WAYU

Silakan klik halaman ini>http://www.youtube.com/watch?v=x2RqZ0R_fxk&feature=related

Mbuku Wayu yi, eebe mbanak pekkaga’lek logonet, aa’nduk pekkoorak nogo yi o.

Mbuku Wayu yi, aakumi nen it Ala aput Yetut Keritut iniki oba panggombunuk abet mbareegwaarak nogo, tebenogo piigo logonet, aaninggin-paaninggin eerogo piigwi iinok, yagan wakwi ti eyom paga liiru yi mbaneegerak.

At liiru yi mbaneegerak nogo ti, wone yi mamunggo logonet, iniki aganggen paga pekkogwe, aaninggin-paaninggin eerogo piigwi iigak, iniki abet mba’nuk waganeegwaarak nogo mbo pukwak, liirogon porogo logonet eekwi, eeko logowak nduk liiru yi mbaneegerak.

Mbuku Wayu yi, peebi eeriyak wakkagak abinggaanggo paga yoge kagagerak nogo, it aap Ala apuri ne ti eyom paga liippuwak nduk, wone ti mendek ambik aret liiru mbaneegerak. Togop kwe, it aakumi ando nen, “Wone yi, liippuurak mondok meek, abu nobarak negen wonage,” mbako menggaarak.

Wone alom liippuwak nduk abinggaanggo paga yogak mban eereegerak nogo, mbuku yi paga ambik aret mbanak wonage. Mbuku Wayu yi paga wakkagak ambik aret mbanak me, it aakumi ando nen pekkogo nagaatik, iniki alitik-alitak aret mbako menggaarak.

Togop mbako menggaarak kwe, wone abinggaanggo paga yoreegerak liiru mbaneegerak alom nogo ti, kin aret wonage kogo monggoorak. “Yetut Keritut nen at awim nogo tebenogo piige logonet, Tile kunduk teppigin lek ti lek, tebenogo pigin aret o. Abu aret tebenogo pege kenok, Ala nen mbogut ngget mendek eeke, nggween ngget mendek eeke, eerigin nogo ti, aap yi mendek ndi mendek obeelom eekwi iinok, onggo wogorogo mengga kwak, at apuri obeelom liirogon mban eeko logomenggaarak nogo ti, o ngget alik mendek eerogo piyamenggerak paga wonogo logonet, inale’nggen mbakak aret wonogo logogun o,” yinuk, abinggaanggo paga yoreegerak nogo liiru mbanak wonage o.

-----------------

WAYU PEEBI EERIYAK PAGANOGO YO’NIRAGAGERAK WONE

1 1 At Ala nen yi eeriyak ndi eeriyak logonuk lek mbet-mbet eeriyak wone nogo, nit at ayeloman mini nineenu eeppinanuwak nduk, Yetut Keritut yoge mbareegi, at nen paganogo

yo’niragagerak wone nogo yi aret o. Ala nen Yetut Keritut yoge mbareegi, ti’nuk, Ala ayeloman an Yaya nogo neenu eeppanuwak nduk, Yetut Keritut nen at ayonggo malayikat ambi wuppi wagagerak.

2 Ndi, malayikat wuppi wagagerak nogo nen, an yo’nege mbareegi, ti’nuk, Ala nen wone yo’nege, ndi, Yetut Keritut nen paganogo yo’nege, eeke kagagirak nogo abok aret mbininogo liiru mbaneegirak yi aret me,

3 wone yi eeriyak nogo abu panggo yegerak me, it aakumi nen peebi eeriyak wone liiru mbanak yi, pekkagak mbininogo yorogwe, ndi, yorogwe iigak, inaruk konembunuk, liirogon

waganggwi, eekwi iinok, Ala nen ale’nggen inoba piige logogin o.

Ala apuri nggereya 7 paga kuwak eekwi nogo keyage wappiyareegerak wone

4-5 An Yaya nen kit Ala apuri o Atiya nggereya 7 paga kuwak eerit nogo monggotak nogo, keyage wappinagi o. Aa’nduk wonagagerak, yogondak wonage, peebi logogin mondok itok

menggerak Ala inom, ndi, Ala wone lengganogo yorage menggim abu’me menggaarak Aberiniki eeke menggerak alom 7 nogo inom, ndi, eeruwak nduk nappi wagagerak mondok liippunuk yubuk togon eeke nagagerik, kambunuk nogo menggam inenggela’me nen at aa’nduk mi’nage nagagerik, yogondak it aap nggween paga mendek inoweewi nagawan-nagawan abok inowe endagembogut agagerak at Yetut Keritut nogo inom, it abok aret iniki kunik en wokkirogwe, ndi, kiniki ugun tayenak ale’nggen logobagip nduk, eeppinagagwi, eeko logowak o. At Yetut Keritut ninabuwa nen iniki kunik ee’ninake, amiya paga ninomaluk koorogo pinanege,

6 “An kinowe endagembogut aret o,” yinuk, abu’me pinanege, at ogoba Ala unde logonet ake eeko logowok nduk, leenogo mippinanege, eereegerak me, nit yi abok aret at endage mban

tiyappugwi, abu’me tebe yinuk, at oone mban konengggwi, mondokmondok eeko logowok o, yinuk, amin!

7 At ndugwi paga wage kenok, it aakumi o nggween paga menggaarak inanebunu lombok at wareegwaarak nogo mendek inom abok aret inalitak lombok nen inigen kogo logomenggaarik, leenggu maako logogun me, liippogo logonip o, yinuk, abet aret yokkiragi o. Amin.

8 Aa’nduk wonagagerak, yogondak wonage, peebi logogin at omaawi lombok menggerak ninogoba Ala nen ari logonet, “O maan aa’nduk togon wonagagirak Alpa inom, ndi, peebi

irip paga mondok logorak Omega inom, ti an aret o,” yinuk, ari menggerak o.

Yaya o Pa’mot logonet, abinggaanggo kagagerak wone

9 Kit aaninggin-paaninggin kinoba pinagagwi iigak kwe, “Ala abu’me pinanigin me, op aret o,” yinuk, Yetut kinom kunik kiniki nu’lek logonet, waganggo monggotak nogo ti, an kinore Yaya togop ndak-ndak eeppanugwi iigak, wagangge minggirak nogo nen Ala wone yorage, ndi, Yetut wone ari nagagerak nogo paganogo yorage, eeke minggirak nogo paga, niyo yenggenak oolo kup mbanak o endage Pa’mot pani wogogwaarak yime agarik o.

10 Yime wonage me, Ninowe mi’nagagerak eyom tamban eekwi nogo paga Aberiniki ninikime lik ari mbaki, nambokan nen oone nggwok eeka trompet nogo oone nggwok ari naruk konengge neegak,

11 yo’nege logonet, “Eeriyak titikkege neegak, mbuku pirik-perek aago paga liiru mbangge

logomenggendik, it Ala apuri o Epetut inom, Timirina inom, Peragamut inom, Tiyatira inom, Taririt inom, Pilarelipiya inom, Laworikiya inom, nggereya 7 paga kuwak eekwi nogo abok aret pekkaawak nduk, nappunu o,” yinuk, yo’nege konenggirak o.

12 Naruk konengge nagarik, “Ta nen yo’nege agaarik o,” yinuk, eebe nenegen kaakit nduk, nena logurogon pekkage nagarik, ndi wuninogo pegak 7 mbuti emas paga ogobakkigirik

kwi’ndak wonage kagarak o.

13 Ndi, ndi wuninogo pegak 7 ogobakkigirik nogo inenggela’me oolo taati aakumi inete-nggen pogom ambi wonage kagarak. Aap ti nogo, ambogoyum nggorek, nok, iyok me

linik yirik wonage, agabee’le mbuti emas mendek obate paga yirik wonage,

14 towe yanggwi eeruwak abinak lan ari nogo pogom at eeruwak togop aago wonage, enegen kani omoonuk wunuk ari pogom wonage,

15 ndi, mbuti tembaga kani kunik me mambugwi iinok, eyak kwindagala eerogo pegetak me, abinak pigan-pigan eeke menggi kwak, iyok togop aret abinak pigan-pigan eeke, niyoraakut oonebu wangge menggi pogom, at oone togop aret ari,

16 at eenggi abe’nggan paga laaluguragan 7 porogo wonage, mbuti togowa ngget peenok-peenok maarak ambeme titik aago wonage, ndi, oonegen ndelenak-welenak eeke nogo pogom, at etenggen togop aago wonage, eeke kagarak o.

17 At eebe togop aago wonage nenegen kage nagarik, aakumi inambuluk yuppuk ngginnari nogo mengga kwak, an togop aret at abu’me ngginnari nage mbaki, at eenggi abe’nggan paga pi’nake logonet, “Aa’nduk togon wonagagirak inom, peebi irip paga lombok mondok logorak inom, ti an aret me, kagabiti mbarugun o.

18 Neenik nitok minggirak an aret o. Aa’nduk kambeegirak kwe, yogondak perak, neenik

mondok-mondok wonage yi neyet o. Kanggwi inom, kambunuk nogo menggam inom, imbirak an mban aret unde logonet, tu paaka kunci porogo minggirak o.

19 Togop me, eerit wage kenegen kagandak inom, yogondak eeke kenegen kage inom, ndi, peebi eeriyak kenegen kaamunggun inom, abok aret liiru mbanogo pege logot o.

20 Laaluguragan 7 neenggi abe’nggan paga kagandak nogo inom, ndi, ndi wuninogo pegak 7 mbuti emas paga ogobakkigirik kagandak nogo inom, ti wone nobarak negen wonage me, alom liirogon yokkiri o. Laaluguragan 7 nogo ti, it Ala apuri nggereya 7 paga kuwak eekwi inarum menggaarak malayikat nogo aret iigen. Ndi, ndi wuninogo pegak 7 nogo ti, Ala apuri nggereya 7 paga kuwak eeko menggaarak nogo aret iigen o,” yinuk yo’nege kagarak o.

2 Ala apuri o Epetut kuwak eekwi nogo yoragagerak wone

1 Yo’nege kage nagarik, wonage me, “At malayikat Ala apuri o Epetut kuwak eekwi inarum menggerak nogo nen apuri yoraawak nduk, yoriyak, yokkiri o. Neenggi abe’nggan paga laaluguragan 7 porogo logonet, ndi wuninogo pegak mbuti emas paga ogobakkigirik 7 inenggela’me nege minggirak an nogo nen,

2 Ala apuri o Epetut eerit nogo menggaarak nogo an neenu aret o. It ndeyak aganake kagak mbo pega’lek mondok nabenak mban eerit nogwe, It aap maluk mendek nit ninenggela’me yime logorak mondok lek o, yinuk, ineebi mbakwi, it aap ando nappiigak mendek lek kwe, wogo nagaatik, Ala nen nappinani wagaarak o, yinuk, yorogwe iinok, inabut mbambunuk, Yi

pilit agan wagaarak o, yinuk, mbo piigwi,

3 ndi, an nendage mban yi awi ndi awi wigak yuwak nduk, eerit nogwe paga aaninggin-paaninggin eeppiinet nogwe iigak, iniki kwippunuk waganggo logonet, ta’liila eeginake

kagak mondok nabenak mban eekwi, eerit nogo menggaarak nogo ti, an neenu aret o.

4 Neenu aret kwe, mbuuluk ambi eekwi iigirak nogo perak, apuri yoraawak nduk, yoriyak yokkiri o. Aa’nduk it iniki kunik lombok ee’nako nogogwaarak kwe, yogondak perak, ninom kunik lek mbo panugwi iige nagarik, yagi o.

5 It aa’nduk an ninom kunik logonet, iniki aganggen paga noone mugurok nogo nogogwaarak nogo mbo punuk, yogondak mondok alik eerit nogwe nogo, liippatinuk, inomaluk mbo pogo logomenggaarik, yungguninuk iniyok paga woraanuk, aa’nduk eeko nogogwaarak nogo ndak-ndak eerit nogo logowak o. It iniki koombunuk inomaluk mbo pugwi lek iinok perak,

an wage logominggirik, ndi wuninogo pegak inenggela’me wonage nogo nggiginogo mbo wumbi woraagin o.

6 Ndi, ambi op negen eekwi iigirak nogo ti, it aap Nikolawut oone mugurok nogo logonet,

eerit nogo menggaarak ti, an neebi lombok mbake minggirak nogo, it ndak-ndak ineebi mbakwi iigirak me op aret o.

7 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o. Ndi, it Ala wone mbo pega’lek, iniki nu’lek porogo logonet, liirogon mugurok nogwe iinok, eyoonggen aakumi ineenik eeginake menggerak Ala eyabu me wonage nogo, It noorak op aret yoraagin o, yinuk, wone yi yagarak nogo abok aret at malayikat Ala apuri o Epetut kuwak eekwi inarum menggerak nogo nen

apuri yoraawak nduk, liiru mbanogo nappu o.”

Ala apuri o Timirina kuwak eekwi nogo yoragagerak wone

8 “Ndi, at malayikat Ala apuri o Timirina kuwak eekwi inarum menggerak nogo nen apuri yoraawak nduk, yoriyak, yokkiri o. An kangge nagagirik, neenik a’nuk mi’nagagirak aa’nduk togon wonagagirak me, peebi irip paga mondok logogin nogo nen,

9 it Ala apuri o Timirina eerit nogo menggaarak nogo, an neenu aret o. It aaninggin-paaninggin inoba age logonet, ineenggi lek age kwe, agi mendek paga ineenggi warak negen wonogwe nogo an neenu aret o. Ndi, it Yakuri mendek lek Ibilit eeke menggerak ndakndak

eeruwok nduk kuwak eeko menggaarak nogo mendek kagak, we piliret, Nit Yakuri mendek

aret o, yinuk, Ala apuri o Timirina mendek inoone miyuk-meya eerogo piigwi ti, neenu mban.

10 Togop eeppiigwi iigak kwe, it Ala apuri eeppiyoorak koonak wonage nogo ti, lek aga’lek awo aret wonage me, inagabiti mbakwi iyo, apuri yoraawak nduk, yoriyak, yokkigi o. Tile

nen ari logonet, An aaninggin-paaninggin inoba piige neenok, nonggop eekwi iyaamun? yinuk, inabut mbanikit nduk, aakumi iniki nggagangge mbaremenggi, it Ala apuri o Timirina ineebe keele maarogo o mbuuluk me mambiyamenggaarak wonogwe iigak, nogo aap ambit

eenggi aret yugun o. It nogo nen, Eeppinanugwi iigak, kambi noorak kuli ariyak op aret o, yinuk, mondok inogogumbuk logonet, waganggwi iinok, mondok-mondok ineenik logorak

mendek nggare-nggare mendaarak nogo yippiyaagin o.

11 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o. Ndi, it aaninggin-paaninggin nogo

mendek abok aret inoba age kwe, kagak, Ala wone mbo pega’lek mondok inogogumbuk logonet liirogon mugurok nogwe iinok, ne mbere paga kambugun lek o, yinuk, wone yi yagarak nogo abok aret at malayikat Ala apuri o Timirina kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Peragamut kuwak eekwi nogo yoragagerak wone

12 “Ndi ambi, at malayikat it Ala apuri o Peragamut kuwak eekwi inarum menggerak nogo nen apuri yoraawak nduk, yoriyak, yokkiri o.

An mbuti togowa ngget peenokpeenok maarak porogo minggirak nogo nen,

13 it an napuri o Peragamut time nggeeme wonogwe nogo an neenu o. It Ibilit oone kon- enggo menggam inenggela’me inom time aret menggaarak kwe, naput ambi noone

liirogon woppunuk ko’lu-kii’me yoranet nege nagagerak Andipat nogo, it inenggela’me Tile wonage menggim inagota time aret wako mbareegwa, it iniki abet mba’nuk, an noone waganeegwaarak nogo, Mugurok noorak nineebi o, yinuk, yuurak kwe, kagak, Lek o. Nit ninowe Keritut aret me, at oone waganggoorak nogo ti, mondok aret porogo logowok o,

yinuk, yogwe iigirak o.

14 Togop aret yogwe iigirak kwe, mbuuluk ambi ninggin eekwi iigirak nogo perak, yoraawak nduk, yoriyak, yokkiri o. It aakumi Iterali mendek nen Ala wone mbo punuk kugi aanggo warak nunggwi, ndi, kumi we ugun-ugun wurinabit nogwe, eeko logowak nduk, at Mbileyam nen aap Mbalak mamunege mbareegi, aap Mbalak nen Iterali mendek mamuniragagerak wone nogo, it Ala apuri o Peragamut wonogwe ando nen wone ti, mugurok nogwe,

15 ndi, ando nen at Nikolawut oone mugurok nogwe, eekwi iigirak me,

16 it maluk eekwi nogo ti, iniki koombunuk, mbo pogo logowak o. Mbo pega’lek iinok perak, an mbet-mbet wage logominggirik, mbuti togowa an nambeme wonage yi nogo paga inoori wambi woraagin o.

17 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok liirogon aret konenggo logowak o. It Ala wone mbo pega’lek nu’lek porogo logonet liirogon mugurok nogwe iinok, mbi mbogut paga mendek kumaarak wonage nogo wogorage, ndi, it waamenggaarak nogo mban ineenu logowak nduk, inendage ngget toonogo yugum yanggwi negen lan ari nogo paga liiru mbanogo wogorage, eerigin o, yinuk, wone yi yagarak nogo abok aret at malayikat Ala apuri o Peragamut kuwak eekwi inarum menggerak

nogo nen apuri yoraawak nduk liiru mbanogo nappu o.”

Ala apuri o Tiyatira kuwak eekwi nogo yoragagerak wone

18 “Ndi, ambi at malayikat Ala apuri o Tiyatira kuwak eekwi inarum menggerak nogo nen apuri yoraawak nduk, yoriyak, yokkiri o. An nenegen kani omoonuk wunuk ari pogom logonet, mbuti tembaga kani kunik me mambugwi iinok, eyak kwindagala eerogo pegetak

me, abinak pigan-pigan eeke menggi kwak, niyok togop ndak-ndak piganpigan eeke minggirak nogo nen,

19 it Ala apuri o Tiyatira eerit nogo menggaarak nogo an neenu aret o. It aakumi iniki kunik aganakwi, abet mba’nuk iniki noba panggombanugwi, inoreewi yeenggwaaranet nugwi, aaninggin-paaninggin eeppiigwi iigak, inogogumbuk logonet waganggwi, eerit nogwe nogo

abok neenu aret o. Ndi, aa’nduk we mbuuluk eeko nogogwaarak kwe, yogondak nggwok togon eerit nogwe ti, neenu mban aret kwe,

20 mbuuluk ambi ninggin eekwi iigirak me, yoraawak nduk, yoriyak, yokkiri o. Kwe Iteben nogo nen, An Ala wone yorage minggirak mendek aret o, yinuk, an nayeloman mini ineebe

ambik nomoniren nage logonet, kumi ugun-ugun wurinabit nogwe, ndi, kugi aanggo warak nunggwi, eerit nogo logowak nduk, mamunirage kagak kwe, mberega’lek, Op aret o, yinuk teppugwi iigirak me, abu neebi lombok ee’nake kenok yagi o.

21 At kwe ti, iniki koombunuk, omaluk mbo puwak nduk, tokkagarak kwe, An ee’nabuwak, mbarit nege nogo mbo puurak neebi o, yinuk, eerit nage me,

22 andi yagan yobak-nggolak wake logowak nduk, aaninggin oba kwippege logonet, it ando kwe ti inom maluk eerit nogo menggaarak nogo kunduk, iniki koombunuk inomaluk mbo pugwi lek iinok, it togop aret aaninggin mondok luurik-maarak agago inoba kwippiige neyaagun o.

23 Kwe ti, aagalogwe nogo abok aret inoorit nage neenok, it an napuri yi awi ndi awi kuwak eeko menggaarak nogo abok nen, Nit niniki mbakwi inom, niniki koombunuk eerit nogwe inom, abok aret liippinaninuk onggo ndak-ndak wo’nirage menggerak ti, at aret kogo o, yinuk, an neebe ineenu arugun o.

24 Ndi, it ando o Tiyatira wonogwe nogo, kwe ti, oone inom, Tile eeke menggerak kote kumaarak yogo menggaarak wone nogo inom, it mugurok naga’lek mbo pereegwaarak me,

an nen aaninggin mendek ambi inoba piyoorak mbarulik kwe,

25 it abet mba’nuk waganeegwaarak nogo mondok nu’lek porogo wonogwe me, An aret woraagin, yegerak o, yinuk, yoraawak nduk, yoriyak, yokkigi.

26-27 It Ala wone mbo pega’lek mondok nu’lek porogo logonet, an eeriyak mbake minggirak nogo eerit nogwe iigak, o age yobok ari wage kenok, an nogoba nen aakumi inanebunu lom-bok inarum logokit nduk, mippaneegerak nogo kokwak, it togop aret, yi aakumi ndi aakumi inabu’me piinok, wone lengganogo yorogo logowak nduk, mippiyaagin o. Ala nen ari log-onet, Mbim obate mbanak eenggime logonet, Oone omaawi paga wone lengganogo yo-rage, Ndi, yi mendek ndi mendek nggween nggabok paga ogobakkigirik nogo, Telenogo pogo mengga kwak, eerogo piige, Eerigin o, yinuk, yereegerak nogo ndak-ndak eeko logogun o.

28 Ndi, it Ala wone mondok nu’lek porogo wonogwe me, an wage logominggirik, o weerikit

nduk eeke kagak laaluguragan abinak kere ari nogo aret wogora woraagin o.

29 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret at malayikat Ala apuri o Tiyatira kuwak eekwi inarum menggerak nogo nen apuri yoraawak nduk liiru 23 mbanogo nappu o.”

3 Ala apuri o Taririt kuwak eekwi nogo yoragagerak wone

1 “Ndi, ambi, at malayikat Ala apuri o Taririt kuwak eekwi inarum menggerak nogo nen apuri yoraawak nduk, yoriyak, yokkiri o. Laaluguragan 7 neenggime porogo logonet, Ala Aberiniki eeke menggerak alom 7 unde minggirak nen, Ala apuri o Taririt eerit nogo mengg-aarak ti, an neenu aret o. It abu ndeyak kambak negen aret wonogwe iigak kwe, aakumi nen, Lek o. Aap eenik omaawi nege menggi kwak, it Ala apuri nggereya ti paga kuwak eekwi nogo mondok inomaawi aret wonogwe iigo o, yinuk, yogwe nogo neenu aret kwe,

2 it eerit nogwe nogo an nogoba Ala nen, Op aret eekwi, inombaka’lek me, it abu ndeyak kambuurak negen aganake nogo mbet-mbet ineenik a’nuk, Ala wone mbuuluk mugurok nogwe iigirak nogo nggwok togon mugurok nogo logowak nduk, inomaawi eekkolaawak o.

3 It wone mamunirogwe iigak, inaruk konembunuk waganeegwaarak nogo abeppunuk, inomaluk mbo pogo logomenggaarik, wone koneneegwaarak nogo aret liirogon porogo logorak yoraawak nduk yokkigi o. Ndi, Nit nonggop eeko ogoorik o, yinuk, inomaluk mbo

pugwi lek iinok perak, aap yogoot woorak nduk wage menggi kwak, an o ndiyom paga woroorak ineenggo’lek iigak, togop aret abera’lek me perak togon inowagam woraagin

o.

4 Togop kwe, it Taririt mendek ando mbuuluk mban inayum mili eekkolaga’lek obeelom mban eerit nugwi me, Kit obeelom aret o, yinuk, inayum laambu abe yirik ninom nugu

logogun o.

5 Ndi, it Ala wone mbo pega’lek mondok nu’lek porogo logonet, mugurok nogwe me, an wage logominggirik, aakumi mondokmondok ineenik logorak inendage mbuku paga liiru mbanak wonage nogo, an kagaarigin lek o. It togop aret inayum abu laambu yippiige logomi-nggirik, an nogoba inom, at ayonggo malayikat inom, inenggaanom paga, It aap yi, an nawuri aret o, yinuk, yoraagin o.

6 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret

at malayikat Ala apuri o Taririt kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Pilarelipiya kuwak eekwi nogo yoragagerak wone

7 “Ndi, ambi at malayikat Ala apuri o Pilarelipiya kuwak eekwi inarum menggerak nogo nen apuri yoraawak nduk, yoriyak, yokkiri o. An Ndawut agunci nogo porogo logonet, tu paake neenok aakumi nen nakwi, ndi, nake neenok paakwi, eekulik an mban unde logonet, pilit

ariilik abet mban ari minggirak nalik leenak minggirak nogo nen,

8 it Ala apuri o Pilarelipiya eerit nogo menggaarak nogo an neenu aret o. Neenu aret me, it an nendage mbo pega’lek porogo logonet, inomaawi mbuuluk wonage nogo paga an noone mugurok nogo menggaarak me, it ambi eeko logowak nduk, tu paarogo piyareegirak nogo, aakumi nen narogo piyoorak mondok meek aret o.

9 It aap Tile eeke menggerak ndakndak eeko logowok nduk, kuwak eeko menggaarak nogo, it Yakuri mendek lek kagak we piliret, Nit Yakuri mendek aret o, yinuk, yogo menggaarak nogo nen, Yi Ala apuri inom iniki abe kunik wonogwe iigo o, yinuk, it Ala apuri o Pilarelipiya mendek inabu’me tebe yi wa’nuk inoone konenggo logowak nduk, eeppiige neyaagun o.

10 Ndi, Kit kinogogumbuk kiniki kwi’ndak logonet eeko logonip o, yinuk, yoragagirak nogo, konembunuk liirogon aret eekwi me, peebi yi aakumi ndi aakumi nggween paga menggaarak

abok aret inabut mbanikit nduk, aaninggin-paaninggin inoba piya woroorak eyom nogo paga, it an napuri ti, inoba arukwak, an nen ndegeninake logogin o.

11 An logonuk lek mbet-mbet aret woraagin o. Ndi, wage logominggirik, it abet mba’nuk waganeegwaarak nogo liirogon porogo wonogwe iinok, nggare-nggare mendaarak nogo

mendek yippiya woraagin me, aakumi nen waganggwi iyo, liippunuk, tum wako logowak o.

12 It Ala wone mbo pega’lek liirogon porogo wonogwe me, an wage logominggirik, o omaawi logowak nduk, tiru oolo yinggo mengga kwak, it aakumi ti, Ala awi wurik me togop aret mippiinok, an nogoba Ala endage inom, Ala awi wurik o kota Yerutalem ngget mendek nogoba Ala mbogut paga nen wuppi woraagin nogo endage inom, ndi, an nendage ngget

toonak nogo inom, inalitak lombok inoba liiru mbanogo piyaminggirak wonogwe me, it peebi time nen wundi nagun abu lek o.

13 Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti, abok aret at malayikat Ala apuri o Pilarelipiya kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Laworikiya kuwak eekwi nogo yoragagerak wone

14 “Ndi, ambi at malayikat Ala apuri o Laworikiya kuwak eekwi inarum menggerak nogo nen apuri yoraawak nduk, yoriyak, yokkiri o. At Ala nen yi mendek ndi mendek wakkaakit mbake kagak, wakkagagirak alom an aret me, Ala nonggop menggerak mondok liirogon abet

aret paganogo ari minggirak nendage Amin nogo nen,

15 it Ala apuri o Laworikiya eerit nogo menggaarak nogo an neenu aret o. Iniki miin lek

aganggen togon lek we niyo tarom ombat negen wonogwe iigirak me, iniki aganggen logorak mbakwi kenok, aganggen aret wonogwe, ndi, iniki miin logorak mbakwi kenok, miin aret wonogwe, eeko logorak op aret mbake kwe,

16 iniki aganggen lek, miin lek, we niyo tarom ombat negen wonogwe me, niyo kulubit

ombat kenok inambeme nen kilirogo wumbogo mengga kwak, it ineebe togop aret kilirogo wumbiyoorak mbake agarik o.

17 It nogo nen, Ninigen mbuk ninagap mbelanak nineenggi lek niniki ale’nggen mondok lek aaninggin ndugu aago nugu logonet, agan nugu monggoorak kogo o, yinuk, mbaka’lek logonet, Nit ninamendek ambi lek ti lek, abok aret wonage me, nineenggi warak aret o, yinuk, yogo menggaarak me, it eeko logorak yoraawak nduk, yoriyak wone ambi yokkiri o.

18 It inagap mbelanak nugwi me aakumi nen inigen iigwi iinok, inenggali ogwe iyo, inayum laambu yanggwi negen yikkolaawak nduk kunggologwe, inigen mbuk nogo obeelom a’nuk yi mendek ndi mendek inigen kaawak nduk, amburu inigen me puurak kunggologwe, ndi, aabe mendek paga ineenggi warak aruwak nduk, an nawu mbuti emas abe kani paga worarak nogo mendek inom onggo kunggologwe, eeko logorak yoraawak nduk, yoriyak, yokkigi o.

19 It aakumi an niniki kunik eeginake minggirak nogo ti, inaruk wake, iniki koonnaruwak nduk yawi inooke, eeke minggirak me, iniki koombunuk, inomaluk nggaruk togon mbo

puwak o.

20 An tunggambe paga mi’ndak logonet, tu puk-puk eeke nogo liippanuwak o. Aap ambi an tu puk-puk eeke nogo, aruk konembunuk, tu paa’neege kenok, an ka unggwage logominggi-rik, nimbirak niniki ambit lambunik nore-kore logonet, mbi nonggo logogun o.

21 Ndi, it an noone mbo pega’lek mondok nu’lek porogo logonet mugurok nogwe iinok, an nogoba yo’nereegerak nogo abu worok togon eeppunuk, at wone lengganogo yorage menggim nimbirak kwi’ndak wonage nogo ndak-ndak, it kunduk an noone lengganogo yorage minggim ninom kwi’ndak logowok nduk, Neya woraanip o, yinuk, yoraagin o.

22 Aberiniki nen it Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti abok aret at malayikat Ala apuri o Laworikiya kuwak eekwi inarum menggerak nogo nen apuri yoraawak nduk, liiru mbanogo nappu o,” yinuk, yo’nege kagarak o.

4 Mbogut paga Ala alut eekwi iyareegerak wone

1 Ti yo’nege mbaki, nabinggaanggo ambi kage logonet, o mbogut paga time tungga ambi paarak kage neegak, nogome nen aap ambi nen oone nggwok eeka trompet oone nggwok ari pogom aa’nduk yo’nege konenggirak nogo ambinom yo’nege logonet, “Yogondak eeriyak kagandak nogo eeppunuk, peebi eeriyak nogo titikkirikit nduk lagi mok o,” yinuk,

2 awo aret yo’nege kagak, Aberiniki ninikime lik ari nagaarik, wo’neren pani laganggerak mban kagarak. Pani laganggerak wonage me, mbogut paga time wone lengganogo yorage menggim eyo ndoonak nogo paga, aap ambi kwi’ndak wonage kagarak.

3 Wu kirin abinak pindan-pindan eeke menggi kwak, aap kwi’ndak wonage nogo etenggen ti, yugum yatipit pogom, yugum taririt pogom, eerak wonage kagarak. Ndi, at kwi’ndak menggim irimbaga liware yugum tamurut etenggen kunik negen wanggerak wonage kagak,

4 it mbogut paga wonogwe inoweewi ineebe 24 nen inayum yanggwi negen yirikwi, mbuti emas paga nggare-nggare mendaarak inanobak paga yirikwi, eeppunuk, wone lengganogo yorage menggim oolo kagak, it wone lengganogo yorogo menggam eyo ndoonak 24 wanggerak wonage nogo paga inoweewi 24 nogo ti paga kwi’ndak wonogwe iigirak.

5 At wone lengganogo yorage menggim time nen o kimbik pindanggage kagak, oone ngguurubu agan wundi wage kagarak. Ndi, wone lengganogo yorage menggim enaame

nggwe taati ndi 7 wuninik wonage kagarak. Ndi 7 nogo ti, Ala Aberiniki eeke menggerak alom 7 nogo aret o.

6 Ndi, wone lengganogo yorage menggim eyo ndoonak abu’me taati pugagi abu abe tabak lombok yilaa’nggun kole yenggenak kibu-kibu pege nogo pogom wonage kagarak. Ndi, aakumi nen iigulik mendek ineebe 4 enaagan-ambokan inigen abok wonage me, wone lengganogo yorage menggim oolo taati wanggerak wonogwe iigirak.

7 Ineebe nogo ti, ambi nggeewo singa etenggen pogom, ambi tapi ngguunok etenggen pogom, ambi ti, aakumi inetenggen pogom, ndi, ambi ti, towe wu a’naabit wiganak nogo pogom, wonogwe iigirak o.

8 Aakumi nen iigulik mendek ineebe 4 nogo ti, inalitak lombok ina’naabit 6 aret me, ineebe

paga apit aret inigen warak mban wonogwe iigirak. It nogo puk aga’lek ko’lu-kii’me inoone yogo logonet, “Maan wonagagindak, yogondak wonage, peebi logomunggun, nogo ti, kat mondok itok komaawi lombok menggendak ninogoba Ala aret me, Kat mondok obeelom alik leenak aret o. Kat mondok obeelom alik leenak aret o. Kat mondok obeelom alik leenak

aret o,” yinuk, yogak mban eeko logonet,

9 at mondok-mondok eenik menggerak wone lengganogo yorage menggim kwi’ndak wonage nogo, “Wa,”yinuk, alut eekwi, endage tiyappugwi, eekwi iigak,

10-11 it inoweewi ineebe 24 nogo nen at mondok-mondok eenik itok menggerak wone lengganogo yorage menggim eyo ndoonak paga kwi’ndak wonage nogo, abu’me tebe yinuk, alut eeko logonet, “Ninogoba Ala wa. Kat kiniki koombunuk yi mendek ndi mendek abok aret wakkaakit o, yinuk, wakkagagindak kat mban kalik nggwok aret me, Yi aakumi ndi aakumi abok kat kabu’me tebe yinuk, kendage tiyappagago logonet, kalut eeko logowak o,”

yinuk, inenggare-nggare mendaarak yirik nogo, nggoorogo at abu’me pii wogwe iigirak o.

5 Mbuku pirik-perek aago wondekkagagerak wone

1 Ti eekwi iige nagarik, ti’nuk, ambi kage logonet, mbuku pirikperek aago ambi nggorek peenok-peenok liiru mbanak me, “Piiniyak lek o,” yinuk, ambi perengge keele maake, ambi perengge keele maake, eerit keele 7 paga maarak at wone lengganogo yorage menggim eyo

ndoonak paga kwi’ndak wonage nogo eenggi abe’nggan porogo wonage kagarak.

2 Kage neegak, malayikat alilaakwi ambi nen oone nggwok ari logonet, “Mbuku mbanak pirik-perek eerak yi, aap ta nen keele piinogo pekkoorak op o?”

3 Ari mbaki, mbogut paga inom, nggween paga inom, nggween abu’na inom, aakumi ambik

aret wonogwe kwe, it ambi nen keele piinogo wondekka woroorak unde eeppiyoolik me, ambi pekka wage iyoolik o.

4 Piinogo wondekka waga’lek aret mbaki, “Nit aap abok maluk eeko monggoorak me, nit piiniyak unde eeppinanulik aret kagi o,” yinuk, niniki mondok wakkolage logonet, le nggwok yagarak.

5 Awo le ari wonage me, mbogut paga wonogwe inoweewi nogo ambi nen an yo’nege logo-net, “Le ari mage o. Eyo ambi agarip lagangge menggi kwak, anebunu Yekura nen Ndawut ombooluk nggeewo singa pogom nda’nagagerak nogo, eegin tiyak yereegerak me, at nen mbuku pirik-perek eerogo keele 7 maarak nogo, piinogo wondekkoorak op me, wondekka wage kaamunggun o.”

6 Yo’nege mbaki, inoweewi 24 nogo inom, aakumi nen iigulik mendek ineebe 4 nogo inom, wone lengganogo yorage menggim taati wanggerak wonogwe iigak, Ndomba Aagaluk ambi eebe warak negen kwe, it inenggela’me mi’ndak wonage kagarak. Ndomba Aagaluk nogo

ti, aruk alom me eyak 7, ndi, enegen 7, wonage kagarak. Aruk alom me eyak 7 inom, enegen 7 inom, nogo ti, Ala Aberiniki eeke menggerak alom 7 o nggween paga yi awi ndi

awi nappiige menggerak nogo aret o.

7 Ti’nuk, Ndomba Aagaluk nogo wage nagaarik, wone lengganogo yorage menggim eyo ndoonak paga kwi’ndak mbuku eenggi abe’nggan porogo wonage nogo wagangge kagarak.

8 Wagangge mbaki, it aakumi nen iigulik mendek ineebe 4 nogo inom, mbogut paga wonogwe inoweewi ineebe 24 nogo inom, Ndomba Aagaluk nogo abu’me tebe yinuk,

9-10 ndawi ngget mendek wako logonet, “It aakumi inanebunu alitak lombok inom, inoone alitak lombok inom, inagabolo alitak lombok inom, yi aakumi ndi aakumi abok aret wono-gwe kwe, Inenggela’me nen ambitak nggiginogo Ala apuri aruwak nduk, kat kooko mbar-eegwa, kamiya paga inonggo mbaneegindak ti paga mbuku pirik-perek aago keele 7 maarak nogo, kat nen waganogo piiniyak op aret o.

10 It kat kamiya paga inonggo mbaneegindak nogo, ninogoba Ala abu’me piinok, Ala unde

logonet, ake eeko logowak nduk leenogo mippiyareegindak me, Inendagembogut logonet,

aakumi nggween paga ogu time wonogwe nogo wone lengganogo yorogo logogun o,” yinuk, at yogwi naruk konenggirak. Konengge nagarik, it inoweewi ineebe 24 nogo nen nggitat inom, togolowak mbuti emas paga ogobakkigirik obari abe kaga toolak nogo inom, inalitak lombok porogo logonet, ndawi paga yogwi iigirak o. Obari abe kaga togolowak mbuti emas

paga toolak nogo ti, it Ala apuri ake leenak tamban eeko nogogwaarak inoone toolak negen aret kagarak.

11 Ti eekwi iige neegak, wone lengganogo yorage menggim eyo ndoonak nogo inom, it aakumi nen iigulik mendek ineebe nogo inom, it mbogut paga wonogwe inoweewi nogo inom, oolo wonogwe iigak, it malayikat ineebe ambik ineenggi lingginiyak mondok meek lombok wanggerak wonogwe nogo nen inoone nggwok paga ndawi wako logonet,

12 “Ndomba Aagaluk wareegwaarak nogo, yi aakumi ndi aakumi abok at abu’me tebe yi

unggwogwe, Yi mendek ndi mendek abok aret at wogogwi, Yi wone ndi wone abok kat mban keenu aret o, yinuk, yogwi, Kat kalik mondok komaawi aret o, yinuk, ayuk wukwi,

endage tiyappugwi, Kat obeelom aret o, yinuk, inale’nggen ombakwi, Eeko logorak op aret o,” yinuk, yogwe iigak,

13 it mbogut paga wonogwe inom, nggween paga wonogwe inom, nggween abu’na wonogwe

inom, yi nggwok yenggenak laut inikime nugwi inom, Ala nen ogobakkigireegerak yi men-dek ndi mendek yi aakumi ndi aakumi abok aret inoone nggwok paga ndawi wako logonet, “Nit abok aret, at wone lengganogo yo’nirage menggim kwi’ndak wonage nogo inom, Ndo-mba Aagaluk nogo inom, kimbirak obeelom aret o, yinuk, Inabu’me tebe yinuk, inalut eekwi, inendage tiyappiigwi, eeko logonet, inoone mondok-mondok konenggo logogun o,” yinuk, yogwe iigak,

14 it aakumi nen iigulik mendek ineebe 4 nogo nen, “Abet aret yaga o,” yinuk, “Amin,” mban yogwe, ndi, it inoweewi 24 nogo nen Ndomba Aagaluk nogo abu’me tebe yinuk, alut eekwi, eekwi iigirak o.

6 Keele 7 maarak piinogo wondekkagagerak wone

1 Ti eekwi iige neegak, Ndomba Aagaluk nogo nen keele 7 maarak nogo aa’nduk maarak piingge kagak, aakumi iigulik mendek ineebe 4 nogo ambi nen oone o ngguurubu pogom ari logonet, “Omok o,” ari naruk konengge nagarik,

2 nenegen neegak, kuda eeruwak yanggwi lombok me, amborowak paga aap ambi kwi’ndak eegin eenggime wage mbaki, “Aakumi tebembiya nak o,” yinuk, nggare-nggare ambi yippunuk, nappege mbaki, tebenogo piinet nage kagarak.

3 Ti’nuk, Ndomba Aagaluk nogo nen keele aa’nduk maarak piingge nagaarik, ambi maarak nogo piingge kagak, ineebe 4 nogo inore ambi nen ari logonet, “Omok o,” ari naruk kone-ngge nagarik, nenegen neegak,

4 kuda alik ambi eeruwak maa’ngga kunik me, amborowak paga aap ambi kwi’ndak wage mbaki, “It aakumi o nggween paga ogu time iniki ugun tayenak ale’nggen nugu logorak

lek o. Ata, it-it wat-wat yogo logowak o,” yinuk, unde logorak mippege logonet, mbuti wooluwak nggorek lombok wogoge kagarak o.

5 Ndi, Ndomba Aagaluk nogo nen keele mbere maarak nogo piingge nagaarik, ambi maarak piingge kagak, ineebe 4 nogo inore ambi nen ari logonet, “Omok o,” ari naruk konengge

nagarik, nenegen neegak kuda mili lombok me, amborowak paga aap ambi kwi’ndak aaninggin wakkagak nogo mendek eenggime wonok wage mbaki,

6 it aakumi iigulik mendek ineebe 4 nogo, inenggela’me nen oone ambi ari logonet, “Mbato

yum mbuuluk ambi yonggolak nogo ti, wu ne ambit paga it yabu eekwi onggo wogorogwe ndak-ndak nogo paga kungge, ndi, gandum yum mbuulogwe kenagan yonggolak nogo ti, ndak-ndak wu ne ambit paga it yabu eekwi onggo wogorogwe nogo paga kungge, eeriyak kwe, eyo tayitun amburu inom, anggur amburu inom, ti perak, maluk eerogo puurak mage o,” yinuk, ari kagarak.

7 Ti’nuk, Ndomba Aagaluk nogo nen keele kenagan maarak piingge nagaarik, ambi maarak nogo piingge kagak, aakumi iigulik mendek ineebe 4 nogo inore ambi nen ari logonet, “Omok o,” ari naruk konengge nagarik,

8 nenegen neegak, aap kambuurak nduk eeke logonet, etenggen ndoongga kere agago pege menggi kwak, kuda togop aret aap ambi endage Kanggwi Unde nogo kuda amborowak paga kwi’ndak wage kagak, aap ambi endage Kambunuk Nogo Menggam ambokan nabek togon

aago wage eekwi iigirak. Wogo mbaka, it nen aakumi o nggween paga ando mogonogo teppiigo logonet, ando mogonogo seper empat nogo wooluwak paga inoorit nogwe, mbi abu nen kambuwak nduk, noogelo eerogo piigwi, andi nen kambuwak nduk, kugilengga ndi wurogo piigwi, ndi, nggwiya eyonggaame mendek nen nibininabuwak nduk, inanini eerogo piigwi, eerit nogo logowak nduk, unde eeppiige kagarak.

9 Ti’nuk, Ndomba Aagaluk nogo nen keele 4 maarak piingge nagaarik, ambi maarak nogo piingge mbaki, it aakumi Keritut inake eereegerak wone abet mba’nuk, mbo pega’lek Ala wone mondok liippunuk mugurok nogwe iinok, inooko nogogwaarak nogo, inogoma Ala ake warogo kani kunggo menggam abu’me taati wonogwe iigirak.

10 It nogo nen inoone nggwok yogo logonet, “Ninogoba Kaliku Ala wae. Kat kalik mondok nggwok alik leenak menggendak me, it aakumi o nggween paga wonogwe nen ninooreegw-aarak ninamiya wambit nagagerak nogo, inowak loonogo ninane’me inooka’lek keegak, ne mande arigin o,”yinuk, yogo mbaka,

11 “Lek o. Kit kinowe-kinawot inom, it kinom Ala wone mondok liippunuk mugurok nogwe inom, kit kinooreegwaarak kokwak inookwi iinok perak, kinane’me ambugwi lambuk togon inoorigin aret me, we ne ambiriluk puk logomunggup o,” yinuk, mbogoyum nggorek yanggwi negen inalitak lombok yippiige kagarak o.

12 Ti’nuk, Ndomba Aagaluk nogo nen keele 5 maarak piingge nagaa rik, ambi maarak nogo piingge mbaki, o mi nggwok nuk ari, kibiyan kiik worako mengga kwak oonegen apit age, tut aakumi inamiya negen age,

13 o wiya nggwok omaawi wake logonet mbogom anggen ki kagak nggaru-nggaru nggween paga oone ndu wambit wage menggi kwak, laaluguragan mbogut paga nen nggween paga wambit wage,

14 mbuku pirik-perek eeko mengga kwak mbogut nggoguk ari logonet, pirik-perek arit nage, ndi, puut inom, niyo inikime nggween kup mbanak inom, abok aret wa’nanok ambi me ari nagak eeke, eeke kagarak.

15 Ti eeke kage nagarik, it aakumi nggween paga mendek inendagembogut inom, nagawan-nagawan inom, it aap wim eeka waka’ngget inom, aap ineenggi warak inom, aap inoone omaawi inom, aakumi inayeloman mini inom, aakumi weelek mendek inom,

16-17 abok nen yogo logonet, “Ala anini eeppinaniyak eyom muk panggo yegerak me, nit nineenik logorak meek aret kogo o,” yinuk, inagabiti nen, “Nggeeme nawi?” yinuk, ndoome inom, yugum ambe nggaganak me inom, kumaa’nari nogo nagaarik, “At wone lengganogo yorage menggim eyo paga kwi’ndak wonage Ndomba Aagaluk inom, imbirak inanini nen nit ninoorukwak, puut yi paga inom, yugum nggwok yi paga inom, aan lebenninabu o,” yinuk, puut inom, yugum inom, yogwi iigirak o.

7 Iterali mendek ineebe 144,000 leenogo piyareegerak wone

1 Ti eekwi iige nagarik, o yi irip 4 wonage me nen o wiya ndak-ndak 4 aret warit wundi wage menggerak me, o nggween paga inom, yi nggwok yenggenak laut inom, iri’ngga-kale’ngga inom, o wiya nen abolok eerit nage kero, malayikat ineebe 4 nen panggomborogo wonogwe iigirak.

2 Iige nagarik, wonage me, malayikat alik ambi oonegen wundi wage menggim nen wundi wage logonet, Ala eenik menggerak apuri leenogo piinok, ineraambe yelok iigo logowak nduk, amburu eeppiigak wonok wage nagaarik, nggween inom, niyo nggwok yenggenak laut inom, maluk eerogo puwak nduk, it malayikat ineebe 4 unde eeppiyareegerak nogo, oone

nggwok paga yorage logonet,

3 “Nit ninogoba Ala ayeloman mini leenogo piinok, yelok logowak nduk, amburu inenggaa-wak paga labumbiiga’lek neegak, nggween inom, yi nggwok yenggenak laut inom, iri’ngga-kale’ngga inom, maluk eerogo puurak mage o,”yinuk, yorage mbaki,

4 “It Iterali paga wiganak inanebunu lombok abok ineebe lambuk togon seratus empat puluh empat ribu leenogo piya o,”yinuk, ari naruk konengge nagarik,

5 anebunu Yekura mendek dua belas ribu leenogo piige, anebunu Uruben mendek dua belas ribu leenogo piige, anebunu Nggat mendek dua belas ribu leenogo piige,

6 anebunu Atet mendek dua belas ribu leenogo piige, anebunu Natali mendek dua belas ribu leenogo piige, anebunu Manate mendek dua belas ribu leenogo piige,

7 anebunu Timeyon mendek dua belas ribu leenogo piige, anebunu Lewi mendek dua belas

ribu leenogo piige, anebunu Itakat mendek dua belas ribu leenogo piige,

8 anebunu Tebulon mendek dua belas ribu leenogo piige, anebunu Yutup mendek duabelas ribu leenogo piige, anebunu Mbeniyamin mendek dua belas ribu leenogo piige, eeke logonet, Ala apuri yelok logowak nduk, amburu inenggaawak paga labunogo piinet nagaarak nogo ti, ineebe lambuk togon seratus empat puluh empat ribu aret iigirak o.

Aakumi apit kuwak eerak wonogwe iyareegerak wone

9 Ti eeke kage nagarik, it aakumi inanebunu inalitak lombok inom, inoone alitak inom, inagabolo alitak inom, inenggela’me nen ambitak nggigik kuwak eereegwaarak nogo ti,

ineebe ambik ineenggi lingginiyak abu meek iigirak. It aakumi ti, inambogoyum nggorek yanggwi negen yippunuk eyoongga kalenak yibi-yibit eeko logonet, at wone lengganogo

yorage menggim eyo ndoonak paga kwi’ndak wonage nogo inom, Ndomba Aagaluk nogo inom, imbirak inabu’me mi’na’nuk,

10 inoone nggwok yogo logonet, “Wone lengganogo yorage menggenom kwi’ndak wonage

kat ninogoba Ala nogo inom, Kat Ndomba Aagaluk inom, Kimbirak nen ninagap ndareegutak

me, wa,” yinuk, yorogwe iigak,

11 at wone lengganogo yorage menggim inom, it mbogut paga wonogwe inoweewi ineebe 24 nogo inom, it aakumi nen iigulik mendek ineebe 4 nogo inom, oolo wonogwe iigak, it mala-yikat yendok-wandok aago mi’ndak wonogwe nogo abok aret at wone lengganogo yorage menggim kwi’ndak wonage nogo, abu’me tebe yinuk, Ala alut eeko logonet,

12 “Amin o! Kat ninogoba Ala aret me, Yi aakumi ndi aakumi abok kabu’me tebe yinuk, Ina-lenggen kombakwi, kendage tiyappagagwi, Yi wone ndi wone abok kat keenu o, yinuk,

Yokkugwi, Wa, yogo logonet kayuk wukwi, kalik komaawi ambik mondok kalilaakwi me,

Wi, kugwi, eekwi nogo, Mondok-mondok togop aret eeko logowak o, amin,”yinuk, yogwi iigirak o.

13 Yogo mbaka, it mbogut paga wonogwe inowe ambi nen an yo’nege logonet, “It aakumi inayum yanggwi negen yirik ti, taamini o? Ndi, it nggeeme nen wagaarak mbaken o?”

14 Yo’nege mbaki, “Nogoba o. An neenggo’lek me, kat nen mban yu o,” yoge mbaki, at nen an yo’nege logonet, “Lek o. It aakumi yi, aaninggin-paaninggin mondok alik negen eeppiigwi

iigak, inenggela’me nen wundi wagaarak nogo ineebe yi aret o. It nogo ti, inayum laambu yanggwi negen aruwak nduk, Ndomba Aagaluk amiya nogo paga inayum kookkologog-waarak me,

15 Wone lengganogo yorage menggim Ala enggaanom time logonet, Ko’lu-kii’me Ala awi wurik me ake eekwi iigak, At wone lengganogo yorage menggim eyo ndoonak paga kwi-ndak wonage ninogoba Ala nogo nen maluk inoba age kero, abu’me piirogo wonage

agaarik o.

16-17 Ndi, wone lengganogo yorage menggim oolo lombok menggerak Ndomba Aagaluk

nogo nen ineebe liirogon aret ndegeninake, Ineenik mondok logowak nduk, niyo eneeri abe mili me piya nage, Eerigin me, Mbi abu aganake, niyo abu aganake, mo andi inooke, o aganggen nen ndeyak eerogo piige, Eerigin mondok lek o. It le yogwe iinok, Ala nen aret

inale amburu lek eerogo piyamenggerak logogun o,” yinuk, yo’nege kagarak.

8 Keele maarak wubuk togon piingge kagagerak wone

1 Ti’nuk, Ndomba Aagaluk nogo nen keele age wobok maarak 7 nogo piingge mbaki, mbogut paga time inoone inom, inabolok inom, mondok lek puk wonogwe iigak, setengah jam negen age mbaki,

2 it malayikat ineebe 7 Ala abu’me mi’ndak menggaarak nogo oone nggwok eeka trompet 7 wogorage kagarak.

3 Kage neegak, malayikat alik ambi togolowak mbuti emas paga ogobakkigirik eenggime wonok, Ala ake warogo kani kunggo menggam mi’nari wage mbaki, it Ala apuri ake leenak tamban eekwi inoone yogwi nogo at yoge logonet, kani kunggo menggam mbuti emas paga ogobakkigirik Ala wone lengganogo yorage menggim abu’me wonage nogome, kani kuni ungguwak nduk, obari abe kaga apit toologo wogoge kagarak.

4 Ndi, at malayikat nen kani kungge kagak, ka’luk obari nogo Ala nen obeelom kage, ndi, it Ala apuri ake leenak tamban eekwi inoone Ala unde yogwi iinok, at nen Ala yoge nogo aruk konengge, eeke kagarak o.

5 Nogo eeke kage neegak, obari abe kaga togolowa’na toolak wonagagerak nogo, kani kungge menggim nogome nen kani kunik anggen wagangge nagaarik, togolowa’na nogome mambunuk, mbo nggween paga wuppi wage mbaki, o ngguurubu oone ari, o kimbik pindanggage, eeke kagak, mi nggwok nuk-nuk eeke kagarak.

Trompet oone eekwi koneneegerak wone

6 Ti eeke kage nagarik, it malayikat ineebe 7 inalitak lombok oone nggwok eeka trompet wogoragaarak porogo wonogwe nogo, oone eeruwok nduk, li’luk eekwi iigirak.

7 Oone nggwok eeka trompet porogo wonogwe nogo, ambi aa’nduk arompet oone eeke mbaki, mayu kumulinggen inom, kani inom, amiya inom, nenggelak-kenggelak eerogo

punuk, o nggween paga mbo wuppit wage mbaki, nggween inom, eyo inom, ando mogonogo teppunuk, ando mogonogo sepertiga nogo kani nengge logonet, iri’ngga-kale’ngga ki wonage nogo tigitogon nenet nage kagarak.

8 Malayikat ambi oone nggwok eeka arompet nogo, oone eeke mbaki, ti’nuk, inore ambi nen arompet eeke kagak, puut nggwok ambi kani wunuk agan yi nggwok yenggenak laut nogo paga kwi’nari wangge mbaki, yi nggwok yenggenak ando mogonogo teppege logonet, ando sepertiga nogo amiya eerogo pegerak me,

9 yi mendek ndi mendek niyo inikime nugu menggaarak nogo ando mogonogo teppege logonet, ando sepertiga nogo kambit nogwe, ndi, yiiro nggwok niyo ogombaga nugwi nogo ando mogonogo teppege logonet, ando sepertiga nogo kalenakpugunik arit nage, eeke kagarak.

10 Malayikat mbere oone nggwok eeka inarompet nogo, oone eeko mbaka, ti’nuk, at ambi nen arompet oone eeke kagak, laaluguragan nggwok ambi ndi wunuk ari nogo pogom mbogut paga nen wunuk agan wambi wage nagaarik, niyo nage inom, eneeri wungge menggim inom, abok aret ando mogonogo teppege logonet, ando sepertiga nogo ale eerogo pit nage kagarak.

11 Laaluguragan nogo ti, endage Aleegwi aret me, niyo eneeri-eneeri ando mogonogo sepertiga nogo ale eerogo pit nagaarak me, aakumi nonggo nagaarik, kambit nogwe iigirak o.

12 Malayikat kenagan oone nggwok eeka inarompet nogo, oone eeko mbaka, at ambi nen arompet oone eeke kagak, oonegen eya inom, tut eya inom, laaluguragan eya inom,

Abeenok mogonogo sepertiga nogo, abinak lek eerogo pege kenok, o liingge nogo eya mbuuluk age, ndi, oonikiya kenok, o abu apit age, eeke logowak nduk, oonegen eya inom,

tut eya inom, laaluguragan eya inom, ando mogonogo teppege logonet, ando sepertiga nogo, abinak lek age kagarak.

13 Ti age kage neegak, towe wu negen mbogut paga wuga agan nage logonet, “Malaikat ineebe 4 oone nggwok eeka inarompet nogo, oone muk eekaarak kwe, ineebe 3 perak, eeruwok nduk, abu li’luk eekwi wonogwe me, it aakumi nggween paga mendek ti, inabuwa o, inabuwa o, inabuwa o,” yinuk, oone nggwok paga agan nage naruk konenggirak.

Pasala 9

1 Konengge nagarik, wonage me, malaikat ineebe 4 oone nggwok eeka inarompet nogo oone eeko mbaka, ti’nuk, at ambi nen arompet eeke kagak, laaluguragan ambi mbogut paga nen nggween paga wambi wage kagarak. Wambi wagaarak nogo nen Kambunuk Nogo Me-nggam mbuun ambena ogu kiiniki paga lombok tu paaruwak nduk, kunci wogoge kagarak o.

2 Wogogerak Kambunuk Nogo Menggam mbuun ambe nogo tu paake mbaki, yugum yugu ka’luk yonggo-ndonggo eeke menggi kwak, mbuun ambena nen kaluk alik negen lagi wage logonet, oonegen inom, o oolo ogona ya’i inom, apit eerogo pege kagarak.

3 Kage neegak, kaluk enggela’me nen wurin ambik lagi wogo nagaarik, nggitamuru eyak inooketak andi kogo mengga kwak, wurin nogo nen aakumi ineyak mbaninabit nogwe paga andi yagan wako logowak nduk, inomaawi eeppiige kagarak.

4 Inomaawi eeppiige nagaarik, yorage logonet, “Iri’ngga-kale’ngga inom, igale inom, yi mendek ndi mendek ki wonage nogo abok aret kineyak lelenogo nenet nogo logorak mage o. Ata, it aakumi Ala nen amburu inenggaawak paga labumbiyoolik kenok mban kineyak

mbaninabit nogo logonip o.

5 Ndi, ineebe kambuwak nduk, nibininaburak ti mage o. Ata, we andi yagan wakwi iigak, tut 5 penenuwak nduk, kineyak mbaninabit nogo logonip o,” yinuk, yorage mbaki, nggitamuru

nogo nen ineyak mbaninakaatak andi yagan wako mengga kwak, ndakndak aret ineyak mbaninabit nogwe iigak, andi nen yagan yobak-nggolak warit nogwe iigirak.

6 Ti eyom paga it aakumi andi nen yagan wako logonet, “Nggarurogon kambuwok lak ao,” yinuk, inowe-inawot nen mondok-mondok inooruwak nduk, yoramenggaarak kwe, kambuurak inoba ari woraagin lek me, kangga’lek we ineenik yagan yobak-nggolak mban wako logogun o.

7-9 Ndi, wurin nogo ti, inetenggen aap kokwak kwe, ineeruwak ti, kumi ineeruwak laanak nogo pogom, ndi, ineyak ti, nggeewo singa eyak nogo pogom, wonogwe iigirak.

Ndi, kuda amborowak paga kwi’na’nuk wim namburuwok nduk, li’luk eerogo piigo mengga kwak, it wurin ineebe nogo ti, togop aret li’luk eerogo piige logonet, nggare-nggare mbuti emas paga ogobakkigirik inom, tin mbuti omanggen paga yarak inom, yirippiinok, wim namburuwok nduk, kuda nggweendo paga mbarembunuk, niikkenok wim endok kuni unggwogo logonet, kuda ineebe apit me iniyogobit oonembogu nogwe konenggo mengga kwak, wurin nogo wuga agan nogo logonet, ina’naabit oone ti, togop aret agan nogwe iigirak o.

10 Ineyak ti, nggitamuru ineyak nogo pogom me, ineyak aakumi mbaninakwi iinok, andi nen yagan wakwi iigak, tut 5 penengge kagarak.

11 Ndi, at malayikat Kambunuk Nogo Menggam mbuun ambeme unde menggerak nogo ti, it wurin inowe endagembogut inarum menggerak at aret o. At endage ti, aakumi Iberani inoone paga, “Abaron,” yogwe, ndi, Yunani inoone paga, “Apoliyon,” yogwe, eeko menggaarak. (Ndi, nit ninoone paga ti, “Pup Eerogo Piiga o,” yinuk, yogo monggoorak.)

12 “Inabuwa o, yinuk, ne kenagan paga ari konenggendak nogo ti, ambi wurin nen muk eeke kagandak nogo aret kwe, mbere ti awo eeka’lek me, kenegen logot o,” yinuk, yo’nege

kagarak.

13 Yo’nege mbaki, nenegen wonage me, malayikat ineebe 5 oone nggwok eeka inarompet nogo oone eeko mbaka, ti’nuk, at ambi nen arompet oone eeke mbaki, obari abe kaga kani kunggo menggam mbuti emas paga ogobakkigirik irip-irip ndomba eyak negen 4 to ari Ala abu’me wonage nogome nen oone ambi ari logonet,

14 “Malayikat ineebe 4 niyo nggwok Eparat aa’nggi paga keele maarak wonogwe nogo, mbet piinogo nappiyet o,” yinuk, at malayikat trompet oone eekerak nogo yoge mbaki,

15 it malayikat ineebe 4 nogo nen tahun ti paga, tut ti paga, ne ti paga, oonegen ti paga, mondok ndak-ndak ari nage kenok, aakumi ando mogonogo teppiigo logonet, ando

Sepertiga nogo inoorit nogo logowak nduk, pipuk eerogo piyareegerak nogo aret inoorit nogo logowak nduk, piinogo teppiige kagarak.

16 Kage nagarik, “It aakumi yigin unde kuda inamborowak paga kwi’nogo nagaarik, wim namburi nagaarak nogo ti, ineebe dua ratus juta aret o,” yinuk, ari naruk konenggirak.

17 Ndi, kuda inom, aap ineebe kuda inamborowak paga kwi’ndak wonogwe inom, nabi-nggaanggo kage logonet, iigirak nogo yi o. Inarin nogo ti, kani kunik kere ari, mbogut mili kibu-kibu pege, ndi, yaliingga yi’nip nggwi ari, eeke nogo pogom, inarin etenggen togop aret kagarak. Ndi, kuda inanobak nogo ti, nggeewo singa anobak nogo pogom aret me, kugi lengga ndi wurogo pit nawak nduk, inambeme nen kwi yigirik etenggen yaliingga yi’nip nogo pogom inom, kani omoonuk inom,

18 Inambeme nen wundi wagaarak nogo paga nen, kugilengga ndi wurogo pit nagaarak me, aakumi ando mogonogo teppiige logonet, ando sepertiga nogo kugi andi nen mondok kambit nogwe iigirak.

19 It kuda inage ti, waalo muuru anobak nogo pogom nen aakumi inoorit nogo nagaarak me, inambe inom, inage inom, ti mondok omaawi ambik aret iigirak o.

20 It ando andi nen kambulik teppiigerak ineenik wonogwe nogo nen, “Nit togop aret kambit nogwe niyo, ninagugiwak nogo ti, yi mendek ndi mendek inigen kogwe, ninoone inaruk konenggwi, tu nogwe, eekulik kagak we aanom warogo mbuti emas paga, mbuti perak nogo

paga, mbuti tembaga etenggen kunik negen nogo paga, yugum paga, eyo paga, ogobakkigi-rogo punuk, alut eekwi, kugi inendage tiyappiigwi,

21 aakumi inookwi, magagirak inookwi, kumi ugun wurinakwi, yogoot waganggwi, eeko monggoorak abok aret mbo punuk, niniki koonuwi o,” yinuk, yuurak op aret kwe, mbo

pega’lek iniki kundugu logonet, eerit nogwe iigirak.

10 Mbuku mbuuluk perenak pekkagagerak wone

1 Eekwi nogo iige nagarik, ti’nuk, malayikat alilaakwi ambi, ndugwi nogo ayum negen pirik-perek eerak mbogut paga nen wambi wage kagarak. Anobak paga liware negen nggare-ggare yirik logonet, etenggen ti, oonegen pogom, ndi, iyok ti, eyo yinik paga kani wunuk ari nogo pogom logonet,

2 mbuku mbuuluk pirik-perek eerak ambi eenggime mbigamborogo wonage kagarak. Iyok abe’-nggan niyo nggwok yenggenak laut nogo ogombaga pege, ndi, iyok kwaare’nggan nggween paga pege, eeppunuk logonet,

3 nggeewo singa oone mondok ku ari menggi kwak, oone nggwok ari mbaki, o ngguurubu

ne 7 paga ari naruk konenggirak.

4 O ngguurubu ne 7 paga ari naruk konembunuk, ari nogo liiru mbanikit nduk eeke me, mbogut paga nen oone ambi yo’nege logonet, “O ngguurubu ne 7 paga ari konenggendak

nogo ti, liiru mbanugun o. Ata, kinikime mban kumaapporogo logot o,” yinuk, yo’nege kagarak.

5 Yo’nege mbaki, nenegen neegak, malayikat iyok ambi niyo nggwok yenggenak laut ogombaga pege, ndi, ambi nggween paga pege, eeppunuk, mi’ndak wonage kagarak nogo

nen, Abet aret ari, mbaruwak nduk eenggi abe’nggan mbogut paga nippunuk,

6-7 at mbogut inom, mbogut paga wonogwe inom, nggween inom, nggween paga wonogwe inom, niyo nggwok yenggenak inom, inikime wonogwe inom, abok aret wakkagagerak mondok-mondok itok eenik menggerak nogo endage kungge logonet, “At Ala nen, Kit nagote wone kumaarak nogo ando yokkiragagirak kwe, irip pagaluk ando kumaarak wonage nogo, peebi kineenu arumunggup o, yinuk, at ayeloman mini yorage kagak, yoraga nen yoragagerak

nogo, ambinom kumaapporogo logogin lek o. It malayikat ineebe 6 nen oone nggwok eeka trompet nogo oone muk eekaarak kwe, ambiret

7 nogo ti, awo eeka’lek me, eeke kenok, wone nogo pagak yigin o,” yinuk, ari naruk konenggirak.

8 Naruk konengge nagarik, wonage me, mbogut paga oone ambi yo’nege kagarak nogo nen ambinom yo’nege logonet, “At malayikat iyok peenok nggween paga pege, ndi, peenok niyo nggwok yenggenak laut paga pege, eeppunuk, mi’ndak mbuku mbanak eenggime mbiga-mborogo wonage ti, kola nak o,”

9 Yo’nege mbaki, malayikat nogo owagam nage nagarik, “Mbuku mbuuluk ti, wo’niru o,” yoge mbaki, at nen wo’nege logonet, “Waganogo namen o. Nengge keegak, kambe paga nggiin amburu negen ombat abe kaamenggendak kwe, kaanagale paga perak, alembere agan nage kaamunggun o,” yinuk, yo’nege kagarak.

10 Yo’nege mbaki, mbuku malayikat eenggime wonage nogo waganogo nengge neegak, nambe paga nggiin amburu negen ombat abe kagarak kwe, naanagale paga perak, alembere agan nage kagarak o.

11 Mbuku nogo nengge mbaki, mbogut paga oone yo’nege kagarak nogo nen ambinom yo’nege logonet, “Aakumi inanebunu alitak lombok inom, inagabolo alitak inom, inoone

alitak inom, aap inendagembogut inom, yi aakumi ndi aakumi apit wone yi abok aret, Ndogop arigin, yorage logonu o,” yinuk, yo’nege kagarak.

11 Aap mbere Ala wone yorogwe iinok, inooreegwaarak wone

1 Ti yo’nege kage nagarik, wonage me, wakkagak waanggun negen ogobakkigirik ambi wo’nege logonet, “Ala awi wurik inom, Ala ake warogo kani kunggo menggam inom, wakkage, ndi, aakumi Ala awi wurik me alut eeri unggwogo menggaarak nogo, ineebe

keenggi linggininake, eeri nak o.

2 Eerit nage logonet, Ala awi wurik me oore’nggam endekem nogo wakkaagun o. It aakumi endekem mendek nen o kota abe alik leenak menggim nogome iniyok aambele eerogo pit nogo logonet, Ala awi wurik me oore’nggam endekem time inom aambele eerogo pit nogwe

iigak, tut 42 peneniyak koonak me, wakkoorak mage o.

3 Ndi, it aap ineebe mbere noone yorogo logowak nduk, nappiyaminggirak nogo nen aakumi iniki puru yogo logonet, inayum nibinik maluk mendek yiko mengga kwak yirik logonet, an

noone yorogwe iigak, nogo seribu dua ratus enam puluh yogo logogun o,” yinuk, yo’nege kagarak.

4 Eyo tayitun mbere inom, ndi, ndi wuninogo pegak mbere inom, at yi mendek ndi mendek alom unde ninogoba abu’me menggerak nogo pogom ti, it Ala wone yorogo menggaarak ineebe mbere nogo aret o.

5 It aap mbere ti, inambeme nen kani wunuk agan wundi wage logonet, it inom ogoorak wonogwe nogo inooko menggaarak me, “Aap mbere ti, inooruwi o,” yinuk, inooriyak

nduk eekwi iigak, it inambeme nen kani wunuk agan wundi wage logonet, it inooriyak eekwi ineebe nogo kani wunuk togon nunggwi iigirak o.

6 It aap ineebe mbere nogo ti, iniki koombunuk, “O kibi paga wone yorogo logowam mayu woraagun o,” yinuk, yogwi iinok, mayu waga’lek puk wonage, “Niyo yi, amiya aru o,” yogwi iinok, amiya aret age, ndi, “O nggween paga yime kugi lengga ndi wu’naru o,” yogwi iinok, kugi lengga ndi wu’nage, togop aret eerit nogo logowak nduk, Ala nen unde eeppiige kagarak

o.

7 Kage mbaki, at wone yo’nege nogo nen ambinom yo’nege logonet, “Wone yorogo logowak nduk, nappiyamenggerak nogo age yobok togon yorogo mbaremengga, nggwiya nggwok lombok Kambunuk Nogo Menggam mbuun ambena nen lagi wage logomenggerik, aap ineebe mbere nogo nggugiraanet muguren nage logonet, nibininake kenok, kanggo mbare-mengga,

8 ineebe o kota nggwok inowe eyo karo-karo paga warogo pereegwam tu nggwok yarak nogo paga, pili ogo logowak nduk, mbo piyaagun o. O kota nggwok yogo monggoorak nogo, it

ando wone eegu laarogo yogo logonet, O Torom o, o Metit o, yinuk, yogo menggaarak nogome aret ineebe mbo piinok,

9 it aakumi inanebunu alitak lombok inom, inoone alitak inom, inagabolo alitak inom, yi aakumi ndi aakumi apit nen, Wi! yinuk, pegiya wogwe iigak, nogo kenagan abu yippunuk, o ambi weeremenggerak liingge paga nggween taambiyoorak me, mbo piyaanip,yugun o.

10 Ndi, it aakumi nggween paga wonogwe nogo abok nen, It aap Ala wone yaga mbere yi nen inoone yogo nagaarak paga nit andi-pandi mondok alik negen eeppinanit nugu nagaarak me, Kayik a! Op kangga o, yinuk, inale’nggen mbako logonet laago lakwi, inamendek tumbuttumbut eekkologwe, eerugun o,” yinuk, yo’nege kagarak.

11-12 Kage nagarik, nenegen neegak, nogo kenagan yippunuk, o ambi weegerak liingge paga Ala nen ambebubu aap mbere nogo inikime mambiige mbaki, it apit inigen iigak, ineenik a’nuk, mi’nogo mbaka, mbogut paga nen oone nggwok ari logonet, “Lagi wa’nip o,” yorage mbaki, inaruk konembunuk, “It op kangga o,” yinuk, inale’nggen mbakwi nogo inigen iigak, ndugwi enggela’me mbogut paga laganggwi iinok, aakumi nogo nen, “Ia!” yinuk, iniki ma-nogo logonet, inagabiti ambik ogwe iigirak.

13 Awo pi wogonakwi iigak, mi nggwok nuk-nuk eeke kagak, o kota time aakumi inawi ambik wurik nogo ando teppege, ando sepersepuluh langgu-langgu nage, eeke logonet, aakumi apit ineebe tujuh ribu aret aambeleninake mbaki, it ando teppiigerak nogo inagabiti nen at mbogut paga menggerak Ala nogo mondok tiyappugwi iigirak.

Trompet ambi 7 nogo oone eeke kagagerak wone

14 Iige nagarik, nenegen wonage me, at mbogut paga nen oone ari nogo ambinom yo’nege logonet, “Inabuwa o, yinuk, ne kenagan paga ari konenggendak ti, mbere muk eeke kagandak kwe, ambiret nogo mbetmbet eerikit nduk eeke me, kenegen logot o,” yinuk, yo’nege kagarak.

15 Yo’nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet,

“O nggween paga time aakumi inabu’me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu’me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.

16 Yogo mbaka, nenegen neegak, it mbogut paga wonogwe inoweewi ineebe 24 wone lengganogo yorogo menggam eyo ndoonak paga Ala abu’me kwi’ndak menggaarak nogo

nen inetenggen wanduk Ala abu’me ngginnari nogo nagaarik, alut eeko logonet,

17 “Kat komaawi lombok menggendak aa’nduk wonagagindak, yogondak wonage, ninogoba Ala nogo kat aret o. It aakumi abok inowe kendagembogut logonet, wone lengganogo yorage logokit nduk, unde agagindak nogo, Yogondak yi eyom paga aret eeke logokit nduk, mi’nagandak me, Wa, wa, yokkogo o.

18 Yi aakumi ndi aakumi abok inanini kombako logonet, At ninowe endagembogut logorak

nineebi o, yinuk, agan nogwe nogo, Kanini inoba piige, it kambit nogogwaarak nogo inawone

amburu mbanogo inowak loonogo piige, It kayeloman mini yorage keegak yoraga inom, kapuri kake leenak nogo inom, it kayuk wuko menggaarak inom, inendage lek inendage warak abok aret obeelom eekwi iinok onggo wogorage, Ndi, it o nggween paga time maluk eerogo pugwi nogo pup eerogo piige, Eeriyak eyom abu panggo yi wagaarak me, wa,” yinuk, yogwi iigirak.

19 Yogo mbaka, Ala awi wurik mbogut paga nogome tu paa’nage mbaki, Ala aloobut mbanak wone yoragagerak liiru mbanak yonggolak wonage nogo, kin ari wage kage neegak, o yabok eeke, ngguurubu ari, mi nuk ari, mayu kumulinggen mondok lubu-lubu wangge, eeke kagarak o.

12 Kwe ambi waalo imbirak nen eekwi iyareegerak wone

1 Eeke kage nagarik, mbogut paga time eerubok mendek mondok iya lombok ambi eeke kagarak. Kage logonet, kwe ambi tut eebe paga mi’ndak wonage me, ambogoyum negen ti, oonegen aret yirik, ndi, anobak paga nggarenggare mendaarak enggela’me laaluguragan

12 nabenak wonage kagarak.

2 Kwe nogo, abila wonage me, aagaluk ndariyak nduk enegen paganak andi nen yagan wake logonet, kwa ari kagarak.

3 Kwa ari mbaki, mbogut paga time inagabiti warak mendek alik ambi eeke kagarak. Kage logonet, waalo nggwok tinambe pogom agabolo maa’ngga kunik me, eebe ambit aret kwe, anobak 7, ndi, anobak nogo paga eyak 10, ndi, anobak 7 nogo paga nggare-nggare mendaarak abok aret yirik kagarak.

4 At waalo nogo age paga laaluguragan mbogut paga wonage nogo ando iigak, ando sepertiga nogo pelenogo nggween paga mbo wuppit wage kagarak. Kage nagarik, waalo nggwok nogo nen, “Kwe nogo aagaluk ndake kenok, naakit o,” yinuk, kwe nogo owagam

enaarak wonage kagak,

5 yi aakumi ndi aakumi endekem konenggulik mendek abok aret inarum logonet, mbim obate mbanak ineenggime logonet, inoone omaawi paga yorogo mengga kwak, oone omaawi paga

wone lengganogo yorage logowak nduk, at kwe nogo nen aagaluk aap aret ndake mbaki, elege nogo ndininuk, wone lengganogo yorage menggim at Ala owagam pi lagangge kagarak.

6 Pi lagangge mbaki, agalo nogo, logowam Ala nen ogobakkigirogo pereegim karume aakumi lek me time kole nagaarak wonage me, Ala nen arum wonage kagak, nogo seribu dua ratus enam puluh yit nage kagarak o.

7 Ti eeke kage nagarik, at Mikayen awuri malayikat mendek inom nen at waalo nggwok tinambe pogom nogo, awuri inom mbogut paga time wim nambukwi iigirak.

8 Nambuko logonet, it nen waalo nggwok nogo awuri inom tebenogo piigo nagaarik, “O mbogut paga yime logorak lek o,” yinuk,

9 at waalo nggwok nogo awuri inom mbelenogo nggween paga mbo wuppiya wage kagarak. Wuppiya wage mbaki, waalo nggwok mbo wuppi wagaarak nogo ti, o maan nen yi aakumi ndi aakumi abok aret inambokan lagangge menggerak Ibilit nogo ti, Tile aret me, at awuri

inom abok aret mbogut paga nen mbelenogo nggween paga wuppiya wogwe iigirak o.

10 Mbelenogo wuppiya wogo mbaka, oone nggwok ambi mbogut paga nen ari logonet, “At Ala enggaanom paga ninoreewi Ala apuri ko’lu-kii’me pilit wone inoba piige menggerak nogo, muk wuppi wagaarak me, At Ala omaawi paga Tile tebenogo punuk, apuri inagap ndake, Ninogoba Ala nen it yi aakumi ndi aakumi abok at abu’me piige, Ndi, Kinowe endagembogut yi aret o, yinuk, leenogo pereegerak Keritut nogo, oone mban konenggwi,

Eeke logorak eyom ari waga o.

11 It ninoreewi nogo nen Ndomba Aagaluk amiya wundeegerak abet mba’nuk, iniki ti paga panggombunuk logonet, Ninooriyak op aret o, yinuk, Inagabiti lek Ala wone wonok yoranet nugwi paga Tile tebenogo pugwi me,

12 Kat mbogut inom, kit mbogut paga monggotak inom, kiniki ale’nggen mbako logonip o.

It nggween paga wonogwe nogo inom, niyo nggwok yenggenak laut paga wonogwe nogo

inom, nogo perak, Inenggela’me at Tile wuppi wagaarak nogo nen, An ne mbereeluk logonuk, nenggaawak lek arigin kagi, mba’nuk, Anini nen aakumi lale-pale eerogo piyaakit nduk, wambi nagaarak wonage me, inabuwa o,”yinuk, ari kagarak.

13 Ndi, at waalo nggwok nogo nen, “An nggween paga abu aret mbo wuppani wagaarak kagi,” mbake nagaarik, kwe aagaluk wulaga ndakerak nogo, mugurok nage mbaki,

14 wake kero, o at logowam ogobakkigirogo pereegim karume nogome nawak nduk, Ala nen towe wu a’naabit kokwak, kwe nogo, a’naabit warak eeppege mbaki, wuga agan o nogome namenggerak wonage me, Ala nen arum wonage kagak, tahun kenagan eeppunuk, ambi oolo eeruwak nduk, nage kagarak.

15 Ndi, nage kagak, niyo nen kwe ti wonok nawak nduk, niyo nggwok wu’nuk nage menggi kwak, at waalo nggwok nogo ambeme nen niyo kilirogo aru nggaruk nappegerak kwe,

16 nggween nogo nen kwe nogo yeenggwaage logonet, ambe nggaganogo punuk, niyo kole nage kwak ambeme nen kilirogo nappegerak nogo, nggween ambe nggaganak me time wuppege kagarak.

17 Ti eeke mbaki, at waalo nggwok nogo nen anini agaket ari nagaarik, “Ala nen, Yogop ee’nu ndogop ee’nu, ari menggerak wone liirogon eerit nogwe inom, Yetut nen paganogo yoragagerak wone abet mba’nuk mugurok nogwe inom, kwe nogo aagalogwe ando it aret me, Ninom wim namburi naakit o,” yinuk,

18 niyo nggwok yenggenak laut aa’nggi paga enaa’nari nagaarak wonage kagarak.

13 Nggeewo negen anini warak ambi nen eeke kagagerak wone

1 Ti eeke kage nagarik, nggeewo negen ambi niyo nggwok yenggenak laut inikime nen wundi wage kagarak. At nggeewo negen nogo ti, aruk alom me eyak 10, ndi, anobak 7, wonage kagarak. Ndi, eyak 10 nogo paga nggare-nggare mendaarak abok yirik, ndi, anobak

7 nogo paga Ala endage miyukmeya eerogo pugu liiru mbanak abok wonage kagarak.

2 Ndi, nggeewo pogom anini ambik niyome nen wundi wage kagarak eebe nogo ti, nggeewo harimau negen aret me, iyok ti, yo’nggok beruang iyok pogom, ndi, eyagarin nogo ti, nggeewo singa eyagarin nde eerak nogo pogom wonage kagarak. At waalo nggwok tinambe pogom nogo nen, “An nomaawi paga eerit nage, an wone lengganogo yorage minggim logonet, wone lengganogo yorage, eeke logonok nduk, abok aret kat unde eeppagagi o,” yinuk, yoge kagarak.

3 Kage nagarik, nggeewo anobak ando nogo kagak, anobak ambit nogo wako mbaka, mondok kambuurak nduk eeke kagarak kwe, lek age mbaki, it aakumi nggween paga mendek abok aret, “Wi!” ugo logonet, at mban amugurok nogwe iigirak.

4 Ndi, waalo nggwok nogo nen at nggeewo negen niyome nen wundi wagaarak nogo, awone kiliregerak me, waalo nggwok nogo tiyappunuk, alut eekwi, ndi, nggeewo nogo kunduk alut eeko logonet, “Nggeewo yi kokwak ambi wonogwe mondok lek me, taani nen at inom wim

namburiyak mbakop? Mondok lek aret o,” yinuk, at tiyappugwi, eekwi iigirak.

5 At nggeewo anini warak niyome nen wundi wagaarak nogo tut 42 penengge kagak, wogo-ppake logonet, Ala miyuk-meya eerogo pege, ndi, wone lengganogo yorage, eeke logowak nduk, waalo nggwok nogo nen awone kilirege kagarak.

6 Awone kilirege mbaki, nggeewo nogo nen at Ala eebe inom, at endage inom, at menggim inom, ndi, it mbogut paga menggaarak inom, it abok aret at oone paga miyuk-meya eerogo

piinet nage kagarak.

7 It aap inanebunu alitak lombok inom, inoone alitak inom, inagabolo alitak inom, yi aakumi ndi aakumi abok aret at abu’me tebenogo piinok, at mban mondok tiyanak logowak nduk, waalo nggwok nogo nen awone nggeewo nogo kiliregerak me, at nggeewo nogo nen it Ala apuri ake leenak nogo inom wim nambuke logonet, tebenogo piinet nage kagarak.

8 Ndomba Aagaluk wareegwaarak nogo nen o maan mbogut-nggween yi awo wakkaga’lek kagak, aakumi o nggween paga menggaarak abok aret it inendage mondok-mondok ineenik

aganaburak mbuku paga liiru mbanak wonage lek kenok, at nggeewo nogo alut eekwi iigirak.

9-10 “It keele maarinaburak punik kenok keele maarinakwi, Kambuwak nduk mbuti tege paga inooriyak punik kenok, inookwi, Eeko logogun o, yinuk, yereegerak nogo aret aganabit

nagun me, aganabit nogwe iigak, it Ala apuri ake leenak nogo nen, Yi nonggop ee’ninakwi o? yinuk, iniki lek-lek arugwaarik o. Ata, Obeelom eeppinaniyak yereegerak nogo abet aret eeppinanigin o, yinuk, iniki kwippunuk, inogogumbuk logonet, waganggo logowak o. Inaruk wonage kenok, wone ti, liirogon aret konenggo logowak o,” yinuk, yo’nege kagarak.

Nggeewo negen alik ambi nen eeke kagagerak wone

11 Ti’nuk, peebi nen nggeewo alik ambi nggween enoona nen lagi wage kagarak. Nggeewo nogo ti, aruk alom me eyak mbere ndomba eyak pogom kwe, oone perak, waalo nggwok oone nogo pogom ari kagarak.

12 Nggeewo aa’nduk niyo yenggenak me nen lagi wagaarak awone kiliregerak nogo li’luk eerogo wagangge nagaarik, it aakumi nggween paga wonogwe abok aret yorage logonet, “Kit

nen nggeewo aa’nduk lagi wagaarak anobak ambi wako mbaka, kambuurak nduk eekerak kwe, lek agaarak nogo mban alut eeko logonip o,” yinuk, oone omaawi paga nabek togon

yorage kagarak.

13 Ndi, nggeewo peebi nggween enoona lagi wagaarak nogo nen eerubok mendek iya tit eerit nage logonet, aakumi abok inenggaanom paga kani kunik mbogut paga nen nggween paga wuppi wage kagarak.

14 At nggeewo aa’nduk lagi wagaarak oone kiliregerak paga, eerubok mendek iya tit eerit nage logonet, “Nggeewo negen ambi mbuti tege paga wakaarak kwe, eenik agaarak nogo, ogut wakkagak ambi ogobakkigirogo punuk, at mban alut eeko logonip o,” yinuk, it aakumi

nggween paga wonogwe nogo inambokan lagangge logonet, yorage kagarak.

15 Yorage mbaki, nggeewo aa’nduk lagi wagaarak ogut wakkagak ogobakkigirik nogo oone yuwak nduk, ambebubu inikime pu eerogo mambuurak unde eeppegerak me, pu eerogo mambege mbaki, ogut wakkagak ogobakkigirik nogo oone warak age nagaarik, at alut eeka’lek nogo anini nen inoorit nage kagarak.

16 At nggeewo ti nen it aap inendage warak inom, inendage lek inom, ineenggi warak inom, ineenggi lek inom, weelek mendek inom, aakumi inayeloman inom, abok aret ineenu agak ambi ineenggi abe’nggan paga ilik, inenggaawak paga a, liiru mbanogo piige nagaarik, yorage logonet,

17 “It aakumi ti, an nendage ilik, an nanomor a, ineebe paga liiru mbanak wonogwe lek kenok, inamendek onggo mbanggologwe, ndi, yi mendek ndi mendek kunggwi, eeko logorak mondok mage o,” yinuk, wone lengganogo yorage kagarak.

18 Kage nagarik, at wone yo’nege nogo nen ambinom yo’nege kage logonet, “Wone lengga-nogo yorage kagandak nogo ti, it aap iniki warak nen mban kin kogo logogun o. At nggeewo nogo nen liiru mbanggerak nogo ti, aakumi nen eekwi inanomor liiru mbanak 666 aret me, it

aakumi iniki warak kenok, Yi aret kagi o, yinuk, liippogo logowak o,”yinuk, yo’nege kagarak.

14 Ndawi ngget mendek tiyanggwi iyareegerak wone

1 Yo’nege kage nagarik, wonage me, it aap ineebe apit seratus empat puluh empat ribu nogo Ndomba Aagaluk endage inom, at ogoba endage inom, inalitak lombok inenggaawak paga liiru mbanak Ndomba Aagaluk nogo inom puut Tiyon nogo paga mi’ndak wonogwe nenegen nagiigirak.

2 Nagiige nagarik, niyoraakut oonebu ari, o ngguurubu iya tit ari, eeke nogo pogom, mbogut paga nen nggitat nggwok oone eekwi nogo pogom, oone nggwok ambi ari naruk konenggi-rak.

3 Konengge nagarik, at wone lengganogo yorage menggim menggerak eebe nogo inom, it aakumi nen iigulik mendek ineebe 4 nogo inom, ndi, it mbogut paga wonogwe inoweewi

inom, wonogwe iigak, it ineebe seratus empat puluh empat ribu nogo nen inabu’me wanggeko logonet, ndawi ngget mendek wakwi iigirak. Ndi, ndawi wakwi iigirak nogo ti, it aakumi ugun nen mamumbunuk tiyaniyak abu meek o. Ata, at Ala nen, “It o nggween paga time logorak lek o,” yinuk, aap seratus empat puluh empat ribu inonggo mbaneegerak nogo nen mban tiyaniyak perak op me, tiyanggwi iigirak o.

4 It aap ti, kumi wogonakulik me, kumi inom mondok lambunulik aret menggaarak. Yi mendek ndi mendek aa’nduk mendek Ala ake pogo mengga kwak, aakumi ando iigak, it nogo mban Ala inom, at Ndomba Aagaluk inom, inake leenak logowak nduk, inonggo mbanogo

5 It nogo pilit wone ambi abu yogolik me, maluk ambi inoba mondok lek aret iigirak o. Malayikat ineebe kenagan nen eekwi iyareegerak wone

6 Ti iige nagarik, wonage me, malayikat alik ambi mbogut oolo taati wuga agan nage logonet, “Kit aakumi kinanebunu alitak lombok inom, kinoone alitak inom, kinagabolo alitak inom, yi aakumi ndi aakumi nggween paga monggotak abok aret wone lek ageelik obeelom mondok menggerak wone yokkirage yi, konenggo logonip o,”

7 ari nagaarik, “Mbogut inom, nggween inom, niyo nggwok yenggenak laut inom, niyo eneeri wundit nage menggim inom, at Ala nen mban wakkagagerak me, yogondak Ala nen kinowak loongginaburak eyom abu koorok panggo yegerak me, kinagabiti nen at Ala mban ayuk wuko logonet, at abu’me tebe yinuk, endage tiyappogo logonip o,” yinuk, oone nggwok paga agan nage kagarak.

8 Agan nage mbaki, ore ambi wage logonet, “O kota nggwok Mbaben ti, kwe mbabilu ya wukak pogom me, amburu kumili aganaka nenok, ugunugun eerit nogo mengga kwak, maluk ugun eerit nugwi, iniki nengge kenok maluk ugun eerit nugwi, eeko logonet, Nit eekwi yi, it yi aakumi ndi aakumi inanebunu lombok abok aret ndak-ndak eeko logowak o, yinuk, mamuninako menggaarak me, inawi inom, ineebe inom, abu pup eerogo piigi o. Pup eerogo piigi o,” yinuk, ari naruk konenggirak.

9 It malayikat mbere nogo wone ti, yorogo mbaka, alik ambi wage nagaarik, oone nggwok paga ari logonet, “It aakumi nen nggeewo nogo inom, at ogut wakkagak kugiwak ogobakkigirik nogo inom, inalut eeko logonet, it inapuri yelok logowak nduk, ineenggi paga ilik, inenggaawak paga a, nggeewo endage liiru mbanak wonage kenok,

10 anggur amburu niyo inom toolak lek, at mban toolak nonggo logonet ale ambik kogo mengga kwak, at Ala nen it aakumi ti, inabuwa mbaka’lek anini mondok alik negen inoba piige logonet, kani kunik yugum anggen inom kwippiige mbaremenggi, it Ala ake leenak menggaarak malayikat inom, at Ndomba Aagaluk inom, inigen iigak, Kani omoonuk eyak o. Yugum yuguandi o, yinuk, yagan yobak-nggolak wako logogun o,” yinuk, ari naruk konenggirak.

11 “It aakumi ineenggi paga ilik, inenggaawak paga a, nggeewo endage liiru mbanak logonet, nggeewo inom, at ogut wakkagak ogobakkigirik nogo inom, inalut eeko logomenggaarak nogo, kani kunik yugum anggen inom inoba kwippiyamenggerak ka’luk nogo nggaruk yaga’- lek mondok-mondok inoba wungge kagak, liingge inom, oonikiya inom, tat yonggongga’lek mondok-mondok yagan wako logogun o,” yinuk, ari naruk konenggirak.

12 Ari naruk konengge mbaki, at oone yo’nege nogo nen, “It iniki Yetut oba panggombunuk, oone yugu li’lak eerit nogwe, ndi, Ala nen, Yogop ee’nu ndogop ee’nu, yereegerak wone liirogon mugurok nogwe, eeko menggaarak at apuri ake leenak nogo, andi-pandi inoba piigwi iigak kwe, inogogumbuk logonet, waganggo logowak o,” yinuk, yo’nege kagarak.

13 Ti yo’nege mbaki, ti’nuk, mbogut paga nen wone ambinom yo’nege kage logonet, “Yogondak nen it aap ninowe inom kunik logonet kanggwi nogo, iniki ale’nggen aret mbako logogun o, yinuk, liiru mbanu o,” yo’- nege mbaki, liiru mbangge me, Aberiniki nen, “Abet aret o. It kanggwi iinok, ineenik logonet, ta’liila eeginake kagak yabu eerit nugu nagaarak nogo, Ala nen kobak eerogo pigin lek me, iniki ale’nggen mbako logonet, tat yonggonggologo logogun o,” yinuk, ari naruk konenggirak.

Anggen kole agaarak me, mbangge kagagerak wone

14 Wone ari nogo naruk konengge nagarik, wonage me, aakumi inetenggen pogom ambi nggare-nggare mendaarak mbuti emas mendek anobak paga yirik, ndi, paloowi ena yomonak ngget ambik eenggime porogo logonet, ndugwi abinak lan ari nogo paga kwi’ndak wonage nenegen kagarak.

15 Kage mbaki, ti’nuk, malayikat alik ambi Ala awi wurik me nen wundi wage nagaarik, oone nggwok paga at ndugwi paga kwi’- ndak wonage nogo yoge logonet, “O nggween paga ogu time anggen yugu abu kole agaarak mbaniyak eyom agaarak me, kobaloowi woppunuk, mbet-mbet mbani wambu o,” yinuk,

16 yoge mbaki, at ndugwi paga kwi’ndak wonage nogo nen abaloowi yomonak nogo paga o nggween paga time anggen yugu abu kole agaarak nogo, abok aret mbani wangge kagarak.

17 Wangge mbaki, mbogut paga Ala awi wurik nogome nen malayikat alik ambi wundi wage nagaarik, at kunduk, paloowi yomonak ngget ambik eenggime wonage kagarak.

18 Ti’nuk, malayikat alik ambi Ala ake warogo kani kungge menggerak unde nogo kani kungge menggim nogome nen wundi wage nagaarik, at malayikat obaloowi yomonak ngget ambik aa’nduk eenggime wundi wagaarak nogo, yoge logonet, “O nggween paga ogu time anggur anggen yugu nogo, abu kole agaarak me, kobaloowi ngget ambik ti paga mbanogo yonggoli wambu o,” yinuk,

19 yoge mbaki, at malayikat nogo nen anggur anggen mbanikit nduk obaloowi yomonak nogo nggween paga wuppi wage nagaarik, anggur anggen nogo abok aret mbanogo punuk, kubulogo Ala anini nen aambiranuwak nduk, aambirangge menggim nogome mambege kagarak.

20 Mambege mbaki, anggur anggen amburu aambirangge menggim o kota yagat endekem nogome aambirangge kagak, aakumi inamiya niyo wurik negen yenggenit lagangge logonet, aloboguk ambik kuda anobak ndak-ndak age nagaarik, irip o nda tiga ratus kilometer ndak-ndak ari nage kagarak.

15 Irip paga andi-pandi eeppiige kagagerak wone

1 Ti’nuk, peebi mbogut paga time inagabiti warak mondok iya tam warak negen eeke kage logonet, malayikat ineebe 7 nen irip paga aakumi andi aganabuwak nduk, kugi alom 7 unde wonogwe iigirak. It malayikat 7 yi nen aakumi andi aganabuwak nduk, kugi 7 nogo inoba piya woramenggaarak andi aganabit nogwe iinok, Ala anini mbake nogo lek age logomenggerik, iniki yanggo yigin me, irip paga eeppiyoorak nogo unde wonogwe iigirak.

2 Iige nagarik, yilaa’nggun nggwok yenggenak negen kwe, etenggen pugagi pindan-pindan eeke enggela’me nen kani omoonuk wungge kagarak. Kage nagarik, wonage me, nggeewo aa’nduk lagi wagaarak nogo nen, “Kit an noone waganggwi, an nogut wakkagak ogobakkigirik nogo alut eekwi, ndi, an nendage kinenggaawak paga liiru mbanak nogo wonok nugwi, eeko logonip o,” yinuk, yoragaarak kwe, “Nit kat koone woorak mondok lek o,” yinuk, oone taganogo mbo pogo mbaka, Ala tiyappiigerak nogo nen yilaa’nggun nggwok yenggenak etenggen pugagi pogom nogo aa’nggi paga nggitat nggwok Ala nen wogoragaarak ineenggime porogo mi’- ndak wonogwe iigirak. Iige nagarik, wonage me, nggitat nogo oone eekwi,

3 ndi, Ala ayeloman Muta endawi inom, Ndomba Aagaluk nogo endawi inom, wakwi, eeko logonet, “Komaawi lombok menggendak ninogoba Ala kat aret o. Kat eeke menggendak nogo ti, eerubok mendek mondok iya lombok eeke menggendak o. Yi aakumi ndi aakumi aa’nduk wonogogwaarak, yogondak wonogwe, peebi logogun abok inowe kendagembogut kat aret o. Kat eeke menggendak nogo ti, mondok a’me nggelok abe mban eeke menggendak o.

4 Ninogoba o. It taani nen kayuk wukwi, kendage tiyappagagwi, eeka’lek logogun mbaken? Lek aret o. Kat maluk eekeelik kalik leenak obeelom mban menggendak o. Kat mondok a’me nggelok mban inowak loongge menggendak ineenu me, It aakumi inanebunu lombok abok aret kowagam tebe yi wogo logomenggaarik, kalut eeko logogun o,” yinuk, ndawi wakwi iigirak.

5 Ti wakwi iige nagarik, Ala ninom wonage mbaruwak nduk, Ala awooliya wurik mbogut paga wonage nogo, tu paarak kage nagarik,

6 nogome nen malayikat ineebe 7 nogo nen aakumi andi-pandi eeginaburak kugi alom 7 nogo, wonok wundi wogwe iigirak. It nogo inambogoyum yawenak abu laambu abinak kere’likere’lo aago yirik, ndi, inagabee’le tabak mbuti emas paga ogobakkigirik inobate paga nggerenak wonogwe iigirak.

7 Iige nagarik, nenegen neegak, it aakumi nen iigulik mendek ineebe 4 nogo ambi nen at Ala eenik mondok itok menggerak anini aakumi inoba piyaawak nduk, togolowak mbuti emas paga ogobakkigirik 7 nogome eno korok togon toolak it malayikat ineebe 7 nogo wogorage kagarak.

8 Wogorage mbaki, Ala mondok omaawi ambik me, eebe eya ndelenak- welenak eeke paga nen ka’luk wungge logonet, Ala awi wurik me mondok endak wa’nage mbaki, it malayikat ineebe 7 nogo nen andi aganaburak kugi alom 7 aakumi inoba nappiigwi nogo, worok togon nappiiga’lek iigak, aakumi nen Ala awi wurik me time ungguurak meek aret age kagarak.

16 Ala anini togolowa’na toolak kagagerak wone

1 Ti eeke kage nagarik, Ala awi wurik me nen oone nggwok ambi it malayikat ineebe 7 nogo yorage logonet, “Ala anini togolowak 7 paga toolak ti, wonok, aakumi nggween paga wonogwe ti, inoba kilirogo wuppiya nanip o,” yinuk, yorage konenggirak.

2 Yorage mbaki, at malayikat ambi nen Ala anini arologowa’na toolak nogo, wonok nggween paga kilirogo wuppege mbaki, it aakumi nggeewo endage inenggaawak paga liiru mbanak wonogwe nogo inom, at ogut wakkagak ogobakkigirik alut eekwi nogo inom, abok aret inawin maaluget inoba nik ari mbaki, aakumi nen ogole ambik yogwe iigirak.

3 Malayikat nen Ala anini arologowa’na toolak nogo kilirogo wuppege mbaki, ore ambi nen arologowa’na toolak nogo niyo nggwok yenggenak laut nogo paga kilirogo wuppege mbaki, niyo nogo aakumi inookaatak inamiya negen age logonet, niyo inikime nugu menggaarak nogo mendek abok aret kambit nogwe iigirak.

4 Malayikat mbere nogo nen Ala anini inarologowa’na toolak nogo, abu kilirogo wuppogo mbaka, ambi arologowa’na toolak nogo wonok niyo nage paga inom, eneeri wundit nage paga inom, kilirogo wuppege mbaki, niyo ti abok aret aakumi inamiya pogom age mbaki,

5 at malayikat niyo ti, unde menggerak nogo nen ari logonet, “Aa’nduk wonagagindak yogondak wonage kat nogoba Ala kalik leenak kitok obeelom logonet, a’me nggelok mban eeke menggendak me, It maluk eekaarak onggo kanini inoba piige yi ti, op aret eeke keegi o.

6 It kapuri kake leenak inom, kat yorage keegak yoraga inom, inamiya wunogo inooreegwaarak nogo, Onggo aakumi inamiya yi, niyo negen nonggo logowak nduk, eeppiigendak me, op aret eeken o,” yinuk, yoge kagarak.

7 Yoge mbaki, Ala ake warogo kani kunggo menggam nogome nen oone ari logonet, “Wone ti, abet aret yigi o. Komaawi lombok menggendak ninogoba Ala kat aret o. Aakumi eekwi onggo mondok ndak-ndak a’me nggelok mban eeppiige menggendak me, abet aret yigi o,” yinuk, ari naruk konenggirak.

8 Malayikat ineebe 3 nogo nen Ala anini inarologowa’na toolak nogo kilirogo wuppogo mbaka, ambi nen arologowa’na toolak nogo oonegen paga kilirogo nappegerak. Nappege mbaki, oonegen nogo aganggen ambik age logonet, mo aganggen nen aakumi yaganinabit nage logowak nduk, omaawi eeppege kagarak.

9 Eeppege mbaki, aakumi yaganinabit nage kenok, it nen yogo logonet, “Andi-pandi yogobi eeppinanege me, ninomaluk mbo punuk, Ala endage tiyappogo logowok o,” yinuk, yuurak op aret kwe, kagak, inomaluk iniki kundugu patogo logonet, at andi-pandi eeppiiga unde menggerak Ala nogo endage miyukmeya eerogo pit nogwe iigirak.

10-11 Ndi, it malayikat ineebe 4 nogo nen Ala anini inarologowa’na toolak nogo aakumi inoba kilirogo wuppogo mbaka, ambi nen arologowa’na nogo nggeewo negen wone lengganogo yorage menggim nogome kilirogo wuppege kagarak. Wuppege kage nagarik, nenegen neegak, nggeewo nogo wone lengganogo yorage menggim time o apit age mbaki, at abu’me logonet, oone waga-nggo menggaarak nogo, kugi andi aganake, inawin maaluget inoba nik ari, eeginakerak nogo, andi nen ineyak nggilik maako logonet, “Ninomaluk mbo puwi o,” yinuk, mbo puurak op aret kwe, kagak, inomaluk iniki kundugu patogo logonet, Ala endage miyuk-meya eerogo pugwi iigirak.

12 It malayikat ineebe 5 nogo nen Ala anini inarologowa’na togolowak inalitak lombok kilirogo wuppogo mbaka, ambi nen arologowa’na toolak nogo niyo nggwok endage Eparat paga kilirogo wuppege kagarak. Wuppege mbaki, niyo nogo porok yegerak. Niyo porok yegerak ti paga it aap inendagembogut oonegen wundi wage menggim nen woraawak nduk, inaru koonogo piige kagarak.

13 Kage nagarik, nenegen neegak, waalo nggwok tinambe pogom nogo ambeme inom, nggeewo anini warak niyome nen wundi wagaarak nogo ambeme inom, ndi, aap pilit wone pugunogo yorage menggerak nogo ambeme inom, time nen ogolem pogom kugi maluk lombok ineebe kenagan wundi wogwe iigirak.

14 It inambeme nen wundi wagaarak nogo ti, kugi Tile awuri aret me, At Omaawi Lombok Menggerak Ala mondok iya eeppiyoorak eyom nogo paga it yi aap ndi aap inendagembogut o nggween paga menggaarak abok aret at Ala nogo inom wim namburiyak kuwak eeri woraawak nduk, it ogolem pogom nogo nen yonggo nogo logonet, aakumi abet mbaruwak nduk, eerubok mendek eerit nogwe iigirak.

15 Ti’nuk, at oone yo’nege menggerak nogo nen, ambinom yo’nege logonet, “An aap yogoot wagangga pogom abera’lek me woraagin me, aakumi inenggaanom nggwok paga kinagap mbelanak nogwe kiinok, kinenggali ogwe kiyo, liippogo logonip o. Kinayum abu ndigik-ndegek eerogo patinuk, kinagaket paga wonogwe me, an wage neenok, kiniki ale’nggen eekkinake kaamunggup o,” yinuk, yo’nege kagarak.

16 Ndi, it kugi ogolem pogom nogo nen aap nggween paga inendagembogut abok aret o endage Iberani inoone paga Aramageron nogome aret kuwak eeppiya wogwe iigirak.

17 Malayikat ineebe 6 nogo nen Ala anini inarologowa’na toolak nogo abu kilirogo wuppogo mbaka, ambi nen arologowa’na toolak nogo o oolo yayi kilirogo wuppege mbaki, Ala wone lengganogo yorage menggim Ala awi wurik me nen oone nggwok ambi ari logonet, “Abu age yobok togon aret eeki o,” yinuk, ari kagarak.

18 Ari mbaki, o yabok mondok kunik-kunik eeke, o ngguurubu ari, ndi, maan aakumi wakkagagerak kuli nen, nok, yogondak kuli paga togop eekeelik kwe, o mi mondok alik negen nuk eerit wage logonet, nggween mondok abut laganak- mbaganak eeke, eeke kagarak.

19 Ti eeke kage nagarik, wonage me, o kota nggwok nogo nggween mondok nggoguk ari logonet, kenaga’ndak mogonnage, ndi, yi awi ndi awi nggween paga kota-kota nogo abok aret yigirik-noonom arit nage, eeke kagak, at Ala nen, “O kota nggwok Mbaben nogo perak, at maluk eeke onggo anggur amburu toolak kwak an nanini lombok ombake minggirak toolak nogo, yogondak aret oba kilirogo wuppigi o,” yinuk, kilirogo wuppege kagarak.

20 Wuppege kagak, niyo nggwok yenggenak nggween oolo kup mbanak inom, puut-puut inom, abok aret eenggiiyok lek, lek age kagak,

21 o mayu kumulinggen yo’nggok lombok aaninggin wakkage logonet, 40 kilo negen mbogut paga nen aakumi inoba wuppit wage mbaki, mondok iya tit kambit nogo logonet, “Ala anini nen mayu kumulinggen paga ninooke yi, nineebi a,” yinuk, inanini agaket yogwi iigirak o.

17 Kwe yawukak nen eeke kagagerak wone

1-2 Ti yogwi iige nagarik, wonage me, it malayikat ineebe 7 Ala anini toolak 7 porogo wonagaarak nogo, ambi an nowagam wage nagaarik, yo’nege logonet, “O kota Mbaben niyo kunit wage menggim nogobak-kogobak paga o wurik nogo ti, kwe yawukak lombok pogom me, yi aap ndi aap inendagembogut nen maluk eeppi wogwe, ndi, yi aakumi ndi aakumi nggween paga menggaarak abok aret amburu nenok kumili-kumili negen agan nogo mengga kwak, kwe nogo pekka ungguwok nduk, nili-kili yogwe, eekwi me, at Ala nen kwe nogo maluk onggo oba kwippege kaanok nduk, omok o,” yinuk, yo’nege kagarak.

3 Kage nagarik, wonage me, Aberiniki ninikime lik ari mbaki, malayikat nen wo’neren karume aakumi lek me time pani nagaarak wonage me, nggeewo nggwok anini warak ambi eeruwak maa’ngga kunik, ndi, anobak 7, ndi, aruk alom me eyak 10 wonage nogo, amborowak paga kwe ambi kwi’ndak wonage kagarak. Ala miyuk-meya eerogo pogo logonet, yogo menggaarak abok aret nggeewo eebe nogo paga liiru mbanak kuurik lek aago wonage kagarak.

4 Ndi, kwe nogo ambogoyum maa’ngga kunik inom, maa’ngga amu kunik inom, mondok abe lombok yirik, ndi, mbuti emas inom, yugum etenggen abe inom, kundali inom, nogo paga ogobakkigirik abok aret oba li’luk eekko’- nok, at maluk eerit nage menggerak inom, “Ee’nabuwak,” mbarit nege menggerak inom, abok aret togolowak mbuti emas ogobakkigirik nogo paga niyo toolak kwak eenggime porogo wonage kagarak.

5 “O nggween paga eekulik mendek eerit nugwi, It kumi nen, “Ee’ninabi woraanip o,” yinuk, yogwe, Eeka nogo inagalo o kota nggwok Mbaben an aret o,” yinuk, enggaawak paga endage ti, liiru mbanak wonagaarak. Ndi, endage mbanak wonagaarak nogo ti, eegu laarogo negen mbanak me, aakumi liippuurak meek aret wonagaarak.

6 It Ala apuri ake leenak inom, Yetut eeke nagagerak wone mbo pega’lek mondok mugurok nogo menggaarak ineebe inom, kwe nogo nen inooppiinok, inamiya anggur amburu negen nenok, kumili kunggerak kage nagarik, “Wi!” mbakirak.

7 “Wi!” ari mbaki, at malayikat wo’neren nagaarak nogo nen, an yo’nege logonet, “Kat nonggop nduk, Wi! ari agandik? At kwe nogo inom, at nggeewo nggwok anini warak anobak 7, ndi, eyak 10 nogo amborowak paga kwe nogo kwi’na’nuk, wonok nage kagandak nogo inom, imbirak eeko menggaarak inawone kote kumaarak wonage nogo alom paganogo yokkiri o.

8 Nggeewo nggwok anini warak kagandak nogo ti, aa’nduk wonagagerak kwe, lek age nagagerik, ti’nuk, Kambunuk Nogo Menggam mbuun ambena nen lagi wage kenok, Ala nen enggaawak lek eerogo pege kaamunggun o. Ndi, mbogut-nggween wakkagagerak kuli nen it mondokmondok ineenik aganaburak inendage mbuku paga liiru mbanulik o nggween paga awo kangga’lek ineenik wonogwe nogo nen, nggeewo nggwok aa’nduk wonagagerak kwe, lek agagerak mbareegwaarak mendek kin ari wage inigen kogo logomenggaarik, it kunduk, Wi! mbarugun o.

9 Wone yokkirigin yi nogo ti, it aap iniki warak nen liippogo logowak o, Anobak 7 nogo ti, puut 7 aret me, kwe ti paga kwi’ndak wonage kagandak. Ndi, puut 7 paga kwe kwi’ndakwonage kagandak nogo ti, aap inendagembogut ineebe 7 aret me,

10 ineebe 5 nogo ti, muk inendage lek ogogwaarak kwe, ambi nogo ti, awo mi’ndak wonage, ndi, ambi perak, peebi mi’narigin o. Mi’nage logomenggerik, ne ambit logonuk, endage lek aret arigin o.

11 Ndi, nggeewo nggwok anini warak aa’nduk wonagagerak kwe, lek agagerak nogo ti, it aap inendagembogut ineebe 7 nogo lek ogwe iinok, inobaane’me it nogo mendek at aret me, mi’nage mbaremenggi, Ala nen enggaawak mondok lek eerogo pigin o.

12 Ndi, eyak 10 kagandak nogo ti, it aap inendagembogut ineebe 10 aret kwe, aakumi inarum logowak nduk, awo unde eeppiiga’lek me, at Tile nen aakumi inanebunu alitikalitak nggeewo nogo inom we luulu inarum wonogwe iigak, 1 jam aruwak nduk, unde eeppiyaagin o.

13 Unde eeppiige mbaremenggi, inendagembogut ineebe 10 nogo nen iniki ambit eeppunuk, nggeewo nogo yogo logonet, Kat kendage mban tiyak yuwak nduk, ninawuri ninom yeenggwaagiruwok o, yinuk,

14 Ndomba Aagaluk nogo tebenogo puwok nduk, inom wim nggagambunuk namburit namenggaarak kwe, Ndomba Aagaluk nogo ti, aakumi inoweewi inowe inom, ndi, yi aap ndi aap inendagembogut inowe endagembogut inom, ti, at alik aret me, apuri miirinake nagagerik, yonggo piyareegerak inom liirogon eerit nogwe nogo, inom wunggo logonet, nggeewo awuri inom tebenogo piyaagin o,” yinuk, yo’nege kagarak.

15 Yo’nege nagaarik, ambinom yo’- nege logonet, “Yi niyo ndi niyo kunit wage menggim nogobak-kogobak paga kwe yawukak kwi’ndak wonage kagandak nogo ti, yi aakumi ndi aakumi inanebunu lombok inom, aakumi ugun inom, inagabolo alitak inom, inoone alitak inom, ineebe ti aret iigendak o.

16-17 At Ala nen yereegerak nogo a’me nggelok yuwak nduk, aap inendagembogut ineebe 10 nogo, iniki ambit eeppunuk, awuri inom nen nggeewo nogo yeenggwaago logonet, Ala kooneegerak nogo mban eerit nogo logowak nduk, inikime mambiyareegerak me, it aap inendagembogut ineebe 10 nogo nggeewo inom nen, Kwe yawukak yi, abu nineebi o, yinuk, amindik-amendek li’luk eerak nogo nggoorogo mbo pogo logonet, we agap mbelanak kagak warogo punuk, enggaanggum ando nunggwi, ndi, ando kani kumbugwi, eeruwi o, yinuk, yugun o.

18 Ndi, kwe kagandak nogo ti, o kota nggwok nogo pogom aret me, yi aap ndi aap inendagembogut nggween paga menggaarak nogo abok aret at kwe yawukak nogo abu’me logonet, oone konenggo agaarik o,” yinuk, yo’nege kagarak.

18 O Mbaben pup eerogo pege kagagerak wone

1 Ti yo’nege mbaki, malayikat alik ambi oone mondok omaawi paga yorage logowak nduk unde eeppegerak nogo, at abinak ndelenak-welenak aago nggween paga eya eerit wambi wage kagarak.

2-3 Wambi wage nagaarik, oone mondok omaawi paga ari logonet, “O kota nggwok Mbaben nogo, mondok lek eerogo pigi o. Lek eerogo pigi o. It o kota Mbaben menggaarak nogo ti, kwe yawukak pogom me, Kwe nogo nen iniki nengge kenok, Ee’nabi woraanip o, ari kenok, Yi aap ndi aap inanebunu lombok abok aret, anggur amburu nenok, kumili-kumili agan nugu mengga kwak, ugun-ugun kwe nogo eeppi wogwe,Yi aap ndi aap inoweewi inendagembogut o nggween paga menggaarak abok aret kwe nogo eeri unggwogwe, Ndi, kwe nogo nen aap iniki nengge kenok, eeppi unggwagak eekwi paga It aakumi yi awi ndi awi kunggo menggam unde menggaarak nogo, ineenggi warak eekkologwe, eekwi iinok, O Mbaben nogo pup eerogo pegerak me, Yogondak yi kugi ndi kugi inom, it kambeegwaarak inogoma inom, yi towe ndi towe nen aakumi kanggaatak nunggwi iinok inogole yogo menggaarak inom, Abok aret inawi eekkola unggwaga o,” yinuk, oone nggwok paga ari naruk konenggirak.

4-5 Konengge nagarik, wonage me, mbogut paga nen oone alik ambi ari logonet, “Kit an napuri yi wae. It o kota Mbaben maluk eekwi nogo obaga lu’luk arit mbogut ndak-ndak ari lagangge kenok, At Ala mondok aberak wonage me, kinom maluk eerit nogwe kiinok, It maluk onggo inoba piige logonet, kinom kinoba pinagage kero, o time mbo punuk, kole mbaganggo logonip o.

6 O Mbaben nen kit aakumi eeppinagage nagagerak nogo, yogondak kit nen at onggo ndak-ndak eeppugwi, Ndi, o Mbaben nen kit maluk eerit nogo nogogutak onggo ne ambit paga maluk kinoba pinagareegerak kwe, Yogondak kit nen at maluk eeke onggo ne mbere paga at oba pugwi, Ndi, at kinom ogoorak wonage logonet, anini yi toolak kwak ne ambit kinoba kilirogo pinagareegerak kwe, Yogondak onggo kit kinanini at oba pogo logonet, ne mbere paga kilirogo pugwi, Eeko logonip o.

7 At Mbaben nogo ti, kwe yawukak nogo pogom me, iniki mbake logonet, An kwe togwe wonage nen niniki wakkolage logonet, le yikit lak kwe, aap pe’neya wogo menggaarak ineebe ambik wonogwe me, An kwe nggwok aret kagi, mba’- nuk, niniki ale’nggen ambik mbake agarik o, yinuk, Iniki wogoppake logonet, endage tiyanak paalo aago mban wonage nogo obaane’me ale’- nggen lek age logomenggerik, Iniki puru ari, andi yagan yobaknggolak wake, eeke logowak nduk, aaninggin mondok oba kwippogo logonip o.

8 At eerit nage menggerak awone amburu mbanogo owak loonigin ninogoba Ala nogo ti, omaawi ambik me, At wogoppatit nege onggo ne ambit liingge aaninggin oba age logonet, mbi abu age, andi nen aagalogwe kambit nogwe iinok, iniki wakkolage, eeke logonet, Le ari kagak, eebe waganogo kani kumbugun o,” yinuk, yo’nege kagarak.

9-10 Kage nagarik, wonage me, “It aap inendagembogut yi awi ndi awi o nggween paga menggaarak nen kwe nogo pekka wogo nagaatik, inom aberogon logonet, eeppegak mban eeko nogogwaarak nogo nen, kwe nogo kani andi nen kwa ari inaruk konembunuk, Nit togontogop ee’ninake kero, ninagabiti o, yinuk, tayorogon taati mi’ndak logonet, Kat o kota nggwok abe menggendak Mbaben yi, kabuwa o. Nomaawi ambik neenggi warak me, obeelom mban logokit, mbake keegak, ne ambiriluk 1 jam teppaganuk, wonagaarak kwe, maluk eeke nagandak onggo aaninggin mondok koba kwi’nagaarak me, kabuwa o, yinuk, o kota kwe yawukak nogo pogom aret me, kani nengge ka’luk inigen nakkogo logomenggaarik, iniki wakkologo logonet, aleenggu maako logogun o,” yinuk, yo’nege kagarak.

11 Yo’nege nagaarik, ambi yo’nege logonet, “It aap yi awi ndi awi o nggween paga kunggo menggam unde menggaarak nogo kunduk, o kota Mbaben kwe yawukak pogom kani kumbugwi inigen kogo logomenggaarik, iniki wakkologo logonet,

12 Ninamendek mbuti emas inom, mbuti perak inom, yugum yeebibit inom, kundali inom, yum abe yawenak lombok inom, yum maa’ngga amu kunik inom, yum laambu maa’ngga anggup kunik inom, yum abe mili-mili lombok inom, eyo obari abe ogobakkigirik inom, meelikono inom, yi mendek ndi mendek eyo abe paga ogobakkigirik inom, mbuti tembaga etenggen yaliingga yi’nip kunik nogo paga ogobakkigirik inom, mbuti abe mbuti nogo paga ogobakkigirik inom, yugum moolingget paga ogobakkigirik inom,

13 liboongga inom, kiinde inom, obari abe kaga inom, inagabolo abe kaawak nduk, eyo mur amburu mbenanggwi inom, eyo yibinggami amburu nogo inom, anggur amburu inom, tayitun amburu inom, gandum anggen abe yigirik inom, gandum anggen mbanak inom, tapi-ndomba inom, kuda inom, kuda nikkenok nega nggweendo inom, aakumi ayeloman logowak nduk ineebe kunggologwe inom, aakumi inogut inom, yi mendek ndi mendek anebunu pereegerak abok aret, nit kunggo monggom wonage kwe, ninamendek yi, taani nen kunggola wogo logogun o? yinuk, Ai-ao, yugun o.

14 Yogo logonet, Kwe kat yi, yi mendek ndi mendek abe kigirikwe kenok mban, Name logowak lak ao, mbake nagandak kwe, yogondak kamendek lek agaarak me, peebi ambi kenegen kage logomunggun abu lek o.

15-17 O kota nggwok abe menggendak kat Mbaben yi, kabuwa o. Kambogoyum abe yawenak etenggen maa’ngga amu kunik inom, maa’ngga anggup kunik inom, yirik logonet, mbuti emas inom, yugum yeebibit inom, kundali inom, nogo paga kobaanggi-kobaangge li’luk eekko’nok keegi-wogi aago nege keenok, aakumi nen, O kota nggwok abe aret me, abok eenggi warak aret o, yinuk, yogo menggaarak kwe, ne ambit 1 jam paga aret lek agaarak me, kabuwa o,” yinuk, it yi mendek ndi mendek kunggo menggaarak nogo kunggo logonet, ineenggi warak eekkologo nogogwaarak nogo, kwe andi nen kwa ari inaruk konembunuk, “Nit togon togop ee’ninake kero, ninagabiti o,” yinuk, tayorogon taati ale yogwe, aleenggu maakwi, eekwi iigirak o. Ndi, it yiiro nggwok wonok nega inom, it abok yiiro inikime yonggolak nugu menggaarak inom, nogo logonet yiiro ndegenggo menggaarak inom, ndi, yiiro paga kunggo’net nugu menggaarak inom, abok aret tayorogon taati logonet,

18 kwe yawukak pogom o kota Mbaben nogo kani nengge ka’luk lagangge inigen nakkogo logomenggaarik, “Kota nggwok abe yogobi ambi wonage lek me, yi eekerak ao,” yinuk,

19 wun inanobak paga yumbunogo wuppako logonet,“O kota nggwok abe menggendak yi, kabuwa o. Aakumi inanebunu lombok abok aret inamindik-inamendek yi awi ndi awi nen yiiro paga wonok wogwe iinok, Kunggologo logonet, ineenggi warak eeppiige nagandak kwe, Ne ambit 1 jam paga aret lek agandak me, kabuwa o,” yinuk, ale yogwe, aleenggu maakwi, eekwi iigirak.

20 Eekwi iigak, at oone yo’nege nogo ambinom yo’nege logonet, “Kat mbogut yi, wae. Kale’nggen mbake, Kit Ala apuri ake leenak inom, obeelom wone yoranet nugu nogogutak nappiigak inom, Ala nen yokkirage kagak yoraga inom, Kit abok aret kwe yawukak nogo pogom o Mbaben yi nen eeppinagage nagagerak nogo onggo Ala nen aret eeppege me, kiniki ale’nggen mbakwi, Eeko logonip o,” yinuk, ari naruk konenggirak.

21 Konengge nagarik, nenegen neegak, malayikat alilaakwi ambi wage nagaarik, yugum nggwok gandum yigika nogo pogom waganogo niyo nggwok yenggenak me mbo wuppege logonet, “Nanini paga yugum mbo wuppigirak yi kwak, o Mbaben togop aret yigirik-noonom eerogo pege neenok, o ngga wurik wonagaarak negen kobak aret arigin o.

22-24 Kit o Mbaben monggotak yi, It aakumi inanebunu lombok abok aret iya kinombaruwak nduk, tili paganit nogo logonet, nomoniren nogwe, Ndi it Ala apuri alik leenak inom, Ala nen yorage kagak yoraga inom, nogo inamiya nunggwi, Yi aakumi ndi aakumi nggween paga menggaarak abok aret inoorogo piinok, inamiya nunggwi, Eekwi nogo, Ala nen kiyareegerak me, Mbuti luu’ngget inom, nggawiiwak luu’ngget inom, nggitat inom, oone nggwok eeka trompet inom, O kota time nen oone eerit nogwe konenggo nogotak nogo ambinom konenggwi, Yi aap ndi aap nen yi mendek ndi mendek ineenggi paalo eerogo patit nugwi, Gandum yigiko logonet, inale’- nggen paga inoone agan nugwi, Kwe amili lako logonet, inale’- nggen nen noone-koone yogwe, Eerit nogo logonet, inoone konenggwi, Eekwi nogo abok aret ambinom eerit nogo logogun mondok lek o. