ABAKUK

Mbuku Abakuk yi, eebe mbanak pekkaga’lek logonet, aa’nduk pekkoorak yi o.

At Ala nen yoge kagak yoraga Abakuk nogo, Yetut awo nda’naga’lek kagak tahun tujuh ratus yubunikit nduk eeke kagak, aap aakumi Mbaben mendek inowe endagembogut yi aakumi ndi aakumi abu’me piinok, wone lengganogo yorage nagagerak ti eyom paga at Ala nen aap Abakuk yoge kenok, yorage nagagerak.

At Abakuk nogo it Mbaben mendek iniki worookot nen it Iterali maluk lombok eeppiinet nugwi iige nagagerik, Ala yoge logonet, “It aakumi yi, maluk lombok eeppiinet nugwi iigak, kat nonggop nduk puk agandik? Kat kikak nakeelik obeelom mban eeke menggendak nen it maluk eekwi ti, pegiinok, nonggop togon teppiige agandik? It aap kat koone tagangga nen it aap abe koonak mban eeko menggaarak maluk eeppiigwi iigak, kat koone lek nonggop nduk, puk agandik o?” yinuk, yoreegerak nogo mbanak wonage o.

Ayat ti nogo Abakuk 1:13 aret o. Yoge mbareegi, Ala nen Abakuk yoge logonet, “Ne ndi paga eeppiyaakit, mbake nogo ti, eeppiyaagin aret kwe, awo eeppiiga’lek neegak, wone kiniki abeke logorak yokkiri o,” yinuk, yoreegerak pasal 2 ayat 4 yi aret:

“It aap iniki koonak lek nggolawe nogo iniki wogoppako menggaarak kwe, it aap iniki abe koonak nogo perak, abet mbakwi ti paga ineenik aret logogun o,” yinuk, yoreegerak mbanak wonage. Mbuku irip paga mbanak ti, it aakumi Ala yorage liippunuk, eeka’lek iinok, maluk eerogo piyoorak obagari negen yorage nagagerak nogo mbanak wonage, wone irip paga mbangge logonet, Ala omaawi paga mondok iya eerit nage menggerak anep pugu ndawi nogo mendek liiru mbanak wonage, ndi, ndawi ti paga at Ala nen yoge kagak yoraga nogo iniki nonggop togon abet mbake nagagerak nogo inom mbanak wonage, eerak aret o.
_______________
ABAKUK WONE

1

1 Ala nen yoge kagak yoraga Abakuk nogo, peebi eeriyak abinggaanggo paga yoreegerak yi aret.

“Kat eeke yi, neebi o,” yinuk, Ala yoreegerak wone

2 Kaliku ALA wae. An noone nggwok paga, “Yeenggwa niru o,” yinuk, yokkege kwe, Karuk konengga’lek keegak, ne mande arigin o? “Inanini nen maluk eeppinanugwi yi, iyet o,” yinuk, noone nggwok paga yokkege kwe, Ninagap ndaka’lek wonage keegak, ne mande ari nagin o?

3 “Maluk eerit nugwi enegen iyaawak,” nomba’nuk, mbo panege, Koone yugu taganogo pugwi iigak kwe, lambek wonage, Eeke ti, Nonggop nduk agandik? Nenegen neegak, maluk eerogo piinet nugwi, Inogogumbuk lombok logonet, eeppiinet nugwi, Ndugwi pit nogwe, wone warit nogwe, Eeko agaarik o.

4 Togop aret me, wone eeko logorak yugu nogo omaawi lek eerogo pugwi, A’me nggelok eeppiinet nogo logorak wone nogo eeka’lek tayoppugwi, It aap maluk eeka nen it aap iniki abe koonak nogo, inawone liirogon mbangga’lek yagataga eerogo pugwi, Eekwi ti paga A’me nggelok eeko logorak wone yugu nogo a’me ageelik alik aret age menggerak o.

