Mbuku Maleyaki yi, eebe mbanak pekkaga’lek logonet, aa’nduk pekkoorak yi o.
Mbuku Maleyaki yi, Yetut awo nda’naga’lek kagak, tahun lima ratus negen eeke kagak yorage nagagerak. Ti eyom paga it Iterali mendek iniyokan iname lombok ari woraanuk logonet, Ala awi maluk eerogo pereegwaarak nogo, obaane’me abu wuppunuk, yoragagerak nogo liiru mbaneegerak.
Wone yoragagerak nogo ti, aap Ala unde inom, aakumi abok aret inom, Ala wone yugu liirogon eeka’lek mbo pereegwaarak nogo, liirogon eekwi, wone Ala inom koonogo pereegwaarak nogo ndak-ndak eekwi, eeko logowak nduk, wone yorage nagagerak. It Ala apuri nen at Ala alut eeko logonet, iniki ale’nggen paga eeko nogogwaarak kwe, lek age, iniki aganggen kerek togon Ala mugurok nogo nogogwaarak kwe, lek age, eereegerak.
Ala pilit yoriyak meek kagak kwe, it aap Ala unde inom, aakumi abok aret inom, nen at pilit yogwi, “Ake yogop aret wogogo logowok o,” yinuk, kumbuk mbanggo nogogwaarak kwe, ndak-ndak eeka’lek mbo pugwi, eeko nogogwaarak nogo, abok aret ndak-ndak eeruwak nduk, wone yorage nagagerak. “At Ala wage logomenggerik, inowak loongge, inomaluk inoba lenggenak wonage nogo mbeenogo piige, eeppiinok, Ala nen yereegerak wone nogo yoranet nugu logowak nduk, leenogo nappiyaagin o,” yinuk, yorage nagagerak liiru mbanak wonage o.
_______________________________________________________________
1 MALEYAKI WONE
1 At Aliku ALA nen Maleyaki yoge kagak it aakumi Iterali yoragagerak nogo yi aret.
ALIKU ALA NEN ITERALI INIKI KUNIK EEGINABEEGERAK WONE
2 Aliku ALA nen ari logonet, “An nen it Iterali niniki kunik eeginake neegak kwe, it nen yogo logonet, Nonggoti agago iniki kunik ee’ninake me yo’nirage agaarik o? yinuk, kin wo’neegwi iigi,” yegerak o. “At Etawu ti, Yakup oweeluk nogo lek a? Oweeluk aret kwe, an nen at Yakup niniki kunik eeke,
3 ndi, Etawu perak, neebi lombok mbake, eereegirak me, at Etawu wonage menggim puut nggelok-nggobok time karume aakumi logorak lek eerogo pege logonet, yate anggween nogo karume nugu menggaarak mba’ngge nogo inawi logowak nduk, eerogo pereegirak o,” yinuk, Aliku ALA nen aret yegerak o.
4 Togop me, it aakumi Erom mendek nen, “Nit ninawi lek eerogo pereegerak nogo, obaane’me wurugun aret o,” yinuk, yemenggaarak kwe, at Omaawi Lombok Menggerak Aliku ALA nen ari logonet, “It nen inawi obaane’me wuremenggaarak kwe, an nen minogo pigin o. Aakumi nen, O Erom yi, endage ti, Maluk Eeko Menggam me, Aliku ALA anini mondok-mondok inoba piige kagak menggam yi aret o, yinuk, yogo logogun o.
5 Ti eeppiyoorak it Iterali mendek nen inigen kogo logonet, Aliku ALA ti, omaawi mondok iya lombok menggerak nogo, nit mban kogwe lek o. Ata, it ninaagan-ninambokan wonogwe abok aret kogwe iigo o, yinuk, yogo logogun,” yegerak me, yokkiragi o.
