TITUT

Mbuku Titut yi, eebe mbanak pekkaga’lek logonet, aa’nduk pekkoorak nogo yi o.

At Titut nogo aap Yakuri mendek lek kwe, Yetut abet mba’nuk, Ala apuri inom ari unggwage nagagerik, at Pawulut Ala eyabu eeke nogo imbirak a’nuk eeke nagagerak.

Pawulut o ambime nage logonet, at Titut nogo o Kereta time Ala apuri inarum logowak nduk, teppunuk nagagerak. Nage nagagerik, liiru yi mbanogo Titut nappiya wagagerak. Liiru mbaneegerak yi nogo, wone alom kenagan wonage. Alom ambi ti, it aakumi Kereta mendek inobaabut abu maluk mban wonogwe me, it aakumi Ala apuri inarum logorak mippiyoorak kenok, at Titut nen aakumi inobaabut liippiinok, abe kenok mban mippiige logowak nduk, yoge, ndi, wone ambi ti, at Titut nen Ala apuri kuwak eeko nogogwaarak aap inanggok inom, kumi inanggok inom, kumi ndugum inom, wologwe tawe inom, aakumi inayeloman inom, ineebe wonogwe mugurok aret Ala apuri inom aruwak nduk, wone koonogo yorage, eeke logowak nduk, yoreegerak.

Ndi, ambi irip paga yoreegerak ti, at Titut wone mamuninake logonet, aakumi inom iniki kunik aganakwi, aakumi niniki-kiniki kunik wonogwe, iniki ambit lambunik logonet eerit nugwi, inanini wungga’lek obeelom mban wonogwe, yawi pega’lek wonogwe, kumi ugun-ugun eeginabit nega’lek obeelom mban wonogwe, eeko logorak nogo mamuninake logowak nduk, liiru yi, mbanogo at Titut ake nappiya wagagerak.

--------------

PAWULUT NEN APUT TITUT AKE LIIRU MBANEEGERAK WONE

1 1-4 Naput Titut wae. Nit abok wone abet mbakwi nogo paga naput abe kat aret me, it aakumi Ala nen miirinabeegerak iniki abet mbakwi wone nogo wigangge, ndi, Ala ari menggerak wone nogo liippunuk, Ala apuri nen eeko mengga kwak eekwi, eeruwak nduk, an Pawulut Ala ayeloman Yetut Keritut ayonggo nappiigak mendek agago paneegerak nogo nen aret yokkiri o. At pilit ariilik abet mban ari menggerak Ala nogo nen, “Mondok-mondok ineenik logogun o,” yinuk, o yi wakkaga’lek kagak, koonogo pereegerak nogo, ee’ninabuwak nduk, niniki lunik wonogwe nogo ti, nit abet mbakwi, Ala ari menggerak nineenu ogwe, eekwi nogo paga panggonak wonage agaarik o. Niniki lunik wone ti, maan togon koonogo pereegerak kwe, “Ndiyom paga kin arigin,” mbareegerak nogo ninagap ndaka Ala nen, “At yorage logowak o,” yinuk, an yogondak abe wone yorage logokit nduk, unde eeppaneegerak nogo aret yorage neegak, nineenik ee’ninaburak wone ti inom yorage paga kenom aga o. Ninogoba Ala ninagap ndaka Keritut Yetut imbirak iniki kunik nen wokkugwi, kiniki ugun tayenak ale’- nggen logonok nduk, eeppagagwi, eeko logogun o.

Titut o Kereta logonet, eeke logorak yoreegerak wone

5 An eeka’lek kagak wagagirak nogo eeke, ndi, o kota lombok Ala apuri unde logowak nduk, “Aap ti mendek mippiyoorak,” yokkereegirak nogo mippiige, eeke logonok nduk, kat o Kereta time keegak, an wagagirak nogo o.

6 Ala apuri unde logowak nduk mippiyoorak nogo ti, aakumi inoone inoba piigulik kenok, inakuwi ambit wogo kenok, “Inapurilogwe nen ugun-ugun eerit nugu logonet, inagalomini-inogobamini inoone taganogo piigwi kwe, inaruk waka’lek kiraap!” yogolik Ala wone abet mba’nuk eeko menggaarak inogobamini kenok, it ti mendek mban mippiyoorak op o.