Aliku ALA nen onggo yoreegerak wone

5 Aliku ALA nen it at apuri yorage logonet, “Kit wonogwe yi eyom paga an ambi eeriminggirak nogo kit yokkiroorak kwe, abet mbarumunggup lek me, It aakumi kinaagan-kinambokan wonogwe time kinigen iinok, liippugwi, Wi! yinuk, iya mbakwi, Eerumunggup o.

6 Ti eerigin nogo ti, inogogumbuk worokot nogo nen it inanggween lek kwe, Unde eeppatinuk logowak nduk, o nggween yi abok aret it mban tebeni nogwe aakumi Mbaben mendek aret mippiyaagin o.

7 It aakumi ti, eeppiinet nugwi paga inamineeri ne agan nage logonet, inagabiti mbako menggaarak o. Iniki tiyappatit nogo logonet, aakumi nen eeko logorak koonak abok aret mbo punuk, It iniki nen eeriyak koonggwi nogo mban eerit nugu menggaarak o.

8 Nggeewo inogowa ti, iya negen kwe, it inaguda inogowa perak, abu iya lombok wonogwe, Oonikiya paga mba’ngge noorak abu nen inanini ambik menggaarak kwe, It inaguda perak, inanini abu iya lombok wonogwe, Eeko menggaarak o. It inaguda paga kwi’na’nuk ineebe apit aago me o nda nen iniyok oone mbogu-mbogu wogwe, Towe nggindooni at nengge menggerak wariyak nduk, nabuk togon wangge menggi kwak, it togop aret wogwe, Eeko menggaarak.

9 It abok aret ti, inogogumbuk logonet, aakumi maluk eerogo piyoorak mba’nuk wogwe, O wiya karume nen warit wage menggi kwak, ineebe apit aago wogwe, Mbini niyo aa’nggi paga ineenggi lingginiyak meek menggi kwak, aakumi ineebe togop aret keele maageren nogwe, Eeko menggaarak o.

10 It aakumi inoweewi inendagembogut nogo meek eerogo piigwi, Aakumi inoweewi o unde wonaga nogo inagi’ndok kanggwi, Kota-kota pak omaawi wurik abok aret, Yi iya lek o, yinuk, meek eerogo pugwi, Nggween kabunogo pit laganuk unggwogo logonet, o ti tebenggologwe, Eeppunuk,

11 O wiya nggarek togon warit nage menggi kwak, it togop aret o ambime tebenogo pegak eerit nogo menggaarak. It togop aret maluk eerit nogo logonet, inagugi tiyappogo mengga kwak, Nit ninomaawi ti iya o, yinuk, tiyappatit nugu menggaarak o,” yinuk, it aap eeko menggaarak ti aret mippiyaagin me, nduk, yokkiragi o, yinuk, yorage kagarak.

“Ala eeke yi, neebi a,” yinuk, ne ambinom yoreegerak wone
1:12 Yet. 10:6 1:13 Nda. 18:26 Y

12 Kaliku ALA wae. Kat kanggeelik mondok kitok menggendak nogo lek a? Kat nogoba Ala maluk eekeelik nogoba obeelom mban wonage menggendak o. It Mbaben mendek nen nit aaninggin- paaninggin eerogo pinanuwak nduk, koonogo piige, Kat yugum kole lunik kwak ninogoba wae. Nit maluk eekwi onggo ninoba kwippinanuwak nduk, kat nen aret it mippiige, Eereegindak kagi o.

13 Kat kikak nakeelik abu obeelom wonage me, maluk eekwi kenegen kage, It aakumi maluk eekwi iinok, puk wonage, Eeriyak meek me, It aakumi inoone amburu agan nogo logonet, maluk eekwi nogo nonggop nduk, mbo piige, Ndi, it aap maluk eeka mendek nen maluk eerit nogo logonet, It aap iniki abe koonak nogo inambeme yonggorinakwi iigak, nonggop nduk koone lek puk wonage, Eeke menggendak?

