo, inagap ndakko’nok mbaganggwi,
15 It aap ineegin-inomaale nogo paga ko wappunuk wonogwe, It aap tu inogowa ambik nogo, kole mbo mbaganggwi, It aap kuda paga kwi’na’nuk nega nogo, inagap ndakko’nok mbaganggwi, Eerugun mondok lek aret o.
16 It aap wim kalu-kalu mondok wakaa’ngget aret wonogwe kwe, ne ti eyom paga inagabeewak nggonenak mbaganugun o, yinuk, Aliku ALA nen wone yi abok aret yegerak me yokkiragi o,” yinuk, yoragagirak.
3 Ala nen yorage kagak yorogo nogogwaarak wone
2:9 Pel. 3:8-11 2:11 Lin. 6:1-8
1 Kit Iterali mendek yi wae. Kit o Metit nen wokkiren wundi wagagerak at apuri abok aret Aliku ALA nen eeppinagarak yokkirage yi, kinaruk liirogon aret konenggo logonip o.
2 “It aakumi ndarak logok lombok abok aret o nggween paga wonogwe iigak, It Iterali mban an napuri logowak nduk, leenogo piyareegirak me, It yi maluk ndi maluk eekwi paga aaninggin inoba kwippiyaagin o, Aliku ALA nen aret yegerak me, yokkiragi o,” yinuk, yoragagirak.
Ala nen yorage kagak yoraga nen eeko logorak wone
3 It aap ineebe mbere nen, “Nit nimbirak ndime nawok o,” yinuk, Wone koonogo puulik kagak it imbirak noorak op mbakop?
4 Singa iri’ngga ku’mbanak me logonet, at nengge menggerak awo kwaarogo nengga’lek kagak oone maluk ndi wuke, Ndi, singa awooluk yi mendek ndi mendek kwaarogo nengga’lek awina logonet, eyak ndi wuke,
5 Towe wariyak keele awo yilunogo pega’lek kagak, towe enggaanok nggerok togon wake, Pagi wariyak ta’na pugume waga’lek kagak eyo anggin mbanak nogo aan lebek ari, Eeke menggerak mbakop?
6 O kota ambime oone nggwok eeka trompet nogo oone pu eekwi iinok, aakumi inogut nggigik ari menggerak lek mbakop? Ndi, at Aliku ALA nen it aakumi o kota ambime menggaarak nogo, aaninggin inoba kwippiyoorak koongga’lek kagak Aaninggin inoba kwi’nage menggerak mbakop?
7 At Aliku Itok Menggerak ALA nen eeriyak koongge ti, Ayeloman mini at nen yorage kagak yoraga nogo, Wone yoraga’lek kagak it perak togon yorogo logorak lek aret mbako logonip o.
8 Singa nen oone nggwok muk yegerak me, aap ta nen agabiti mbaka’lek logorak mbakop? Ti ndak-ndak at Aliku Itok Menggerak ALA nen wone muk yegerak me, ta nen wone ti, yoraga’lek puk logorak mbakop?
It Iterali menggam ariyak yoragagerak wone
9 O Atorot time yugum pak wurik me, aakumi inarum logorak inawi wurik inom, O Metit time yugum pak wurik me, aakumi inarum logorak inawi wurik inom, Nogome wone eerogo nappit noorak nogo yi aret. Aliku ALA nen ari logonet, “It o Tamariya koorok puut-puut time kuwak ari woraawak o. Kuwak ari woraanuk, it aakumi o time inenggela’me abu naalopkaalop eerit nugwi, It-it at ambi tebenogo pegak eerit nugwi, Eekwi ti, inigen iyaagun o.
10 Yugum pak wurik me aakumi inarum logorak inawi wurik me time menggaarak nogo nen, Aakumi a’me nggelok eeppiiga’- lek inoone omaawi paga aakumi inageerok waganggwi, Wi-wi aganako logonet, inamendek waganggwi, ee’nuk, Iname pati unggwogo menggaarak o,” yinuk, Aliku ALA nen ti aret yegerak o.
11 Togop eekwi me, at Aliku Itok Menggerak ALA nen ari logonet, “It aakumi ti, wonogo menggam yendok-wandok abok aret inawim nen wanggerinakwi, Yugum pak wurik me inarum menggaarak inawi wurik nogo yigirogo pugwi, Aakumi inagugun wogo inawi nggwok abe wurik me wonage nogo kabologo waganggwi, Eerugun o,” yinuk, yegerak o.
12 Aliku ALA nen ari logonet, “Singa nen ndomba wappunuk nengge logonet, iyok a, aruk a, ti mban yumbunogo mbo pegetak me, At aap ndomba ndegeninaka nogo kwaakkage menggi kwak, It Iterali mendek o Tamariya wonogwe nogo togop aret inagap ndarogo piige neenok, Nogo yegak lit yarak mban kologwe, Inanobak anep mbanak mban waganggwi, eerugun, yegerak me, yagi o,” yinuk, yoragagirak.
13 At Omaawi Lombok Menggerak Aliku ninogoba Ala nen ari logonet, “It Yakup paga wiganak eeppiyoorak wone yi, inaruk liirogon konembunuk yorogo logorak,” yegerak nogo yi aret.
14 “It Iterali mendek maluk lombok eekwi iinok, aaninggin inoba kwippiyoorak eyom ti paga, It inagugi ake warogo wogorogo menggam o Mbeten paga ogobakkigirik nogo, yigirogo wurabit nage logonet, Warogo wogoragak ogobakkigirik irip to aago nogo, kalenogo nggween paga wurabit nagin o.
15 It inawi o togwi eeke kenok, ari unggwagak wurik nogo yinik-minik eerogo pege, Mo andi kenok, ari unggwagak wurik nogo langgunik-panggunik eerogo nggimbege, Inawi wurik me wanggalep inom, meeli inom, ogobakkigirik nabenak nogo yigirogo pege, Inoweewi inendagembogut inawi nggwok abe wurik nogo, yigiriknoonom eerogo pege, Eerigin o,” yinuk, Aliku ALA nen aret yegerak me, yokkiragi o.
Pasal 4
1Tapi amok ambik puut Tamariya o Mbatan mendek mengga kwak kit kumi o puut Tamariya mendek kinaanogum anggen yi wae. Kit nen aakumi ineenggi lek wi-wi eerogo piigwi, It aakumi tebenak mendek meek inombako logonet, yeenggwaaraga’lek mbo piigwi, “Anggur amburu nawok nen wo’nira woraanip o,” yinuk, kinogonggelomini yorogwe, Eeko monggotak yi, Wone yokkirage yi, kinaruk konenggo logonip o.
2 At Aliku Itok Menggerak ALA nogo maluk eekeelik yegetak a’me nggelok mban eeke menggerak me, At ari kit abet mbarumunggup nduk kumbuk mbangge logonet, “Inogobak me ya’nggage nggelembunuk, inalitak lombok nigiren wundi nogwe, Yikwe warak nikkenok wunggo mengga kwak inalitak nigiren wunggwi, Eeginaburak eyom abet aret ari woraagin me,
3 Inalitak nigiren tu koonak yugum pak wurik ambe nggaganak me time wundi nogwe, Inalitak nigiren wundi nanuk, ineebe o Keromon pa’nggwe mbo piya nogwe, Eerugun o,” yinuk, Aliku ALA nen aret yegerak me, yokkiragi o.
Iterali Ala wone ambinom koneniyak ineebi mbareegwaarak wone
3:14 2End. 23:15
4 “It nen o Mbeten nogo logomenggaarik, maluk lombok eekwi, O Nggilagan nogo logomenggaarik, maluk iya lombok eerit nugwi, Ko’lu-kii’me o kubondendok nen nake warogo wo’niriyak nogo wonok wogo logomenggaarik, Nogo mbere yinuk, yi mendek ndi mendek ambi yendenogo nake pugu nogo wonok niri wogwe,
5 Wa! yo’nogo logonet, oroti piike menggerak mendek inom punuk, worarak nogo nake kani kunggwi, Inale’nggen nen, We wogori, yinuk, wo’nogo nagaatik, iniki tiyappatit nugu logonet, agan nugwi, Eekwi ti aret eerit nogo logowak o. Ti eerit nogo menggaarak nogo ti, it Iterali inikilom mbakwi nogo aret me, inobaalombok eerit nogo logowak o,” yinuk, at Aliku Itok Menggerak ALA nen aret yegerak me, yokkiragi o.
Inomaluk mbo punuk woroorak ineebi mbareegwaarak wone
4:11 Wak. 19:24
6 “Ti eekwi iinok, an nen it wonogo menggam kota-kota abok aret inambi nengga’lek wo’no lu yogo logowak nduk eeppiige, Yi yaga’lelo ndi yaga’lelo inambi mbuuluk eerogo piige, Eereegirak kwe, Inomaluk mbo punuk iniyokan yungguninuk an neya waga’lek aret menggaarak o,” yinuk, Aliku ALA nen aret yegerak me, yokkiragi o.
7 “Tut kenagan penembunuk, anggen mbaniyak aret kwe, o mayu wambi wage kero, tu nake, O kota ambime mayu wuppi wage logonet, o kota ambime mayu wuppi waga’lek mbo piige, Ineyabu ambi yagat wurik me o mayu wogorage logonet, ineyabu ambi yagat wurik me o mayu wogoraga’lek mbuk eerogo piige, Eereegirak paga-
8 It aakumi o kota ambime nen kota ambime niyo kwaarit nagak eeko logonet, niyo mbuuluk nenggak eereegwaarak kwe, Niyo abu mban aret wonogogwaarak o. Ti eereegirak kwe, inomaluk mbo punuk iniyokan yungguninuk neya waga’lek aret menggaarak o,” yinuk, at Aliku ALA nen aret yegerak o.
9 “An nen gandum yarak inom, eyo anggur yarak inom, maluk eerogo pege logonet, Pili-loba eerogo pit nage, kanenep eerogo pit nage, Eyo wuli paga inom, eyo tayitun yarak paga inom, wurin nen pup eerogo nawak nduk nappiya wage, Eereegirak kwe, Inomaluk mbo punuk iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
10 “It aakumi Metit mendek eeginabeegi kwak it Iterali inenggela’me kugilingga nappi wage, It inapuri aap tawe nogo wooluwak paga inooruwak nduk eeppiige, Inaguda aakumi nen wonok ma’naruwak nduk, eeppiige, Inawooliya wurik me obari kenok inogobak ko’nok yuwak nduk eerogo pege, Eereegirak kwe, Inomaluk mbo punuk, iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
11 “O Torom Nggomora imbirak eerogo pereegi kwak it wonogo menggam o kota-kota time togop aret eerogo piige, Kani kunggaatak nengge me kiinogo waganggo mengga kwak wogonabuwak nduk eerogo piige, Eereegirak kwe, Inomaluk mbo punuk, iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
12 “Iterali mendek ti, an togop aret eerogo piyaagin o. It Iterali ti, inogoba an Ala ninom lambunugun me, it ti, pipuk eeko logowak o, yinuk, Aliku ALA nen wone yi abok aret yegerak me, yokkiragi o,” yoragagirak.
13 At puut-puut ogobakkigirogo pit wage, O wiya warit wage logorak eerogo pege, At iniki mbake nogo aakumi kin paga yorage, O weeruwak nduk, eerogo punuk, o kiip eerogo pege, O nggween paga yime puut-puut tiyarogon time iyok pit nage, Eeke menggerak endage ti, Omaawi Lombok Menggerak Aliku Ala aret o.
5 It Iterali eekwi paga inale yereegerak wone
1 Kit Iterali mendek yi, wae. Kit eeppinagarak ndawi paga kinale ndawi an ari yi, kinaruk liirogon konenggo logonip o.
2 Kolaga aap kigin waka’lek maluk eeppogo mengga kwak it Iterali ti, Nggween paga ngginnogogwaarak me, peebi mi’narugun lek aret o. It inanggween paga lombok ngginnogo mbareegwa, mbo piyareegwaarak me, Aap ambi nen it mippiyoorak lek aret o.
3 Aliku Itok Menggerak ALA nen ari logonet, “It aap Iterali mendek wim eeka inawi kota ambime nen wim eeruwok nduk ineebe seribu aret wundi nagun kwe, Iname iniyokan woraagun nogo ti, ineebe we 100 mban aret wogwe, Ndi, o kota alik ambime nen wim eeruwok nduk ineebe 100 wundi nagun kwe, Iname iniyokan woraagun nogo ti, ineebe we 10 mban aret wogwe, Eerugun o,” yinuk, yegerak o.