MALUK KAGAK WAROGO WOGOGWI IINOK, YORAGAGERAK WONE
6 At Omaawi Lombok Menggerak Aliku ALA nen ari logonet, “Aap ambi aput nen ogoba ayuk wuke, ndi, aap ambi ayeloman nen ogoba ake eeke nogo ayuk wuke, eeko menggaarak me, an inogoba kenok, nayuk wuko logorak op aret kwe, wuka’lek nonggop nduk agaarik o. Ndi, it an nayeloman mini nake eeka aret kenok, an nayuk wuko logonet, inagabiti mbako logorak op aret kwe, mbaka’lek ti, nonggop nduk agaarik o,” yinuk, yegerak o. “It aap an neebe unde nen aret an nendage maluk eerogo pogo agaarik o. Nendage maluk eerogo pogo logonet kwe, Nit nonggop negen at endage maluk eerogo pogoorak me, yo’nirage agaarik? yinuk, yogwe,
7 An nake warogo kani kunggo menggam eerak paga mbi abe wo’niriyak nogo kagak wo’niriyak lek nogo mendek lunogo punuk, kani kunggo logonet kwe, Nit nonggop negen eeko logonet, at ayuk lek eerogo pugwi niinok, yo’nirage agaarik? yogwe, eekwi iigirak me nduk yagi o.
8 Aliku ALA ageyo ndoonak ti, iya lek o, yinuk, abe puurak kagak nomoppegak awinde-obande eerak mendek nake pi wogwe ti paga nayuk lek eerogo pogo agaarik o. It nen nake warogo wo’niriyak wonok wogo logonet, wam enegen mbuk kagak wonok niri wogwe nogo ti, maluk eekwi lek nduk yogo agaarik ya? Ndi, wam arowak langgonak inom, kugi warak inom, wonok niri wogwe nogo ti, maluk eekwi lek nduk yogo agaarik ya? It nen wam togop mendek kagak inogoba o unde menggerak nogo wogori noorak wakkaawak nda! Napuri wa, yinuk inikilom inombake, keyage warogo wogonake, eerigin mbakop? Lek aret mbaki o,” yinuk, at Omaawi Lombok Menggerak Aliku ALA nen aret yegerak o.
1:8 Pel. 15:21
9 “An inogoba Ala nen inabuwa mbarikit nduk, yogondak yo’niruwak nda! Wo’niri wogwe ti mendek niri wogwe iinok, Op aret niri wogop o, yinuk, keyage warogo wogonaburak mbakwi ya? Lek aret o,” yinuk, at Omaawi Lombok Menggerak Aliku ALA nen aret yegerak me, kit at eebe unde aret yokkiragi o.
10 “An nake warogo kani kunggo menggam it we aanom warogo kani kunggwi iyo, it inenggela’me time aap ambi nen nawi wurik me tu narogo puwak lak, ao, mbake agarik o. It eekwi ti, an abu neebi lombok mbake me, an nake warogo wo’nugwi ti, an waagin lek aret o,” yinuk, at Omaawi Lombok Menggerak Aliku ALA nen aret yegerak me yokkiragi o.
11 “Oonegen lagi wage menggim nen nok, kilu yi nage menggim kuli, yi aakumi ndi aakumi inenggela’me abok aret an nendage mondok tiyanak logogin o. Aakumi inanebunu lombok inenggela’me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale’nggen nen wagangge nogo mendek wo’nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.
12 “It togop aret eerugun kwe, it aap an neebe unde nen yogo logonet, Ninogoba Ala ageyo ndoonak paga yi mendek ndi mendek pi wogwe nogo ti, Ayuk lek o, yogwe, ndi, Yi mendek ndi mendek pugu nogo ti, Abe lek o, yinuk, yogwe, eekwi ti paga an nageyo ndoonak ti, enete maluk eerogo pugwi,
13 ndi, it nen wone ambi yogo logonet, Yi eekwi yi ti, aaninggin ambik aret o, yinuk, laakot mbako logonet, yogwe, eeko agaarik o,” yinuk, at Omaawi Lombok Menggerak Aliku ALA nen aret yegerak o. “It wam kugun wogo inom, inarowak langgonak inom, kugi warak inom, wonok an nake kani kunggwi iinok, an nen, Wa! yinuk, keyage warogo woorak op mbakwi ya? Mondok lek aret o,” yinuk, at Aliku ALA nen aret yegerak o.
14 “An aakumi inowe nendagembogut mondok iya lombok wonage, ndi, yi aakumi ndi aakumi inenggela’me nendage tiyanak nayuk warak wonage, eeke minggirak me, it aap ambi nen aanggumi inenggela’me ngguunok abe an woorak mendek ambi wonage me, Ala ake pigi o, yinuk, kumbuk mbanogo pemenggaarak kwe, mbo punuk, obaane’me alik aga’lu mendek ogoba an Ala wo’niri wage ti, nambokan laganogo wo’nege me, at mondok pulunik aret logowak o,” yinuk, at Omaawi Lombok Menggerak Aliku ALA nen aret yegerak me, yokkiragi o.