14 Kat nen it aakumi ti, yikwe niyo nggwok yenggenak laut inikime menggaarak kwak eerogo piige, Yi mendek ndi mendek yi inikime tu agan nugu menggaarak inowe wone lengganogo yoraga lek kwak, eerogo piige, Eereegindak o.

15 It aakumi eerogo piyareegindak ti, Yikwe niyo nggwok yenggenak laut paga ambik wonogwe nogo, mbuti eyak keele paga pugumbunuk niik eerogo wumbiya wogo mengga kwak, It aap Mbaben mendek nen togop eerogo piigwi, It yum yikwe wagangga nogo paga yonggo’naremenggaarak me, niik eerogo wumbiya wogwe, Yum yikwe wagangga nggorek lombok yugu paga kuwak eerogo yonggorinakwi, Eekwi iinok, Inale’nggen mbakwi, keekok yogwe, eeko menggaarak o.

16 It yum yikwe wagangga wonage ti paga ineebe obeelom mban wonogwe, Inambi abe mban nonggo logonet, inale’nggen wonogwe, Eekwi me, ikwe wagangga yum ti, ayuk wuko logonet, yum ti ake warogo wogogwi, Obari abe kaga mendek yum yikwe wagangga nggorek nogo ake kani kunggwi, Eeko menggaarak.

17 It aakumi ti nen, yi aakumi ndi aakumi inabuwa mbaka’- lek inawooluwak yabonogo inoorogo piinet nogo logorak op mbaken? An nggayo wurik paga o tum wake minggim lagi nage, O pak wurik irimbaga unggutunggut yerek-nggorek wurik nogome nu’lek mi’nari lagangge, Eeke logominggirik, “At Ala nen wone ngge yo’nege kaamun?” yinuk, tokkage, “At Ala eeke yi, neebi o,” yinuk, “Ala yogirak nogo onggo yo’nege kenok, an nonggop yi?” yinuk, koongge, Eerigin o.

2 Ala nen onggo yoreegerak wone

1 Ari mbareegi, at Aliku ALA nen an onggo yo’nege logonet, “At liiru mbanak lunemenggerak nogo nen aakumi yoranet nage logowak nduk, kat kabinggaanggo kagandak nogo liiru mbanogo pege, Aakumi nen malenggo logowak nduk, yugum tabak paga kin paga ayo waganogo pege, Eeru o.
3 Kabinggaanggo kagandak ti, eeriyak eyom koonak nogo awo ari waga’lek kwe, Woraagin nogo ti, pilit lek abet aret woraagin o. Eeri woroorak nogo puk arigin lek abet aret woraagin me, Elaambirik woraagin, mbarugun o. Ata, kagak tokkage logot o.

4 Ndi, wone eebe liiru mbaniyak nogo yi aret. It aap iniki koonak lek nggolawe nogo iniki wogoppako menggaarak kwe, It aap iniki abe koonak nogo perak, abet mbakwi ti paga ineenik aret logogun o,” yinuk, an yo’negerak o.

It aap maluk eeka pulunogo piyareegerak wone
2:3 Ibr. 10:37 2:4 Oro. 1:17, Nggal. 3:11, Ibr. 10:38 2:14 Yet. 11:9

5 “Aap eenggi warak eekko’net nage ti paga ambokan laganggolage, Aap iniki wogoppatit nega nogo, iniki teberogon wonaga’lek yi paga ndi paga mban koonit nege, Eeke menggerak o. Kambunuk nogo menggam nen, Abu aret waga o, mbaka’lek, Ambinom woraayok, mbake menggi kwak, At aap ti nen, Abu aret tebenggolagi, mbaka’lek, Ambinom tebenggolaakit, mban mbarit nege, Kanggo menggam nen, Abu ndonggoppanigi, mbaka’lek ambe a aago mban menggi kwak, at togop aret mbarit nege, Eeke logonet, Yi aakumi ndi aakumi at wonage me mban kuwak eerogo piya wage, Aakumi inanebunu lombok keele maageren abu’me piya wage, Eeke menggerak.