Ineenik logorak mugurok noorak yoragagerak wone
4 At Aliku ALA nen kit Iterali paga wiganak mendek yokkiroorak yo’negerak nogo yi aret. “It an mu’neren wogwe iinok, ineenik aret logogun o.
5 It Nggilagan wonogwe nogo abet aret kugun wogoren mbo piya nogwe, O Mbeten nogo pup eerogo pugwi, Eerugun me, O Mbeten nawi o, yinuk, nogwe, O Nggilagan nogwe, Niyo mbaninuk o Mberetiyeba wunda nogwe, Eerugwaarik,” yegerak o.
6 Togop me, at Aliku ALA mugurok wogwe kiinok, kineenik aret logomunggup o. Ndi, lek kenok, kani nen yi mendek ndi mendek lek eerogo nengge menggi kwak, Kit kinanebunu Yutup paga wiganak mendek togop aret lek eerogo pinagage, O Mbeten kani nenet nage me, aakumi nen nogonogo puurak lek kwak, eerogo pinagage, Eerigin o.
Obeelom eekwi nogo maluk eerogo pugwi iinok, yoragagerak wone
5:8 Ayup 9:9, 38:31
7 Eekaatak a’me nggelok eeppiigwi nogo abut laganogo alepale eerogo piigwi, Obeelom eeppiinet nugwi wone nogo tek eerogo mbo pugwi, Eekwi kit yi, ao!
8 Laaluguragan o mbogut paga ninggirik kuwak aago Kartika inom, Belantik inom, wakkagagerak nogo nen o apit aago wonage nogo obaane’me o weeruwak nduk, eerogo pege, O liingge wonage nogo obaane’- me oonikiya eerogo pege, Niyo nggwok yenggenak laut nogo, wiiremenggerak wundi wage kenok, nggween paga kilirogo wunabit nage, Eeke menggerak endage ti, Aliku ALA aret o.
9 At nen it aap inomaawi lombok menggam nogo ne ambit liingge lek eerogo pit nage, Inawi yugum pak wurik nogo langgunogo pit nage, Eeke menggerak o.
10 It aap tu unggwogo menggam logonet, inowak loonggwi nogo kineebi inombakwi, Inowak loonggo logonet, liirogon mban inowak loonggwi nogo meek inombakwi,
11 It aap ambi eekkoloorak meek mendek nogo wi-wi aganako logonet, inambi gandum anggen mbanak nogo ndinogo waganggwi, Eeko monggotak o. Togop me, kinawi nggwok yugum abe amuni mbanak paga wurumonggotak kwe, o time ye mbanggola unggwogwe, Anggur awi yarumonggotak abe mili kwit agan laganemenggerak kwe, amburu toologo nunggwi, Eeko logomunggup lek o.
12 Kit maluk ambik eerit nugwi, Ndi, kinomaluk iya negen eeriyak koonggwi, Eekwi an neenu me nduk, yokkiragi o. It aap iniki abe koonak nogo piyak-payak eerogo piigwi, Maluk eerak onggo, Ndogop puurak o, yugu kagak, Puurak lek, yoraawak nduk, inawu wogorogwe iinok, waganggwi, It aap tebenak mendek nogo inowak loonggo logonet, inawone abe mbangga’lek yaga-taga eerogo piigwi, Eeko monggotak me,
13 It aap iniki warak nogo nen, “Inowak loonggwi eyom ti, maluk ariyak eyom aret me,” yinuk, Inoone ambi yaga’lek puk aret menggaarak o.
Kambuurak inom, ineenik logorak inom, yoragagerak wone
14 Kit kineenik logomunggup nduk, maluk eeriyak mbakwi nogo mbo punuk, Obeelom eeriyak mendek mban mugurok nogo logonip o. Ti eekwi kiinok, “Aliku ALA ninom wonage o,” yinuk, yogo monggotak ndak-ndak At Omaawi Lombok Menggerak Aliku Ala kinom aret logogin o.
15 At Omaawi Lombok Menggerak Aliku Ala nen kit Yutup mendek eegu yumbunik wonogwe nogo, kinabuwa mbake kagak eerukwak, Maluk eeriyak kineebi mbakwi, Obeelom eeriyak kiniki kunik eekwi, Ndi, inowak loonggo menggam aakumi inowak loonggo logonet, eekaatak ndak-ndak eeppiigwi, Eeko logonip o.
16 At Omaawi Lombok Menggerak nogoba Aliku Ala nen yegerak nogo yi aret. “It aakumi inawi kota-kota wonogwe nogo leenggu maarit nogwe. It aap tu paga tu paga wonogwe nogo nen le agan nogwe, Le yi woraanip o, yinuk, it aap yabu eeka wiirogwe, Ndi, it leendawi tiyangga nen leendawi tiyani woraawak nduk, inayonggo piigwi, Eerugun o.
17 An nen inenggela’me ambi eeppiigak nagin me, Anggur yarak me time abok aret leenggu maarit nogo logogun o,” yinuk, Aliku ALA nen aret yegerak o.
Aliku Ala woroorak eyom yoragagerak wone
18 Aliku ALA woroorak ne nogo, “Ari woraawak lak, ao,” yinuk, yogwe nogo, kinabuwa o! Ne ti eyom ti, o eya arigin lek o apit aret ariyak me, Aliku ALA woroorak ne nogo, “Ari woraawak lak, ao,” yinuk, nonggop nduk yogo ogotik?
19 Aap ambi singa nen mugurok nage kenok, kole mbagangge me, beruang imbirak laabuk ari menggi kwak, Aap ambi ame unggwi nanuk, eenggi kobat nabenak paga, “Piga,” yinuk, eeke me, waalo nen eenggi nogo eyak mbangge menggi kwak, Aliku ALA woroorak ne ti, togop aret o.
20 At Aliku ALA woroorak ne nogo ti, o eya arigin lek o apit age, O eya mbuuluk ambi wonage lek, o angget apit aago wonage, Eerigin nogo lek a?
Ala alut eeko logonet eekwi nogo eebi mbareegerak wone
21 “Nalut eeko logonet, inale’- nggen nen laago lakwi ti, abu neebi lombok mbake, ogole warak lombok mbake, Eeke minggirak o. Nalut eeruwok nduk, kuwak eekwi ti kunduk, nale’nggen mbake mondok lek aret!
22 It nen an nake warogo kani kunggwi, anggen yigirik nake pi wogwe, eekwi ti, an wagangge, Ninom lambunuwok o, yinuk, inaanggumi abe amok warak kenok warogo wo’nugwi ti kunduk, an nenegen pekkage, Eerigin lek o.
23 It ndawi piyanggwi ti, Nda nen yogwe a nayok, mbake, It nggitat oone eekwi ti, naruk koneniyak neebi mbake, Eeke agarik o.
24 Niyo wu’nuk wage menggi kwak, eekaatak onggo a’me nggelok eeppiinet nugwi, Niyo porok ariilik, nage mban menggi kwak, aakumi obeelom eeppiinet nugwi, Eeko logowak o.
25 It Iterali mendek ti, o karume wogoren wage logonet, tahun 40 eeke kagak, nake inaanggumi warogo wo’nugwi, Anggen yigirik nake pugwi, Ee’nip o, Yinuk, yorage nagagirak ya?
26 Lek kwe, inagugi ogut ineenggi paga ogobakkigireegwaarak kugi inowe endage Takut nogo inom, Laaluguragan ayuk wukwi kugi Kewan inom, tiyappit wonok nugwi iyareegirak me,
27 An nen wogoren o Ndamitik kagak nda time mbo piya nagin o,” yinuk, at Omaawi Lombok Menggerak endage Aliku ALA nen aret yegerak me, yokkiragi o.
6 “Iniki ugun wonogwe iinok, inabuwa o,” yoragagerak wone
5:21-22 Yet. 1:11-14 5:25-27 Nap. 7:42-43
It aakumi Iterali mendek nen, “Yeenggwa niraawak o,” yinuk, Aakumi ando tebenak iigak, it ambi abu tiyanak menggaarak inenggela’me nen kit kinengga warak kiya wogo menggaarak abok aret O Tiyon paga, “Niniki ugun obeelom wonogwe,” mbakwi inom, Puut Tamariya paga, “Niniki ugun tayenak nu’lek aret wonogwe,” mbakwi inom, kinabuwa o!
2 Kit nen o Kalene nogo logomonggotik, kinigen yambonit nugwi, Time nen o kota nggwok lombok Kamat nogo pekka nogwe, Ti’nuk, it aap Pilitin wonogo menggam o Nggat pekka nogwe, Eeko logonip o. Eeko logomonggotik, it inabu’me piinok menggam ti abe, ndi, kit kinabu’me piinok monggo’- nom ti meek, It inanggween ti nggwok, ndi, kit kinanggween ti mbuuluk, kaamunggup mbakop?
3 “Aaninggin ninoba kwippinani woroorak ti, abu nda lombok wonage,” mba’nuk, eerit nugwi kwe, Kinogogumbuk logonet eerit nugwi paga aaninggin kinoba pinagarak nogo, koorok panggonogo pati wogo ogotik o.
4 Kit nogo yogo monggo’nom abu abe wanggalep meeli nabenak paga windak wonogwe, Kwi’nagak abe ndoonak paga kwi’ndak wonogwe, Tapi-ndomba inaagalogwe inamok tigiluk inoorogo larogo nunggwi,
5 Nggitat eeko logonet, we lek ndawi wakwi, Ndawut ndawi tiyangge logonet, nggitat eeke nagagi kwak, “Nit togop aret eeruwi,” mba’nuk, eerit nugwi,
6 Anggur amburu niyoowak eno korok togon toologo nenggak mban eekwi, Kinagabolo anen pera yuwak nduk, amburu abu abe kinagabolo paga mbenanggologwe, Eekwi kwe, It Yutup paga wiganak nogo inenggaawak lek ogogwaarak paga, “Yi ee’ninakerak, ao,” mbaka’lek aret wonogwe kiigi o.
7 Togop aret me, aa’nduk lombok wokkiren mbo pinagi noorak nogo kit aret me, Kinale’nggen nen laago lakwi inom, we ugun tayenak-mbayenak nugwi inom, ti lek aret arigin o.
Iterali iniki tiyappit nugwi iinok, eebi mbareegerak wone
8 At Aliku Itok Menggerak ALA owak mbanggolage logonet, Omaawi Lombok Menggerak Aliku Ala nen yegerak nogo yi aret. “It Yakup mendek iniki wogoppakwi nogo ogole mbake, Yugum pak wurik me, inarum logorak inawi wurik nogo neebi lombok mbake, Eeke me, O kota yi inom, yi mendek ndi mendek o kota wonage inom, abok aret inawim ineenggime piyaagin o,” yinuk, yegerak o.
9 Aap ineebe 10 o ambime kiraarak wonogwe iigak kwe, it kunduk kambugun o.
10 Kanggwi iinok, inowe-inawot nen wogo logomenggaarik, ineebe kambemenggaarak nogo, oome time nen wogoren wundi nogo logonet, aap kangga’lek awo kiraarak wonage kero yogwi, “It aap eegu ineenik o yime ambi wonogwe ilik?” Yogo mbaremengga, at nen, “Lek o,” ari kenok, it nen at yogwi, “Koone yugun o. At Aliku ALA endage kunduk ari mage o,” yinuk, yorugun o.
11 At Aliku ALA nen wone lengganogo wumbegerak me, o nggwok abe wurik nogo yigirik-noonom eerogo pit nugwi, O mbuulogwe wurik nogo yinik-minik eerogo pit nugwi, Eerugun o.
12 Kuda puut-puut yugum paga mbe agan nogwe, Lembu nen yugum anggen nggininik paga nggween amok mbanogo pugwi, Eeriyak op mbakop? Lek kwe, kit nen eekaatak a’me nggelok eeppiinet nugwi nogo mbo punuk, obaane’me kanggo menggaarak mendek eeppiinet nugwi, Ndi, obeelom eeppiinet nugu logorak anggen yuurak nogo obaane’me ale-pale eerogo piinet nugwi, Eekotak o.
13 Kit nen o Lorabat tebenggologo nogotik, ale’nggen mbakwi, Ndi, o Karanayim kunduk tebenogo punuk, yogo logonet, “O ti, nit ninomaawi lombok paga tebenggologoorak nogo lek a?” yinuk, wogoppakwi, eekwi kiigi o.