2 ALA ANINI AAP AT EEBE UNDE INOBA PIYOORAK WONE 2:4 Lin. 3:11-13
1 “Eeriyak wone an yorage yi, it an neebe unde nen aret inaruk konenggo logowak o.
2 It nen wone an yorage yi, konenggwi, ndi, Endage tiyappogo logonet, ayuk wuko logowok o, yinuk, koonggwi, eekwi lek iinok, it an neebe unde menggaarak nogo pulunogo piige, nale’nggen paga wogorage neenok, waganggwi nogo, non mbanogo pege, eerigin o. It nen, At Aliku ninogoba Ala endage tiyappogo logonet, ayuk wuko logowok o, yinuk, iniki nggaruk togon koongga’lek me, muk pulunik aret agaarik o,” yinuk, at Omaawi Lombok Menggerak Aliku ALA nen aret yegerak me, kit at eebe unde nogo aret yokkiragi o.
3 “It an neebe unde nogo, eekwi paga it paga wiganak aaninggin inoba kwippiige, it inale’nggen nen laago lako logonet wam waremenggaarak aanagale kilirik nogo, inete paga aambiranogo piige, eeke neenok, aakumi nen wam aan kilirik ti, wonok mbo pi nogo logonet, ineebe inom yabonogo mbo piya nagun o.
4 Ti eekwi iinok, it aap Lewi mendek eeko logorak ninom wone abuk nggaruk togon koonogo pereegurak nogo, mondok liippunuk eeko logowak nduk, wone ti, at nen aret nappi wagaarak ineenu arugun o,” yinuk, at Omaawi Lombok Menggerak Aliku ALA nen aret yegerak o.
5 “It ninom wone abuk nggaruk togon koonogo pereegirak alom nogo ti, it aakumi ineenik logonet, iniki ugun tayenak logorak inake eerit nogo logowak nduk, koonogo pereegurak me, nayuk wuko logonet, ti aret eerit nogo logowak nduk, eeppiyareegirak. Nayuk wukwi, nendage kunggo logonet, inaganak wake, eeko nogogwaarak.
6 Ndi, yoraawak nduk yorage nagagirak nogo, it ando wuppega’lek li'lak mban mamuninakwi, an ninom niniki kunik logonet, abe mban eerit nugwi, aakumi maluk eerit nugwi nogo, yungguninuk iniyokan woraawak nduk mamuninakwi, eeko nogogwaarak.
7 It aap an neebe unde nogo ti, Nomaawi Lombok Minggirak Naliku an ALA nayonggo aret me, it aap neebe unde nogo nen yi wone ndi wone ugun yoraga’lek inoone liippunuk yorogwe, it inambe paga abet mban wungge nogo paga mamunggolaawak nduk, yorogwe, eeko menggaarak kwe,
8 it an neebe unde yi nen perak, tu abe paga noorak yorage minggirak nogo, mbo punuk alik mendek mamuninabit nogwe paga it aakumi apit aret iniyogobit lik togon wambit nogo menggaarak. It Lewi ninom eeko logorak wone koonogo pereegirak nogo, taganogo mbo pereegwaarak o.
9 Eeko logorak mbake minggirak nogo, mugurok naga’lek mbo punuk, eeko logorak wone yugu nogo mamuninako logonet, inete yombonogo piinok, mamuninako menggaarak ti paga it aakumi nen meek inombakwi, inendage tebenogo piigwi, eeruwak nduk, eerogo piyareegirak o,” yinuk, at Omaawi Lombok Menggerak Aliku ALA nen aret yegerak me yokkiragi o.
Iterali Nen Wone Liippunuk Eeka’lek Kenok Yoragagerak Wone
10 Nit abok aret ninogoba ambit aret nogo lek a? Ninogoba Ala ambit nen nineebe ogobakkigi’ninabeegerak nogo lek a? Ti aret kagak, nit-nit wone koonogo pogo monggoorak nogo ndak-ndak eeka’lek ti paga ninombomini eeko logorak Aliku ALA inom abuk nggaruk togon koonogo pereegwaarak nogo aret lale-pale eerogo pugwi ti, nonggop nduk eeko ogoorik?