6 It aakumi at owagam kuwak eerogo piyamenggerak nogo nen at meek eerogo pugwi, agi’ndok kanggwi, eerugun nogo lek a? Eeko logonet, At aap at amendek lek aakumi inamendek kuwak eerogo pati wage, Aakumi inamendek kolaakit nduk, oone omaawi yorage paga eenggi warak eekkolage, Eeke nogo, abuwa o! Ti eeke kagak, ne mande ari nagin o?

7 It aap inamendek kolamenggerak nogo nen pilak yogwe, At ndogop eeppinanege yi, nineebi a, yinuk, mi’na’nuk, aganak wake logowak nduk, eeppugwi, Eerugun nogo lek a? Eeko logonet, at maluk eerogo punuk, amendek ndinggolaagun aret o.

8 At nen aakumi inamiya wunake, Inanggween inom, inawi kotakota inom, maluk eerogo pege, It o kota-kota wonogwe nogo inoorogo piinet nage, Eeke logonet, Aakumi inanebunu lombok ambik aret inagugun wonok nage nagagerak me, It aakumi eegu yumbunogo piyamenggerak nogo nen at amendek kugun wonok ndi yogo logogun o.

9 Neebe op logokit nduk, nawi tiyarogon wurogo patikit o, mba’nuk, Aakumi wi-wi aganake logonet, inamendek wamenggerak paga at paga wiganak ineenggi warak eerogo piige nogo, abuwa o!

10 Yi aakumi ndi aakumi apit aret lek eerogo piyoorak kooneegerak paga at paga wiganak nogo inenggali eerogo piige, Ndi, at eebe kunduk, maluk eerogo pake, Eereegerak me,

11 Pak wurik yugum nogo nen inoone nggwok paga at yogo logonet, Kat pulunik aret o, yinuk, at yogwi iinok, It eyo pelan warak nen kunduk, Abet aret yokkega o, yinuk, at yogo logogun o.

12 Aap ambi nen aakumi inooke logonet, o kota ogowa pit nage, Aakumi maluk eeppiinet nage logonet, o kota nambit-mbit wurogo pit nage, Eeke nogo, abuwa o.

13 Yi aakumi ndi aakumi nggwiirit- nggwaarit eekwi nogo ti, kani noorak ake eekwi, Aakumi inanebunu lombok ambi koloorak lek we aanom warogo kagak, anggon-panggon eekwi, Eeko logowak nduk, Nomaawi Lombok Minggirak Naliku an ALA nen kooneegirak paga eekwi nogo lek a?
14 Niyo nggwok yenggenak laut nen nggween kiiniki paga lombok wonage nogo, nobappunuk menggi kwak, Naliku an ALA abu tiyanak minggirak wone nogo, aakumi o nggween paga ilin-unggut wonogwe abok aret ineenu arugun o.

15 It at enaagan-ambokan wonogwe nogo, Inagabolo kin iyaakit o, yinuk, Niyo kumili aganaka mendek toologo wogoramenggerak nenok, kumili aganake me, aap wogoraga ti, abuwa o.

16 At ayuk wuko logomenggaarak nogo obaane’me at aret enggali warogo pugun me, At aret nenok, agabolo kin kenok, enggali aruwak o. Amburu toolak kwak, at aaninggin oba kwippuurak Naliku ALA neenggi abe’nggan paga wonage nogo, At oba ari wage kenok, wogoriminggirak nagin me, endage tiyanak wonage nogo lek age logonet, enggali mban oba lenggenak aret logogin o.

