Mbuku Nggalatiya yi, eebe mbanak pekkaga’lek logonet, aa’nduk pekkoorak nogo yi o.
Mbuku Nggalatiya mbanak yi, it Ala apuri o Nggalatiya kuwak eekwi nogo nen yogo logonet, “It Yakuri mendek lek endekem konenggulik mendek Ala apuri aruwok nduk, Yetut eeke nagagerak obeelom wone abet mba’nuk, waganggwi iinok, nit Yakuri wone yugu ndak-ndak eeko logorak ilik, lek a?” yinuk, yogwe iinok, at Pawulut nen it yorage logonet, “Nit wone yugu eekwi ti paga, Ala apuri aret o, yuurak ti, meek o. Ata, niniki Yetut oba panggombunuk abet mbakwi ti paga, Ala apuri aret wonogwe o, yuurak ti perak, op o,” yinuk, yoragagerak. Wone yugu ti paga it Pawulut inom ogoorak nogo nen Ala apuri o Nggalatiya wonogwe me, muk inowagam unggwi wagaarak wonogwe iinok, yoragagerak. O Nggalatiya ti, it aap Oroma unde menggam propinsi ambi endage Nggalatiya aret. Ndi, it unggwi wogogwaarak ti, “Nit Yakuri mendek wone yugu eekwi paga Ala ninom kunik logogun,” mbako nogogwaarak kenok yoragagerak.
At Pawulut nen mbuku Nggalatiya liiru mbaneegerak nogo ti, it Ala apuri wone alik mamunik waganggwi paga iniki nomok ari kero, wone obeelom wone aa’nduk waganeegwaarak nogo, liirogon nggirik-nggerok porogo logowak nduk, yoragagerak. At liiru mbanogo Ala apuri o Nggalatiya wonogwe me nappiyareegerak nogo ti, wone obeelom wone mamunik waganeegwaarak nogo mbo punuk, wone alik ngget mendek mamunik nogo mugurok noorak eeko mbareegwa, at Pawulut nen, “Kit wone obeelom wone aa’nduk waganeegutak nogo, mbo puurak mage o. Ata, liirogon porogo logonet mugurok nogo logonip o,” yinuk, yoragagerak. “An Keritut ayonggo aret o,” yinuk, oone omaawi aret yoragagerak. “An Keritut ayonggo agagirak nogo ti, aakumi nggween paga mendek nen eerogo panulik o. Ata, Ala yonggo logonet yorage logokit nduk eerogo paneegerak o.
Ndi, an eeriyak nduk yonggo paneegerak nogo ti, it aakumi Yakuri endekem mendek aa’nduk yorage logokit nduk yonggo paneegerak o,” yinuk, yoragagerak (1:2). Yorage nagagerik, “Ala abet mbakwi ti paga nit Ala ninom ambit lambunik logogun o,” yinuk, yereegerak nogo pasal 3-4 wonage, ndi, pasal 5-6 irip paga yoragagerak nogo ti, “Nit aakumi niniki kunik eeginako monggoorak nogo ti, Keritut abet mbakwi paga aret o. It Ala apuri obeelom eeko menggaarak nogo ti, wone yugu eekwi paga lek o. Ata, abet mbakwi paga nen aret o,” yinuk, yoragagerak nogo liiru mbanak wonage o.
---------------------------------
PAWULUT NEN ALA APURI O NGGALATIYA MENDEK INAKE LIIRU MBANOGO NAPPEREEGERAK WONE
1 1-2 It aakumi nen mippanugwi, aap ambi iniki koombunuk, mippanege, eerulik o. Ata, at Yetut kambunuk nogo menggam nen eenik agago mippereegerak ninogoba Ala ninowe Yetut Keritut imbirak nen, nappiigak mendek agago mippaneegwaarak an Pawulut nogo nen, kit Ala apuri o Nggalatiya kuwak eerit nogo monggotak nogo, wone ambi yokkira o. Noreewi apit ninom wonogwe nogo nen keyage wakkinako o.
3 Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale’nggen logobagip nduk, eeppinagagwi, eeko logogun o.
4 O yogondak yi paga, it aakumi nggween paga mendek nen maluk mban eerit nogo menggaarak nogo, ninom eekwi niyo, ndinogo wo’ninabikit nduk, at ninogoba Ala mbareegerak nogo ndak-ndak, nit maluk eekwi niinok, ninowe Yetut Keritut nen, “Inake kambikit o,” yinuk, ninake kambeegerak.
5 At Ala nen eeppinaniyak kooneegerak paga Keritut ninake kambeegerak me, “Ala endage mondok-mondok tiyappogo logowok o,” yinuk, abet aret yokkiragi o. Amin!
“Wone obeelom wone ti, ambit aret,” yoragagerak wone
6 At Keritut kinabuwa mba’nuk kambeegerak nogo paga, Ala nen obeelom eerogo pinagakit nduk miikkinabeegerak nogo kagak mbo punuk, wone alik mendek ambi mbet-mbet woorak eekwi kiige nagarik, “Wi!” kirage agarik o.
7 Wone obeelom wone alik ambi inom wonage lek aret kwe, it aap ando nen Keritut eeke nagagerak obeelom wone nogo, “Abut laganuwok o,” yinuk, wone alik ambi inom nabenogo agan nugwi ti paga, kit kiniki naalop-kaalop eerogo pinagagwi iigirak me nduk, yokkiragi o.
8 Togop me, nit obeelom wone yaga ambi nen ilik, it mbogut paga nugu menggaarak malayikat ambi nen a, wone aa’nduk yokkirogogurak waganeegutak nogo kagak, alik ambi yokkira wogwe iinok ti, Ala nen pulunogo piyamenggerak aret kambuwak o.
9 Kit aa’nduk obeelom wone waganeegutak nogo kagak, aap ambi nen wone alik mendek ambi wonok yokkira wage kenok, “At kugi pulu aago pogom logonet, kambuwak o,” yinuk, yokkirogo nogogurak nogo ndak-ndak yogondak ambinom yi aret yokkiragi o.
10 An yokkirage ti, aakumi inikilom nombaruwak nduk ari ilik, Ala inikilom nombaruwak nduk ari a? Ndi, an aakumi nen tiyappanuwak nduk ari minggirak mbakop? Lek o. An aa’nduk aakumi inikilom mbaruwak nduk ari nagagirak nogo ndakndak ari logonetak en, yogondak an Keritut ayeloman logonetak lek o.
