2 TIMOTIUYUT

Mbuku 2 Timotiyut yi, eebe mbanak pekkaga’lek logonet, aa’nduk pekkoorak nogo yi o.

At Pawulut nen Timotiyut ake liiru peebi mbanogo nappereegerak yi nogo ti, at awot Timotiyut mondok iniki kunik logonet, imbirak yabu eerit nege nagagerak me, ugun-ugun eerit nage logokwak, iniki kwippunuk liirogon eeke logorak wone ambik aret kini wuppereegerak. Wone alom eeke logorak yoreegerak nogo yi aret.

Iniki mondok nu’lek eeppunuk li’lak yorage, Ala nen yorage kagak yorogo nogogwaarak liiru aa’nduk mbanak nogo mamuninake, Yetut Keritut eeke nagagerak Obeelom Wone nogo liippunuk, yorage, eeke logowak nduk, yoreegerak. At Timotiyut nogo it aakumi mamuninaka aret me, liirogon mamuninake, Obeelom Wone yorage logowak nduk, Ala nen ayonggo pereegerak me, wone yoranet nege, ndi, aaninggin-paaninggin oba age kagak, at oone woorak ineebi mbakwi iigak, iniki nu’lek logonet mamuninake, eeke logowak nduk, yoreegerak.

At Timotiyut nogo aap wi eeko mengga kwak eerit nage, wone wakwi iinok inom age, ndi, wone yugu ambi woppunuk, ti paga obeelom ambi eekkoloorak lek inaruk konenggwi nogo maluk eeppiyoorak kagak eekwi nogo mendek inom eerit nage, eeke logokwak nduk, kini wuppereegerak.

“Ti eerit nogwe nogo abok aret eerit nogwe iigak kwe, kat Timotiyut perak, an eeke nagagi kwak kat ndak-ndak aret eeke logot o. It aakumi iniki Yetut oba panggombunuk abet mbakwi, iniki yanggo yinuk wonogwe, aakumi iniki kunik eeginakwi, iniki nu’lek wonogwe, piyak-payak eeginakwi iigak waganggwi, eeko logowak nduk, kat it aakumi in wakkagak eeke logot o,” yinuk, peebi liiru mbanogo Timotiyut ake nappereegerak nogo yi aret.

-----------------

PAWULUT NEN TIMOTIYUT AKE LIIRU PEEBI MBANEEGERAK WONE

1-1 Timotiyut wae. Kat naput niniki kunik aret me, at Ala mbareegerak paga nit Keritut Yetut ninom kunik logonet, nineenik mondok logorak wone abok yo’niragagerak nogo yorage logokit nduk, Keritut Yetut ayonggo nappiigak agago paneegerak an Pawulut nogo nen wone ambi yokkiri o.

2 At ninogoba Ala inom, ninowe Keritut Yetut inom, imbirak iniki kunik nen wokkugwi, kabuwa nen obeelom eeppagagwi, ndi, kiniki ugun tayenak ale’nggen logonok nduk, eeppagagwi, eeko logogun o.

Iniki eyak wappereegerak wone

3 An ko’lu-kii’me tamban eeke minggirak me, eeke logonet, kat koba aberak wonage me, “Nogoba Ala wa,” yinuk, yoge minggirak. An nombomini maluk abeka’lek logonet iniki abe paga Ala ake eeko nogogwaarak nogo kokwak, an ndak-ndak aret eeke minggirak o.

4 Kat le yereegindak nogo abe’nage kenok, an niniki ale’- nggen nggwok lombok kaakit nduk, “Keya woraakit lak ao,” mbake minggirak.

5 Kat abu abet aret kiniki Yetut oba panggombunuk abet mbareegindak nogo, an neenu aret o. Kowogolo Lowit inom, kagalo Ewunike inom, imbirak aa’nduk abet mbareegwaarak ndak-ndak, kat kunduk abet mbareegindak me, niniki aberak agarik o.

6 Togop me, an neenggi kanobak tebembagage neegak, Ala eyabu ambi ee’nok nduk, unde eeppagareegerak nogo, kani noguk ari kenok ambi kunggwi nogo pogom ambi abeke logonok nduk, yokkigi o.

7 At Ala nen niniki ninagabitinggut mendek wo’- niroolik o. Ata, Aberiniki omaawi eeppinanege kagak ninagabiti lek logonet yorogo logorak mendek inom, aakumi niniki kunik aganaburak mendek inom, niniki warak mendek inom, wo’niragagerak o.