14 Kit togop aret eekwi me, at Omaawi Lombok Menggerak Aliku Ala nen ari logonet, “It Iterali ti, tebenogo piyaawak nduk, aakumi alik mendek ambi inikime mambiyaminggirak wogo logonet, Ineebe ya yigirogo piigak nda yigirogo piigak eerit o Kamat tu unggwogo menggam nen nok, niyo Araba aa’nggi paga kuli piya nagun o,” yinuk, yegerak me, yokkiragi o. +
7 Wurin nen eeppiyoorak kagagerak wone
1 Aliku Itok Menggerak ALA nen nabinggaanggo paga yo’nereegerak nogo yi aret. Aap endagembogut ake iri’ngga mbanogo wogogo mbareegwa, obaane’me yarak nogo agarit lagangge kagak, nabinggaanggo paga Aliku Itok Menggerak ALA nen wurin ambik lombok kuwak eerogo piinet nage kagagirak.
2 Kuwak eerogo piyareegerak nogo, “Nenet nanip o,” yorage mbareegi, wirin ti nen iri’ngga o time wonage abok aret pup eerogo nenet nugwi iige nagagirik, “Kaliku Kitok Menggendak ALA wae. Kapuri inomaluk kami eerogo piyet o. It Yakup mendek ineebe mbuuluk me, inenggaawak lek arukwak nonggop togon eeko logogun o?”
3 Yoge mbareegi, Aliku ALA nen eeppiyoorak mbareegerak nogo tayoppunuk, “Eeke kagandak ti, an nen eeppiyaagin lek o,” yinuk, Aliku ALA nen aret an yo’nege kagagirak.
Kani paga eeppiyoorak kagagerak wone
4 Aliku Itok Menggerak ALA nen nabinggaanggo paga yo’nereegerak nogo yi aret. Aliku Itok Menggerak ALA nen aaninggin inoba piyoorak nduk, kani kunik wiireegerak nogo wage logonet, niyo kole yenggenak laut nggween abu’na wonage nogo, porok togon nenet wambi nage, nggween inom nenet nage, eeke kagagirak.
5 Ti eeke kage nagagirik, an nen, “Kaliku Kitok Menggendak ALA wae. Kat togop eeke mage ubi! Puk aru o. It Yakup mendek ineebe mbuuluk me, inenggaawak lek arukwak nonggop togon eeko logogun o?”
6 Yoge mbareegi, at Aliku ALA nen inoba piyoorak mbareegerak nogo tayoppunuk, “Eeke kagandak ti kunduk, an nen eeppiyaagin lek o,” yinuk, Aliku Itok Menggerak ALA nen aret an yo’nege kagagirak.
Keele wakkagak paga wakkaanuk, eeppiyoorak kagagerak wone
7 Nabinggaanggo paga ambi yo’nereegerak nogo yi aret. At Aliku ALA keele paga yugum pugunik wakkagak nogo eenggime keele wakkagak paga yugum pak wurik me, koorok taati mi’ndak wonage kagagirak.
8 Kage mbareegi, at Aliku ALA nen an yo’nege logonet, “Amot wae. Kat nano mendek kenegen kagan o?” Yo’nege mbareegi, an nen, “Keele wakkagak paga yugum pugunik keenggime wonage kagi o.” Yoge mbareegi, at nogoba nen an yo’nege logonet, “An napuri Iterali ti, keele wakkagak paga yugum pugunik nogo inenggela’me wuppiminggirak ndak-ndak lek kenok, an nen it teppiyaagin lek, aaninggin inoba kwippiyaagin o.
9 Aaninggin inoba kwippiige logonet, it Itak paga wiganak nen puut-puut paga warogo wogorogo menggam nogome abok aret yigirik-noonom eerogo pege, It Iterali inagugi ayuk wurit nogo menggam alik leenak wonage nogo minogo pit nage, Eeke logonet, At aap endagembogut Yerobeyam paga wiganak kunduk, nawooluwak paga nggaluk nawak nduk, mi’narigin o,” yinuk, an yo’nege kagagirak.
Amot Amatiya imbirak eereegwaarak wone
10 Kage mbareegi, at aap Amatiya Ala unde o Mbeten eeke nagagerak nogo nen aap Iterali inowe endagembogut Yerobeyam nogo, wone wonok yori woraawak nduk, nappiya wagagerak wogo nogogwaarik, at yogo logonet, “At Amot nogo, kat kimbirak ogookkoloorak nduk, aakumi Iterali inom wone koonogo pege me, at nen ari nogo paga aakumi pilak yogo logonet, ineebi nen kat koone mbo puurak nduk eeko agaarik o.
11 At Amot nen ari logonet, Aap Yerobeyam nogo wooluwak paga warak kangge, Ndi, it Iterali nogo inanggween paga nen kugun wogoren mbo piya nogwe, Eerugun abet mbako logonip o, yinuk, ari wonage agaarik o.”
12 Yogo mbareegwa, wiireegerak nage mbareegi, at Amatiya nen Amot nogo yoge logonet, “Abinggaanggo kaga yi, nak a! O Yekura paga time nak. Kambi noorak time kwaakkolage, time nen kogoba Ala nen yokkege kagak, yoranet nege, eeke a nak o.
13 O yime ti, aap endagembogut nen ayuk wuke, aakumi at abu’me piinok menggim nen ayuk wukwi, eeko menggam alik leenak o Mbeten yime aret me, o Mbeten yime kogoba Ala nen yokkege kagak, yoragak eeriyak ti mondok mage o!”
14 Yoge mbareegi, at Amot nen aap Amatiya nogo yoge, “An yi, aap Ala nen yorage kagak yoraga nogo mendek wonageelik o. Ndi, it aap ti mendek inaput kunduk wonageelik mban. An ti, ndomba ndegeninake, eyo wuli yarak unde wake, eeka an aret wonagagirak o.
15 Togop aret wonagagirak kwe, at Aliku ALA nen an ndomba ndegeninabit nege me, wo’nake nagagerik, yo’nege logonet, An nen yokkege neegak napuri Iterali yorage logonok nduk, nak o.
16 Yo’nereegerak me, yogondak Aliku ALA nen wone yokkege yi, karuk konengge logot o. Kat nen ari logonet, Kit Iterali eeppinagarak, Ala nen yo’nege kenok yokkiragi o, yinuk, yorage, At Itak ombowologwe wiganak paga, Yogop eeppinagagin o, yinuk, yorage, Eeriyak ti mage o, Yinuk, yo’negendak me,
17 At Aliku ALA nen ari logonet, At aap Amatiya akwe nogo, o kota time terak wuka aret age, Apuri wologwe-komologwe wooluwak paga inoorak kanggwi, At anggween nogo keele wakkagak paga wakkaanuk, tumbukkologwe, At eebe lombok kambuwak nduk, aakumi Ala abu ineenggo’lek wonogo menggam paga pi nogwe, Eerugun o. Ndi, it Iterali ti, inanggween lombok paga nen abet aret kugun wogoren mbo piya nagun, yegerak me, yokkigi o,”yinuk, yoreegirak.
8 Muun yarak me anggen mbanak yonggolak kagagerak wone
1 Aliku Itok Menggerak ALA nen nabinggaanggo paga titi’nereegerak nogo ti, muun yarak me anggen kole agaarak mbanak yonggolak nogo aret o.
2 Titi’nege logonet, “Amot wae. Kat nano mendek kenegen kagan o?” Yo’nege mbareegi, “Muun yarak me, anggen kole agaarak mbanak yonggolak kagi o.” Yoge mbareegi, Aliku ALA nen an yo’nege logonet, “It an napuri Iterali eeppiyoorak eyom nogo muk panggoni wagaarak me, an nen ambinom inili eerogo teppiyaagin lek eeppiyaagin aret o,” yinuk, yo’nege kagagirak.
3 “Ne ti eyom paga o nggwok abe wurik me ndawi wako logomenggaarak nogo obaane’me leendawi piyanggwi, ineebe inoorak ambik aret mbo nappiinet namenggaarak iigwi, eeko logonet, inoone lek inigen keme yogwe puk aret logogun o,” yinuk, Aliku Itok Menggerak ALA nen aret yegerak me, yokkiragi o.
Iterali aaninggin inoba kwippiyoorak wone
4 It aakumi tebenak ambi eekkoloorak meek nogo mendek wiwi aganakwi, It aakumi ineenggi lek o yime wonogwe nogo lek eerogo piigwi, Eekwi kit yi, Wone yi, kinaruk konenggo logonip o.
5 Kit nen, “Gandum ambinom kunggo logowok nduk, tut ngget penengge kenok, eeko logorak koonak nogo mandom wobok yi nage, Ndi, gandum yigirik ambinom kunggo logowok nduk, nogo 6 yippunuk, ko’lu paga yonggonggologo logonet, eeko logorak koonak nogo mandenom yobok yi nage, Eeruwak lak, ao,” Yinuk, yogwe kiigi o. Kit nen aakumi wi-wi aganako logonet, yi mendek ndi mendek wakkagak paga wakkaanuk, Aaninggin tiyarogon kagak, teberogon eerogo wogorogwe, Wu teberogon puurak kagak, wu tiyarogon puwak nduk, yorogwe, Eeko logonet,
6 It aap tebenak mendek inanomat mbanak inoba wonage nogo lek aruwak nduk, ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo lek aruwak nduk, ineebe yum nibinik paga onggo kuninakwi, Ndi, gandum ameneno mbo pega’lek inom kagak, togolowak paga wakkagak onggo kologwe, Eeko monggotak o.
7 At Aliku ALA nen ari logonet, “It Iterali maluk eeko nogogwaarak nogo, an nami arigin mondok lek o, yinuk, it Yakup mendek nen inogoba tiyappanega nendage kumbatinuk yagi o.
8 It eeppiigwi paga o nggween paga yime wonogwe abok aret inaganak wake, Yi o ndi o wonogwe abok aret inayum maluk nibinik mendek yippunuk, iniki wakkologwe, Eerugun nogo lek a? Niyo Nin wu’nuk nage logonet, lagi nage, Ti’nuk, yi alelo tiyak-tebek eeppunuk, poro agan wandi nage, Eeke menggi kwak, O yi togop aret eerigin o,” yinuk, yegerak o.
Oonegen abinak lek arigin yereegerak wone
9 “Ne ti paga ariyak nogo ti, o liingge kagak oonegen kilu yi nage, O liingge wonage kagak, o nggween paga apit age, Eeruwak nduk, eeppigin o.
10 Inale’nggen nen laago lako logomenggaarak nogo obaane’me inayum maluk nibinik mendek yippunuk, iniki wakkologwe, Ndawi piyanggo logomenggaarak nogo obaane’me leenggu maakwi, Inayum nibinik maluk yippunuk nugwi, Ineeruwak inanobak puluk ko eerogo pakwi, Aap ambi aput ambolom kangge kenok, leenggu maake kwak maakwi, Eeko logowak nduk, Eerogo piyaagin o. Ti eeriminggirak paga ne ti eyom ariyak age yubuni nage kagak, iniki abu alik negen wakko’net unggwogo logogun o,” yinuk, at Aliku Itok Menggerak ALA nen yegerak o.
Mbi-niyo abu eeginaburak yoreegerak wone
11 “Ne ti eyom ari wage paga An nen o yime mbi noogelo mondok alik negen nappi woraagin nogo ti, Mbi-niyo abu eeginaburak ti mendek nappi woraagin lek o. Ata, Naliku ALA noone lombok inaruk konenggo logorak ti, mbiniyo abu negen eeginabigin o.
12 Aliku ALA oone konenuwok lak, ao, yinuk, niyo nggwok laut aru-ogwe yenggenak paga kwaarit nogwe, Niyo ambut pa’nggwe nen niyo eneeri pa’nggwe nogwe, Eerugun kwe, Ambit iluk ambi kwaakkaagun mondok lek aret o.
13 Ne ti eyom paga Wologwe-komologwe ineebe yaambu-laambu abe tawe nogo an noone abu nen inambuluk pit nagun o.
14 Inagugi inenggali aga Tamariya mendek endage kumbunuk yogwe, It Ndan mendek inagugi eenik menggerak yi wae, yogwe, It Mberetiyeba mendek inagugi eenik menggerak yi wae, yinuk, yogwe, Eeko logomenggaarak nogo It kunduk an noone abu nen kwaarit nogo logonet, koya-koya nggween paga ngginnarit namenggaarak me, Pilak togon mi’narugun lek aret o,” yinuk, Aliku Itok Menggerak ALA nen aret yegerak me, yokkiragi o.