Pawulut nonggop togon nappiigak agagerak wone
11 An wone obeelom wone yoranet nege minggirak nogo ti, it aakumi nen iniki koombunuk agan nugu menggaarak nogo mendek wagangge nagagirik, yoranet nege logolik o, yinuk, kineenu arubagip nduk yokkiragi o, noreewi.
12 An yorage minggirak nogo ti, aakumi inoone yugu waganeegirak lek o. Ndi, it aap ambinen mamunnereegwaarak paga agan nege minggirak kunduk lek mban. Ata, Yetut Keritut nen lalin negen eeppaneegerak paga yoranet nege minggirak o.
13 An it Yakuri inoone mugurok nage logonet, eerit nege nagagirak nogo, kit muk konenggo nogogutak o. Ala apuri kuwak eerit nogo menggaarak nogo, ambi teppiyoorak mbarulik abok aret lek eerogo piyaakit nduk, mondok tigiren-muguren nege nagagirak nogo kineenu o.
14 Nit Yakuri inoone mugurok nogo logonet, an ninom ndak-ndak ndarak noreewi ando we mbuuluk negen eekwi iigak, an perak nombomini eeko nogogwaarak nogo, niniki aganggen kerek togon mugurok nage logonet, mondok ndak-ndak aret eerit nage nagagirak nogo ti, kineenu mban o.
15 Togop tit eerit nage neegak kwe, nagalo inikime awo nda’naga’lek neegak, at nabuwa mba’nuk, mii’nake nagagerik, yonggo paneegerak Ala nogo nen
16 it aakumi endekem konenggulik mendek an yoranet nage logokit nduk, at aput Yetut ni’neyoorak inikilom nomba’nuk, ni’neege mbareegi, “Yi nonggop ee’naki?” yinuk, it aakumi ambi nen yo’niruwak nduk, inowagam yora nage,
17 ndi, an nappiigak awo mippangga’-lek kagak, it inaa’nduk nappiigak mendek o Yerutalem wonogogwaarak nogo, inowagam yora nage, ti eerulik. Ata, an o Arap nagagirak time wonage nagagirik, peebi niyok paga o Ndamitik aret wagagirak.
18 Ti’nuk, tahun 3 eeppunuk, aap Kepat pekkaagin o Yerutalem nage nagagirik, nimbirak abet aret nogo 15 yereegirak kwe,
19 it nappiigak ando ti, an nenegen abu iyoolik. Ninowe Yetut awuluk Yakobut nogo, alik mban nenegen kagagirak o.
20 An liiru mbanggirage yi nogo ti, pilit lek Ala enggaanom paga mondok abet aret mbanggiragi o.
21 An aap Kepat nimbirak wonagagirik, ti’nuk, o Tiriya inom, Kilikiya inom, wage nagagirik, o nogome enaagan-ambokan nege neegak,
22 it Keritut apuri o Yureya kuwak eerit nogo menggaarak nogo nen, neebe inigen neyoolik kwe,
23 it aakumi nen yogo logonet, “Nit abet mbakwi wone nogo, aa’nduk at nen lek eerogo puurak nduk, ti’niren-mu’niren nege nagagerak nogo kwe, yogondak wone nogo aret woppunuk, yoranet nege agaarik o,” yinuk, yogwe konenggo nogogwaarik,
24 “Wi!” yinuk, an eeke nogo paga Ala endage tiyappogo nogogwaarak.
2 Pawulut oreewi nappiigak inom eereegwaarak wone
1-2 Ti’nuk tahun 14 eeppunuk, an ne ambinom o Yerutalem naakit nduk, Ala nen lalin negen niniki koonogo panege mbareegi, aap Mbaranabat nimbirak nogo logonet, at Titut nogo waganggak nogogurak. Nogo nogogurik, wone obeelom wone it aakumi endekem konenggulik mendek yorage minggirak nogo, it ninoweewi inendage warak Ala apuri o Yerutalem unde menggaarak nogo, “Yorage neenok, it nen, Kat wone alik yorage menggendak keego, yinuk, yo’nugwi iinok, Yoranet nege nagagirak inom, yorage minggirak inom, we aanom warogo eeke nagagirak kagi,” yinuk, mbake neyo, nagabiti mbake logonet, it nogo mban inaa’nduk inalik aret paganogo yoragagirak.
3-4 Nogo yorage nagagirik, at ninore ninom nogogurak Titut nogo, aap Yunani mendek me, it aap ando we piliret, “Nit kinoreewi aret o,” yinuk, ninenggela’me unggwi wogogwaarak nogo nen, “Agabolo mbaniyak,” mbakwi iyareegurak kwe, it ninoweewi nogo perak, “Mbaniyak,” yo’- niraga’lek puk mban wonogwe iyareegurak. It aap ti, nit Keritut Yetut ninom kunik logonet, wondet agagopinaneegerak wone kologo logonet, Yakuri wone mbo pereegurak nogo, ambinom eeko logorak yilinogo pinanuwak nduk, unggwi wogogwaarak kwe,
5 kit Ala abet aret ari menggerak wone obeelom wone waganeegutak nogo mban enaani porogo logonet, eerit nogo logobagip nduk, it eeriyak nduk unggwi wogogwaarak nogo, “Ambiriluk ambi eeruwok o,” yinuk, “E o.” yoroolik mbo piyareegurak.
6 Ndi, it ninoweewi inendage warak yagarak nogo ti, Ala nen ninetenggen maloppinaninuk, ambi yi, iya, ambi yi, meek, ninombakeelik me, an togon inendage ti paga iya mbakeelik kwe, it ninoweewi inendage warak me, it nogo nen, “Kat yorage menggendak ti, wone yi inom eeko logowak nduk yorage logot o,” yinuk, an yo’nugwi lek puk mban wonogwe iyareegirak.
7-8 Ala nen at Peterut it Yakuri mendek yorage logorak unde eeppereegerak kwak, an togon, it aakumi konenggulik mendek yorage logorak unde eeppaneegerak me, wone obeelom wone it aakumi inagabolo mbanak mendek Peterut nen yoranet nage kagak, Ala nen it eeppiyoorak mbareegerak nogo kokwak, an ndakndak obeelom wone it aap endekem konenggulik mendek yoranet nage neegak, it eeppiyoorak mbareegerak kogo nogogwaarik,
9 it Ala apuri kuwak eerit nogwe pippiirogo menggaarak o Yerutalem wonogwe nogo, Yakobut kunduk, Peterut kunduk, Yaya kunduk, nogo nen Mbaranabat nimbirak yo’nirogo logonet, “Ala iniki kunik nen unde eeppinagareegerak me, op aret o. Kit aakumi endekem mendek yora nogwe, ndi, nit inagabolo mbanak mendek yorogwe, eeko logowok o,” yinuk, keyage warogo nappinaneegwaarak.