7 It aap aakumi inarum logorak nogo ti, Ala eyabu eeka me, maluk eeke kenok aakumi inoone inoba piyookwak, obeelom mban eerit nugu logowak o. It koonggwi mban eeriyak mbakwi, inanini mbet-mbet wungge, amburu kumili aganake mendek ndonggorogon nunggwi, ndugwi pugwi, aakumi inawu kolaawok nduk, wi-wi aganakwi, eeko menggaarak kenok, aap ti mendek mippiyoorak lek o.

8 Ata, aap inanoniya laka kenok, obeelom eeriyak inikilom mbaka kenok, iniki warak kenok, a’me nggelok eeka kenok, Ala wone liippunuk eeka kenok, eeriyak eeke kagak kwe, iniki yungguppunuk, puk aga kenok, aap ti mendek mban mippiyoorak op o.

9 Wone kole wone ti, it konenggo menggaarak nen abet mbaruwak nduk, lengganogo yorogwe, abe wone woorak ineebi mbakwi nogo waawak nduk, wone kenaarogo yorogwe, eeko logowak nduk, abe wone nogo paga niniki panggombunuk, waganeegurak wone nogo, it ndakndak iniki panggombunuk, nggiriknggerok porogo wonogwe iinok mban mippiyoorak op aret o.

10 Wone, “E o,” yinuk, konengga’- lek logonet, inoone amburu pukpuk agan nugwi, aakumi inambokan laganggwi, eeko menggaarak ti,it ineebe apit aret kwe, it inagabolo mbanak abet mbareegwaarak nogo perak, abe iyagalo it nen aret agan nugu menggaarak.

11 It aap ti, inenggali ariyak kagak, yi mendek ndi mendek kolaawok nduk, wone mamuniyak lek mendek mamunirogo logonet, aap ambi aaganapuri apit inom iniki abut lagak-mbagak aganabit nogo menggaarak me, inoone mondok lek eerogo piige logot o.

12 It aap wone ti mendek yorogo menggaarak ambi nen ari logonet, “It aap o Kereta mendek ti, mondok pilit pugungga aret menggaarak o. Nggwiya nen yiwi-yawi ari logonet nibingge menggerak pogom it togop aret logonet, Ineenggi lebenak inalom mban koleewak menggaarak o,” yinuk,

13-14 yereegerak nogo ti, abet aret yereegerak o. Togop me, it aap ti, wone abet mbareegwaarak nogo mondok nu’lek porogo logowak nduk, aakumi Yakuri inawoneelom mbininggo menggaarak wone inom, it aap Ala ari menggerak wone mbo punuk, iniki ugun koombunuk, “Yogop ee’nu, ndogop ee’nu,” agan nugu menggaarak wone nogo inom, “Liippuurak mage o,” yinuk, koone omaawi paga mondok inaruk wake logot o.

15 It aakumi iniki obeelom menggaarak kenok, it inigen me yi mendek ndi mendek obeelom mban aret kogo menggaarak. Ndi, it aakumi abet mbaka’lek maluk mban eeko menggaarak kenok ti, eeriyak inikime abe’nage inom, koonggwi inom, ti maluk mban aret me, it inigen me yi mendek ndi mendek maluk mban aret kogo menggaarak.

16 It aap ti nen yogo logonet, “Ala nineenu o,” yogo menggaarak kwe, it eerit nugwi paga nen perak, “Ala nineebi,” mbako logonet, yogwe yelok iigo monggoorak. Ala wone konengga’lek taganogo pit nogo logonet, obeelom ambi eekulik maluk mban eekwi me, inogole warak aret iigo monggoorak o.

2 Kole wone kenok mban mamunirage logorak wone

1 Kat perak, wone mamunirage menggendak nogo wone kole wone kenok mban mamunirage logot o.

2 It aap inanggok ti, iniki tum waka kenok, inayuk warak kenok, iniki warak kenok, it iniki abet mbakwi nu’lek menggaarak kenok, aap togop mendek logowak nduk, yorage logot o. Aakumi abok abet aret iniki kunik aganakwi, ndi, aaninggin inoba age kenok inogogumbuk logonet, waganggwi, eeko logowak nduk, yorage logot o.

3 It kumi inanggok ti, it eeko menggaarak liippunuk, Ala ayuk wuko logonet, eeko logowak nduk, aap inanggok yoroorak yokkigirak nogo ndak-ndak aret yorage logot o. Inambe irip paga wonok nugwi, amburu kumili aganake mendek ndonggorogon nunggwi, ti eeko logorak lek o. Ata, wone abe wone kenok mban mamunirogo logowak nduk, yorage logot o.

4-5 Ala wone miyuk-meya eerogo pukwak, it kumi ndugum nogo nen inogonggelomini inom, inaagalogwe inom, iniki kunik aganakwi, iniki warak ogwe, inoreewi inabuwa nen inigen tebenak nugwi, iname liirogon wonogwe, kumi iniki obeelom logonet, inogonggelomini inabu’- me tebe yinuk, inoone konenggwi, eeko logowak nduk, it kumi inanggok nogo nen kumi ndugum mamunirogo logowak o.

6 Ndi, it wologwe tawe ti, togoti aret iniki warak logowak nduk, inaruk wake logot o.

7 Aakumi kat paga in wakkagak eeko logowak nduk, kat yi eekak ndi eekak eeke logonet, obeelom mban eerit nage logot o. Eerit nage logonet, wone mamunirage menggendak nogo, kat koone inom nabenogo ugun-ugun mamu-nirage, kayuk lek we i’ndok-i’ndok yorage, eeke logogun o.

8 Ata, kayuk warak logonet, yorage kenok, it aap koone woorak, “Nineebi,” mbakwi nogo nen wone maluk ambi yoramenggendak paga yilunogo punuk, nit tebembinaniyak lek me, it inenggali aruwak nduk, wone koleewak wone kenggali wappagarak lek nogo mendek mban yorage logot o.

9 It aakumi inayeloman nogo ti, inogobamini lombok nen yorogwe nogo, inoone konembunuk, wone onggo yoraga’lek iinok, inogobamini inikilom logowak nduk, yorage logot o.

10 It aakumi inayeloman nogo ti, inogobamini inamendek yogoot kumaako logorak lek o. It nogo ti, yi eekak ndi eekak eeko logonet obeelom eerit nugwi paga aakumi ugun nogo nen, “Ninagap ndaka Ala wone waawok,” mbaruwak nduk, “Kinogobamini inamendek wagangga’lek liirogon arum logonip o,” yinuk, yorage logot o.

11 Ala iniki kunik nen wo’niragagerak wone nogo, it aakumi abok inagap ndaruwak nduk, kin agagerak.

12-13 Ninogoba nggwok Ala ninagap ndaka Yetut Keritut, “Wi!” ugwi iigak, kin ari woroorak nogo, nit niniki lunik logonet, ninale’nggen paga tokkogwe me, Ala iniki kunik nen yo’- nirage logonet, “Kit o nggween paga yime Ala kinagabiti mbaka’lek maluk eekwi inom, nggween paga eeriyak kiniki nengge inom, mbo punuk, kiniki warak a’nuk, maluk eeka’lek obeelom mban logonet, Ala wone liippunuk, mugurok nogo logonip o,” yinuk, yo’nirage menggerak.

14 Nit yi maluk ndi maluk eeko monggoorak nogo eeko logokwak ninonggo mbanogo piinogo pinanege, ndi, “An napuri nake leenak logonet, obeelom eeriyak iniki aganggen paga eerit nugu logowak,” mba’nuk, ninomaluk koorogo pinanege, eerikit nduk, nit ninake niya wagagerak.

15 Wone yi yorage, “Yogop eeriyak ndogop eeriyak,” wone lengganinake, koone omaawi paga inaruk wake, eeke logot o. Ndi, aap ambi nen kat meek eerogo pagarak lek o.