9 Warogo wogogo menggam Ala mi’ndak wonage kagagerak wone
1 At Ala ti, warogo wogogo menggam koorok taati mi’ndak wonage nabi paga kage neegak, at nen ari logonet, “Tunggambe aago abok aret nuknuk agan nawak nduk, an nawi wurik yugum owak mippugu irip me yawi mondok tela eerogo wake, Yugum owak mippugu paga o wurik panggonak wonage nogo langgunogo aakumi inanobak paga kwippi wangge, Eeru o. Eeke keenok, ando piyamenggendak ti, an nen wooluwak paga inooriminggirak me, It ambi nen kole mbaganggwi, It ambi nen inagap ndakko’nok mbaganggwi, Eerugun mondok lek aret o.
2 It kole aakumi kambunuk nogo menggam nggween ogu kabunit wambi nanuk wonogwe iigak kwe, time nen aret an neenggi omaawi paga yabonogo nippiya wage, It kole mbogut paga lagi namenggaarak kwe, time nen aret yabonogo nggween paga wuppiya wage,
3 It nen kole puut Karemen paga kumaa’nari namenggaarak kwe, an kwaaganabit nage logomenggirik, piginabunuk, time nen wogoren wage, An wonage me nen kole niyo nggwok laut inikime ogu lombok kumaa’nari wambemenggaarak kwe, waalo nggwok nogo nen eyak mbaninabuwak nduk, yoge,
4 It inawim nen kugun wogoren mbo piya nogwe iinok, Kinawooluwak paga inoorogo piyaanip o, yinuk, yorage, Eerigin o. An nenegen wogoren nege logogin nogo ti, obeelom eerogo piyaakit nduk lek o. Ata, maluk eerogo piyaakit nduk, nenegen wogoren nege logogin o,” yinuk, ari kagagirak o.
5 At Omaawi Lombok Menggerak Aliku ninogoba Ala nen o nggween yi, mbaanggage kenok, nuk-nuk eeke, It aakumi o nggween paga menggaarak abok aret nen le yogwe, Niyo Nin wuke, ti’nuk, niyo Metit poro agan wangge, eeke menggi kwak, o nggween abok aret yi, togop aret eeke,
6 At o mbogut oolo ya’i awi wurogo pege, At awi wurik eyak o nggween paga yime yinogo pi wambi wage, Niyo nggwok yenggenak laut nogo wiiremenggerak owagam wage kenok, o nggween paga yime kilirogo pit nage, Eeke menggerak endage ti, Aliku ALA aret o.
Ala nen leenogo piyareegerak nogo mbo piyareegerak wone
7 “It Iterali mendek ti, an nggwok lombok liippiige, ndi, it Kuti mendek ti, mbuuluk negen liippiige, eeke minggirak mbakop? It Iterali mendek o Metit nen wogoren wundi wagagirak nogo kwak, it aakumi Pilitin mendek o Kereta nen wogoren wage, It Tiriya mendek o Kit nen wogoren piya wage, Eerulik mbakop? Eereegirak aret o,” yinuk, Aliku ALA nen aret yegerak o.
8 “Aakumi inowe endagembogut abu’me menggam maluk mban eekwi yi, Naliku Nitok Minggirak an ALA nen abet aret nenegen wogonake minggirak o. It togop eekwi paga o nggween paga yime nen inenggaawak lek eerogo piyaagin kwe, It Yakup paga wiganak perak, mondok lek eerogo piyaagin lek o,” yinuk, Aliku ALA nen aret yegerak o.
9 “Nggweengguma ameneno wonok nawak nduk, muun yarak piyak-piyak eeko logonet, ambit iluk ambi kiluk togon wanggeelik kwak, It Iterali mendek aakumi inanebunu lombok inenggela’me togop aret wogoren nawak nduk, yoraminggirak kwe, Ambit iluk ambi pibi’na wambugun lek aret o.
10 It aakumi maluk eeko menggaarak an napuri inenggela’me logonet, Aaninggin mendek ambi nit ninoba age, Maluk mendek ambi nit ninoba kwi’nage, eerigin lek o, Yinuk, yogo menggaarak nogo, wooluwak paga inoorak wambugun o,” yinuk, yegerak o.
Iterali aa’nduk wonogogwa kwak eerogo piyoorak wone
9:11-12 Nap. 15:16-18
11-12 “It Iterali nen aakumi o Erom eegu yumbunik wonogwe nogo inabu’me piigwi, It yi aakumi ndi aakumi, Nogoba Ala aret o, yinuk, yogo logomenggaarak nogo, inabu’me piigwi, Eeruwak nduk, Ne ti eyom paga Ndawut awooliya wurik langgunnagagerak nogo obaane’me wuke, Yugum pak wurik langgunogo pereegwaarak nogo, obaane’- me wuke logonet, aa’nduk wurik wonagagi kwak eerogo pege, Eerigin,” yegerak o Eerigin, yegerak yi, Aliku ALA nen aret yegerak me, yokkiragi o.
13 Aliku ALA nen ari logonet, “Aap ambi gandum anggen mbangge me, it aap yabu eeka nen peleppegak yabu eeri nogwe, Ndi, ambi anggur awi yake me, aap anggur anggen aambirangga nen peleppegak amburu aambiranit nogwe, Eeriyak eyom panggoni wage agaarik o. Puut-puut paga anggur yarak amburu tene-tene wangge, Puut-puut teberogon paga niyo nage menggi kwak, anggur amburu taganinuk nage, Eeke logogin me,
14 An napuri Iterali kugun wogoren mbo piya namenggaarak nogo, iniyokan wogoren piya wage neenok, Inawi kota-kota langgu-langgu aago nogo, obaane’me wurogo patinuk wonogwe, Ineyabume anggur yaremenggaarak paga amburu toologo nunggwi, Eyo anggen yege menggerak mendek yabume yaremenggaarak paga anggen abe mban mbanogo nunggwi, Eeko logogun o.
15 It Iterali ti, awi yako mengga kwak, inanggween lombok paga inakom kwippiyaminggirak me, Inanggween wogoragagim time nen it aakumi ambi nen nggiginogo wumbiyaagun mondok lek aret o, yinuk, at Aliku kinogoba Ala nen wone yi abok aret yegerak me, yokkiragi o,” yinuk, yoragagirak.
Amot 9
At Amot nogo, Ala nen yoge kagak yoraga aa’nduk age nagagerik, Ala yoge kagak yorage nagagerak nogo mbinik-mbenak eerogo liiru mbareegwaarak. At awi alom o Yekura wonagagerak kwe, Iterali mendek wone yorage nagagerak.
Ne ti eyom paga aakumi ineenggi warak lombok logonet, inale’nggen paga wonogwe, Ala wone mbanggo menggam kuwak eeriyak nogo ti, iya lombok mbakwi, eeko logonet, it Iterali wonogo menggam time iniki ugun tayenak aret wonogogwaarak. Togop wonogogwaarak kwe, at Amot nen iige logonet, it aakumi ineenggi warak nen it ineenggi lek nogo wi-wi eeginako logonet, inamendek waganogo it iname mban kuwak eerogo pakwi paga it mban ineenggi warak logonet, inale’nggen paga wonogwe iyareegerarak.
Ti eekwi paga Ala wone mbaniyak kuwak eeko menggam abet aret kuwak eeri nogo nogogwaarak kwe, iniki abe paga kuwak eekwi lek o. Ata, “Nit obeelom eekwi,” ninombaruwak nduk, eekwi iyareegerak. Togop eekwi iinok, at Amot nogo Ala nen wone yogetak nogo teppega’lek mondok telanogo yorage, “Ala nen kit aaninggin kinoba kwippinagagin o,” yinuk, yorage, eeke nagagerak.
Amot nen it yorage logonet, “Abe li’lak mban eekwi nogo ti, niyo wurik negen kinoba wage logogin o,” yinuk, yorage, it aakumi Iterali eegu piyareegwaarak nogo, “Ala nen iniki kunik eekkinabigin o,” yinuk, yorage, eeke nagagerak ti, pasal 5 ayat 15 paga wonage o.
--------------------------------
AMOT WONE
1 1 O mi awo waga’lek kagak tahun mbere eeppunuk, ambi awo eeke paga at aap Utiya aakumi Yekura mendek inowe endagembogut a’nuk wone lengganogo yorage, ndi, at aap Yowat aput Yerobeyam nogo, aakumi Iterali mendek inowe endagembogut a’nuk wone lengganogo yorage, eekwi iigak, aap ndomba ndegeninaka o Tekowa mendek ambi endage Amot nogo nen it Iterali mendek eeppiyoorak abi paga kage nagagerik, yoragagerak nogo yi aret o.
Aakumi inanebunu alik mendek aaninggin inoba piyoorak wone
2 At Amot nen ari logonet, “Singa oone nggwok ari menggi kwak Aliku ALA o Tiyon paga nen oone nggwok ari, O ngguurubu eeke menggi kwak, Yerutalem nen oone ari, Eeke logonet, It aap ndomba ndegeninaka nen inandomba inagari’ngga nenet nugu logowak nduk piigo menggam nogome mbuk age, Iri’ngga o puut Karemen paga wonage nogo teebat neyo-neyo nage, Eeke agaarik o,” yinuk, yereegerak o.
It Tiriya mendek eeppiyoorak wone
3 Aliku ALA nen ari logonet, “It aakumi o Ndamitik menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. Eyo mbanak paga paku kumbunuk, woromo anggen yigiko mengga kwak, it aakumi Ndamitik mendek nen togop aret inogogumbuk lombok logonet, It Nggileyat mendek inoorit nogogwaarak paga-
4 Aap Katayen wonage menggim kani nen lek eerogo nengge, Yugum pak wurik me aap endagembogut Mben-Karat awi wurik nogo kani nen lek eerogo nengge, eeruwak nduk, Kani kunik nappi woraagin o.
5 O kota Ndamitik pak ambe mbanak tu omaawi narak nogo yigirogo pege, It aakumi o Awen Kobappaga wonogwe nogo lek eerogo piige, At aap aakumi Mbet-Eren mendek abu’me piinok ambim mbanak eenggime porogo menggerak nogo lek eerogo pege, Eeke neenok, It aakumi o Aram menggaarak nogo kugun wogoren o Kit mbo piya nagun o,” yinuk, Aliku ALA nen aret yegerak o.
It Pilitin mendek eeppiyoorak wone
1:1 2End. 14:23-29, 15:1-7, 2Mbin. 26:1-23 1:2 Yow. 3:16 1:3-5 Yet. 17:1-3, Yer. 49:23-27,
Tak. 9:1 1:6-8 Yet. 14:29-31, Yer. 47:1-7, Yeti. 25:15-17, Yow. 3:4-8, Tep. 2:4-7, Tak. 9:5-7
6 Aliku ALA nen ari logonet, “It aakumi o Nggata menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It aakumi Nggata mendek nen aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,
7 An nen o Nggata kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o.
8 Aakumi o Atorot wonogwe nogo lek eerogo piige, At aap it Atekelon mendek abu’me piinok, ambim mbanak eenggime porogo menggerak nogo lek eerogo pege, Aakumi o Ekeron menggaarak nogo, an neenggi omaawi paga yigirogo piige, Eerit nage logonet, It aakumi Pilitin mendek eegu yumbunogo piyaminggirak nogo ambit iluk ambi teppigin lek abok aret inenggaawak lek eerogo piyaagin o,” yinuk, Aliku Itok Menggerak ALA nen aret yegerak o.