10 Nappinani wogo logonet, “It aakumi ineenggi lek tebenak wonogwe nogo, inabuwa mbako logonip o,” yinuk, ti mban yo’nirogo mbareegwa, an kunduk ti, niniki lunik logonet, eerit nage minggirak me, “Op aret yo’niraga o,” mbakak wogogurak.
Pawulut nen Peterut enggali wareegerak wone
11-12 Ti’nuk, peebi at Yakobut nen awuri nappiya wagagerak nogo, awo waga’lek iigak, at Peterut nogo nen o Andiyokiya wage nagagerik, aap endekem konenggulik mendek inom mbi ugun nengge nagagerak kwe, Yakobut nen nappiya wagagerak nogo, wogwe iige nagagerik perak, “It yi, inagabolo mbanggo menggaarak me, nonggop yo’neremengga?” yinuk, agabiti nen ogookkolagagerak ti, maluk aret eereegerak me, an nggwok paga enggali wappereegirak.
13 Ti’nuk, it aap Yakuri mendek ando Ala apuri ogogwaarak nogo, Peterut iniki mbere eeke kogo nogogwaarik, it ndak-ndak ogookkologo mbareegwa, aap Mbaranabat kunduk, it Yakuri mendek iniki mbere ogwe iige nagagerik, “Ie! An nonggop eeri?” mbake nagagerik, Peterut inom aret nabennagagerak.
14 Ndi, an togon Ala nen abet aret yereegerak obeelom wone yugu kagak alik eerit nugwi iige nagagirik, it apit inenggaanom paga Peterut yoge logonet, “Kat aap Yakuri mendek aret kwe, it Yakuri mendek eeko mengga kwak eeka’lek logonet, it endekem mendek eeko menggaarak nogo op aret eekendak kwe, yogondak it endekem mendek nen it Yakuri mendek eekwi kwak eeko logowak nduk, nonggop nduk mamunirage agandik o?” yinuk, enggali wappereegirak. Yakuri endekem mendek inom abet mbakwi paga obeelom eeppiyoorak wone
15 “It aap endekem konenggulik mendek ti maluk mendek o,” yogwe nogo, nit aap togoti mendek lek o. Nit aap Yakuri mendek abet aret nda’-nogogurak kwe,
16 Ala nen wone Muta yoreegerak nogo ndak-ndak eekwi niinok, “Aap yi, oba lek o,” yinuk, obeelom agago pinanigin lek o. Ata, Keritut Yetut abet mbakwi nogo paga, “Aap yi, oba lek o,” yinuk, obeelom eeppinanege menggerak nineenu me, nit togon Keritut Yetut abet mbareegurak o. Wone Muta yoreegerak nogo eekwi paga, “Aap yi, oba lek o,” yinuk, obeelom agago piyaagin lek me, nit Yakuri mendek kunduk, obeelom agago pinanuwak nduk, wone Muta yoreegerak nogo eekwi lek o. Nit togon, Keritut abet mbareegurak aret o.
17 Keritut niniki abet mbakwi paga, “Aap yi, oba lek o,” yinuk, nit obeelom agago pinanuwak nduk, eeko logonet, “It aakumi endekem mendek maluk eeko menggaarak ndak-ndak, nit eeko monggoorak kogo o,” yinuk, mbako logonet, “Keritut abet mbakwi wone nogo paga ninomaluk kenom agagerak me, Keritut ti maluk aret o,” yinuk, yuurak op mbakop? Mondok mage o, noreewi.
18 An mbo pereegirak nogo waganogo obaane’me eeke neenok, it aakumi nen, “Op eeriyak kagak mbo pereegerak nogo ti, maluk aret eereegerak o,” yinuk, nombarugun lek mbakop? Togop aret nombarugun me,
19 wone Muta yoreegerak kagak alik eereegirak paga noorogo paneegerak kambeegirak negen me, yogondak, “Yogop ee’nu, ndogop ee’nu,” yo’nege nogo, an koneniyak mondok meek o. An Ala ake mban neenik agarik o.
20 An Keritut nimbirak eyo karo-karo paga nabenogo paneegwaarak me, kambeegirak. Ndi, yogondak eerit nage minggirak nogo ti, an nomaawi paga lek o. Ata, Keritut omaawi eeppanege kagak eerit nage minggirak me, an nggween paga yime neegak, at Ala aput nabuwa mba’nuk, nake kambeegerak me, at abet mbake logonet, niniki at oba panggombunuk, eerit nage agarik o.
21 Wone Muta yoreegerak nogo, nit eekwi paga, “Aap yi, oba lek o,” yinuk, obeelom eerogo pinaniyak op mba’netak en, Keritut we aanom warogo ninake kambeegerak mba’- netak o. An mbo pereegirak nogo obaane’me eeke paga Ala iniki kunik en eeppinaniyak kooneegerak nogo, meek eerogo pukwak, an togop eerigin abu lek o, noreewi.
3 Niniki abet mbakwi niinok, obeelom agago pinanigin wone
1 Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak ta nen kugi pulunogo pinagagerak kenok, kiniki lek kumili negen agan nugu ogotik?
2 Kit wone onggo ambi yo’nirubagip nduk, yokkiraakit mbakirak nogo yi o. Wone Muta yoreegerak nogo, kit eerit nogo nogogutak paga Aberiniki waganeegutak ilik, obeelom wone konembunuk, abet mbareegutak paga waganeegutak a? Mbet yo’ninip nda!
3 Kit kiniki ngget ndakkinabeegerak nogo ti, Aberiniki nen aret kwe, yogondak wone Muta yoreegerak nogo eerit nogwe paga, “Niniki kole eekkolaawok o,” yinuk, eeko ogotik ya? Kit kiniki lek wi negen aret eekwi kiigi o.
4 Kit wone waganeegutak nogo paga mondok alik negen piyak-payak eerogo pinagagwi iigak, kiniki yanggonak logonet, waganggo nogogutak nogo ti, we aanom warogo waganggo nogogutak ya? An togop mbake lek o, noreewi.