11 It Yekura mendek inom eeko logorak koonogo pereegwaarak nogo, lalenogo pugwi, it Iterali menggam inom, o kota Yerutalem inom, maluk inamineeri ne agan noorak nogo mendek eereegwaarak nogo ti, it Yekura mendek nen inogoba Ala lek aakumi inambik inagugi eeko menggaarak mendek inapuri komologwe wogonabeegwaarak paga at Aliku ALA awi wurik alik leenak iniki kunik nogo, enete maluk eerogo pugwi, eereegwaarak ti aret. 2:5 Lin. 25:12
12 It aap ti mendek abok aret togop eekwi iinok perak, at Omaawi Lombok Menggerak Aliku ALA ake warogo wogori wogwe iigak kwe, at Aliku ALA nen it Yakup mendek inawooliya wuppunuk wonogwe me nen inenggaawak mondok lek eerogo piyaawak o.
13 Ndi, ambi eekwi kiigirak nogo ti, at Aliku ALA ake warogo wogogo menggaarak eerak nogo paga kinale amburu paga miin nggulu eerogo pogo monggotak. Pogo logonet, Nit Aliku ALA wogori wogwe nogo liippege, nineenggi lombok paga nen iri wogwe kwe, ale’nggen nen wagangge, eeka’lek o, yinuk, le yogwe, kiniki wakkologo logonet, leenggu maakwi, eeko monggotak o.
14 Eeko logonet, Alom nano eekoorak paga eeki o, yinuk, yogo monggotak nogo alom an yokkira o. Kit awo tawe logonet, kinakuwi kinom lambumbinagagwi eyom ti paga Aliku ALA enggaanom, Nit yogop eeko logowok o, yinuk, kinoone yereegutak nogo, yogondak kinakuwi kinom lambumbinagareegwaarak kinoreewi aret iigak kwe, kinoone yereegutak nogo ndak-ndak liirogon eeka’lek taganogo mbo pugwi nogo, Aliku ALA nen kiyareegerak me, alom ti paga eeppinagage agaarik o.
15 At Aliku ALA nen it aap akwe imbirak ti, ineebe ambit aret eerogo piyareegerak nogo lek a? Ambit aret kunogo piyareegerak me, ineebe inom, iniki inom, ti, at unde aret o. Nonggop nduk aap akwe imbirak ambit togop aret eerogo piyareegerak? Lek o. At mendek awi wiganogo piyaawak nduk, eereegerak o. Togop me, kiniki alik age kero, arum wakkologwe, ndi, kit tawe paga kinakuwi wogonako logonet, kinom wone koonogo pereegutak nogo taganogo pugwi kiyo, liippugwi, eeko logonip o.
16 Iterali inogoba Aliku Ala nen ari logonet, “It aap nen inakuwi mbo piigwi ti, an neebi lombok mbake minggirak, yegerak o.” Ndi, “Aap ambi ogogumbuk logonet, akwe togop eerogo pege kenok, at ti kunduk, neebi mbake minggirak o,” yinuk, at Omaawi Lombok Menggerak Aliku ALA nen aret yegerak me yokkiragi o. Togop me, kiniki alik age kero, arum wakkologwe, ndi, wone Ala kinom koonogo pereegutak nogo taganogo pugwi kiyo, liippugwi, eeko logonip o.
17 Kinoone agan nugwi paga at Aliku ALA koneniyak anggon eerogo pogotak kagak kit nen yogo logonet, “Ninoone nonggop yogwe paga at koneniyak anggon eerogo pogoorak?” yogwe ti paga an yokkira o. Kit nen yogo logonet, “It aakumi maluk eeko menggaarak ti, at Ala nen inooka’lek teppiige me, Op aret eekwi, mbake,” yogwe, ndi, “A’me nggelok eeke menggerak Ala nogo ngge o?” yinuk, yogwe, eekwi ti paga at Aliku ALA kinoone koneniyak anggon eerogo pogotak me nduk, yokkirage agaarik o.
11 It Yekura mendek inom eeko logorak koonogo pereegwaarak nogo, lalenogo pugwi, it Iterali menggam inom, o kota Yerutalem inom, maluk inamineeri ne agan noorak nogo mendek eereegwaarak nogo ti, it Yekura mendek nen inogoba Ala lek aakumi inambik inagugi eeko menggaarak mendek inapuri komologwe wogonabeegwaarak paga at Aliku ALA awi wurik alik leenak iniki kunik nogo, enete maluk eerogo pugwi, eereegwaarak ti aret. 2:5 Lin. 25:12
12 It aap ti mendek abok aret togop eekwi iinok perak, at Omaawi Lombok Menggerak Aliku ALA ake warogo wogori wogwe iigak kwe, at Aliku ALA nen it Yakup mendek inawooliya wuppunuk wonogwe me nen inenggaawak mondok lek eerogo piyaawak o.