8 Togop me, ninowe eereegerak wone nogo yorage logorak kagabiti mbarugun o. Ndi, an Ala wone yorage nagagirak paga nen keele maa’- nabeegwaarak nogo kunduk, kagabiti mbarugun mban. Obeelom wone yorogwe paga aaninggin-paaninggin ninoba pinanugwi iinok, ndak-ndak woorak nduk, Ala omaawi wo’nirage menggerak me, an nalik lek o. Nimbirak ndak-ndak aaninggin kogo logowok o.

9 At Ala nen ninagap ndake nagagerik, nit at apuri at ake leenak logowok nduk, ninayonggo pereegerak. Nit ambi eekkologogurak paga ti lek o. Ata, at ee’ninaburak kooneegerak nogo ndak-ndak, iniki kunik nen eeppinanege logonet, ninagap ndareegerak. At iniki kunik nen eeppinanege menggerak nogo ti, o yi awo wakkaga’lek kagak, “Keritut Yetut abet mbakwi paga woorak o,” yinuk, koonogo pinaneegerak nogo, pagak yaga’lek wonagagerak kwe,

10 yogondak iluk ninagap ndaka Keritut Yetut kin ari wage nagagerik, kambuurak ninoba lenggenak wonogogurak nogo, lek eerogo punuk, wone obeelom wone waganggwi paga nabelan-kabelan ee’ninaburak wone nogo nggwok paga pagak yereegerak.

11 Wone obeelom wone ti, mamunirage, yi aakumi ndi aakumi yoranet nege, nappiigak logonet, yi awi ndi awi, “Nak o,” yo’nege kenok nage, eeke logokit nduk, leenogo mippa-neegerak.

12 Mippaneegerak me, eerit nage neenok, aakumi nen aaninggin eeppanugwi kwe, nenggali mbaka’- lek aret agarik o. An niniki at oba panggombunuk abet mbareegirak eebe nogo ti, an abu neenu aret o. Ndi, an eeke logokit nduk, unde eeppaneegerak nogo ninowe waga’lek kagak, lek arigin ti lek o. “Yorage logogin aret o,” yinuk, abet aret mbake agarik o.

13 Wone kole wone kat nen it in wakkagak eeke logonok nduk, yokkege nagagirak nogo porogo logot o. Keritut Yetut ninom kunik logonet, wone kole wone yi, abet mbake, ndi, aakumi kinom kunik aganake, eeke logonet, porogo logot o.

14 Abe mendek unde eeppagareegerak nogo, Aberiniki ninikime menggerak nogo nen omaawi eeppagage kagak, liirogon unde logot o.

15 It o Atiya menggaarak aap Pigelut kunduk, aap Eromogenet kunduk, abok aret an mbo paninuk mbaganeegwaarak nogo ti, kat keenu aret o.

16 At aap Onetiporut perak, an mbuti keele maarak neegak, agabiti nen mbo panulik nabenak mban niniki eyak wappani wagak mban eeke nagagerak me, at apuri inom abok aret ninowe inabuwa nen obeelom eeppiige logogin o.

17 At o Oroma nen mbet-mbet kwaa’nabit nege logonet, kwaa’neyareegerak.

18 At o Epetut logonet, yeenggwaanege nagagerak nogo kat abu keenu me, o age yobok eyom paga ninowe nen aap ti, abuwa mba’nuk obeelom eeppigin aret o.

2 Keritut Yetut awot yigin unde abe logorak wone

1 Naput kat perak, Keritut Yetut ninom kunik me, Ala iniki kunik nen omaawi eeppagage kagak, nu’lek logonet, eerit nage logot o.

2 Aakumi apit inenggaanom paga an yi wone ndi wone yokkege koneneegindak nogo, it aap abe mamumbunuk aakumi liirogon mamuniroorak op iigendak kenok, unde logowak nduk, mamunirage logot o.

3 Maluk eeppanugwi iigak, nogogumbuk logonet wagangge minggi kwak, kat Keritut Yetut awot yigin unde abe kwak logonet, nimbirak ndak-ndak waganggo logowok o.

4 Aap ambi nen, “Nowe wim mamunnegerak inikilom nombaruwak o,” yinuk, yi mendek ndi mendek eeriyak mbo punuk, wim eeriyak mban iniki lunik logonet eerit nage menggerak nogo o.

5 Ndi, aap ambi, “Ta aa’nduk onggo kolamenggi?” yinuk, wakkogo logonet, “Ndogop eeru o,” yinuk, wone yugu nogo ndak-ndak eekeelik kenok, onggo kolageelik o.

6 Aap yabu eenggi omaawi eeke logomenggerik, anggen iyaalok yugu nogo nggwok mbanggoloorak op o.

7 An yokkege yi nogo ti, yi wone ndi wone yelok kaanok nduk, ninowe nen keenu eeppagagin me, liippege logot o.

8 At Ala nen Ndawut ombooluk Yetut Keritut kambunuk nogo menggam nen mippereegerak wone nogo ti, an obeelom wone yorage minggirak ndak-ndak aret me, abeke logot o.

9 An wone ti aret yorage neenok, maluk eeppanegak mban eerit wogoga, wogoga, irip paga, “Aap abu maluk eeka o,” yinuk, keele maarogo paneegwaarak yime wonage kwe, Ala wone perak, keele maariyak meek me, wiganinuk nage agaarik o.

10 Togop me, it aakumi Ala miirinabeegerak iniki Keritut Yetut oba panggombunuk, abet mbakwi iinok, inagap ndappunuk mondokmondok inom tiyanak logowak nduk, maluk eeppanugwi iigak, it inake nogogumbuk logonet wagangge minggirak o.

11 “Nit at ninom kambeegurak kenok, at ninom nineenik arugun o.

12 Maluk eeppinanugwi iigak, ninogogumbuk logonet, waganggwiniinok, at ninom tiyanak logonet, aakumi inarum logogun o. Nit nen at mbo pugwi niinok, at kunduk nit mbo pinanigin o.

13 Nit yogootak kagak alik eekwi kwe, at yegetak perak, alik ageelik yegetak ndak-ndak aret eeke menggerak o,” yinuk, yogo menggaarak nogo ti mondok abet aret o.

Ala eyabu eerit nogo logonet, eeko logorak wone

14 Wone yokkege yi nogo ti, aakumi nen abeko logowak nduk, yorage logot o. Wone mbuuluk yugu kagak wone wakwi nogo paga obeelom eekkologwe lek it konenggwi nogo iniki mi’nage me, “Togop eerugup o,” yinuk, Ala enggaanom paga koone omaawi paga yorage logonok nduk, yokkigi o.

15 Aap ambi yabu abe eeke logonet, agabiti mbakeelik nogo pogom, kat Ala ari menggerak wone mamunirage logonet, kiniki nen koonogo alik inom nabenogo yoraga’lek at oone mban liirogon yorage keenok, Ala nen inikilom kombaruwak nduk, liippunuk, eeke logot o.

16 Wone liirak lek inoone amburu puk-puk agan nugwi paga obeelom eekkoloorak lek maluk eeriyak mban ee’ninake logorak me, mbo puurak aret o.

17 It aap inawin maaluget ambit me kungge nagaatik, ineebe paga nggwok wigangge menggerak nogo pogom, it aap ti, inoone togop aret wiganinuk nage menggerak. Wone ti agan nugu menggaarak nogo ti, aap Kimeneyut Piletut imbirak it inom a’nuk agan nugu menggaarak.

18 It aap ti, Ala ari menggerak wone nogo nomonogo mbo punuk, “Aakumi kambunuk nogo menggam nen muk ineenik agago mippiyareegerak o,” yinuk, yogo logonet, it abet mbareegwaarak nogo ando iniki abut laganggo menggaarak kwe,

19 o wurik ili agago liiru mbanogo pogo mengga kwak, Ala eeriyak kooneegerak nogo, “Mondok logogin,” mbaruwak nduk, ari logonet, “An napuri kenok ti, neenu aret minggirak o.” Ndi, ambi, “Yi aap ndi aap abok aret, An Ala aput aret o, yogwe iinok, It maluk eekwi nogo mbo pogo logowak o,” yinuk, yereegerak me, it aap ti togop aret eeko menggaarak kwe, Ala nen, “Eeriyak,” kooneegerak ti, o eyak wurabak nu’lek menggi kwak, mondok nu’lek aret logogin o.

20 O nggwok wurik inikime ti, mbuti emas paga inom, mbuti perak paga inom, togolowak ti mendek mban ogobakkigirik menggerak lek o. Ata, ando eyo paga inom, ando nggween paga inom, ogobakkigirik menggerak. Togolowak abe kigirikwe kenok ti, iya mendek ambi eeriyak nduk, leenak menggerak. Ndi, maluk negen kenok perak, we ugun eekak yuurak nduk menggerak.

21 Togop aret menggerak me, aap ambit-ambi togolowak koorak mondok obeelom wonage kokwak, at omaluk mbo pege kenok, at ogoba nen yi mendek ndi mendek obeelom iya lombok eeke logowak nduk, ogoba ake mondok leenak aret menggerak.

22 Wologwe tawe iniki nengge nogo kokwak, kat togop eekkake kero, mbo punuk mbagangge logot o. Abe kenok mban eekwi inom, iniki abet mbakwi inom, aakumi iniki kunik aganakwi inom, iniki ambit lambunik wonogwe inom, it aakumi iniki abe paga, “Ninogoba Ala aret o,” yinuk, yogwe nogo, kinom a’nuk it eekwi ti mendek mban mugurok nage logot o.

23 Aap wi negen wone yugu pelaarit nugwi paga ndugwi pugwi nogo, kat keenu me, mbo pege logot o.

24 Kat ninowe ayeloman aret kenok, ndugwi pegak eeriyak ti mage o. Ata, yi aakumi ndi aakumi abok aret koone yanggorogon yorage, wone mamunirage, maluk eeppagagwi kwe, onggo yoraga’lek puk wonage, eeke logot o.

25 It kinom ogoorak logonet, wone alik agan nugwi nogo, mbo punuk, abe wone ineenu aruwak nduk, Ala nen eeppiyoorak kagak eerukwak, koone yanggorogon mamunirage logot o.

26 Ala nen togop eeppiige kenok, Ibilit mbake menggerak eeko logowak nduk, keele maarogo piyareegerak kagak, iniki warak a’nuk, keele nogo piinggo’nok wundi wogo logogun o.

3 Age yobok paga aakumi nonggop logorak wone

1 Naput wae. Peebi o age yobok paga aaninggin abu alik negen ninoba ari woraagin nogo, keenu a’nok nduk, yokkigi o.

2 Ti eyom paga eeriyak nogo ti, aakumi nen, “An mban,” mbako logonet, iniki nggilimi wonogwe, wu mban uugwe mbarit nugwi, iniki tiyappatit nugwi, “Wi!” iraawak nduk wogoppatit nugwi, inoreewi miyuk-meya eerogo piinet nugwi, inagalo-inogoba inoone liirogon konengga’lek nugwi, lambek-nggoonak nugwi, Ala wone taganogo pit nugwi, eeko logogun aret o.

3 Ti eerit nugu logonet, inowe-inawot inabuwa mbakwi, inom lambuniyak mbakwi, eeka’- lek aret logogun o. Aakumi inabok mbanit nugwi, eeriyak aganake kenok tebenogo pugwi lek mondok eerit nugwi, inanini wulo lombok logonet, aakumi mondok inoorit nugwi, obeelom eeriyak mondok ineebi mbarit nugwi,

4 aakumi inambokan laganggwi, iniki koongga’lek ugun eerit nugwi, “An mban iya,” mbarit nugwi, Ala inikilom mbaka’lek iniki nengge kenok mugurok noorak mban inikilom mbakwi, ti mendek mban eerit nogo logogun o.

5 Ndi, ti eerit nugu logonet, Ala wone abet mba’nuk mugurok nogwe inetenggen negen eekkolamenggaarak kwe, iniki perak, “Ala nen obeelom eeppinaniyak nineebi,” mba’nuk, eerit nogo logogun o. It aap ti eekwi iinok, inogole nen mbagangge logonu o.

6 It aap ti nen oome ungguwok nduk, inoone waanggo-waanggo yoraanuk unggwogo nagaatik, kumi iniki nengge kenok mugurok nogo logonet, maluk eeko nogogwaarak paga iniki aaninggin wonogwe nogo, it aap ti nen inoone yanggorogon yorogo nagaatik, it kumi nogo iniki nomoninako menggaarak.

7 It kumi ti nen kulinik-kalinik, “Ala ari menggerak wone ti, ambi yo’niraanip o,” yinuk, yorogo menggaarak kwe, Ala ari menggerak wone nogo wagangga’lek aret menggaarak.

8 It aap Yanet Yamberet imbirak en Muta wone, “Nineebi o,” yinuk, yogogwaarak nogo pogom, it aap ti, Ala ari menggerak wone, “Nineebi o,” yinuk, yogo menggaarak. It iniki mondok maluk mban koonggwi me, nit wone abet mba’nuk eekwi paga inabut mbambunuk, eekwi lek iinok, mbo piyareegurak.

9 It aap Yanet Yamberet imbirak nen eerit nogogwaarak kin agagerak nogo pogom, it aap ti, iniki ugun kobak logonet, agan nugwi nogo aakumi abok inenggaanom paga pagak ari kenok, ambinom eeko logogun lek o.

Eeke logowak nduk, irip paga yoreegerak wone

10 Kat perak, an wone mamunirage, eerit nage, eeriyak niniki koongge, niniki at oba panggombunuk abet mbake, maluk eeppanugwi iigak, niniki yanggonak wonage, aakumi niniki kunik aganake, maluk eeppanugwi kwe, nogogumbuk logonet wagangge, eerit nage neyareegindak nogo o.

11 Ndi, an o Andiyokiya inom, o Ikoniyum inom, o Litera inom, wonage me, piyak-payak ee’nakwi iigak, nogogumbuk logonet wagangge nagagirak kwak, yogondak ee’nakwi iinok, wagangge mi-nggirak abok aret kat keenu aret o. An o time wonage me eeppanugwi iigak, nogogumbuk logonet wagangge neegak, nowe nen nagap ndareegerak me, iya!

12 Yi aakumi ndi aakumi Keritut Yetut inom kunik logonet, Ala wone liippunuk eeruwok mbakwi iinok, piyak-payak agago piinet nugu logogun aret o.

13 Togop aret kwe, it aakumi maluk eeka inom, pilit pugungga inom, maluk ambinom nggwok eerit nugu logonet, it mban-mban inambokan laganggologo logogun kwe,

14 kat perak, yi wone ndi wone, “Yi abet aret o,” yinuk, mamunggolagagindak nogo, nggirik-nggerok porogo logot o. Taamini nen mamunggireegwaarak nogo keenu aret.

15 Ala yereegerak wone liiru mbanak paga Keritut Yetut abet mbakwi niinok, ninagap ndariyak nineenu ee’ninaburak wone wulaga mbuuluk paga kat keenu agagindak nogo, abeke logonet, nggirik-nggerok porogo logot o.

16 Ala yereegerak wone liiru mbanak abok aret Aberiniki aakumi inikime lik ari nagagerik, yorage kagak, liiru mbaneegwaarak me, wone mbanak yi nogo paga nen aakumi mamunirogwe, inoone alik agan nugwi nogo kooninakwi, maluk eekwi iinok inaruk wakwi, ndi, obeelom mban eeko logorak lengganogo yorogwe, eeko logowak nduk, mbanak aret menggerak o.

17 At Ala yereegerak liiru mbanak wo’niragagerak nogo ti, nit Ala apuri logonet, yi obeelom ndi obeelom eeko logowok nduk, ninake li’luk agago pereegerak wonage agaarik o.

Pasal 4 1 Aakumi at abu’me piyoorak nduk, ninowe kin ari wage logonet, it ineenik wonogwe inom, kambeegwaarak inom, inowak loonogo inawone amburu mbani woroorak Keritut Yetut inom, Ala inom, imbirak inenggaanom paga an noone omaawi paga wone yi yokkiri o.

2 Ala wone yoranet nege logot o. Anggon kagak, anggon lek kagak, yiyom-ndiyom ugun yorage logonok nduk, pipuk aago logot o. “E o,” yuwak nduk yorage, maluk eekwi iinok mberirage, koone yanggorogon inaruk wake, eeke logonet, kaanaganggenggwi lek kiniki kwippunuk liirogon mamunirage logot o.

3 It aap wone kole wone mamunik nogo koneniyak, “Nineebi o,” yuurak eyom panggoni woraagin. Panggoni wage kenok, it aap ti nen, “Wone ngge yogwe iyaamun?” yinuk, inaruk nggoonit nogo logonet, wone it inikilom mbako menggaarak mban yogwe iinok, inabu’me unggwogo logogun o.

4 It aakumi ti nen Ala ari menggerak abe wone kenok, nomonogo mbo punuk, woneelom kenok mban mbininit nogo logogun o.

5 Togop kwe, kat perak, kiniki tum wakkolage logot o. Maluk eeppagagwi iigak, kogogumbuk logonet wagangge, aap obeelom wone yoranet nugu mengga kwak, kat ndak-ndak yoranet nege, eeke logonok nduk, mippagareegwaarak nogo ndak-ndak aret eeke, eeke logot o.

6 Ala ake amburu kilirogo pugwi kwak, an nooriyak nduk, abu punogo panegaarak wonage me, an lagi noorak panggoni waga o.

7 Nit abet mba’nuk mugurok nogwe nogo kolaawok nduk, wakkagak eeko monggoorak nogo ti, an mondok wakkagak eeke nagagirak o. “Kuli ndi paga mbe agan mi’nari nak o,” yorogwe iinok, mbe agan mi’nari nogo mengga kwak, an abu irip paga kuli mi’nari wagi o. Nit wone abet mba’- nuk mugurok nogwe nogo ti, an mondok aret porogo wonagagirak.

8 Ndi, yogondak at wone a’me nggelok owak loongga ninowe nen it aakumi obeelom eekwi iinok, onggo nggare-nggare mendaarak yippiige menggerak me, o age yobok paga an ambi yippanikit nduk, nake paneegerak wonage o. An nalik yippanigin lek o. Ata, yi aakumi ndi aakuminen, “At kin ari woraawak lak, a o,” yinuk, tokkogwe nogo abok aret yippiyaagin o. Timotiyut liirogon eeke logorak wone

9 Mbet-mbet neya woraanok nduk, koongge logot o.

10 At Ndemat nogo, nggween paga mendek mban inikilom agagerak me, mbo paninuk o Tetalonika nagagerak o. Ndi, at Kereket o Nggalatiya nage, at Titut o Ndalamatiya nage, eekwi iigak,

11 at Lukat alik perak, nimbirak agarik o. At Marakut nogo nimbirak eeriyak op me, kat wage logonet, waganggak woraamunggun o.

12 At Tikikut nogo, o Epetut nappigirak o.

13 Kat wage logonet kenok, togwi yum o Torowat aap Karuput ame kagak wagagirak nogo inom, nambuku pirikperek aago nogo inom, ndi, eyo agabolo paga liiru mbanak ti iya me, ti inom, abok aret wo’nombanok woraamunggun o.

14-15 Aap mbuti paga yi mendek ndi mendek ogobakkigika Alekandet nogo nen nit wone yorogo monggoorak at mondok eebi lombok mbake logonet, maluk iya tit eeppaneegerak me, kat kunduk maluk eeppagukwak, tum wake logot o. At eeppaneegerak nogo ti, nogoba nen onggo ndak-ndak wogorigin o.

16-17 Aa’nduk, nawone mbaniyak nduk, eekwi me, noreewi ambi abu neya woroolik abok aret mbo paneegwaarak kwe, nowe Yetut nen perak, nimbirak logonet, niniki eyak wappaneegerak. An obeelom wone yorage logokit nduk, mippaneegerak nogo, ambi wuppulik tigitogon it aakumi endekem mendek abok aret konenuwak nduk, “An yoraakit o,” yinuk, mi’nage neegak, nowe nen mban nomaawi eeppanege, niniki eyak wappanege, eereegerak o. Togop me, maluk eeppaniyak mbakaarak nogo singa ambeme nen ndinggwi kwak, ndinnabeegerak. Ndi, noreewi mbo paneegwaarak nogo maluk inoba piige kero, Ala yoge minggirak.

18 Maluk eeppaniyak mbakaarak nogo abok aret eeppanugwi iyo, nogoba nen nagap ndarogo at abu’me piige menggim mbogut paga time kuurik me aret pani nagin o. At togop eeppaningin me, endage mondokmondok tiyanak aret logowak o. Amin.

Keyage wappereegerak wone

19 Kwe Piritikila aap Akwila imbirak inom, ndi, aap Onetiporut aaganapuri inom, keyage wappiyaanok nduk yokkigi o.

20 Aap Eratut o Korindut time puk agagerak. Aap Toropimut andi eereegerak me, o Miletut time kagak wagagirak.

21 O mayu kumulinggen wambi woroorak eyom awo panggoni waga’lek kagak, kat mbet-mbet neya woroorak koongge logot o. Aap Ebulut kunduk, Puret kunduk, Linut kunduk, Kalawuriya kunduk, ndi, noreewi Ala apuri kunduk, nen abok aret keyage wakkaka o.

22 Ninowe Yetut iniki kunik en eeppagage logonet, karum aret logogin o. Wa!