5 At Ala nen Aberiniki wokkirage, ndi, kinenggela’me eerubok mendek eeke, eeke menggerak nogo ti, kit wone Muta yoreegerak nogo ndak-ndak eekwi paga eeke menggerak ilik, obeelom wone konembunuk abet mba’nuk, waganeegutak nogo paga eeke menggerak a? Kit yinip nda!
6 “At Abarakam iniki Ala oba panggombunuk, abet mbake mbareegi,Ala nen, Aap yi, iniki koonak abu obeelom aret kagi o,” yinuk, yereegerak liiru mbanak nogo liippinip o.
7 Liiru mbanak ti ndak-ndak, it aakumi abet mbakwi nogo mban Abarakam ombowologwe wonogo menggaarak kogo o.
8 Obeelom wone awo kenom ari waga’lek kagak, at Ala nen, “Yi aakumi ndi aakumi o nggween paga yime abok aret kat paga inale’nggen kogo logogun o,” yinuk, Abarakam yoreegerak ti paga it aap Ala nen yorage kagak yoraga nen, “Aakumi endekem mendek abet mbakwi iinok, Ala nen, It yi, inoba lek o, yinuk, obeelom agago piyaagin,” yelok kaawak nduk, Abarakam yoreegerak me, yelok kogo nogogwaarik, liiru mbaneegwaarak.
9 Togop me, at Abarakam abet mbake mbareegi, Ala ale’nggen at oba pereegerak nogo ndak-ndak, nit togon abet mbakwi niinok, Ala nen ale’- nggen ninoba pinanigin aret o.
10 Ala nen ari logonet, “Aap ambi eeko logorak wone yugu liiru mbanak yi, porogo logonet, liirogon eeka’lek kenok, at pulinik aret logowak o,” yinuk, yereegerak liiru mbanak ndakndak it aakumi nen, “Nit obeelom agago pinanuwak nduk, wone Muta yoreegerak nogo ndak-ndak aret eerit nogo logowok o,” yinuk, wone ti paga iniki panggombunuk eeremenggaarak kwe, ndak-ndak eeriyak meek kenok, pulinik aret me, kambit nogo logogun aret kogo o.
11 “It aap iniki abe koonak nogo perak, abet mbakwi ti paga, ineenik aret logogun o,” yinuk, yereegerak liiru mbanak ti paga, wone Muta yoreegerak ndak-ndak eekwi paga Ala nen, “Aap yi, oba lek o,” yinuk, obeelom eerogo piyaagin lek nineenu aret o.
12 Eeko logorak wone yugu liiru mbanak panggombunuk, “Obeelom eerogo pinaniyak o,” yinuk, eekkoloorak wone ti, abet mbakwi paga ee’ninaburak wone ndak-ndak lek alom alik aret kagak kwe, “Eeko logorak wone nogo it mondok porogo logonet, liirogon eerit nugwi paga ineenik aret logogun o,” yinuk, liiru mbanak me, aap ambi wone ti, abu ndak-ndak eeke kenok, at abet aret eenik logogin o.
13 Ndi, Ala wone mbanak paga nen ari logonet, “Aap ambi warogo eebe eyo karo-karo paga tugunogo pugwi kenok ti, Ala nen pulunogo pege menggerak o,” yinuk, yereegerak liiru mbanak ndak-ndak, wone Muta yoreegerak kagak alik eeko nogogurak ti paga, nit togon kambuwok nduk, pulunik aret wonogogurak kwe, lek aruwak nduk, Keritut ninobaane’me pulunogo pege mbareegi, eyo karokaro paga tugunogo pereegwaarak ti paga, ninonggo mbambunuk, wondet eerogo pinaneegerak wonogo ogoorik o.
14 Ti eereegerak nogo ti, nit abok aret niniki abet mbakwi paga Ala nen “Aberiniki wokkiraagin o,” yinuk, abok yo’niragagerak nogo, waawok nduk, Ala nen, “Nale’nggen koba pagagin o,” yinuk, Abarakam yoreegerak nogo ti, Keritut Yetut eeremenggerak paga it aakumi endekem konenggulik mendek ninom niniki ale’nggen mbaruwok nduk, eereegerak kogo o.
Wone Muta Abarakam imbirak wakkagak yoragagerak wone
15 Noreewi o. Nit yogo monggoorak ambi wakkagak yuwok o. Nit aap nggween paga mendek aret kwe, aap ambi ninom wone mbambunuk, “Mondok ndogop eeruwok o,” yinuk, nineenggi amburu pugwi niinok, aap alik ambi nen wone ti, taganogo mbo pege, ndi, at alik ambi nen wone alik ambi inom nabenogo pege, eeriyak mondok meek aret kogo monggoorak nogo ndak-ndak,
16 at Abarakam ombowologwe inom peebi eeriyak wone Ala nen Abarakam yoge logonet, ombowologwe ineebe ambik kenok, “Kombowologwe o,” yinuk, ti yoroolik. Ata, eebeambit Keritut aret me, “Kombooluk o,” yoreegerak.
17 At Ala nen Abarakam imbirak wone mondok abuk nggaruk togon mbaneegwaarak kagak, tahun empat ratus tiga puluh eeppunuk, wone Muta yoreegerak me, peebi yoreegerak nogo paga nen, aa’nduk yugu nogo awo eeka’lek kagak, lek eerogo puurak op mbakop? Meek me nduk, yokkiragi o, noreewi.
18 Ala nen eeppinaniyak Abarakam abok yoreegerak nogo, peebi wone Muta yoreegerak eekwi paga eeppinaniyak mba’netak en, aa’nduk at Abarakam ti, yo’netak lek kwe, iniki kunik eeke logonet, yoreegerak me, abet mbakwi niinok woorak nduk, yoreegerak kogo o.
19 Ti kenok, Ala nen wone Muta yoreegerak nogo ti, nonggop nduk yoreegerak mbakop? Lek o. Abet mbakwi paga woorak yoreegerak wone nogo, eebe kin ari waga’lek kagak, maluk aa’nduk kin kogo logowak nduk, wone Muta yoreegerak ti, inom nabenogo yoreegerak. Wone Muta yoreegerak nogo ti, Ala nen nok-nok aakumi Iterali yoroolik. Ata, it malayikat nen waganogo aap nggween paga mendek ambi yogo mbareegwa, at nen wonok aakumi yoragagerak.