17 Aakumi inamiya wunabit wage, It aakumi inanggween inom, inawi kota-kota inom, pup eerogo pege, Ndi, it inawi kota-kota wonogwe nogo, ineebe inoorogo piinet nage, Eereegerak me, At ogogumbuk lombok logonet, it puut Libanon menggaarak eyo muurogo pit nogo mengga kwak, eeppiinet nage nagagerak nogo ti, Yungguk togon at oba kwi’nari wage, Ndi, ndiimbu-nggwiya eyonggaame time lek eerogo piinet nage nagagerak nogo nen Melak togon at agabiti mbaruwak nduk, eeppugwi, Eerugun o, yinuk, at yogo logogun,” yegerak o.

18 It aap eyo paga kugi ogut ogobakkigiko menggaarak ti, nano eekkolaawok nduk, eeko menggaarak? Mbuti paga kugi ogut longgo warak ti nen wone abe yorage lek pilit yorage menggerak kagak eekwi ti, Nano eeppiyoorak nduk, eeko menggaarak? At aap ogobakkigika nogo nen ogut ogobakkigirogo pege nogo ti, Oone lek kagak ogobakkigirogo punuk, iniki oba panggombege me, At nen nano eekkolaakit nduk, ogobakkigike menggerak?

19 Aap ambi nen eyo obate mbanak yoge logonet, “Keenik aru o,” yinuk, yoge, Ndi, yugum oone ariilik kagak, “Kat mi’naru o,” yinuk, yoge, Eeke kenok, abuwa o. At oone lek ti nen, “Ndogop ee’nip o,” yinuk, yoroorak op mbakop? Ogut ogobakkigirik nogo ti, mbuti emas paga inom, mbuti perak paga inom, nabenogo pugu wonage kwe, Nebek-ndalok yaga’lek oone lek aret menggerak.

20 Togop kwe, at Aliku ALA perak, at awi wurik abu alik leenak menggim time wonage me, Kit aakumi nggween paga wonogwe abok aret at enggaanom paga kinoone lek puk aret logonip o.

3 At Abakuk nen tamban eereegerak wone

1 At Ala nen yoge kagak yoraga Abakuk tamban eereegerak nogo yi aret.

2 “Kaliku ALA wae. Kat eeke menggendak nogo an muk konengge, Kaliku ALA o. Kat eerit nage nogo paga an nagabiti mbake, Eeke agarik o. Kat eeke menggendak ti, nit kaawok nduk, ambinom eeke, Kat eeke menggendak nogo, nit yogondak wonogwe yi paga kin eeppege, Kanini ninoba pinanege logonet kwe, ninabuwa mbake, Eeru o,” yinuk, tamban eereegerak.

3 Tamban eeke mbareegi, at Ala nogo o Teman nen wage, At Kikak Nakeelik abu obeelom menggerak nogo puut Paran nen wage, At abu tiyanak me, “Wi!” yogwe nogo, o mbogut paga ndak warak wonage, O nggween paga kunduk, at alut eekwi nogo ndak warak wonage, Eerak aret agaarik o.

4 At wage kagak, eya kwindagala aago wonage ti, At omaawi nogo eenggime kumaarak wonage me, time nen abinak pindanogo wumbi wage,

5 At wage kagak, kugilingga aa’nduk iyak wu’nage, Wage kagak, ambokan andi kambuurak mendek mugurok wage,

6 At mi’nage kagak, nggween na’ndo-wa’ndo eeke, At enegen enaagan-ambokan pi’nage kagak, yi aakumi ndi aakumi inaganak warit nage, Puut-puut aa’nduk lombok nen itok negen wonage nogo, yigirogo wurabit wage, Puut-puut teberogon o maan nen wonage nogo, aambirambira wangge, Eeke kagarak o. Ti eeke kagarak ti, o aa’nduk lombok eeke nagagerak nogo aret eeke kagarak.

7 It aakumi o Kutiyan mendek inawooliya wurik me wonogwe nogo, inomanggen tayo-tayo nage, O Miriyan inawi wurik me wonogwe nogo, inaganak warit nage, Eeke kagarak o.

8 Kaliku ALA wae. Kat kaguda paga kwi’na’nuk nage, Kanggweendo paga nen wim eeke logonet, keegin tiyak yuwak nduk kwi’na’nuk nage, Eeke logonet, Yi niyo ndi niyo nage nogo kanini inombake logonet, eereegindak ilik? Niyo mbuulogwe-mbaalogwe nage nogo paga kanini oba puurak mbake logonet, eereegindak a? Ilik, niyo nggwok yenggenak laut paga kanini oba puurak mbake logonet, eereegindak kwa? Yu o!

9 Keegin agale wuppunuk, komaale agale paga lumbege, O nggween nggaganogo punuk, niyo nage logorak eerogo pege, Eereegindak o.

10 Puut-puut nen inigen keenok, inaganak warit nage, Kat keegak niyo wu’nuk nage, Niyo kole yenggenak laut kiiniki lombok paga anggut-nggut oone ari logonet, Kilaarak-mogonik eerogo nippit wage, Eereegerak o.

11 Komaale namburik abigan o kimbik negen eeke, Kawooluwak namburik nage logonet, abinak pindanggage, Eeke paga Oonegen inom, tut inom, inobaane’me mbogut paga nogome puk ogwe iigirak o.

12 Kanini mbakak o nggween paga yime wanggerit nege, Kanini kani kunik negen eeke logonet, yi aakumi ndi aakumi aan lebenogo piinet nage,

13 Kat kapuri inagap ndariyak nduk wundi wage, Kapuri leenogo piyareegindak nogo, inagap ndarikit nduk wage, Eeke logonet, It aap maluk eeko menggam wonogwe inowe nogo, aan lebenogo pege, It at awuri inom nege abok aret lek eerogo piige, Eereegindak o.

14 It aakumi ambi eekkoloorak meek kumaarak wonogwe nogo, at awuri nen inambeme yonggorinabuwok nduk, eeko logonet, Nanonggwan aga o, yinuk, inale’- nggen mbako mengga kwak, At awuri wim eeka nen nit mappinanuwok nduk, o wiya warit wage menggi kwak wogwe iigak, At awooluwak yabok togon eerogo inowe nogo anobak polok togon warogo pege,

15 Kaguda iniyogobit paga niyo kole yenggenak laut nogo, aan lebenogo pit nogwe iigak, Niyo nggwok yenggenak laut nogo aanggolagap eerogo pege, Eereegindak o.

16 Agan wage yi abok aret naruk konengge, niniki ma’nage, Nagabiti nen nambe lele ari, Nowak ne agan nage, Naganak ndik-ndik ee’nake, Eereegerak kwe kagak, It aakumi tebenogo pinani unggwogwe nogo, aaninggin inoba kwippiyorak eyom ari woraawak nduk, An niniki aanaganggenggwi lek tokkage logogin o.

17 Eyo wuli nogo anggup lobangga’lek kagak, Eyo anggur nogo anggen yega’lek kagak, Eyo tayitun anggen yega’lek kagak, Yabu yarak me anggen abe mbanggolaga’lek kagak, Kambin-ndomba inanggenogona ambiriluk ambi wonogwe lek iigak, Lembu-tapi inengga’nggo’na ambiriluk ambi wonogwe lek iigak,

18 An perak, Aliku ALA paga nale’nggen nggwok mbake, Nagap ndaka nogoba Ala aret me, nale’nggen nen ndawi lubuk ari, Eeke logogin o.

19 An nomaawi ti, at Aliku Itok Menggerak nogoba Ala aret. Rusa iyok teeluk me, ya pegak nda pegak nege menggi kwak, an niyok togop aret eerogo panege, Puut-puut tiyarogon niyok pit nage logokit nduk, eerogo panege, Eeke menggerak o. Ndawi pugu yi, nggitat eekwi iigak, tiyanggo logowak nduk, inowe wogoreegwaarak.
___________________________
Habakuk 3:19 2Tam. 22:34, Nda. 18:33