3 Ala apuri kenok eeko logorak wone

1 Aakumi nen it o arum waka pemerintah inom, it aap inayuk warak menggaarak inom, inabu’me logonet, inoone konenggwi, ndi, eeriyak obeelom ambi kin age kenok, “Eeko logowok o,” yinuk, mbako logowak nduk yorage, eeke logot o.

2 Aap ambi miyuk-meya eerogo pugwi, ndugwi pugwi, eeko logorak ti mage o. Ata, iniki yanggonak logonet, yi aap ndi aap abok aret inabuwa mbako logowak nduk, yorage logot o.

3 Nit kunduk, maan togop aret nineenggo’lek wi negen wonogwe, wone yo’niragaatak konengga’lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, naninikanini yogwe, ti mendek mban eeko nogogurak kwe,

4 ninagap ndaka Ala nen yi aakumi ndi aakumi inabuwa mba’nuk, obeelom eeppiyoorak nogo, kin ari wage nagagerik,

5 ninagap nda’ninabeegerak. Nit obeelom eeko nogogurak paga ninagap nda’ninabulik o. Ata, at alik iniki nen ninabuwa mba’nuk, obeelom eeppinanege logonet, niniki maluk koorogo punuk, obaane’me ngget ndarogo pinanege, Aberiniki nen niniki ngget ogobakkigi’ninake, eereegerak ti paga ninagap nda’ninabeegerak.

6 At ninagap ndaka Yetut Keritut eereegerak paga Ala nen Aberiniki ndonggok togon wo’niragagerak.

7 At Ala iniki kunik nen eeppinaneegerak paga, “Aap yi, oba lek o,” yinuk, abu obeelom aret eerogo pinanege nagagerik, aap ambi ogoba eyate ko-lage menggi kwak, nit nineenik mondok-mondok logorak niniki lunik nogo kolaawok nduk, Aberiniki ndonggok togon wo’niragagerak.

8 An wone yokkigi ti, abet aret o. It aakumi iniki Ala oba panggombunuk, abet mbakwi nogo iniki liippunuk, obeelom mban eeko logowak nduk, an yokkigirak ti, kulinik-kalinik koone omaawi paga yorage logot o. “Wone yi, obeelom aret o,” yinuk, waganggwi paga obeelom ambi eekkoloorak aret me, yorage logot o.

9 Wone irip me op eekkoloorak lek mendek inom, ndarak alom mbininggwi inom, Muta wone mbanak paga, “Yogop-ndogop,” yogo logonet ndugwi pugwi inom, ti eerit nogo logonet, irip me time ambi eekkoloorak lek kagak we aanom warogo yogwe me, mbo puurak aret o.

10-11 Aap aakumi iniki nomoninaka nogo nen abe wone mbo punuk, maluk mban eerit nage paga maluk onggo oba kwippatiyak kagak, eerit nage keenu me, ne mbere paga aruk wappunuk, mbo puurak aret o.

Wone irip paga yoreegerak wone

12 An nen aap Aretemat ilik, aap Tikikut a, nappi wage logominggirik, o mayu kumulinggen wambi woroorak eyom paga o Nikopolit time logorak mbakirak me, time wonage me, kat mbet-mbet neya woraanok nduk, koongge logot o.

13 Wone amburu mbangga aap Tenat nogo inom, aap Apolot nogo inom, mbetmbet nappiya wage logonet, inamendek lek kenok, wogoranu o.

14 It ninapuri ti, eyo anggen yegeelik pogom logokwak, it aakumi aaninggin inoba age kenok yeenggwaarogo logowak nduk, yabu liirogon eeriyak mamunggologo logowak o.

15 It aap ninom minggirak abok aret an ninom nen keyage wakkako o. Ndi, it Ala wone abet mba’- nuk, iniki kunik ee’ninakwi kinom wonogwe time abok aret, “At Pawulut nen keyage wappinagagi o,” yinuk, yoret o. Ala iniki kunik en eeppagage logonet, karum aret logogin o. Naput wa!