13 Ndi, ambi eekwi kiigirak nogo ti, at Aliku ALA ake warogo wogogo menggaarak eerak nogo paga kinale amburu paga miin nggulu eerogo pogo monggotak. Pogo logonet, Nit Aliku ALA wogori wogwe nogo liippege, nineenggi lombok paga nen iri wogwe kwe, ale’nggen nen wagangge, eeka’lek o, yinuk, le yogwe, kiniki wakkologo logonet, leenggu maakwi, eeko monggotak o.
14 Eeko logonet, Alom nano eekoorak paga eeki o, yinuk, yogo monggotak nogo alom an yokkira o. Kit awo tawe logonet, kinakuwi kinom lambumbinagagwi eyom ti paga Aliku ALA enggaanom, Nit yogop eeko logowok o, yinuk, kinoone yereegutak nogo, yogondak kinakuwi kinom lambumbinagareegwaarak kinoreewi aret iigak kwe, kinoone yereegutak nogo ndak-ndak liirogon eeka’lek taganogo mbo pugwi nogo, Aliku ALA nen kiyareegerak me, alom ti paga eeppinagage agaarik o.
15 At Aliku ALA nen it aap akwe imbirak ti, ineebe ambit aret eerogo piyareegerak nogo lek a? Ambit aret kunogo piyareegerak me, ineebe inom, iniki inom, ti, at unde aret o. Nonggop nduk aap akwe imbirak ambit togop aret eerogo piyareegerak? Lek o. At mendek awi wiganogo piyaawak nduk, eereegerak o. Togop me, kiniki alik age kero, arum wakkologwe, ndi, kit tawe paga kinakuwi wogonako logonet, kinom wone koonogo pereegutak nogo taganogo pugwi kiyo, liippugwi, eeko logonip o.
16 Iterali inogoba Aliku Ala nen ari logonet, “It aap nen inakuwi mbo piigwi ti, an neebi lombok mbake minggirak, yegerak o.” Ndi, “Aap ambi ogogumbuk logonet, akwe togop eerogo pege kenok, at ti kunduk, neebi mbake minggirak o,” yinuk, at Omaawi Lombok Menggerak Aliku ALA nen aret yegerak me yokkiragi o. Togop me, kiniki alik age kero, arum wakkologwe, ndi, wone Ala kinom koonogo pereegutak nogo taganogo pugwi kiyo, liippugwi, eeko logonip o.
17 Kinoone agan nugwi paga at Aliku ALA koneniyak anggon eerogo pogotak kagak kit nen yogo logonet, “Ninoone nonggop yogwe paga at koneniyak anggon eerogo pogoorak?” yogwe ti paga an yokkira o. Kit nen yogo logonet, “It aakumi maluk eeko menggaarak ti, at Ala nen inooka’lek teppiige me, Op aret eekwi, mbake,” yogwe, ndi, “A’me nggelok eeke menggerak Ala nogo ngge o?” yinuk, yogwe, eekwi ti paga at Aliku ALA kinoone koneniyak anggon eerogo pogotak me nduk, yokkirage agaarik o.
________________________________
2:15 Wak. 2:24, Kini 4:23 3:1 Yet. 40:3, 42:6, Mat. 11:10, Mrk. 1:2, Luk. 1:76, 7:27 3:2 Yow. 2:11, Wayu 6:17
2:15 Wak. 2:24, Kini 4:23 3:1 Yet. 40:3, 42:6, Mat. 11:10, Mrk. 1:2, Luk. 1:76, 7:27 3:2 Yow. 2:11, Wayu 6:17
PASAL 3
1 At Omaawi Lombok Menggerak Aliku ALA nen ari logonet, “An woraawam tu yarogo panuwak nduk, nayonggo nappi wage neyaagun o. Tu yarogo panege kenok, Ninogoba woraawak lak, ao, mbakwi nogo, nawi wurik me time unggwi nage, ndi, at inom wone abuk nggaruk togon koonogo puwak nduk, Nappi woroorak, mbakwi nogo, abera’lek me aret wage, eerigin o,” yinuk, yegerak.
