Mbuku 1 Timotiyut yi, eebe mbanak pekkaga’lek logonet, aa’nduk pekkoorak nogo yi o.
At Timotiyut nogo o Atiya Mbuuluk nogome logonet, tawe agagerak me, at Pawulut Ala eyabu eerit nege kenok, at awot lombok age nagagerik, imbirak Ala eyabu eerit nugu nogogwaarak.
At Timotiyut ogoba ti, aap Yunani mendek, ndi, agalo ti, kwe Yakuri mendek aret wonogogwaarak. At Pawulut liiru aa’nduk yi, Timotiyut ake mbangge logonet, wone alom kenagan mbaneegerak nogo yi aret. Wone aa’nduk liiru mbanak ti, maluk mamunik mendek Ala apuri inenggela’me wonok unggwi nanuk, mamuninakwi iyo, tum liirogon wake logowak nduk yoragagerak.
Wone ti, agan nugwi alom nogo ti, it Yakuri mendek inom, it endekem mendek inom, nen, “Yi mendek ndi mendek ogobakkigirik yi, abu maluk agagerak me, wone kote wone ambi abet mba’nuk, mugurok nogo logonet, Kumi wogonaburak mage, yogwe nogo liippugwi, Yi mendek ndi mendek noorak mage, yogwe nogo konenggwi, eekwi niinok, ninagap ndariyak,” mbakwi me, Ala apuri wone ti mendek mugurok noorak eeko mbareegwa, at Timotiyut liirogon inarum logonet, wone abe mendek mamuninake logowak nduk, Pawulut nen liiru aa’nduk yi aret mbanogo nappereegerak.
Wone ambokan liiru mbangge logonet, at Timotiyut Ala apuri inarum logonet, liirogon eeke logorak wone inom, Ala alut eeko logonet eeko logorak wone inom, yoge, ndi, it Ala apuri inarum logorak nogo ti, “Aap inobaabut ndogop mendek kenok mban mippiyoorak o,” yinuk, yoge, eereegerak.
Wone irip paga mbanak ti, at Timotiyut Yetut Keritut ayeloman abe mendek logonet wone mamuninake, ndi, it Ala apuri kuwak eekwi ineebe wonogwe mugurok aret Ala apuri inom aruwak nduk, wone koonogo yorage, eeke logowak nduk, Timotiyut ake liiru aa’ndok mbanogo nappereegerak nogo yi aret.
---------------------------
PAWULUT NEN TIMOTIYUT AKE LIIRU AA’NDUK MBANEEGERAK WONE
1 1-2 Naput Timotiyut wae. At ninagap ndaka Ala inom, niniki lunik Keritut Yetut inom, imbirak nen wone lengganogo yo’nereegwaarak paga an Pawulut Keritut Yetut ayonggo nappiigak mendek agago paneegwaarak nogo nen, nit apit abet mbakwi nogo paga an naput lombok agagindak me, wone ambi yokkiri o. At ninogoba Ala ninowe Keritut Yetut imbirak iniki kunik nen wokkugwi, kabuwa nen obeelom eeppagagwi, ndi, kiniki ugun tayenak ale’- nggen logonok nduk, eeppagagwi, eeko logogun o.
Pilit wone agan wogwe iinok, eeko logorak wone
3-4 An o Makendoniya woraakit nduk, wage logonet, “Kat o Epetut yayi logot o,” yinuk, noone nabek togon yokkereegirak nogo ti, “It aakumi timbayok mbininggwi, ndarak alom mbininggo logonet, puk aga’- lek niikkenok nogwe, eekwi iinok, niniki abet mbakwi paga Ala nen ee’- ninaburak kooneegerak nogo nineenu ariyak nduk yo’nirogwe lek we wone alom kwaako logonet, noonekoone yogwe me, liippugup o,” yinuk, yorage, ndi, it aakumi ando wone alik agan nugwi nogo, “Mamuniroorak mage o,” yinuk, yorage, eeke logonok nduk, “Yayi logot o,” yinuk, yokkereegirak nogo o.
5 An wone lengganogo yokkereegirak nogo ti, it iniki abe paga aakumi inabuwa mbakwi, iniki obeelom koonnage kenok mban eekwi, ndi, iniki abu abet aret mbakwi, eeko logowak nduk, “Yorage logot o,” yinuk, yokkereegirak nogo o.
6 An wone yokkege yi nogo ti, eeriyak kagak aakumi ando nen nomonogo mbo punuk, wone lek ariyak mendek mban aanom warogo mbininggo menggaarak.
7 It aap ti nen, “Ala yereegerak wone yugu liiru mbanak mamuniraga mendek nit aret logowok,” mbako menggaarak kwe, it yogo menggaarak inom, ndi, inoone omaawi paga, “Ti ndogop kaamunggup o,” yinuk, yogo menggaarak nogo inom, it iniki we ugun kobak mban logonet, yogo menggaarak.
8 Ala yereegerak wone yugu liiru mbanak nogo ndak-ndak eeruwok nduk, waganggwi kenok ti, obeelom aret kogo monggoorak.
9 Ala wone yugu liiru mbanak nogo ti, aap iniki obeelom wonogwe iinok yoroolik. Ata, it aap Ala wone yugu tagangga inom, inogobamini inoone koneniyak ineebi mbaka inom, Ala ayuk wuka’lek meek eerogo pega inom, it maluk eeka inom, iniki liirak lek ugun-ugun eerit nega inom, inagaloinogoba inooka inom, aakumi ugunugun inoorit nega inom,
10 kumi ugun wurinaka inom, aap-aap wut-wut yaga inom, aakumi inapuri kumaarinaka inom, pilit pugungga inom, pilit wone inoba pega inom, ti eekwi abok aret Ala wone kole wone kagak alik eekwi iinok, inake aret yoragagerak nineenu aret o.
11 Ala wone kole wone nogo ti, nit alut eeko monggoorak tiyanak menggerak Ala nogo nen obeelom wone an unde logokit nduk, eeppaneegerak nogo aret o.
Eeppege paga, “Wa,” ari nagagerak wone
12 An nomaawi eeppanege menggerak nowe Keritut Yetut nogo nen,“Aap yi, ambi eeke logowak nduk, unde eeppege neenok, liirogon aret eeke logogin,” nombake nagagerik, an yabu ambi eeke logokit nduk, unde eeppaneegerak me, “Wa,” yoge minggirak.
13 An aa’nduk noone maluk at yoge, nanini wulo logonet, at oone waganggwi mendek inoorit nage, at miyukmeya eerogo pege, eeke nagagirak kwe, abet mbaka’lek ugun neenggo’lek logonet, eeke nagagirak me, Ala nabuwa mba’nuk, teppaneegerak o.
14 Ninowe Keritut Yetut ninom kunik me, iniki kunik nen obeelom eeppanegak mban eeke logonet, an Ala wone abet mbarikit nduk ee’nake, ndi, aakumi niniki kunik aganabikit nduk ee’nake, eereegerak.
15 “Aakumi maluk eeko menggaarak nogo inagap ndaruwak nduk, Keritut Yetut o yime wambi wagagerak o,” yinuk, yogo menggaarak wone nogo ti, abet aret me, woorak op aret o. “Aakumi maluk eekwi o,” yogo menggaarak nogo ti, maluk eeka abe iyagalo an aret kwe,
16 alom ti paga at nabuwa mba’nuk teppaneegerak. Peebi it aakumi ineenik mondok logorak mbaremenggaarak nogo nen iniki at oba panggombunuk, abet mbakwi paga waganggo logorak nogo, in wakkagak eeko logorak an neebe aret o. Nit nen Keritut Yetut maluk eeppugwi kwe, onggo mbet-mbet eeppinanege lek liippunuk eeppinanege menggerak nogo, maluk eeka abe iyagalo an neebe nogo paga kin aruwak nduk, nabuwa mba’nuk, teppaneegerak.
17 Ndi, yogondak, naput o. Yi o ndi o aakumi aa’nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!
Timotiyut yabu unde eeppereegerak wone
18-19 Ndi, naput Timotiyut wae. Wone lengganogo yokkigirak ti, mondok unde logonok nduk, yokkigi o. Kat awo eeka’lek keegak, “Peebi ndogop eeke logomunggun o,” yinuk, yokkereegwaarak wone nogo ndakndak aret yokkigi o. Kiniki abet mbariyak inom, kiniki obeelom koonnage kenok mban eeriyak inom, mondok nggirik-nggerok agago porogo logonet, aap wim waka’ngget menggi kwak, kat togop aret kalilaakwi eerit nage logot o. It aap ando iniki obeelom koonnage nogo taganogo punuk, alik eerit nugwi me, yiiro eyo paga lik ari logonet, yigirik-noonom age menggi kwak, it abet mba’nuk waganeegwaarak wone nogo togop aret yigirogo mbo pereegwaarak me nduk yokkigi o.
20 It aap Kimeneyut kunduk, aap Alekandet kunduk, togop eereegwaarak me, an nen Ala endage miyuk-meya eerogo pugwi inagabiti mbaruwak nduk, Ibilit unde eeppereegirak aret o. 2 Tamban eeko logorak wone
1 Wone aa’nduk yokkiriyak mbakirak nogo yokkiri o. Yi aakumi ndi aakumi abok aret inake Ala nggino yoge, tamban eeke, aakumi inake yoge, eeppagage nogo, “Wa,” yoge, eeke logonok nduk, noone nabek togon yokkege agarik o.
2 It aap inendagembogut inom, aap yo’nggok abok aret inom, nen ninarum abe wonogwe iigak, niniki warak a’nuk, Ala liirogon mugurok nogo logonet, niniki ugun tayenak ale’nggen logowok nduk, it inake tamban eeke logot o.
3 Togop eekwi kiinok, ninagap ndaka Ala inikilom mbake menggerak me, ti eeko logorak op aret o.
4 At nen yi aakumi ndi aakumi abok aret inagap ndappunuk, at ari menggerak wone nogo ineenu aruwak lak, “Ao!” inombake menggerak.
5 At Ala ambit aret menggerak. Ndi, aakumi inom, Ala inom, terak inake yonggo nappegak aap ambit Keritut Yetut aret o.
6 Yi aakumi ndi aakumi abok aret at eebe paga inonggo mbambunuk, wondet agago piyareegerak. Ti eereegerak nogo ti, Alanen yi aap ndi aap abok eeppiyoorak kooneegerak pagak yuurak eyom panggoni wagagerak me, aret pagak yereegerak.
7 Ala nen yi aakumi ndi aakumi abok eeppiyoorak kooneegerak nogo, it aap endekem mendek Ala ari menggerak wone ineenu a’nuk, abet mbariyak wone nogo, agan nage logokit nduk mippanege, ndi, yi awi ndi awi yoranet nege logokit nduk, nappiigak agago panege, eereegerak o. Wone ti, pilit lek abu abet aret yokkigi o.
8 Togop me, it aap yi awi ndi awi abok aret inanini mbakwi, wone wakwi, eeka’lek obeelom mban logonet, ineenggi nippunuk, tamban eeko logowak nduk, “Ao!” lombok inombake minggirak.
9 Ndi, it kumi iniki warak nen inayum-inagali liirogon yikkologo mengga kwak, yi kumi ndi kumi abok aret iniki warak a’nuk, togop aret inayum-inagali nggirik-nggerok liirogon aret yikkologo logowak o. Ineeruwak awi wuppunuk laanggwi, mbuti abinakwi mendek yirikwi, eyoonggen laambu kigirikwe nogo mendek yikkologwe, ndi, yum onggo nggwok kenok mban kunogo yirikwi, eekak yuurak ti mage o.
10 Ata, it kumi Ala wone liippunuk, mugurok nogo menggaarak mendek nen inayum- inagali liippunuk yikkologo mengga kwak, yi obeelom ndi obeelom eeriyak nogo ti, ndak-ndak aret liippunuk eerit nogo logowak o.
11 It kumi nogo ti, inoone lek aap inabu’me kwi’na’nuk wone mamunggologo logowak o.
12-14 At Kawa aa’nduk lek o. Aram aa’nduk wakkagagerak me, kumi ti, inoone lek logonet, inoreewi inoone liirogon konenggo logowak o. Ibilit nogo nen aap Aram ambo’me laganulik. Ata, kwe ambo’me lagangge mbareegi, kwe nogo nen maluk eereegerak me, “Kumi nen aap mamunirogwe, ndi, it kumi nen aap inabu’me piinok, Yi eeri nak, ndi eeri nak, yorogwe, eeko logorak ti mage o,” yinuk, ari minggirak.
15 Kwe nogo maluk eereegerak ti kwe, it kumi nogo iniki warak logonet, Ala wone abet mbakwi, aakumi iniki kunik aganakwi, ndi, maluk eeka’- lek Ala ake leenak wonogwe, eekwi iinok perak, it inaagalogwe ndaganakwi iigak, Ala nen inagap ndaganake logogin o.
3 Ala apuri unde logorak mippiyoorak wone
1 “Aap ambi nen, An Ala apuri unde logokit, mbake kenok, at mbakerak nogo ti, op aret o,” yinuk, aakumi nen yogo menggaarak nogo ti, abet aret yogo menggaarak o.
2 Aap ambi Ala apuri unde logorak mippuurak mbakwi kenok ti, aakumi inoone at oba pugulik kenok, akwe ambit wogo kenok, iniki tum waka kenok, iniki warak kenok, li’lak mban eeke menggerak kenok, inanoniya laka kenok, aakumi op mamuniroorak kenok,
3 amburu kumili aganake ndonggorogon nenggeelik kenok, anini mbet-mbet wunggeelik iniki yanggonak kenok, yawi pegeelik kenok, wu inikilom mbakeelik kenok, aap togop mendek ti, Ala apuri unde logorak mippiyoorak op aret o.
4 Aap ambi Ala apuri unde logorak ti, ayuk warak logonet, at apuri liirogon ndegeninake menggerak kenok mban mippuurak.
5 Aap ambi nen at apuri lombok liirogon kooninake logorak kobak menggerak kenok, Ala apuri ti, nonggop togon kooninake logogin mbakop?
6 Aap awo ngget iluk Ala miikerak kenok mippuurak lek o. Ibilit iniki wogoppake mbareegi, maluk eeppereegerak nogo kwak, aap ti, togop iniki wogoppatemenggerak paga maluk eeppege kero, mippuurak lek o.
7 Mippugwi iinok, maluk eeremenggerak paga aakumi nen abok mbanggwi iinok, pagi keele pugu enggaanok nggerok ari menggi kwak, Ibilit nen aap ti, togop aret iniki nomongge kero, it aap endekem mendek nen at eeke abok mbanggo logonet, “Aap ti, obaabutkoonak aret o,” yogwe iinok mban mippuurak o.
Aap yeenggwaaragak mippiyoorak wone
8 Ndi, it aap yeenggwaaragak nogo, togop aret it inayuk warak logonet, inoone mbere lek ambiret mban yogo menggaarak kenok, anggur amburu kumili aganake menggerak ndonggorogon nunggulik kenok, wu kolaawok nduk aakumi wi-wi eeginakulik kenok,
9 ndi, wone kote kumaarak wonagagerak niniki abet mbakwi wone nogo porogo logonet, iniki obeelom koonnage kenok mban eekwi kenok, aap ti mendek mippiyoorak op aret o.
10 It aap yeenggwaaragak logorak ti, aa’nduk inabut mbambunuk, inoone inoba piigulik kenok, mippiyoorak op o.
11 It inakuwi ti togop aret inayuk warak logonet, wone inambe irip paga wonok nugulik kenok, iniki warak kenok, ndi, yi eekwi ndi eekwi ineenggi omaawi eerit nugwi kenok, kumi togoti mendek iinok, it inogonggelomini aap yeenggwaaragak mippiyoorak op aret o.
12 It aap yeenggwaaragak ti, inakuwi ambit wogo kenok, ndi, inapuri inom, it at inom menggaarak inom, ndegeninako logonet, wone liirogon lengganogo yorogwe iinok mban mippiyoorak op aret o.
13 It aap yeenggwaaragak eerit nugu menggaarak nogo abe koonak eekwi iinok, inendage warak aret logogun o. Ndi, nit niniki Keritut Yetut oba panggombunuk abet mbakwi wone nogo, it inagabiti mbaka’lek logonet, yoranet nugu logogun aret o.
Wone kote kumaarak wonagagerak wone
14 An mbet-mbet keya woraakit nduk, niniki lunik logonet, wone yi, liiru mbanggege kwe,
15 ambi yiluk ari kagak eerukwak, Ala apuri inenggela’me logonet, nonggop eerit nege logorak keenu a’nok nduk, liiru yi mbanggege agarik o. Wone Ala ari menggerak wone o eyak nu’lek wuraberak ti, Ala mondok eenik menggerak apuri kuwak eeko menggaarak nogo aret.
16 Nit Ala wone abet mba’nuk waganggo monggoorak kote kumaarak lombok wonagagerak nogo yi o. “At aap aret kin ari wage mbareegi, Yi Ala aput, mbaruwak nduk, Aberiniki nen kin eeppereegerak. Kin eeppege mbareegi, it malayikat nen at eebe inigen kogwe, Ala wone ineenggo’lek mendek wonogome yoranet nogwe, it aap abok aret at abet mbakwi, eeko mbareegwa, Wi, ugwi iigak, wonok laganeegerak o,” yinuk, yogo menggaarak nogo mondok abet aret kogo o.
4 “Pilit wone agan wogo logogun,” yoreegerak wone
1 At Aberiniki nen kin paga ari logonet, “O age yobok kuli paga it aap ando nen aakumi inambokan laganuwok nduk, pilit pugunogo yorogwe, Ibilit nen yorage kagak mamunirogwe, eekwi wone nogo liippunuk, mugurok nogo logonet, Ala wone abet mbareegwaarak nogo kobak eerogo mbo aret pugun o,” yinuk, ari menggerak.
2 It aap wone ti mendek agan nugwi nogo ti, aakumi inambokan laganuwok nduk, pilit pugunogo yorogo menggaarak aret. Ninagabolo togum agaatak me, kani nengge kagak andi lek menggi kwak, it aap ti, inikime togop aret me, wone yoragaatak kwe, konengga’lek inogogumbuk aret menggaarak o.
3 It aap ti nen, “Kumi wogonako logorak mage o,” yinuk, yorogwe, ndi, it aap Ala ari menggerak wone ineenu a’nuk abet mbakwi nogo nen, “Ugun noorak nduk Ala nen wakkagagerak me, Wa, yinuk, ma’mak noorak op,” mbakwi iigak, “Noorak mage o,” yinuk, mamunirogwe, eeko menggaarak.
4 Yi mendek ndi mendekAla nen wakkagagerak nogo ti, obeelom mban aret wakkagagerak me, nit niniki nen, “Wa,” mbako logonet, waganggwi kenok ti, mage lek o.
5 Ala wone waganggwi, tamban eekwi, eekwi paga obeelom age menggerak me, yi mendek ndi mendek ugun noorak op aret o.
Keritut Yetut ayeloman obeelom logorak wone
6 Wone ti, koreewi mamunirage keenok, kat Keritut Yetut ayeloman abe mendek aret logomunggun o. Ndi, niniki abet mbakwi wone inom, wone kole wone mamunik mugurok nage menggendak inom, waganogo aberit nage paga kiniki nu’lek kole aret logomunggun o.
7 It kumi inanggok inariimbayok mbininggo mengga kwak, yi wone ndi wone abe mendek lek kagak aanom warogo mbininggo menggaarak nogo ti, liippugun o. Ala wone perak, ndakndak eeke logonok nduk, nabeniknabenak mamunggolage logot o.
8 Nineebe omaawi eeriyak wakkagak eekwi paga nineebe ninomaawi ee’ninake ti, we mbuuluk op ee’ninaburak nduk eeko monggoorak kwe, Ala wone yugu ndak-ndak eeruwok nduk, wakkagak eekwi niinok perak, Ala nen yogondak inom, peebi inom, ee’ninaburak nineenu me, mondok nggwok togon obeelom ee’- ninaburak nduk, eeko monggoorak kogo o.
9 Togop me, “Wone ti abet aret o,” yinuk, kiniki mbere lek nggaruk togon waganggo logorak op aret o.
10 Yi aakumi ndi aakumi abok inagap ndarikit mbake menggerak kwe, nit niniki at oba panggombunuk abet mbakwi ninagap ndaka mondok itok eenik menggerak Ala nen, “Nit yorogwe niigak eeppiyaagin,” mba’nuk, niniki lunik mondok nu’lek monggoorak me, nit lin wako logonet, nabenik-nabenak mban eerit nogo monggoorak.
11 Wone yi nogo lengganogo yorage, mamunirage, eeke logot o.
12 Kat keebe awo tawe aret me nduk, aakumi nen tebenogo pagarak ti mage o. Ari menggendak inom, eeke menggendak inom, aakumi kiniki kunik aganake menggendak inom, Ala wone abet mbake menggendak inom, maluk eerukwak, kenegen tebenak nege menggendak nogo inom, eeke ti paga it aap abet mbako menggaarak kat in wakkagak logonet, eeke logot o.
13 An awo waga’lek neegak, Ala wone mbuku paga mbininirage, inaruk wake, wone mamunirage, eeke logonet, liirogon eeke logot o.
14 Ala eyabu ambi eeke logonok nduk, it Ala apuri unde nogo nen kanobak tebenggo logonet, “Kat peebi togop eeke logomunggun o,” yinuk, nggwok paga aa’nduk unde eeppagareegwaarak nogo, kobak eerogo puurak ti mage o.
15 Kiniki kole age aakumi abok yelok keyaawak nduk, yokkigirak ti paga mban panggombunuk, eerit nage logot o.
16 Kobaabut eeke menggendak inom, wone mamunirage menggendak inom, liippege logot o. Wone yi, mondok liirogon porogo logot o. Porogo logonet, liirogon eeke keenok, it aakumi kat koone konenggwi nogo inagap ndake, ndi, kat kunduk kagap ndakkolage, eerumunggun o.
5 Abet mbakwi iinok, eeppiigo logorak wone
1 It aap inanggok iinok, koone omaawi paga mberiraagun o. “Yi nogobamini kwak me,” yinuk, iniki eyak wappiige logot o. It aap tawe ti, kat kawuri kwak,
2 it kumi inanggok ti, kagalomini kokwak, ndi, kumi tawe ti, kat kiriwi kokwak me, it paga kiniki me maluk mondok abeka’lek logonet, yorage logot o.
3 It kumi togwe inaagalogwe inarum liirogon wonogwe lek iinok, liippiige logot o.
4 Kumi togwe inaagalogwe- inowowologwe wonogwe iinok perak, it nogo nen Ala wone ndakndak eeruwak nduk, inagalominiinowogolomini it inaa’nduk yee-nggwaarogo logowak o. It inagalomini- inowogolomini nen inaagalogwe- inowowologwe ndegengginako nogogwaarak nogo onggo yogondak it togop aret ndegeninako logowak o. Togop eekwi iinok, Ala inikilom mbake menggerak.
5 Kwe ambi togwe aret kwe, aagalogwe nen yeenggwaaga’lek kenok, “Ala nen yeenggwaanege logowak o,” yinuk, iniki Ala paga lunik logonet, ko’lu-kii’me Ala nggino yoge, tamban eeke, eeke menggerak kenok, kwe ti, abe togwe aret o.
6 It kumi ineenggi eekwi lek amburu warak mban na mbarit nugwi iinok ti, ineenik wonogwe kwe, kambak negen aret wonogwe o.
7 Kumi togwe togop eekwi iinok, aakumi inoone inoba piyookwak, wone ti, kulinik-kalinik koone omaawi paga inaruk wake logot o.
8 Aap ambit-ambi at owe-awot ndegeninakeelik ti, maluk aret kwe, at apuri lombok ndegeninaka’lek kenok perak, it aakumi abet mbaka’lek mendek ti, we maluk mbuuluk negen kwe, aap ti perak, maluk mondok nggwok aret eeke menggerak o. At abet mbareegerak nogo ti, mbo pereegerak aret wonage o.
9 Kwe ambi nda’nagagerak kagak tahun 60 eeka’lek kenok, endage mbaniyak lek o. Ata, ogonggelo ambit wogo kagak togwe pugu kenok,
10 “Yi obeelom ndi obeelom eeke menggerak,” yogwe iinok, aagalogwe liirogon tawe eeginaka kenok, aap nggiru inanoniya laka kenok, it Ala apuri ake leenak iniyok koorinaka kenok, it aakumi aaninggin inoba agaatak iniki eyak wappiiga kenok, ndi, yi obeelom ndi obeelom eekwi abok aret, “An unde o,” yinuk, eeke menggerak kenok, endage mbaniyak op kwe,
11 it kumi togwe awo ndugum iinok perak, inendage mbaniyak lek o. It kumi ti, iniki nengge kenok, Keritut wone waganeegwaarak mbo punuk, aap alik koloorak koonugun me, inendage mbaniyak mage o.
12 It aa’nduk mugurok noorak miireegwaarak nogo mbo pugwi paga maluk aret eekkologo logogun o.
13 Oolukooluk nogo yit nogo logonet, ineenggi lebenak eekko’net nugu menggaarak. Ti mban eerit nugwi ti lek o. Ata, wone inambe irip paga wonok nugwi, ambi me wok yagak nugwi, eerit nugu logonet, wone yuurak lek nogo mendek kagak ugun agan nugu menggaarak.
14 Togop me, it kumi ti nen ambi eeremenggaarak paga it ninom ogoorak nogo nen ninenggali wappinanukwak, it kumi ndugum me togwe piyamenggerak nogo, inogonggelomini kologwe, inaagalogwe ndaganakwi, inamelak wogo eekwi, eeko logorak op aret mbake agarik o.
15 Kumi ando perak, Ibilit mugurok nugu logowok nduk, muk iniyok paga yungguninuk nogo agaarik o.
16 Kwe iniki abet mbake ambi nen agalo togwe wonage kenok, it Ala apuri abunuk aaninggin inoba piyookwak me, at aagaluk nogo nen yeenggwaage logowak o. Ndi, it kumi togwe aret kwe, inaagalogwe lek iinok perak, it Ala apuri nen yeenggwaarogo logowak o.
17-18 Ala nen ari logonet, “Lembu nen iniyok gandum anggen mbelanit nage kagak ando nunggwi iyo, inambe keele maarogo piigo logorak mage o,” ari, ndi, ambi, “It aap yabu eeko menggaarak yabu onggo woorak op aret o,” yinuk, ari, yereegwaarak liiru mbanak wonage me, it aap Ala apuri unde menggaarak inendage tiyanak kwe, obeelom lombok inarum wonogwe me nduk, inendage ambinom tiyappuurak ti op aret o. It Ala wone nggwok paga yorogwe, wone mamunirogwe, mondok nabenak mban eekwi iinok ti, abunuk ambinom inendage tiyappiigo logonet, liippiigo logowak o.
19 Aap mbere ilik, kenagan a, nen, “Togop eekerak o,” yinuk, yogwe lek iigak, at ambiret nen mban aap Ala apuri unde menggaarak ambi oone oba pege kenok, at oone kone-niyak ti, lek o.
20 Aap ambi nen maluk mban eeke kenok, it aakumi abok inagabiti mbaruwak nduk, nggwok paga aruk wake logonu o.
21 An nogo, Ala inom, Keritut Yetut inom, it Ala ake leenak malayikat nogo inom, abok inenggaanom paga an wone yi, lengganogo yokkigi o. An wone lengganogo yokkege yi, abok aret eeke logonet, kat kinom kunik kenok eeko logorak yoraga’lek mbo piige, ndi, aakumi ugun kenok eeko logorak yorage, eeke logogun o. Ata, aakumi abok aret ineenu a’nuk, eeko logowak nduk, yorage logot o.
22 Ala apuri unde logowak nduk, inanobak mbet-mbet tebeniyak mage o. It ambi maluk eekwi iinok, kat kinom nabenggoloorak ti mage mban o. Kat kiniki kikak naka’lek mondok alik leenak logot o.
23 Kat kaanogum andi eekkake, keebe kuluk-kuluk ndeyak eekkake, eeke menggerak me, kat niyo mban nengge logogun o. Ata, anggur amburu mbuuluk inom nenggak eeke logot o.
24 It aap mippiyoorak nduk, inabut mbangge logonet, aap ando maluk eekaatak kenom age kenok, mbo piigo menggaarak kwe, it aap ando perak, inomaluk nobarak kagak, mippiigaatak me, peebi inomaluk kenom aret age menggerak.
25 It obeelom eekwi ti, togop aret iigo monggoorak. Ndi, it ando obeelom eekwi ambi nobarak wonage kenok, kumaarak togop mban logogin lek o. Kin arigin aret o.
Pasal 6 1 Ala endage inom, nit wone mamunirogwe nogo inom, miyukmeya eerogo pukwak, it aakumi inayeloman nen, “Ninogobamini aret o,” yinuk, inoone konenggo logonet, inayuk wuko logowak o.
2 Ndi, it aakumi inayeloman nogo nen inogobamini abet mbakwi iinok, “Nit kunduk abet mbakwi me, Ala apuri ninom ndak-ndak aret o,” yinuk, inoone taganogo punuk, tebembiyoorak mage o. Ata, it nogo nen, “Ninogobamini yabu eeppiigwi ti, aakumi inambik ti lek o. Nit ninom ndak-ndak abet mbakwi aret me niniki kunik aret o,” yinuk, ambinom inake nggwok togon eerit nugu logowak o. Wone ugun agan nogwe iinok, yoreegerak wone Wone yokkege yi nogo abok aret mamunirage, inaruk wake, eeke logot o.
3 Aap ambit-ambi wone kole wone ninowe Yetut Keritut wone nogo inom, ndi, nit Ala wone liippunuk, mugurok noorak mamunirogwe wone nogo inom, eebi mbake logonet, wone alik mamunirage kenok,
4-5 at nen, “An neenu o,” nduk, wogoppatit nage kwe, kobak kagak we ugun agan nege o. At aap ti nen wone, “Yi ndogop me, ti ndogop me,” ari logonet, wone wake, ndi, wone mbuuluk yugu kagak ndugwi pege, eerit nage logorak ti, inikilom lombok mbarit nage menggerak. At togop eerit nage kenok, it aap ando Ala ari menggerak wone nogo mondok kobak logonet, maluk mban koonggwi nogo nen, “At ari kenok mban koneniyak, yo’nirogwe me,” yinuk, neebi-keebi yogwe, “An iya, kat iya,” yogo logonet ndugwi pugwi, at meek ombako logonet abok mbanit nogwe, ndi, inom wone mondok wakak mban eekwi, eeko menggaarak. It aap ti, “Ala wone liippunuk eerit nogwe niinok, nineenggi warak eekkolaawok,” mbako menggaarak kwe,
6 nit perak, Ala wone liippunuk, eerit nogo logonet, niniki tayenak wonogwe nogo ti, onggo iya tit kologwe ti aret.
Wu uugwe mbarit nogwe wone
7 Ninagalomini inikime nen nda’- nogo logonet, iri’ngga ambi nineenggime wonok wundi woroolik me, kanggo logonet kunduk, ambi wonok nagun lek mban.
8 Ninambininayum ambiriluk ambi wonage kenok, “Yi abu aret o,” yinuk, ninikitayenak logowok o.
9 It aap, “Nineenggi warak eekkolaawok,” mbakwi iinok, Tile nen, “Nanonggwan aga o,” yinuk, iniki nggagangge kagak, pagi keele pugu paga enggaanok nggerok togon wake menggi kwak, it aap ti togop aret perak togon maluk eekwi, ndi, “Yi an neebe paga maluk eekkolage,” mbaka’lek iniki ugun nenet nugwi, eerit nugwi paga yobok togon yigeebu wanggo logonet, ineebe mondok wakkolaagun aret o.
10 Yilukmaluk alom lombok ti, wu mban uugwe mbarit nugwi ti aret o. It aakumi ando nen uugwe nduk, kwaarit nugu logonet, wone abet mbareegwaarak nogo mbo punuk, tu alik nomoninuk nogwe me, aap togowa paga ndanunggologo nagaatik, andi kogo mengga kwak, it aap ti, togop aret wakkologo menggaarak.
Timotiyut eeke logorak yoreegerak wone
11 Kat perak, Ala aput aret me, eekwi ti mendek mamunggolookwak, ogole nen mbagangge logot o. Obeelom kenok mban eekwi, Ala wone liippunuk eekwi, iniki abet mbakwi, aakumi iniki kunik aganakwi, aaninggin inoba age kagak, inogogumbuk logonet waganggwi, iniki yanggonak paga yorogwe, ti mendek eeriyak kenok mban mugurok nage logot o.
12 Nit abet mba’nuk mugurok nogwe nogo, kat kunduk mugurok nage logonok nduk, mondok wakkagak eeke logot o. Ndi, keenik mondok logonok nduk, kayonggo pege mbareegi, kat abet mbareegindak aakumi ambik inenggaanom paga paganeegindak nogo, nggirik-nggerok agago porogo logot o.
13 Yi mendek ndi mendek ineenik aganake menggerak alom at Ala inom, ndi, at iniki mbareegerak Pondiyut Pilatut enggaanom paga paganeegerak Keritut Yetut nogo inom, imbirak inenggaanom paga noone omaawi yi yokkege agarik o.
14 Wone lengganogo yokkereegwaarak nogo ambi wuppega’lek abok enaani porogo logonet, eerit nage me, “Ninowe Yetut Keritut kin ari woraawak o,” yinuk, wone ti lengganogo yokkigi o.
15 Ala nen ninowe Yetut Keritut, “Ndiyom paga kin eeppi woroorak,” koonogo pereegerak nogo ndak-ndak aret kin eeppi woraagin o. Nit alut eeko monggoorak mondok alik omaawi menggerak ti, Ala aret o. Aakumi inoweewi inogoba at aret. Yi aap ndi aap inendage warak inowe endagembogut ti, at mban aret o.
16 At kanggeelik mondok-mondok eenik menggerak aret o. At wonage me time eya ambik me aakumi at owagam wok yi noorak meek o. Aakumi nen aa’nduk at eebe inigen koolik me, yogondak kunduk inigen kogwe lek mban aret. “At endage mondok tiyanak yi aakumi ndi aakumi abok at abu’me tebe yinuk, at oone mban konenggo logowak o,” yinuk, amin.
17 It aakumi o yogondak ineenggi warak wonogwe nogo ti paga iniki wogoppako logonet, yi mendek ndi mendek lek ariyak kagak, iniki ti paga lunik logokwak, yorage logot o. Nit ale’nggen mbaruwok nduk, at yi mendek ndi mendek ngginu-ngginu eerogo wo’nirage menggerak Ala paga mban iniki mondok lunik logowak nduk, yorage logot o.
18 Obeelom eeppiinet nugu logonet, yi obeelom ndi obeelom eekwi paga ineenggi warak eekkologwe, iniki lek ndoobu aakumi wogoroorak mban inikilom mbakwi, eeko logowak nduk, mamunirage logot o.
19 Ti eekwi iinok, ko’lu o eebe wuruwok nduk, yogondak o eyak nu’lek wurakwi nogo kokwak, it peebi ineenik mondok abe mendek kologo logorak iniki piirik lek, “Eeppinanigin aret,” mba’nuk, inageerok abe kunggolaawok nduk, inawu kuwak eeko mengga kwak, yogondak yi obeelom ndi obeelom mban eerit nogo logowak nduk, yorage logot o.
20 Timotiyut wae. Wone liirogon yogwe lek inoone amburu puk-puk agan nugwi, pilit wone aret kwe, “Wone ngget mendek yi aret o,” agan wogwe paga wone wakwi, eekwi nogo mendek liippugun o. Ata, kat unde logonok nduk, mippagareegwaarak nogo liippunuk eeke logot o.
21 Wone ti mendek agan nugwi paga aakumi ando abet mba’nuk waganggo nogogwaarik, Ala wone abet mbareegwaarak nogo mbo punuk, tu alik paga nomoninuk nogo agaarik o. Yogondak abu aret yokkigi. Ninogoba iniki kunik en eeppagage logonet, karum aret logogin o. Wa.
Mbuku 1Timotiut
BalasHapus