20 Aap mbere nen, “E o,” yinuk, eeko logowak nduk ambi yegetak wonok ambi yogak eeko menggaarak kwe, Abarakam yoreegerak nogo perak, Ala eebe ambit aret me, alik nen iniki koombunuk nggaruk togon, “Eerikit,” mbareegerak me, nok-nok Abarakam yoreegerak.
Ala nen nonggop mba’nuk Muta yoreegerak wone
21 Togop kenok, wone Muta yoreegerak inom, ndi, Abarakam abok yoreegerak wone inom, ti alom alitak mbakop? Mondok lek o, noreewi. Nit nineenik logorak nduk, wone yugu alom alik ambi logonetak en, wone ti woppunuk eekwi paga Ala nen, “Aap yi, iniki abe koonak aret o,” yinuk, yo’nirage logonetak kwe,
22 lek me, Ala nen eeppinaniyak yoreegerak nogo, nit niniki Yetut Keritut abet mbakwi paga eeppinanuwak nduk, tokkogo logonet, “It yi aakumi ndi aakumi abok aret maluk eeko menggaarak paga wam anggenogona narak negen wonogwe,” mbaruwak nduk, Ala nen yereegerak liiru mbanak wonage.
23 Nit abet mbakwi paga woorak yugu nogo, wage kenok, “Abet mba’- nuk, waganggo logowak o,” yinuk, awo kin ari waga’lek kagak, wone Muta yoreegerak paga, wam anggenogona nappiigo mengga kwak narogo pinaninuk wonagagerak.
24 Togop me, Keritut wage kenok, “Kit abet mbakwi paga, kinoba lek o, yinuk, obeelom agago pinagarak,” yo’niraawak nduk, wone Muta yoreegerak nogo nen we luulu aret ninarum wonagagerak kwe,
25 niniki abet mbakwi paga woorak nogo, muk kin ari wagagerak me, yogondak wone Muta yoreegerak nogo ninarum wonogwe lek o.
26 Kit abok Keritut Yetut abet mba’nuk, kiniki at oba panggombereegutak me, kit Ala apuri aret ogotik o.
27 Keritut kinom kumbinagage mbareegi, yiime wambeegutak me, Keritut obaabut ndak-ndak aret ogogutak o.
28 Kinobaabut ambit Keritut mendek ogogutak me, yi Yakuri mendek yi Yunani mendek, yi aap inayeloman aago mendek, yi aap inayeloman aago lek mendek, yi aap yi kwe, togop yuurak mondok lek aret o. Nit abok Keritut Yetut ninom kunik me, nineebe ambit aret ogoorik o.
29 Ndi, nit Keritut apuri abet aret wonogwe kenok, Abarakam ombowologwe aret me, wone abok yoreegerak nogo, nit aret woorak nduk ogoorik o.
Pasal 4
1 Wone yokkiragarak nogo ando ambi yi yokkira o. Aap ambi nen, “An namendek yi, napuluk tawe agekenok, unde eeppikit,” mbaketak nogo abok aret ti, apuluk amendek aret kwe, apuluk nogo tawe aga’lek kenok, tokkage kagak aakumi inabu’me inayeloman negen aret menggerak o.
2 Ogoba nen, “Ti eyom paga unde eeppikit,” mbaketak nogo, awo panggoni waga’lek kagak wulaga nogo ti, eebe inom, amendek inom, ogobamini unde menggaarak me, it inabu’me logonet, inoone liirogon konengge menggerak.
3 Ti ndak-ndak nit togon tawe aga’lek wologwe-mbuulogwe negen ugun wonogwe niigak, it aakumi nggween paga mendek nen, “Yogop eeriyak ndogop eeriyak,” iniki koonogo inapuri yoranet wundi wogo menggaarak wone nogo mendek mban konembunuk, eeko logowok nduk, keele maarak negen aret wonogogurak kwe,
4-5 wone Muta yoreegerak nit eeko logowok nduk, keele maarak negen wonogwe nogo, ninonggo mbambunuk, wondet eerogo pinanege logomenggerik, aap ambi apuluk maluk ngguungge menggi kwak, nit at apuri lombok logorak ngguunninabuwak nduk, Ala nen, “Ndiyom paga napuluk nappi woraagin o,” yinuk, kooneegerak nogo, abu aret panggoni wage mbareegi, kwe ambi nen aret ndareegerak. Ndake mbareegi, wone Muta yoreegerak eekwi nogo inom aret eerit nage nagagerak.
6 Ndi, yogondak kit Ala apuri aret me, Ala nen aput Yetut at Aberiniki nappi wagagerak nogo, kinikime logonet, “Kit kinogoba Ala aret o,” yinuk, ari menggerak.
7 Togop me noreewi o. Kit aakumi inayeloman kokwak wonogwe lek o. Kit Ala apuri lombok aret ogotik o. Ndi, Ala apuri lombok aret me, amendek unde eeppiyoorak mbareegerak nogo kit aret o.
Pawulut iniki aaninggin agagerak wone
8 Kit aa’nduk Ala kineenggo’lek logonet, kugi ti, abe mendek lek kagak, inayeloman a’nuk inoone konenggo logonet, kugiwak ogobakkigippunuk alut eeko nogogutak kwe,
9 yogondak perak, Ala kineenu ogwe, ndi, Ala nen kit togon kineebe eenu age, eereegutak me, kit nonggop nduk, wone abe yugu nogo mbo punuk, obeelom eekkinaburak lek kagak aanom warogo eeko nogogutak wone nogo, “Ambinom abu’me tebenak logowok,” mba’nuk, kiniyok paga yungguninuk wa nogo ogotik?
10 “Ne yi paga yogop eeriyak mage o. Tut ti paga togop eeriyak mage o. O omarip paga kagak, o ame kagak, togop eeriyak mage o. Tahun ti paga togop eeriyak mage o,” yinuk, yi eyom ndi eyom abok aret mage agago pit nogwe nogo, kit togon ndak-ndak liippunuk, eerit nugwi kiige nagagirik,
11 an kinake eeke nagagirak nogo ti, “We aanom warogo eeke nagagirak kulik?” mba’nuk, niniki aaninggin ee’- nake o, noreewi.
12 Kit nen an maluk eeppaneegutak kenok, yokkirage lek kwe, wone yugu liiru mbanak nogo, kineenggo’- lek logonet, abet mba’nuk Ala apuri ogogutak nogo kwak, an togon, wone ti mbo punuk, abet mba’nuk Ala aput agagirak me, yogondak an eeke nogokit ndak-ndak eeko logobagip nduk, noone nabek togon yokkiragi o.