It Tirut mendek eeppiyoorak wone
9 At Aliku ALA nen ari logonet, “It aakumi o Tirut menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. Ninom kunik logorak wone yugu nogo kobak eerogo punuk, It aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,
10 An nen o kota Tirut yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It Erom mendek eeppiyoorak wone
11 Aliku ALA nen ari logonet, “It aakumi o Erom menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Erom mendek ti nen inawuri inabuwa mbaka’lek wooluwak nutik muguren nogwe, Inanini mi’nagak mban eekwi, Kani kunik wunuk mban ari menggi kwak inawuri inanini mban eeppiinet nogwe, Eeko nogogwaarak me,
12 An nen o Teman kani nappi woraminggirak paga, o Mbotera yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It Amon mendek eeppiyoorak wone
1:9-10 Yet. 23:1-18, Yeti. 26:1-28:19, Yow. 3:4-8, Tak. 9:1-4, Mat. 11:21, Luk. 10:13-14 1:11-12 Yet. 34:5-17, 63:1-6, Yer. 49:7-22, Yeti. 25:12-14, 35:1-15, Oba. 1-14, Mal. 1:2-5 1:13-15 Yer. 49:1-6, Yeti. 21:28-32, 25:1-7, Tep. 2:8-11
13 Aliku ALA nen ari logonet, “It aakumi o Amon menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Amon mendek nen inanggween nggwok aruwak nduk, kuli pugu kagak ya langgok eerogo pogo logonet, Kumi o Nggileyat mendek inabila wonogwe nogo, inaagalogwe kilirik-ndowanak eerogo wumbiinet nogo nogogwaarak me,
14 An nen o Araba yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o. Wim inoba kwi’nari unggwogwe eyom paga kumi-wa’le inoone ya-kwa agan nogwe, O wiya oone pu warit wage menggi kwak, wim eeko logonet, keekok piyanggogwe, Eekwi iigak,
15 It inowe endagembogut inom, at awuri inom eeko menggaarak inom, ambugwi aret wogoren mbo piya nagun o, yinuk, Aliku ALA nen wone yi abok aret yegerak me, yagi o,” yinuk, yoragagirak.
2 It Mowap mendek eeppiyoorak wone
1 Aliku ALA nen ari logonet, “It aakumi o Mowap menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Mowap mendek nen aap Erom mendek inowe endagembogut meek eerogo pogo logonet, owak nenenak kani kuneegwaarak wun aret agagerak me,
2 O Mowap time kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o. Wim inoba kwi’nari unggwogwe eyom paga kumi-wa’le inoone ya-kwa agan nogwe, Oone nggwok eeka trompet nogo oone pu eekwi, Eekwi iigak, It Mowap mendek nogo yagwandagwa agan nogo logonet, inoorak kambit nogo logogun o.
3 Aap inowe endagembogut inom, at awuri inom eeko menggaarak inom, abok aret lek eerogo inoorigin o,” yinuk, Aliku ALA nen aret yegerak o.
It Yekura mendek eeppiyoorak wone
4 Aliku ALA nen ari logonet, “It aakumi o Yekura menggaarak nogo ti, ne kenagan mban maluk eerulik ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Yekura mendek nogo Naliku an ALA nen eeko logorak wone yorage nagagirak nogo, taganogo mbo pugwi, An wone lengganogo yorage nagagirak nogo, pipporogo wonaga’lek tayoppugwi, Eeko logonet, It inombomini inagugi abe mendek lek, pilit kagak ayuk wuko nogogwaarak nogo aret mugurok nogo logonet, Nomo agan nogo nogogwaarak me,
5 An nen o Yekura yime kani nappi woraminggirak paga o Yerutalem yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.
It aakumi Iterali mendek eeppiyoorak wone
6 Aliku ALA nen ari logonet, “It aakumi o Iterali menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Iterali mendek nen aap iniki abe koonak inanomat mbanak inoba wonage nogo, Lek aruwak nduk ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo, lek aruwak nduk, ineebe yum nibinik paga onggo kuninakwi,
7 Iniyok paga liirubu aa’ngga eerogo pogo mengga kwak it aakumi ambi eekkoloorak meek nogo mendek togop aret eerogo piigwi, It aakumi tebenogo piigaarak nogo inawone liirogon mbangga’lek yaga-taga eerogo piigwi,
2:1-3 Yet. 15:1-16:14, 25:10-12, Yer. 48:1-47, Yeti. 25:8-11, Tep. 2:8-11
Aput-ogoba imbirak nen kwe tawe ambiret terak eerit nugwi paga an nendage alik leenak nogo maluk eerogo pugwi,
8 Inawu wogorogwe iinok, inayum nogoyum laalu porogo logorak waganggaatak nogo paga inagugi inake warogo wogorogo menggam eraanu time lenggenogo punuk, nogo yit nugwi, Wone taganogo pugwi iinok, onggo anggur amburu waganggaatak nogo, inagugi awi wurik me time nunggwi, Eeko menggaarak.
9 Eyo nggabina nggorek menggi kwak, Eyo teno omaawi ambik menggi kwak, It aakumi Amori mendek togop aret wonogwe iigak kwe, An naa’nduk nage logonet, ineebe lek eerogo piige, Eyo anggen ira’nggu’me yugu inom, omanggen wurabak inom, lek eerogo pege, Eereegirak o.
10 It aakumi Amori mendek wonogo menggam unde eeppatinuk logowak nduk, o Metit nen wogoren wundi wage, Tahun 40 eeke kagak, o karume wogoren nege,
11 An yorage neegak yoraga aruwak nduk, inapuri ando leenogo mippiige, Inapuri wologwe tawe inenggela’- me nen kumbuk mbambunuk nake leenak logowak nduk leenogo piige, Eereegirak o. Ti eereegirak nogo ti, it Iterali nogo nen, At nen abet aret ee’ninabeegerak nombakwi ilik?” yinuk, Aliku ALA nen aret yegerak o.
12 “Ti eereegirak kagak, it aap nake leenak logorak kumbuk mbaneegwaarak nogo, Anggur amburu nawak nduk inoone omaawi paga yorogwe, It an yorage neegak yoraga nogo, Wone yo’niroorak lek o, yinuk, yorogwe, Eereegwaarak o.
13 Togop me, nggweendo gandum anggen mbanak yebet ee’nuk nage me, aaninggin nen aan lebe eerogo pege menggi kwak, An togop aret eerogo piyaagin o.
14 It aap tu inogowa ambik wonogwe nogo, mbet-mbet kole mbaganggwi, It aap inomaawi ambik wonogwe nogo, inomaawi paga panggombunuk wonogwe, It aap wim wakaa’ngget nogo, inagap ndakko’nok mbaganggwi,
15 It aap ineegin-inomaale nogo paga ko wappunuk wonogwe, It aap tu inogowa ambik nogo, kole mbo mbaganggwi, It aap kuda paga kwi’na’nuk nega nogo, inagap ndakko’nok mbaganggwi, Eerugun mondok lek aret o.
16 It aap wim kalu-kalu mondok wakaa’ngget aret wonogwe kwe, ne ti eyom paga inagabeewak nggonenak mbaganugun o, yinuk, Aliku ALA nen wone yi abok aret yegerak me yokkiragi o,” yinuk, yoragagirak.
3 Ala nen yorage kagak yorogo nogogwaarak wone
2:9 Pel. 3:8-11 2:11 Lin. 6:1-8
1 Kit Iterali mendek yi wae. Kit o Metit nen wokkiren wundi wagagerak at apuri abok aret Aliku ALA nen eeppinagarak yokkirage yi, kinaruk liirogon aret konenggo logonip o.
2 “It aakumi ndarak logok lombok abok aret o nggween paga wonogwe iigak, It Iterali mban an napuri logowak nduk, leenogo piyareegirak me, It yi maluk ndi maluk eekwi paga aaninggin inoba kwippiyaagin o, Aliku ALA nen aret yegerak me, yokkiragi o,” yinuk, yoragagirak.
Ala nen yorage kagak yoraga nen eeko logorak wone
3 It aap ineebe mbere nen, “Nit nimbirak ndime nawok o,” yinuk, Wone koonogo puulik kagak it imbirak noorak op mbakop?
4 Singa iri’ngga ku’mbanak me logonet, at nengge menggerak awo kwaarogo nengga’lek kagak oone maluk ndi wuke, Ndi, singa awooluk yi mendek ndi mendek kwaarogo nengga’lek awina logonet, eyak ndi wuke,
5 Towe wariyak keele awo yilunogo pega’lek kagak, towe enggaanok nggerok togon wake, Pagi wariyak ta’na pugume waga’lek kagak eyo anggin mbanak nogo aan lebek ari, Eeke menggerak mbakop?
6 O kota ambime oone nggwok eeka trompet nogo oone pu eekwi iinok, aakumi inogut nggigik ari menggerak lek mbakop? Ndi, at Aliku ALA nen it aakumi o kota ambime menggaarak nogo, aaninggin inoba kwippiyoorak koongga’lek kagak Aaninggin inoba kwi’nage menggerak mbakop?
7 At Aliku Itok Menggerak ALA nen eeriyak koongge ti, Ayeloman mini at nen yorage kagak yoraga nogo, Wone yoraga’lek kagak it perak togon yorogo logorak lek aret mbako logonip o.
8 Singa nen oone nggwok muk yegerak me, aap ta nen agabiti mbaka’lek logorak mbakop? Ti ndak-ndak at Aliku Itok Menggerak ALA nen wone muk yegerak me, ta nen wone ti, yoraga’lek puk logorak mbakop?
It Iterali menggam ariyak yoragagerak wone
9 O Atorot time yugum pak wurik me, aakumi inarum logorak inawi wurik inom, O Metit time yugum pak wurik me, aakumi inarum logorak inawi wurik inom, Nogome wone eerogo nappit noorak nogo yi aret. Aliku ALA nen ari logonet, “It o Tamariya koorok puut-puut time kuwak ari woraawak o. Kuwak ari woraanuk, it aakumi o time inenggela’me abu naalopkaalop eerit nugwi, It-it at ambi tebenogo pegak eerit nugwi, Eekwi ti, inigen iyaagun o.
10 Yugum pak wurik me aakumi inarum logorak inawi wurik me time menggaarak nogo nen, Aakumi a’me nggelok eeppiiga’- lek inoone omaawi paga aakumi inageerok waganggwi, Wi-wi aganako logonet, inamendek waganggwi, ee’nuk, Iname pati unggwogo menggaarak o,” yinuk, Aliku ALA nen ti aret yegerak o.
11 Togop eekwi me, at Aliku Itok Menggerak ALA nen ari logonet, “It aakumi ti, wonogo menggam yendok-wandok abok aret inawim nen wanggerinakwi, Yugum pak wurik me inarum menggaarak inawi wurik nogo yigirogo pugwi, Aakumi inagugun wogo inawi nggwok abe wurik me wonage nogo kabologo waganggwi, Eerugun o,” yinuk, yegerak o.
12 Aliku ALA nen ari logonet, “Singa nen ndomba wappunuk nengge logonet, iyok a, aruk a, ti mban yumbunogo mbo pegetak me, At aap ndomba ndegeninaka nogo kwaakkage menggi kwak, It Iterali mendek o Tamariya wonogwe nogo togop aret inagap ndarogo piige neenok, Nogo yegak lit yarak mban kologwe, Inanobak anep mbanak mban waganggwi, eerugun, yegerak me, yagi o,” yinuk, yoragagirak.
13 At Omaawi Lombok Menggerak Aliku ninogoba Ala nen ari logonet, “It Yakup paga wiganak eeppiyoorak wone yi, inaruk liirogon konembunuk yorogo logorak,” yegerak nogo yi aret.
14 “It Iterali mendek maluk lombok eekwi iinok, aaninggin inoba kwippiyoorak eyom ti paga, It inagugi ake warogo wogorogo menggam o Mbeten paga ogobakkigirik nogo, yigirogo wurabit nage logonet, Warogo wogoragak ogobakkigirik irip to aago nogo, kalenogo nggween paga wurabit nagin o.
15 It inawi o togwi eeke kenok, ari unggwagak wurik nogo yinik-minik eerogo pege, Mo andi kenok, ari unggwagak wurik nogo langgunik-panggunik eerogo nggimbege, Inawi wurik me wanggalep inom, meeli inom, ogobakkigirik nabenak nogo yigirogo pege, Inoweewi inendagembogut inawi nggwok abe wurik nogo, yigiriknoonom eerogo pege, Eerigin o,” yinuk, Aliku ALA nen aret yegerak me, yokkiragi o.
Pasal 4
1Tapi amok ambik puut Tamariya o Mbatan mendek mengga kwak kit kumi o puut Tamariya mendek kinaanogum anggen yi wae. Kit nen aakumi ineenggi lek wi-wi eerogo piigwi, It aakumi tebenak mendek meek inombako logonet, yeenggwaaraga’lek mbo piigwi, “Anggur amburu nawok nen wo’nira woraanip o,” yinuk, kinogonggelomini yorogwe, Eeko monggotak yi, Wone yokkirage yi, kinaruk konenggo logonip o.