2 Woraagin aret me, aap mbuti at mendek mban aruwak nduk kani woraka kwak, aap yum kooka erabun omaawi ambik kwak, eerogo piyaakit nduk woraagin me, wage ti eyom paga aap ta nen ko wappunuk wonage, kin ari wage eyom ti paga aap ta nen ogogumbuk mi’ndak puk wonage, eerigin mbakop? Lek aret o.
3 Mbuti perak at mendek mban age, abinak age, eeruwak nduk, aap kani woraka kwak a’nuk, eeppiige logogin o. Mbuti emas inom, mbuti perak inom, enete abinak aruwak nduk, kani worako mengga kwak, it Lewi mendek togop aret eerogo piige kenok, ake wogori wogwe nogo ti, iniki ale’nggen paga wagangge nogo mendek ake pi wogo logogun o.
4 Ndi, o maan aa’nduk togon yi tahun ndi tahun eeke kagak, ake warogo wogori wogwe iinok, ale’nggen nen wagangge nagagi kwak, ne ti eyom paga it Yekura mendek inom, it kota Yerutalem mendek inom, Aliku ALA ake warogo wogori wogwe ti, ale’nggen nen wagangge logogin o.
5 “An nen inowak loonogo maluk onggo eeppiyaakit nduk woraagin o. Wage logominggirik, it aap tili pagangga inom, aap kumi ugun-ugun eeginaka inom, pilit pugunogo, Ndogop eeke kagarak, yaga inom, onggo koloorak eyabu eekwi wi-wi eeginaka inom, it aap kumi togwe kunduk, elege moono kunduk, tebenogo piiga inom, it aap nggiru inawone yagataga eerogo piiga inom, it an inagabiti nombakulik nogo mendek abok aret, Ndogop eekwi kiigirak o, yinuk, yorage logokit nduk, woraagin o,” yinuk, at Omaawi Lombok Menggerak Aliku ALA nen aret yegerak me, yokkiragi o.
Ala Wi-Wi Eerogo Pugwi Iinok, Yoragagerak Wone
7 It inombomini nda’nogogwaarak kuli nen nok, yogondak kuli, eeko logorak wone lengganogo yorage minggirak nogo, ndak-ndak eeka’lek mbo pogo menggaarak me, it yogondak ina koonogo an pe’neegwi iinok, an kunduk, nena koonogo pegiyaagin o,” yinuk, at Omaawi Lombok Menggerak Aliku ALA nen aret yegerak o. “Togop eeko logonet kwe, it nen yogo logonet, Nit nonggop togon ninena koonogo at pekkoorak me, yigi, yinuk, yogwe iigi o. Ti yogwe nogo an yora.
8 Aap ambi nen an Ala wi-wi ee’naburak op mbakwi ya? Togop ee’naburak meek kwe, it nen aret wi-wi ee’nako agaarik o. It wi-wi ee’nako logonet kwe, Nit nonggop togon agago at wi-wi eekoorak me yigi, yinuk, yo’nugwi iigi o. An wi-wi ee’nakwi nogo ti, inamendek 10 wonage kenok, ambi yendenogo nake leenogo pugwi, nake pi wogwe, eeko logonet, wi-wi ee’nakwi iinok, yagi o.
9 It abok aret nen an wi-wi ee’nakwi me, it aakumi ti abok aret pulunogo piyareegirak wonogo agaarik o.
10 Togop eerak logokwak, inamendek 10 wonage kenok, ambi yendenogo punuk, enaani aret an nake pugu pogo menggam pi wogo logowak o. Pi wogwe iinok, an nawi wurik me yabu eeka nogo inambi endak aret nunggo logogun o. Nake pugu nogo it aakumi pi wogo logonet, At nen mbogut paga tu paarogo pit nanuk, ale’nggen nen yi mendek ndi mendek ngginu-ngginu eerogo wuppinani woramenggerak paga niname yagabit age kenok, Eegu ngga patuwi o, yinuk, yuurak ee’ninake kaamun ilik, lek a? yinuk, an nabut mbanggo logonet pi wogo logowak o.
11 Ti eekwi iinok, inambi yarak waalo pune nen nenet nugwi, inageyo anggur awi yarak anggen yugu mono-mono wangge, eeke kero, an arum wonage logogin o,” yinuk, at Omaawi Lombok Menggerak Aliku ALA nen aret yegerak o.
12 “Ti eerogo piminggirak paga it iname time abu obeelom mban wonage kenok, aakumi inanebunu lombok abok aret nen yogo logonet, It inale’nggen paga wonogwe ti kwak ninom op logone, yinuk, yogo logogun o,” yinuk, at Omaawi Lombok Menggerak Aliku ALA nen aret yegerak me, yokkiragi o.
O Age Yobok Aap Iniki Abe Koonak Eeppiyoorak Wone
14 Inoone andiigwi yo’nugwi nogo ti, At ayuk wuko logonet, alut eeko monggoorak nogo ti, we aanom warogo aret eeko monggoorak o. Yogop ee’nu ndogop ee’nu, at yo’nirage nogo eerit nugwi, at Omaawi Lombok Menggerak Aliku ALA enegen kagak, maluk eeko nogogurak paga niniki wakko’net nogwe, eeko monggoorak nogo ti, nano eekkolaawok nduk, eeko ogoorik? Lek aret o.
15 It aap maluk eeko menggaarak ti, ineenggi warak ogwe, it aap nen, Ala maluk eeppanege kaamun ilik? yinuk, maluk eekwi kwe, ineebe op mban wonogwe, eekwi iigwi me, o yogondak nen it aap iniki wogoppakwi ti, inale’nggen mbako menggaarak yogo logogun, yogwe ti paga niniki andi negen eerogo panugo agaarik o,” yinuk, yegerak me, yokkiragi o.
16 Yorage nagagerik, it aap Aliku ALA inagabiti mbako nogogwaarak nogo nen it-it wone mbanggo logonet, it nen yogwi iinok, at Aliku ALA liippege, aruk konengge, eereegerak o. It aap Aliku ALA inagabiti mbakwi, at endage tiyappogo logonet ayuk wukwi, eeko nogogwaarak nogo inendage aberak logowak nduk, at Aliku ALA enggaanom paga mbuku pirik-perek aago paga inendage liiru mbanogo pereegwaarak.
17 Mbanogo pogo mbareegwa, at Omaawi Lombok Menggerak Aliku ALA nen ari logonet, “It aap ti, an napuri aret logogun o. It aakumi koonogo piyoorak wage eyom paga it aap ti, an napuri niniki kundugu aret me, aap ambi aput oone konembunuk eeke kenok, ogoba nogo apuluk abuwa nen ili ari menggi kwak, an togop aret eerogo piyaagin o.
18 Ti eeke neenok, it aakumi iniki abe koonak logonet, eeka inom, inobaabut nggolawe logonet, maluk eeka inom, inalitak eekwi paga eeppiige, ndi, it nayuk wuko logonet, noone mugurok nogwe inom, nayuk wuka’lek noone mbo pugwi inom, inalitak eekwi paga eeppiige, eeke neyaagun o,” yinuk, yegerak me, yokkiragi o.
____________________________________________
3:10 Unde 27:30, Lin. 18:21-24, Pel. 12:6, 14:22-29, Nek. 13:12
1 At Omaawi Lombok Menggerak Aliku ALA nen ari logonet, “An nen aakumi eeppiya woroorak ne nogo ti, abet aret woraagin o. Yugum kani pugu wunuk ari menggi kwak, woraagin me, it aap iniki wogoppatit nega inom, maluk eeriyak mban mbaka inom, wiiringga kani nenet nage menggi kwak nenet nagin o. Ne ti paga kani nenet nage logonet, wiiringga owak inom, omanggen inom, pup eerogo nengge menggi kwak, togop aret eerogo nagin o.
2 It an nendage tiyappogo logonet, nayuk wuko menggaarak iinok perak, oonegen wundi wage logonet, aakumi inagabolo mbiganogo piige menggi kwak, at obeelom eeppiinet nega nogo, wundi woraanuk, towe kwak wiga agan it obeelom eeppiinet nage logogin o. Tapi aagaluk anggenogona wonage me, wumbugwi iinok, ale’nggen paga kunu wonet nege menggi kwak, it inale’nggen nen togop aret agan nugu logogun o.
3 An aakumi koonogo piyoorak ne ti eyom paga aap iniyok liirubu aa’ngga eerogo pogo mengga kwak, it nen aakumi maluk eeka nogo iniyok aambiranogo piinet nogo logogun o,” yinuk, at Omaawi Lombok Menggerak Aliku ALA nen aret yegerak o.