13 An andi ee’nabeegerak me, kinenggela’me ninom logonet, iyaalok togon wone obeelom wone yokkirage nagagirak nogo kineenu aret o.
14 Andi ee’nabeegerak paga neebe abu maluk me, “Anggon lombok ndegeniyak yi, nineebi a,” yinuk, nogole nen mbo paniyak op aret kwe kagak, “Yi Ala nappiige menggerak malayikat kwak, yi Keritut Yetut kwak,” nomba’nuk, neebe wo’nako nogogutik, ndegennako nogogutak nogo o.
15 Kiniki ale’nggen ambik eekwi kiyareegirak kwe, yogondak nonggop aga o, noreewi? Nabuwa mbako logonet, “Ninigen kilirogo wogoriyak op nen, wogoruwok lak ao,” nombakwi kiyareegirak kwe,
16 yogondak kit eeko monggotak an paganogo yokkirage paga kinawim negen ogoorogo panugwi kiigi o.
17 It aap ando nogo ti, kiniki nomongginabuwok nduk, iniki aganggen kerek togon kwaakkinabit wogwe kwe, ti paga obeelom eeppinagawok nduk, kinabuwa nen kiya wogwe lek o. Ata, “Ninoone konembunuk, iniki aganggen kerek togon, mu’neren nogo logowak,” mba’nuk, kiya wogo menggaarak.
18 “Obeelom eeriyak mendek yi, ninom eeruwok,” yinuk, iniki aganggen kerek togon aakumi wogonabit wogwe ti, op aret kwe, an neebe lek neegak mban wogonabit wogwe ti mage o. Ata, neebe kinenggela’me wonage neegak wogonabit woroorak togon op mban aret o.
19 Ai, napuri, kit an niniki kunik me, kumi elege enegen paganak yagan wako mengga kwak, kit Ala apuri arubagip nduk, an kinake yagan wake aret wonagagirak kwe, yogondak kit Keritut obaabut ndak-ndak arubagip nduk, ambinom yagan wake agarik o.
20 An kinenggela’me logonet, kit eerit nugwi kiige logominggirik, noone yanggorogon yokkiroorak, “Ao,” mbake kwe, kit eekwi an kiiga’lek me, niniki piirik togon logonet, noone alik negen aret yokkirage yi abet aret o, napuri.
Kwe Agat Tara imbirak eereegwaarak wone
21 Kit wone Muta yoreegerak eeko logorak mbakwi nogo, wone Muta yoreegerak mbanak ambi yokkiraakit mbakirak me, konenggo logonip o.
22 At Abarakam apuri mbere ndaganabeegerak nogo ti, ambi kwe at ayeloman nogo nen ndake, ndi, ambi at akwe abe wogo nogo nen ndake, eereegwaarak liiru mbanak kogo monggoorak nogo o.
23 Kwe at ayeloman nogo nen ndareegerak nogo ti, it nggween paga nen ndaganako mengga kwak, ndareegerak. Ndi, at akwe lombok nen ndareegerak nogo perak, wone yugu paga nen aret ndareegerak.
24 Wone yi nogo ti, wakkagak aret o. Kumi mbere yi nogo ti, wone mbere yugu nogo kokwak aret me, ambi puut Tinayi paga nen yoreegerak wone nogo ti, kwe Agat kokwak aret. Kwe Agat Abarakam ayeloman logonet, aagalogwe ndaganabeegerak nogo inom Abarakam ayeloman tebenak wonogogwaarak nogo kokwak, it wone puut Tinayi paga yoreegerak nogo waganggwi iinok, aakumi inayeloman kokwak tebenak aret menggaarak o.
25 Ndi, puut Tinayi o Arap wonage nogo ti, kwe Agat kokwak aret me, wakkogo logonet, kwe Agat aagalogwe inom Abarakam ayeloman tebenak wonogogwaarak nogo kokwak, puut Tinayi paga, “Yogop ee’nu, ndogop ee’nu,” wone yereegerak nogo, it o Yerutalem mendek nen awo eekwi me, aakumi inayeloman kwak, wone ti abu’me tebenak wonogwe iigo o.
26 Ndi, o Yerutalem agi mbogut paga nogo ti, at akwe abe wogo nogo kokwak me, at Tara nen wone yugu abet mbareegerak paga aagaluk ndareegerak kokwak, nit kunduk,“Yogop ee’nu, ndogop ee’nu,” yereegerak nogo eekwi paga lek o. Ata, abet mbakwi paga o Yerutalem agi mbogut paga mendek ogoorik o.
27 Ala wone mbanak paga nen ari logonet, “Kwe ogonggelo nen mbo pereegerak nogo aagalogwe ambik lombok wonage, Ndi, kwe ogonggelo warak aagalogwe mbereeluk wonage, eekwi me, At aagaluk ndaka’lek kwe wubili ti, iniki ale’nggen mbake, Kwe enegen paganak yagan waka’lek ti, ale’nggen inikime nggelok ari logonet, keyage wake, Eeke logowak o,” yinuk, yereegerak liiru mbanak nogo ti, nit abet mbakwi apit ninowogolo kwe Tara aret o.
28 Ndi, noreewi o. Kwe Tara nen wone yugu abet mbareegerak paga Itak ndareegerak nogo kokwak, nit togon Ala wone yo’nirage abet mbakwi paga at apuri aret nda’ninake menggerak o.
29 Ti eyom it nggween paga mendek nen ndaganako mengga kwak ndarak nogo nen, Aberiniki nen wone yoreegerak paga ndarak nogo, miyuk-meya eerogo tebenogo pit nage nagagerak nogo kokwak, yogondak ti ndak-ndak, it puut Tinayi paga yoreegerak eekwi nogo nen, nit abet mbakwi nogo miyuk-meya eerogo pinanugo menggaarak kwe,
30 Ala wone liiru mbanak nogo ngge mbanak mbakop? “Kat keyate an kakwe abe wogo naagaluk wulaga Itak nogo kolage logonet, at kwe nayeloman Agat aagaluk Itamayen yi, inom wogoriyak lek me, kwe ti, aagaluk imbirak mbet mugogo wumbiyet o,” yinuk, Abarakam yoreegerak liiru mbanak wonage me,
31 nit kwe ayeloman nogo owowologwe lek o. Nit kwe abe wogo nogo owowologwe aret o. 5 Keritut nen wondet agago pinaneegerak wone
1 Nit wondet aago nugu logowok nduk, Keritut nen wondet agago pinaneegerak me, eyo aaninggin tapi inuut paga pogo mengga kwak, aaninggin ambinom kinoba pinagawok nduk, “Yogop ee’nu, ndogop ee’nu,” wone yugu nogo mendek ambi yokkira wogwe iinok, inoone konengga’- lek mondok kinogogumbuk logonip o.