2 At Aliku Itok Menggerak ALA nogo maluk eekeelik yegetak a’me nggelok mban eeke menggerak me, At ari kit abet mbarumunggup nduk kumbuk mbangge logonet, “Inogobak me ya’nggage nggelembunuk, inalitak lombok nigiren wundi nogwe, Yikwe warak nikkenok wunggo mengga kwak inalitak nigiren wunggwi, Eeginaburak eyom abet aret ari woraagin me,
3 Inalitak nigiren tu koonak yugum pak wurik ambe nggaganak me time wundi nogwe, Inalitak nigiren wundi nanuk, ineebe o Keromon pa’nggwe mbo piya nogwe, Eerugun o,” yinuk, Aliku ALA nen aret yegerak me, yokkiragi o.
Iterali Ala wone ambinom koneniyak ineebi mbareegwaarak wone
3:14 2End. 23:15
4 “It nen o Mbeten nogo logomenggaarik, maluk lombok eekwi, O Nggilagan nogo logomenggaarik, maluk iya lombok eerit nugwi, Ko’lu-kii’me o kubondendok nen nake warogo wo’niriyak nogo wonok wogo logomenggaarik, Nogo mbere yinuk, yi mendek ndi mendek ambi yendenogo nake pugu nogo wonok niri wogwe,
5 Wa! yo’nogo logonet, oroti piike menggerak mendek inom punuk, worarak nogo nake kani kunggwi, Inale’nggen nen, We wogori, yinuk, wo’nogo nagaatik, iniki tiyappatit nugu logonet, agan nugwi, Eekwi ti aret eerit nogo logowak o. Ti eerit nogo menggaarak nogo ti, it Iterali inikilom mbakwi nogo aret me, inobaalombok eerit nogo logowak o,” yinuk, at Aliku Itok Menggerak ALA nen aret yegerak me, yokkiragi o.
Inomaluk mbo punuk woroorak ineebi mbareegwaarak wone
4:11 Wak. 19:24
6 “Ti eekwi iinok, an nen it wonogo menggam kota-kota abok aret inambi nengga’lek wo’no lu yogo logowak nduk eeppiige, Yi yaga’lelo ndi yaga’lelo inambi mbuuluk eerogo piige, Eereegirak kwe, Inomaluk mbo punuk iniyokan yungguninuk an neya waga’lek aret menggaarak o,” yinuk, Aliku ALA nen aret yegerak me, yokkiragi o.
7 “Tut kenagan penembunuk, anggen mbaniyak aret kwe, o mayu wambi wage kero, tu nake, O kota ambime mayu wuppi wage logonet, o kota ambime mayu wuppi waga’lek mbo piige, Ineyabu ambi yagat wurik me o mayu wogorage logonet, ineyabu ambi yagat wurik me o mayu wogoraga’lek mbuk eerogo piige, Eereegirak paga-
8 It aakumi o kota ambime nen kota ambime niyo kwaarit nagak eeko logonet, niyo mbuuluk nenggak eereegwaarak kwe, Niyo abu mban aret wonogogwaarak o. Ti eereegirak kwe, inomaluk mbo punuk iniyokan yungguninuk neya waga’lek aret menggaarak o,” yinuk, at Aliku ALA nen aret yegerak o.
9 “An nen gandum yarak inom, eyo anggur yarak inom, maluk eerogo pege logonet, Pili-loba eerogo pit nage, kanenep eerogo pit nage, Eyo wuli paga inom, eyo tayitun yarak paga inom, wurin nen pup eerogo nawak nduk nappiya wage, Eereegirak kwe, Inomaluk mbo punuk iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
10 “It aakumi Metit mendek eeginabeegi kwak it Iterali inenggela’me kugilingga nappi wage, It inapuri aap tawe nogo wooluwak paga inooruwak nduk eeppiige, Inaguda aakumi nen wonok ma’naruwak nduk, eeppiige, Inawooliya wurik me obari kenok inogobak ko’nok yuwak nduk eerogo pege, Eereegirak kwe, Inomaluk mbo punuk, iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
11 “O Torom Nggomora imbirak eerogo pereegi kwak it wonogo menggam o kota-kota time togop aret eerogo piige, Kani kunggaatak nengge me kiinogo waganggo mengga kwak wogonabuwak nduk eerogo piige, Eereegirak kwe, Inomaluk mbo punuk, iniyokan yungguninuk an neya waga’lek aret menggaarak o,” yinuk, Aliku ALA nen aret yegerak o.
12 “Iterali mendek ti, an togop aret eerogo piyaagin o. It Iterali ti, inogoba an Ala ninom lambunugun me, it ti, pipuk eeko logowak o, yinuk, Aliku ALA nen wone yi abok aret yegerak me, yokkiragi o,” yoragagirak.
13 At puut-puut ogobakkigirogo pit wage, O wiya warit wage logorak eerogo pege, At iniki mbake nogo aakumi kin paga yorage, O weeruwak nduk, eerogo punuk, o kiip eerogo pege, O nggween paga yime puut-puut tiyarogon time iyok pit nage, Eeke menggerak endage ti, Omaawi Lombok Menggerak Aliku Ala aret o.
5 It Iterali eekwi paga inale yereegerak wone
1 Kit Iterali mendek yi, wae. Kit eeppinagarak ndawi paga kinale ndawi an ari yi, kinaruk liirogon konenggo logonip o.
2 Kolaga aap kigin waka’lek maluk eeppogo mengga kwak it Iterali ti, Nggween paga ngginnogogwaarak me, peebi mi’narugun lek aret o. It inanggween paga lombok ngginnogo mbareegwa, mbo piyareegwaarak me, Aap ambi nen it mippiyoorak lek aret o.
3 Aliku Itok Menggerak ALA nen ari logonet, “It aap Iterali mendek wim eeka inawi kota ambime nen wim eeruwok nduk ineebe seribu aret wundi nagun kwe, Iname iniyokan woraagun nogo ti, ineebe we 100 mban aret wogwe, Ndi, o kota alik ambime nen wim eeruwok nduk ineebe 100 wundi nagun kwe, Iname iniyokan woraagun nogo ti, ineebe we 10 mban aret wogwe, Eerugun o,” yinuk, yegerak o.
Ineenik logorak mugurok noorak yoragagerak wone
4 At Aliku ALA nen kit Iterali paga wiganak mendek yokkiroorak yo’negerak nogo yi aret. “It an mu’neren wogwe iinok, ineenik aret logogun o.
5 It Nggilagan wonogwe nogo abet aret kugun wogoren mbo piya nogwe, O Mbeten nogo pup eerogo pugwi, Eerugun me, O Mbeten nawi o, yinuk, nogwe, O Nggilagan nogwe, Niyo mbaninuk o Mberetiyeba wunda nogwe, Eerugwaarik,” yegerak o.
6 Togop me, at Aliku ALA mugurok wogwe kiinok, kineenik aret logomunggup o. Ndi, lek kenok, kani nen yi mendek ndi mendek lek eerogo nengge menggi kwak, Kit kinanebunu Yutup paga wiganak mendek togop aret lek eerogo pinagage, O Mbeten kani nenet nage me, aakumi nen nogonogo puurak lek kwak, eerogo pinagage, Eerigin o.
Obeelom eekwi nogo maluk eerogo pugwi iinok, yoragagerak wone
5:8 Ayup 9:9, 38:31
7 Eekaatak a’me nggelok eeppiigwi nogo abut laganogo alepale eerogo piigwi, Obeelom eeppiinet nugwi wone nogo tek eerogo mbo pugwi, Eekwi kit yi, ao!
8 Laaluguragan o mbogut paga ninggirik kuwak aago Kartika inom, Belantik inom, wakkagagerak nogo nen o apit aago wonage nogo obaane’me o weeruwak nduk, eerogo pege, O liingge wonage nogo obaane’- me oonikiya eerogo pege, Niyo nggwok yenggenak laut nogo, wiiremenggerak wundi wage kenok, nggween paga kilirogo wunabit nage, Eeke menggerak endage ti, Aliku ALA aret o.
9 At nen it aap inomaawi lombok menggam nogo ne ambit liingge lek eerogo pit nage, Inawi yugum pak wurik nogo langgunogo pit nage, Eeke menggerak o.
10 It aap tu unggwogo menggam logonet, inowak loonggwi nogo kineebi inombakwi, Inowak loonggo logonet, liirogon mban inowak loonggwi nogo meek inombakwi,
11 It aap ambi eekkoloorak meek mendek nogo wi-wi aganako logonet, inambi gandum anggen mbanak nogo ndinogo waganggwi, Eeko monggotak o. Togop me, kinawi nggwok yugum abe amuni mbanak paga wurumonggotak kwe, o time ye mbanggola unggwogwe, Anggur awi yarumonggotak abe mili kwit agan laganemenggerak kwe, amburu toologo nunggwi, Eeko logomunggup lek o.
12 Kit maluk ambik eerit nugwi, Ndi, kinomaluk iya negen eeriyak koonggwi, Eekwi an neenu me nduk, yokkiragi o. It aap iniki abe koonak nogo piyak-payak eerogo piigwi, Maluk eerak onggo, Ndogop puurak o, yugu kagak, Puurak lek, yoraawak nduk, inawu wogorogwe iinok, waganggwi, It aap tebenak mendek nogo inowak loonggo logonet, inawone abe mbangga’lek yaga-taga eerogo piigwi, Eeko monggotak me,
13 It aap iniki warak nogo nen, “Inowak loonggwi eyom ti, maluk ariyak eyom aret me,” yinuk, Inoone ambi yaga’lek puk aret menggaarak o.
Kambuurak inom, ineenik logorak inom, yoragagerak wone
14 Kit kineenik logomunggup nduk, maluk eeriyak mbakwi nogo mbo punuk, Obeelom eeriyak mendek mban mugurok nogo logonip o. Ti eekwi kiinok, “Aliku ALA ninom wonage o,” yinuk, yogo monggotak ndak-ndak At Omaawi Lombok Menggerak Aliku Ala kinom aret logogin o.
15 At Omaawi Lombok Menggerak Aliku Ala nen kit Yutup mendek eegu yumbunik wonogwe nogo, kinabuwa mbake kagak eerukwak, Maluk eeriyak kineebi mbakwi, Obeelom eeriyak kiniki kunik eekwi, Ndi, inowak loonggo menggam aakumi inowak loonggo logonet, eekaatak ndak-ndak eeppiigwi, Eeko logonip o.
16 At Omaawi Lombok Menggerak nogoba Aliku Ala nen yegerak nogo yi aret. “It aakumi inawi kota-kota wonogwe nogo leenggu maarit nogwe. It aap tu paga tu paga wonogwe nogo nen le agan nogwe, Le yi woraanip o, yinuk, it aap yabu eeka wiirogwe, Ndi, it leendawi tiyangga nen leendawi tiyani woraawak nduk, inayonggo piigwi, Eerugun o.
17 An nen inenggela’me ambi eeppiigak nagin me, Anggur yarak me time abok aret leenggu maarit nogo logogun o,” yinuk, Aliku ALA nen aret yegerak o.
Aliku Ala woroorak eyom yoragagerak wone
18 Aliku ALA woroorak ne nogo, “Ari woraawak lak, ao,” yinuk, yogwe nogo, kinabuwa o! Ne ti eyom ti, o eya arigin lek o apit aret ariyak me, Aliku ALA woroorak ne nogo, “Ari woraawak lak, ao,” yinuk, nonggop nduk yogo ogotik?
19 Aap ambi singa nen mugurok nage kenok, kole mbagangge me, beruang imbirak laabuk ari menggi kwak, Aap ambi ame unggwi nanuk, eenggi kobat nabenak paga, “Piga,” yinuk, eeke me, waalo nen eenggi nogo eyak mbangge menggi kwak, Aliku ALA woroorak ne ti, togop aret o.
20 At Aliku ALA woroorak ne nogo ti, o eya arigin lek o apit age, O eya mbuuluk ambi wonage lek, o angget apit aago wonage, Eerigin nogo lek a?
Ala alut eeko logonet eekwi nogo eebi mbareegerak wone
21 “Nalut eeko logonet, inale’- nggen nen laago lakwi ti, abu neebi lombok mbake, ogole warak lombok mbake, Eeke minggirak o. Nalut eeruwok nduk, kuwak eekwi ti kunduk, nale’nggen mbake mondok lek aret!