4 “Puut Korep paga nen it aakumi Iterali abok aret yoraawak nduk, wone lengganak inom, eeko logorak wone yugu inom, nayeloman Muta yoge mbareegi, liiru mbaneegerak nogo abeko logowak o.
5 Naliku ALA woroorak ne abu nggwok aakumi inamineeri ne agan noorak mendek koorok panggoni wage kagak, an yoge neegak yoraga Eliya nogo, inowagam nappi wage neyaagun o.
6 Nappi woraminggirak wage kenok, inogobamini nen inapuri inabuwa mbaruwak nduk, iniki koonogo piige, inapuri nen inogobamini inabuwa mbaruwak nduk, iniki koonogo piige, eeremenggerak kwe, ndak-ndak eekwi lek iinok perak, an wage logominggirik, inanggween nogo maluk eerak logowak nduk, pulunogo pigin o,” yinuk, at Omaawi Lombok Menggerak Aliku ALA nen aret yegerak me, yokkiragi, yinuk, yoragagerak.
3:10 Unde 27:30, Lin. 18:21-24, Pel. 12:6, 14:22-29, Nek. 13:12
4 Aliku Ala Woroorak Ne Nogo Paga Eeriyak Wone
1 At Omaawi Lombok Menggerak Aliku ALA nen ari logonet, “An nen aakumi eeppiya woroorak ne nogo ti, abet aret woraagin o. Yugum kani pugu wunuk ari menggi kwak, woraagin me, it aap iniki wogoppatit nega inom, maluk eeriyak mban mbaka inom, wiiringga kani nenet nage menggi kwak nenet nagin o. Ne ti paga kani nenet nage logonet, wiiringga owak inom, omanggen inom, pup eerogo nengge menggi kwak, togop aret eerogo nagin o.
2 It an nendage tiyappogo logonet, nayuk wuko menggaarak iinok perak, oonegen wundi wage logonet, aakumi inagabolo mbiganogo piige menggi kwak, at obeelom eeppiinet nega nogo, wundi woraanuk, towe kwak wiga agan it obeelom eeppiinet nage logogin o. Tapi aagaluk anggenogona wonage me, wumbugwi iinok, ale’nggen paga kunu wonet nege menggi kwak, it inale’nggen nen togop aret agan nugu logogun o.
3 An aakumi koonogo piyoorak ne ti eyom paga aap iniyok liirubu aa’ngga eerogo pogo mengga kwak, it nen aakumi maluk eeka nogo iniyok aambiranogo piinet nogo logogun o,” yinuk, at Omaawi Lombok Menggerak Aliku ALA nen aret yegerak o.
4 “Puut Korep paga nen it aakumi Iterali abok aret yoraawak nduk, wone lengganak inom, eeko logorak wone yugu inom, nayeloman Muta yoge mbareegi, liiru mbaneegerak nogo abeko logowak o.
5 Naliku ALA woroorak ne abu nggwok aakumi inamineeri ne agan noorak mendek koorok panggoni wage kagak, an yoge neegak yoraga Eliya nogo, inowagam nappi wage neyaagun o.
6 Nappi woraminggirak wage kenok, inogobamini nen inapuri inabuwa mbaruwak nduk, iniki koonogo piige, inapuri nen inogobamini inabuwa mbaruwak nduk, iniki koonogo piige, eeremenggerak kwe, ndak-ndak eekwi lek iinok perak, an wage logominggirik, inanggween nogo maluk eerak logowak nduk, pulunogo pigin o,” yinuk, at Omaawi Lombok Menggerak Aliku ALA nen aret yegerak me, yokkiragi, yinuk, yoragagerak.
_________________________________________
4:5 Mat. 11:14, 17:10-13, Mrk. 9:11-13, Luk. 1:17, Ya. 1:21
Mbuku wakkagagerak kuli nen nok wayu kuli, malenit wage, Blog yi paga mbanogo mambege, Bulan Januari tgl 1 mulai eeregirak kuli nen nok Hari selasa september tgl 7 2010 Jam 5:00 selesai baca eeki o.
Nogoba Kaliku Ala kat kawone kinikime nen wunabi wagagindak mbuku paga mbanak wonage nogo, mamunirit wagandak me, kalut eeke logonet, ne ambinom wa lombok yokege. tiyappagage, eeki o. Nogoba Ala wa!
MBUKU MALEYAKI WONE
BalasHapus