2 Kit liippatubagip nduk, an Pawulut nen wone ambi yokkira o. Kit kinagabolo mbaniyak mbakwi kenok, Keritut nen eeppinagarak mbake nogo, ambi eeppinagagin mondok lek aret o.
3 Kit kinagabolo mbaniyak mbakwi kenok, wone, “Yogop ee’nu, ndogop ee’nu,” yugu liiru mbanak nogo, ambiriluk ambi eeriyak lek ti lek mondok tigitogon eeko logorak ariyak me, mbo pubagip nduk, muk yokkiragagirak me, ne ambinom yokkiragi o, noreewi.
4 Wone Muta yoreegerak nogo, eekwi paga, “Noba lek, neyaawak o,” yinuk, obeelom eekkoloorak mbakwi nogo, Keritut kinom ogookkologwe me, Ala iniki kunik nen eeppinagarak kooneegerak nogo lek eerogo pako ogotik.
5 Nit abet mbareegurak nogo paga Aberiniki nen eeppinanege kagak, Ala nen, “Aap yi, iniki abe koonak aret o,” yinuk, obeelom agago pinaniyak nogo, “Mbet-mbet eerogo pinanuwak lak ao,” yinuk, niniki lunik logonet, tokkogo ogoorik o.
6 Nit Keritut Yetut ninom kunik logonet, ninagabolo mbanak kenok, mbanak lek kenok, ti iya lek o. Ata, niniki abet mbareegurak paga aakumi inabuwa nen obeelom eeppiinet nogo logorak nogo perak iya o.
7 Ala abet aret ari menggerak wone nogo, kit aa’nduk, kiniki aganggen paga op aret mugurok nogwe kiige nagagirak kwe, Ala wone mbo pubagip nduk, ta nen kiniki nggagambunuk nomonggiren nage agaarik o?
8 Ala wone mbo punuk, alikeerit nugwi nogo ti, at yonggo pinagareegerak nogo nen yokkiroolik o.
9 “Roti piike menggerak mendek mbuuluk roti enggela’me pugwi iinok, roti eebe abok aret piike menggerak,” nogo o.
10 Nit ninowe ninom ambit kunik me, an mbake minggirak nogo, kit ndak-ndak mbako logonet, eerit nogo logorak abet aret kinomba’nuk yokkiragi o, noreewi. Ndi, at nomonggiren nage nogo perak, Ala nen maluk onggo eeppigin me, agabiti mbake logowak o.
11 Ndi, noreewi o. An perak, alom ngge paga piyak-payak ee’nakwi mbakop? An, “Kinagabolo mbaniyak o,” agan nege logonetak en, piyak-payak agago paninetak lek kwe, Yetut eyo karo-karo paga kambeegerak wone yoranet nage logonet, “Kinagabolo mbaniyak lek o,” yinuk, non mbanogo piinet nage paga, inanini nombako logonet piyak-payak ee’nako agaarik o.
12 It aap kiniki abut laganit unggwogwe nogo, inagabolo ti mban mbaniyak lek o. Ata, eebe inom aret mbanogo nappako logowak nduk, teppiyaanip o.
13 Noreewi o. Kit perak, wondet aago nugu logobagip nduk, Ala nen miikkinabeegerak kwe, “An nanonggwan wondet agago paneegerak me, niniki nengge kenok ugun eerit nage logi o,” yinuk, yuurak ti mage o. Ata, nabuwa-kabuwa mbako logonet, kinoreewi kinom yeenggwayeenggwa eeko logonip o.
14 “Ineebe iniki kunik eekkologo menggaarak ti kwak, aakumi inom menggaarak ti togop aret iniki kunik aganako logowak o,” yinuk, yo’niragagerak nogo ti, wone yugu liiru mbanak eebe tigitogon eekwi ti aret o.
15 Kit neyak-keyak yogo logonet, at ambi nibinogo nappegak eekwi paga kineebe lek eerogo pakwi kiyo, liippogo logonip o.
Aberiniki nen ari mban mugurok noorak wone
16 Togop me, Aberiniki nen yokkirage kagak eerit nogwe kiinok, kiniki maan mendek nen maluk eeriyak eekkinake nogo, mugurok noorak eekkinabigin lek o, yinuk, yokkiragi o.
17 Niniki maan mendek nen Aberiniki warikit mbake, ndi, Aberiniki nogo nen niniki maan mendek warikit mbake, eeko logonet, imbirak wim negen ogoorak togon wonogwe me, kit eeriyak mbarumonggotak nogo, eeriyak meek aret kaamunggup o.
18 Ndi, Aberiniki nen yokkirage nogo eerit nogwe kiinok perak, wone yugu liiru mbanak nogo abu’- me logomunggup lek o.
19 Iniki maan mendek paga eeko menggaarak nogo yi o. Kumi ugun wurinabit nugwi, iniki kumi paga mban lunik logonet ugun-ugun aganabit nugwi, iniki nengge kenok mugurok nogwe,
20 kugiwak amili kunggwi, magagirak paga aakumi inookwi, iniki ogoorik-ogoorak wonogwe, wone wakwi, nuwa-kuwa yogwe, inanini mbet-mbet wungge, an eeke mban op mbakwi, an iya kat iya yogwe, iniki nen koombunuk pilit pugunogo agan nugwi,
21 neebikeebi yogwe, amburu nenok kumilikumili agan nugwi, kwaanggen wappunuk inoone amburu paga kumi ugun-ugun eeginabit nugwi, ti mendek abok aret it eerit nugwi iinok, at Ala abu’me piige menggim nogome unggwi nagun mondok lek aret o, yinuk, aa’nduk yokkiragagirak nogo aret yokkiragi o, noreewi.