22 It nen an nake warogo kani kunggwi, anggen yigirik nake pi wogwe, eekwi ti, an wagangge, Ninom lambunuwok o, yinuk, inaanggumi abe amok warak kenok warogo wo’nugwi ti kunduk, an nenegen pekkage, Eerigin lek o.
23 It ndawi piyanggwi ti, Nda nen yogwe a nayok, mbake, It nggitat oone eekwi ti, naruk koneniyak neebi mbake, Eeke agarik o.
24 Niyo wu’nuk wage menggi kwak, eekaatak onggo a’me nggelok eeppiinet nugwi, Niyo porok ariilik, nage mban menggi kwak, aakumi obeelom eeppiinet nugwi, Eeko logowak o.
25 It Iterali mendek ti, o karume wogoren wage logonet, tahun 40 eeke kagak, nake inaanggumi warogo wo’nugwi, Anggen yigirik nake pugwi, Ee’nip o, Yinuk, yorage nagagirak ya?
26 Lek kwe, inagugi ogut ineenggi paga ogobakkigireegwaarak kugi inowe endage Takut nogo inom, Laaluguragan ayuk wukwi kugi Kewan inom, tiyappit wonok nugwi iyareegirak me,
27 An nen wogoren o Ndamitik kagak nda time mbo piya nagin o,” yinuk, at Omaawi Lombok Menggerak endage Aliku ALA nen aret yegerak me, yokkiragi o.
6 “Iniki ugun wonogwe iinok, inabuwa o,” yoragagerak wone
5:21-22 Yet. 1:11-14 5:25-27 Nap. 7:42-43
It aakumi Iterali mendek nen, “Yeenggwa niraawak o,” yinuk, Aakumi ando tebenak iigak, it ambi abu tiyanak menggaarak inenggela’me nen kit kinengga warak kiya wogo menggaarak abok aret O Tiyon paga, “Niniki ugun obeelom wonogwe,” mbakwi inom, Puut Tamariya paga, “Niniki ugun tayenak nu’lek aret wonogwe,” mbakwi inom, kinabuwa o!
2 Kit nen o Kalene nogo logomonggotik, kinigen yambonit nugwi, Time nen o kota nggwok lombok Kamat nogo pekka nogwe, Ti’nuk, it aap Pilitin wonogo menggam o Nggat pekka nogwe, Eeko logonip o. Eeko logomonggotik, it inabu’me piinok menggam ti abe, ndi, kit kinabu’me piinok monggo’- nom ti meek, It inanggween ti nggwok, ndi, kit kinanggween ti mbuuluk, kaamunggup mbakop?
3 “Aaninggin ninoba kwippinani woroorak ti, abu nda lombok wonage,” mba’nuk, eerit nugwi kwe, Kinogogumbuk logonet eerit nugwi paga aaninggin kinoba pinagarak nogo, koorok panggonogo pati wogo ogotik o.
4 Kit nogo yogo monggo’nom abu abe wanggalep meeli nabenak paga windak wonogwe, Kwi’nagak abe ndoonak paga kwi’ndak wonogwe, Tapi-ndomba inaagalogwe inamok tigiluk inoorogo larogo nunggwi,
5 Nggitat eeko logonet, we lek ndawi wakwi, Ndawut ndawi tiyangge logonet, nggitat eeke nagagi kwak, “Nit togop aret eeruwi,” mba’nuk, eerit nugwi,
6 Anggur amburu niyoowak eno korok togon toologo nenggak mban eekwi, Kinagabolo anen pera yuwak nduk, amburu abu abe kinagabolo paga mbenanggologwe, Eekwi kwe, It Yutup paga wiganak nogo inenggaawak lek ogogwaarak paga, “Yi ee’ninakerak, ao,” mbaka’lek aret wonogwe kiigi o.
7 Togop aret me, aa’nduk lombok wokkiren mbo pinagi noorak nogo kit aret me, Kinale’nggen nen laago lakwi inom, we ugun tayenak-mbayenak nugwi inom, ti lek aret arigin o.
Iterali iniki tiyappit nugwi iinok, eebi mbareegerak wone
8 At Aliku Itok Menggerak ALA owak mbanggolage logonet, Omaawi Lombok Menggerak Aliku Ala nen yegerak nogo yi aret. “It Yakup mendek iniki wogoppakwi nogo ogole mbake, Yugum pak wurik me, inarum logorak inawi wurik nogo neebi lombok mbake, Eeke me, O kota yi inom, yi mendek ndi mendek o kota wonage inom, abok aret inawim ineenggime piyaagin o,” yinuk, yegerak o.
9 Aap ineebe 10 o ambime kiraarak wonogwe iigak kwe, it kunduk kambugun o.
10 Kanggwi iinok, inowe-inawot nen wogo logomenggaarik, ineebe kambemenggaarak nogo, oome time nen wogoren wundi nogo logonet, aap kangga’lek awo kiraarak wonage kero yogwi, “It aap eegu ineenik o yime ambi wonogwe ilik?” Yogo mbaremengga, at nen, “Lek o,” ari kenok, it nen at yogwi, “Koone yugun o. At Aliku ALA endage kunduk ari mage o,” yinuk, yorugun o.
11 At Aliku ALA nen wone lengganogo wumbegerak me, o nggwok abe wurik nogo yigirik-noonom eerogo pit nugwi, O mbuulogwe wurik nogo yinik-minik eerogo pit nugwi, Eerugun o.
12 Kuda puut-puut yugum paga mbe agan nogwe, Lembu nen yugum anggen nggininik paga nggween amok mbanogo pugwi, Eeriyak op mbakop? Lek kwe, kit nen eekaatak a’me nggelok eeppiinet nugwi nogo mbo punuk, obaane’me kanggo menggaarak mendek eeppiinet nugwi, Ndi, obeelom eeppiinet nugu logorak anggen yuurak nogo obaane’me ale-pale eerogo piinet nugwi, Eekotak o.
13 Kit nen o Lorabat tebenggologo nogotik, ale’nggen mbakwi, Ndi, o Karanayim kunduk tebenogo punuk, yogo logonet, “O ti, nit ninomaawi lombok paga tebenggologoorak nogo lek a?” yinuk, wogoppakwi, eekwi kiigi o.
14 Kit togop aret eekwi me, at Omaawi Lombok Menggerak Aliku Ala nen ari logonet, “It Iterali ti, tebenogo piyaawak nduk, aakumi alik mendek ambi inikime mambiyaminggirak wogo logonet, Ineebe ya yigirogo piigak nda yigirogo piigak eerit o Kamat tu unggwogo menggam nen nok, niyo Araba aa’nggi paga kuli piya nagun o,” yinuk, yegerak me, yokkiragi o. +
7 Wurin nen eeppiyoorak kagagerak wone
1 Aliku Itok Menggerak ALA nen nabinggaanggo paga yo’nereegerak nogo yi aret. Aap endagembogut ake iri’ngga mbanogo wogogo mbareegwa, obaane’me yarak nogo agarit lagangge kagak, nabinggaanggo paga Aliku Itok Menggerak ALA nen wurin ambik lombok kuwak eerogo piinet nage kagagirak.
2 Kuwak eerogo piyareegerak nogo, “Nenet nanip o,” yorage mbareegi, wirin ti nen iri’ngga o time wonage abok aret pup eerogo nenet nugwi iige nagagirik, “Kaliku Kitok Menggendak ALA wae. Kapuri inomaluk kami eerogo piyet o. It Yakup mendek ineebe mbuuluk me, inenggaawak lek arukwak nonggop togon eeko logogun o?”
3 Yoge mbareegi, Aliku ALA nen eeppiyoorak mbareegerak nogo tayoppunuk, “Eeke kagandak ti, an nen eeppiyaagin lek o,” yinuk, Aliku ALA nen aret an yo’nege kagagirak.
Kani paga eeppiyoorak kagagerak wone
4 Aliku Itok Menggerak ALA nen nabinggaanggo paga yo’nereegerak nogo yi aret. Aliku Itok Menggerak ALA nen aaninggin inoba piyoorak nduk, kani kunik wiireegerak nogo wage logonet, niyo kole yenggenak laut nggween abu’na wonage nogo, porok togon nenet wambi nage, nggween inom nenet nage, eeke kagagirak.
5 Ti eeke kage nagagirik, an nen, “Kaliku Kitok Menggendak ALA wae. Kat togop eeke mage ubi! Puk aru o. It Yakup mendek ineebe mbuuluk me, inenggaawak lek arukwak nonggop togon eeko logogun o?”
6 Yoge mbareegi, at Aliku ALA nen inoba piyoorak mbareegerak nogo tayoppunuk, “Eeke kagandak ti kunduk, an nen eeppiyaagin lek o,” yinuk, Aliku Itok Menggerak ALA nen aret an yo’nege kagagirak.
Keele wakkagak paga wakkaanuk, eeppiyoorak kagagerak wone
7 Nabinggaanggo paga ambi yo’nereegerak nogo yi aret. At Aliku ALA keele paga yugum pugunik wakkagak nogo eenggime keele wakkagak paga yugum pak wurik me, koorok taati mi’ndak wonage kagagirak.
8 Kage mbareegi, at Aliku ALA nen an yo’nege logonet, “Amot wae. Kat nano mendek kenegen kagan o?” Yo’nege mbareegi, an nen, “Keele wakkagak paga yugum pugunik keenggime wonage kagi o.” Yoge mbareegi, at nogoba nen an yo’nege logonet, “An napuri Iterali ti, keele wakkagak paga yugum pugunik nogo inenggela’me wuppiminggirak ndak-ndak lek kenok, an nen it teppiyaagin lek, aaninggin inoba kwippiyaagin o.
9 Aaninggin inoba kwippiige logonet, it Itak paga wiganak nen puut-puut paga warogo wogorogo menggam nogome abok aret yigirik-noonom eerogo pege, It Iterali inagugi ayuk wurit nogo menggam alik leenak wonage nogo minogo pit nage, Eeke logonet, At aap endagembogut Yerobeyam paga wiganak kunduk, nawooluwak paga nggaluk nawak nduk, mi’narigin o,” yinuk, an yo’nege kagagirak.
Amot Amatiya imbirak eereegwaarak wone
10 Kage mbareegi, at aap Amatiya Ala unde o Mbeten eeke nagagerak nogo nen aap Iterali inowe endagembogut Yerobeyam nogo, wone wonok yori woraawak nduk, nappiya wagagerak wogo nogogwaarik, at yogo logonet, “At Amot nogo, kat kimbirak ogookkoloorak nduk, aakumi Iterali inom wone koonogo pege me, at nen ari nogo paga aakumi pilak yogo logonet, ineebi nen kat koone mbo puurak nduk eeko agaarik o.
11 At Amot nen ari logonet, Aap Yerobeyam nogo wooluwak paga warak kangge, Ndi, it Iterali nogo inanggween paga nen kugun wogoren mbo piya nogwe, Eerugun abet mbako logonip o, yinuk, ari wonage agaarik o.”
12 Yogo mbareegwa, wiireegerak nage mbareegi, at Amatiya nen Amot nogo yoge logonet, “Abinggaanggo kaga yi, nak a! O Yekura paga time nak. Kambi noorak time kwaakkolage, time nen kogoba Ala nen yokkege kagak, yoranet nege, eeke a nak o.
13 O yime ti, aap endagembogut nen ayuk wuke, aakumi at abu’me piinok menggim nen ayuk wukwi, eeko menggam alik leenak o Mbeten yime aret me, o Mbeten yime kogoba Ala nen yokkege kagak, yoragak eeriyak ti mondok mage o!”
14 Yoge mbareegi, at Amot nen aap Amatiya nogo yoge, “An yi, aap Ala nen yorage kagak yoraga nogo mendek wonageelik o. Ndi, it aap ti mendek inaput kunduk wonageelik mban. An ti, ndomba ndegeninake, eyo wuli yarak unde wake, eeka an aret wonagagirak o.
15 Togop aret wonagagirak kwe, at Aliku ALA nen an ndomba ndegeninabit nege me, wo’nake nagagerik, yo’nege logonet, An nen yokkege neegak napuri Iterali yorage logonok nduk, nak o.
16 Yo’nereegerak me, yogondak Aliku ALA nen wone yokkege yi, karuk konengge logot o. Kat nen ari logonet, Kit Iterali eeppinagarak, Ala nen yo’nege kenok yokkiragi o, yinuk, yorage, At Itak ombowologwe wiganak paga, Yogop eeppinagagin o, yinuk, yorage, Eeriyak ti mage o, Yinuk, yo’negendak me,
17 At Aliku ALA nen ari logonet, At aap Amatiya akwe nogo, o kota time terak wuka aret age, Apuri wologwe-komologwe wooluwak paga inoorak kanggwi, At anggween nogo keele wakkagak paga wakkaanuk, tumbukkologwe, At eebe lombok kambuwak nduk, aakumi Ala abu ineenggo’lek wonogo menggam paga pi nogwe, Eerugun o. Ndi, it Iterali ti, inanggween lombok paga nen abet aret kugun wogoren mbo piya nagun, yegerak me, yokkigi o,”yinuk, yoreegirak.
8 Muun yarak me anggen mbanak yonggolak kagagerak wone
1 Aliku Itok Menggerak ALA nen nabinggaanggo paga titi’nereegerak nogo ti, muun yarak me anggen kole agaarak mbanak yonggolak nogo aret o.
2 Titi’nege logonet, “Amot wae. Kat nano mendek kenegen kagan o?” Yo’nege mbareegi, “Muun yarak me, anggen kole agaarak mbanak yonggolak kagi o.” Yoge mbareegi, Aliku ALA nen an yo’nege logonet, “It an napuri Iterali eeppiyoorak eyom nogo muk panggoni wagaarak me, an nen ambinom inili eerogo teppiyaagin lek eeppiyaagin aret o,” yinuk, yo’nege kagagirak.
3 “Ne ti eyom paga o nggwok abe wurik me ndawi wako logomenggaarak nogo obaane’me leendawi piyanggwi, ineebe inoorak ambik aret mbo nappiinet namenggaarak iigwi, eeko logonet, inoone lek inigen keme yogwe puk aret logogun o,” yinuk, Aliku Itok Menggerak ALA nen aret yegerak me, yokkiragi o.
Iterali aaninggin inoba kwippiyoorak wone
4 It aakumi tebenak ambi eekkoloorak meek nogo mendek wiwi aganakwi, It aakumi ineenggi lek o yime wonogwe nogo lek eerogo piigwi, Eekwi kit yi, Wone yi, kinaruk konenggo logonip o.
5 Kit nen, “Gandum ambinom kunggo logowok nduk, tut ngget penengge kenok, eeko logorak koonak nogo mandom wobok yi nage, Ndi, gandum yigirik ambinom kunggo logowok nduk, nogo 6 yippunuk, ko’lu paga yonggonggologo logonet, eeko logorak koonak nogo mandenom yobok yi nage, Eeruwak lak, ao,” Yinuk, yogwe kiigi o. Kit nen aakumi wi-wi aganako logonet, yi mendek ndi mendek wakkagak paga wakkaanuk, Aaninggin tiyarogon kagak, teberogon eerogo wogorogwe, Wu teberogon puurak kagak, wu tiyarogon puwak nduk, yorogwe, Eeko logonet,
6 It aap tebenak mendek inanomat mbanak inoba wonage nogo lek aruwak nduk, ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo lek aruwak nduk, ineebe yum nibinik paga onggo kuninakwi, Ndi, gandum ameneno mbo pega’lek inom kagak, togolowak paga wakkagak onggo kologwe, Eeko monggotak o.
7 At Aliku ALA nen ari logonet, “It Iterali maluk eeko nogogwaarak nogo, an nami arigin mondok lek o, yinuk, it Yakup mendek nen inogoba tiyappanega nendage kumbatinuk yagi o.
8 It eeppiigwi paga o nggween paga yime wonogwe abok aret inaganak wake, Yi o ndi o wonogwe abok aret inayum maluk nibinik mendek yippunuk, iniki wakkologwe, Eerugun nogo lek a? Niyo Nin wu’nuk nage logonet, lagi nage, Ti’nuk, yi alelo tiyak-tebek eeppunuk, poro agan wandi nage, Eeke menggi kwak, O yi togop aret eerigin o,” yinuk, yegerak o.
Oonegen abinak lek arigin yereegerak wone
9 “Ne ti paga ariyak nogo ti, o liingge kagak oonegen kilu yi nage, O liingge wonage kagak, o nggween paga apit age, Eeruwak nduk, eeppigin o.
10 Inale’nggen nen laago lako logomenggaarak nogo obaane’me inayum maluk nibinik mendek yippunuk, iniki wakkologwe, Ndawi piyanggo logomenggaarak nogo obaane’me leenggu maakwi, Inayum nibinik maluk yippunuk nugwi, Ineeruwak inanobak puluk ko eerogo pakwi, Aap ambi aput ambolom kangge kenok, leenggu maake kwak maakwi, Eeko logowak nduk, Eerogo piyaagin o. Ti eeriminggirak paga ne ti eyom ariyak age yubuni nage kagak, iniki abu alik negen wakko’net unggwogo logogun o,” yinuk, at Aliku Itok Menggerak ALA nen yegerak o.
Mbi-niyo abu eeginaburak yoreegerak wone
11 “Ne ti eyom ari wage paga An nen o yime mbi noogelo mondok alik negen nappi woraagin nogo ti, Mbi-niyo abu eeginaburak ti mendek nappi woraagin lek o. Ata, Naliku ALA noone lombok inaruk konenggo logorak ti, mbiniyo abu negen eeginabigin o.
12 Aliku ALA oone konenuwok lak, ao, yinuk, niyo nggwok laut aru-ogwe yenggenak paga kwaarit nogwe, Niyo ambut pa’nggwe nen niyo eneeri pa’nggwe nogwe, Eerugun kwe, Ambit iluk ambi kwaakkaagun mondok lek aret o.
13 Ne ti eyom paga Wologwe-komologwe ineebe yaambu-laambu abe tawe nogo an noone abu nen inambuluk pit nagun o.
14 Inagugi inenggali aga Tamariya mendek endage kumbunuk yogwe, It Ndan mendek inagugi eenik menggerak yi wae, yogwe, It Mberetiyeba mendek inagugi eenik menggerak yi wae, yinuk, yogwe, Eeko logomenggaarak nogo It kunduk an noone abu nen kwaarit nogo logonet, koya-koya nggween paga ngginnarit namenggaarak me, Pilak togon mi’narugun lek aret o,” yinuk, Aliku Itok Menggerak ALA nen aret yegerak me, yokkiragi o.
9 Warogo wogogo menggam Ala mi’ndak wonage kagagerak wone
1 At Ala ti, warogo wogogo menggam koorok taati mi’ndak wonage nabi paga kage neegak, at nen ari logonet, “Tunggambe aago abok aret nuknuk agan nawak nduk, an nawi wurik yugum owak mippugu irip me yawi mondok tela eerogo wake, Yugum owak mippugu paga o wurik panggonak wonage nogo langgunogo aakumi inanobak paga kwippi wangge, Eeru o. Eeke keenok, ando piyamenggendak ti, an nen wooluwak paga inooriminggirak me, It ambi nen kole mbaganggwi, It ambi nen inagap ndakko’nok mbaganggwi, Eerugun mondok lek aret o.
2 It kole aakumi kambunuk nogo menggam nggween ogu kabunit wambi nanuk wonogwe iigak kwe, time nen aret an neenggi omaawi paga yabonogo nippiya wage, It kole mbogut paga lagi namenggaarak kwe, time nen aret yabonogo nggween paga wuppiya wage,
3 It nen kole puut Karemen paga kumaa’nari namenggaarak kwe, an kwaaganabit nage logomenggirik, piginabunuk, time nen wogoren wage, An wonage me nen kole niyo nggwok laut inikime ogu lombok kumaa’nari wambemenggaarak kwe, waalo nggwok nogo nen eyak mbaninabuwak nduk, yoge,
4 It inawim nen kugun wogoren mbo piya nogwe iinok, Kinawooluwak paga inoorogo piyaanip o, yinuk, yorage, Eerigin o. An nenegen wogoren nege logogin nogo ti, obeelom eerogo piyaakit nduk lek o. Ata, maluk eerogo piyaakit nduk, nenegen wogoren nege logogin o,” yinuk, ari kagagirak o.
5 At Omaawi Lombok Menggerak Aliku ninogoba Ala nen o nggween yi, mbaanggage kenok, nuk-nuk eeke, It aakumi o nggween paga menggaarak abok aret nen le yogwe, Niyo Nin wuke, ti’nuk, niyo Metit poro agan wangge, eeke menggi kwak, o nggween abok aret yi, togop aret eeke,
6 At o mbogut oolo ya’i awi wurogo pege, At awi wurik eyak o nggween paga yime yinogo pi wambi wage, Niyo nggwok yenggenak laut nogo wiiremenggerak owagam wage kenok, o nggween paga yime kilirogo pit nage, Eeke menggerak endage ti, Aliku ALA aret o.
Ala nen leenogo piyareegerak nogo mbo piyareegerak wone
7 “It Iterali mendek ti, an nggwok lombok liippiige, ndi, it Kuti mendek ti, mbuuluk negen liippiige, eeke minggirak mbakop? It Iterali mendek o Metit nen wogoren wundi wagagirak nogo kwak, it aakumi Pilitin mendek o Kereta nen wogoren wage, It Tiriya mendek o Kit nen wogoren piya wage, Eerulik mbakop? Eereegirak aret o,” yinuk, Aliku ALA nen aret yegerak o.
8 “Aakumi inowe endagembogut abu’me menggam maluk mban eekwi yi, Naliku Nitok Minggirak an ALA nen abet aret nenegen wogonake minggirak o. It togop eekwi paga o nggween paga yime nen inenggaawak lek eerogo piyaagin kwe, It Yakup paga wiganak perak, mondok lek eerogo piyaagin lek o,” yinuk, Aliku ALA nen aret yegerak o.
9 “Nggweengguma ameneno wonok nawak nduk, muun yarak piyak-piyak eeko logonet, ambit iluk ambi kiluk togon wanggeelik kwak, It Iterali mendek aakumi inanebunu lombok inenggela’me togop aret wogoren nawak nduk, yoraminggirak kwe, Ambit iluk ambi pibi’na wambugun lek aret o.
10 It aakumi maluk eeko menggaarak an napuri inenggela’me logonet, Aaninggin mendek ambi nit ninoba age, Maluk mendek ambi nit ninoba kwi’nage, eerigin lek o, Yinuk, yogo menggaarak nogo, wooluwak paga inoorak wambugun o,” yinuk, yegerak o.
Iterali aa’nduk wonogogwa kwak eerogo piyoorak wone
9:11-12 Nap. 15:16-18
11-12 “It Iterali nen aakumi o Erom eegu yumbunik wonogwe nogo inabu’me piigwi, It yi aakumi ndi aakumi, Nogoba Ala aret o, yinuk, yogo logomenggaarak nogo, inabu’me piigwi, Eeruwak nduk, Ne ti eyom paga Ndawut awooliya wurik langgunnagagerak nogo obaane’me wuke, Yugum pak wurik langgunogo pereegwaarak nogo, obaane’- me wuke logonet, aa’nduk wurik wonagagi kwak eerogo pege, Eerigin,” yegerak o Eerigin, yegerak yi, Aliku ALA nen aret yegerak me, yokkiragi o.
13 Aliku ALA nen ari logonet, “Aap ambi gandum anggen mbangge me, it aap yabu eeka nen peleppegak yabu eeri nogwe, Ndi, ambi anggur awi yake me, aap anggur anggen aambirangga nen peleppegak amburu aambiranit nogwe, Eeriyak eyom panggoni wage agaarik o. Puut-puut paga anggur yarak amburu tene-tene wangge, Puut-puut teberogon paga niyo nage menggi kwak, anggur amburu taganinuk nage, Eeke logogin me,
14 An napuri Iterali kugun wogoren mbo piya namenggaarak nogo, iniyokan wogoren piya wage neenok, Inawi kota-kota langgu-langgu aago nogo, obaane’me wurogo patinuk wonogwe, Ineyabume anggur yaremenggaarak paga amburu toologo nunggwi, Eyo anggen yege menggerak mendek yabume yaremenggaarak paga anggen abe mban mbanogo nunggwi, Eeko logogun o.
15 It Iterali ti, awi yako mengga kwak, inanggween lombok paga inakom kwippiyaminggirak me, Inanggween wogoragagim time nen it aakumi ambi nen nggiginogo wumbiyaagun mondok lek aret o, yinuk, at Aliku kinogoba Ala nen wone yi abok aret yegerak me, yokkiragi o,” yinuk, yoragagirak.
Amot 9
Mbuku Amut
BalasHapus