PILLEMON

Mbuku Pilemon yi, eebe mbanak pekkaga’lek logonet, aa’nduk pekkoorak nogo yi o.

At Pilemon nogo, o Kolote wonage logonet, abet mba’nuk Ala apuri o Kolote mendek inom kuwak eeke nagagerak.

At ayeloman ambi endage Onetimut aret me, at ogoba Pilemon mbo punuk mbaganeegerak. Ti’nuk, at Pawulut keele maarogo mambiigo menggam wonage logonet, at Onetimut nogo aput negen eekkolage nagagerik, Ala wone liirogon mamunege kagak, at Onetimut nogo abet mba’nuk, Ala aput agagerak. At Pawulut nen liiru mbanogo Pilemon ake nappereegerak yi nogo ti, at ayeloman Onetimut nogo, at Pilemon wonage me ka nawak nduk, nappemenggerak nage kenok, eebe waawak nduk, liiru yi mbanogo nappereegerak.

“At Onetimut nogo aa’nduk maluk eereegerak ti abet aret kwe, An maluk eekirak o, yinuk, pagangge nagaarik, abet mba’nuk, Ala aput agaarak me, kat nen mbo puurak ti mage o. Ata, an neebe wo’nabukwak at eebe liirogon aret wamen o,” yinuk, liiru mbanogo nappereegerak.

-------------

PAWULUT NEN PILEMON AKE LIIRU MBANEEGERAK WONE

1 1 Keritut Yetut wone yoranet nage minggirak paga keele maa’nabeegwaarak an Pawulut ninawot Timotiyut nimbirak nen, kat ninore Pilemon ninom niniki kunik logonet, eeko monggoorak inom,

2 nit niniriluk kwe Apipiya inom, aap Ala wone ninom piyanggo monggoorak ninore Arikiput nogo inom, Ala apuri kat kame kuwak eeko menggaarak inom, abok aret wone ambi yokkiraawi o.

3 Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale’nggen logobagip nduk, eeppinagagwi, eeko logogun o.

Pilemon eeke paga Ala, “Wa!” yoreegerak wone

4-5 Nore Pilemon wae. Kat kiniki ninowe Yetut oba panggombunuk abet mbake menggendak inom, it Ala apuri alik leenak abok aret kiniki kunik aganake menggendak inom, kabok an konengge me, tamban eeke logonet, kat koba niniki aberak wonage me, kulinik-kalinik, nogoba Ala, “Wa,” yoge minggirak.

6 Kit abet mbakwi paga Ala apuri kinom monggotak nogo kinom kiniki ambit eeppunuk logonet, “Ndogop ee’ninakerak o,” yinuk, pagan-pagan yogwe paga Keritut ninom kunik logonet obeelom mendek eeppinaniyak mbake menggerak nogo, ambinom kineenu arubagip nduk, kinake tamban eeke minggirak.

7 It Ala apuri alik leenak kiniki kunik aganake logonet, iniki eyak wappiinet nage paga niniki kwippaneegindak me, niniki ale’nggen nggwok mbake logonet, “Wa,” yokkigi o, noreeluk. Onetimut waawak nduk yoreegerak wone

8 Togop me, an koweeluk Keritut nimbirak kunik logonet, kat ambi eeriyak agaarak kagarak nogo, eeke logonok nduk, noone omaawi togon yokkiriyak op kwe,

9 kat an niniki kunik lombok wonage me, noone we yanggorogon yokkiriyak ee’nake o. An Pawulut nogo aap abu nanggok agagirak o. Ndi, Keritut Yetut oone wonok yonggo nege nagagirak paga keele maa’nabeegwaarak yogondak yime logonet,

10 an naput Onetimut awone nogo yokkiri o. An keele maarogo mambiigo menggam yime logonet, an naput negen agagerak me,

11 aa’nduk, at kimbirak eerit noorak meek wonogogutak kwe, yogondak perak, kat kunduk, an kunduk, ninom eeriyak op lombok agaarak kagarak me nduk, yokkigi o.

12 Yogondak keya woraawak nduk, kowagam nappi wagi ti o. Ndi, at eebe wage logonet, an niniki inom nikkenok wage agaarik o.

13 Obeelom wone yoranet nege nagagirak nogo paga an keele maarogo paneegwaarak yime wonage me, at kat kobaane’me an narum yime nimbirak logorak op aret mbakirak kwe,

14 kat unde nen, “E o,” yo’nega’lek me, obeelom eeppaniyak mbakendak kero, kiniki mba’nuk nen, “An eeppanuwam,” noone omaawi paga yokkirigin lek o.

15-16 Yogondak at keya wage nogo ti, aap inayeloman pogom keya wage ti lek o. At aa’nduk mbaganeegerak nogo ti, we ne ambiriluk mbo paganuk mbaganeegerak kero. Ndi, yogondak perak, kat kore kimbirak inikikunik lombok logomunggup nduk wage me, mondok-mondok wamen o. At nimbirak ti, niniki mondok kunik kwe, kat kayeloman aret me, ndi, at kunduk, Keritut ninom niniki kunik logonet, keya woraagin me, mbo puurak mage o, noreeluk.

17 Ti kenok, kat nimbirak ndakndak abet mbareegurak me, “Nore Pawulut aret o,” yinuk, an wo’naburak mbake nogo kokwak, at aret wamen o.

18 Aa’nduk kimbirak logonet, maluk ambi eeppagage, kamendek ambi wagangge, eereegerak kenok, at yoriyak lek o. Ata, an nobaalombok me, an aret yo’nirumunggun o.

19 “At Pawulut nen yoga’lek kagak liiru mbanggerak o,” nombake keyo, “An Pawulut nen aret onggo wokkirigin o,” yinuk, wone ambiriluk ti, an neenggi lombok paga aret liiru mbanggigi o. An wone yokkereegirak paga kiniki abet mbareegindak nogo ti, nanomat mbanak pogom koba wonage me, ambi yi inom koba pagakit lak kwe, mbo pigi o.

20 Ai, noreeluk. Yokkigirak ti, abet aret eeke keenok, “Yi Ala nen iniki koonggerak paga eeke,” komba’nuk, niniki ale’nggen ee’nabuwak nduk, at eebe wamen o. Nimbirak Keritut apuri mban aret me, niniki ale’nggen eerogo panenok nduk, yokkigi o.

21 An liiru mbanggege yi nogo mban kat eeke logonok nduk, yokkege ti lek o. Ata, ando kat kiniki nen koombunuk ambinom nggwok togon eeke logomunggun abet aret kombake logonet mbanggigi o.

22 Wone yokkigirak ti, eeke logonet, kat nake tamban eeke Ala aruk konembunuk, an keya woroorak koonnabigin abet aret mbake me, woraanuk nogo yuurak o ambi ogobakkigirogo panege logot o.

Age yobok paga keyage wappereegerak wone

23 Aap Epaparat Keritut Yetut wone yorage nagagerak nogo paga keele maarogo pereegwaarak yime nimbirak logonet, keyage wakkako o.

24 Ndi, it nawurilogwe ninom eekwi nogo, Marakut kunduk, Aritarukut kunduk, Ndemat kunduk, Lukat kunduk, nit abok aret nen keyage wakkako o.

25 At ninowe Yetut Keritut iniki kunik en eeppagage logonet, karum aret logogin o. An Pawulut Timotiyut nimbirak nen abu aret yokkogo o. Wa!