22 Togop kwe, eyoonggen abe yi’nage menggi kwak, Aberiniki ninikime logonet, eerit nogo monggoorak nogo yi o. Aakumi inabuwa mbakwi, niniki ale’nggen mban mbakwi, niniki ugun tayenak wonogwe, niniki aanaganggenggwi lek kwi’ndak wonogwe, ninobaabut abu obeelom wonogwe, aakumi obeelom eeppiinet nugwi, liippunuk mban eerit nogwe,
23 niniki yanggonak wonogwe, eeriyak niniki nengge kenok mbetmbet tebenogo pugwi, eeko monggoorak ti aret o. Ti eeko monggoorak nogo eeko logorak mage yugu ambiwonage mondok lek o.
24 Nit Keritut Yetut apuri kenok, niniki maan mendek paga nen maluk eeriyak niniki nengge nogo, mondok warogo tebenogo punuk wonogo ogoorik o.
25 Nit Aberiniki nen pi’niren noorak mbakwi kenok, at yo’nirage nogo mban aret eerit nogo logowok o.
26 Kit wogoppako logonet, an iya kat iya yogwe, at ambi eeke paga at ambi iniki warogo pegak eekwi, obeelom eeppugwi iinok, nuwa-kuwa yogwe, eeko logogup o.
6 Yeenggwa-yeenggwa eeko logorak wone
1 Noreewi o. Kinore ambi perak togon yigeebu wangge kenok, kit aap Aberiniki kinom kunik monggotak nogo nen, “Noreeluk iniki nggagangge mbaki, yigeebu wanggerak nogo kokwak, an togop wangge neyo nagabiti o,” yinuk, kinoone yanggorogon awone mbanggo logonip o.
2 Aaninggin kinoba age kenok, yeenggwa- yeenggwa eerumonggotak paga Keritut nen, “Ndogop eeko logonip o.” yo’niragagerak wone yugu nogo ndakndak aret eeko logomunggup o.
3 Kit aap iya lek kwe, “Nit iya o,” mbakwi kiinok, kit aret kinambokan laganggologo ogotik o.
4 Kit ambi nen at ambi eeke wakkagak eeko logogup o. Ata, kinalitak lombok eeko monggotak nogo wakkaanuk, op kenok kiniki ale’nggen mbakwi, ndi, maluk kenok mbo pugwi, eeko logonip o.
5 Nit ninalitak ninobaalombok koonggologo logowok o.
6 Nit Ala wone konenggo monggoorak nogo nen, ninamendek obeelom nogo mogonogo ninogobamini mamunnirogo menggaarak nogo wogorogo logorak ti op aret o.
7 Ala ambokan laganggulik kagak, ambokan laganggwi kiinok, kit aret kinambokan laganggologwe me, liippako logonip o. Aap ambi awi yaremenggerak nogo ti, anggen ti mendek aret mbanggolage menggerak me,
8 kit kiniki maan mendek nen eeriyak eekkinake nogo, eerit nugwi kiinok, anggen yugu maluk mendek mbanggologwe nogo kokwak, kineebe aret kambumunggup o. Ndi, Aberiniki nen yokkirage nogo mban mugurok nogwe kiinok perak, anggen yugu abe mendek mbanggologwe ti pogom, mondok-mondok kineenik aret logomunggup o.
9 Togop me, nit yi obeelom ndi obeelom eerit nogo logonet, anggon-panggon ee’ninake kagak, mbo pega’lek mondok aret eerit nogwe niinok, anggen yugu obeelom mbanggologwe nogo kokwak, nit onggo wo’niroorak nineenu me, ta’liila ee’ninake kenok mbo puurak mage o. Kagak aret eerit nogo logowok o.
10 It yi aakumi ndi aakumi abok aret obeelom eeppiyoorak, “Nanonggwan aga o,” yinuk, obeelom eeppiinet nogo logonet kwe, it ninom ndak-ndak abet mbakwi kenok perak, logorogon obeelom eeppiyoorak mondok aberak aret logonip o.
Oba aberak logowak nduk, irip paga yoragagerak wone
11 An neenggi lombok paga liiru yo’nggok lombok mbanggiragi yi kaanip o.
12 It aakumi nen, “Ia!” ninombaruwak nduk, wogoppatit nugwi nogo ti, Keritut eyo karo-karo paga kambeegerak wone yoranet nugwi paga piyak-payak eeginaburak inagabiti mbako logonet, “Kinagabolo mbaninip o,” yinuk, inoone omaawi paga yokkirogo menggaarak.
13 It inagabolo mbanak nogo nen wone Muta yoreegerak nogo ndak-ndak eeka’- lek logonet kwe, kit mban eeko logobagip nduk, yokkirogwe nogo ti, “Nit ninapuri ambik aga o,” yinuk, wogoppatuwok nduk, yokkirogo menggaarak.
14 Ndi, an perak, ninowe Yetut Keritut eyo karo-karo paga kambeegerak wone nogo abet mba’nuk, waganeegirak ti paga, it nggween paga mendek nen eeko menggaarak ti, aap kanggaatak inoone yogolik nogo pogom me, it eekwi nogo an ambieeke logokit nduk, yo’niriyak meek aret o. Ndi, an kunduk kambeegirak negen aret me, it nen an yo’nugwi nogo kunduk, koneniyak meek me, an eeke minggirak paga wogoppatiyak lek o. Ata, ninowe Yetut Keritut eyo karo-karo paga kambeegerak wone nogo mban tiyappege agarik o.
15 Inagabolo mbanak kenok, mbanak lek kenok, ti imbirak iya lek o. Ata, niniki ngget ogobakkigirogo pinanege logonet, ninobaabut koonogo pinanege ti perak, iya o.
16 It wone ti paga panggombunuk, eerit nugwi nogo inom, ndi, Iterali mendek kwe, it abet mbakwi paga Ala apuri ogwe nogo inom, yi aakumi ndi aakumi abok aret Ala nen inabuwa mbake logonet, inomaluk mbo nappunuk iniki ugun tayenak ale’nggen logowak nduk, eeppiige logogin o.
17 An Yetut wone yoranet nage paga ee’nabit nogo nogogwaarak nawin oban noba kunik yogobi wonage me, an mbo panubagip nduk, it kiniki nggagani wogwe nogo, inawone ambinom mbaniyak neebi me, mondok mbo piyaanip o.
18 Ninowe Yetut Keritut iniki kunik en eeppinagage logonet, kinarum aret logogin o. Wone ti abu aret yokkiragi o. Noreewi wa.
Mbuku Galatiya
BalasHapus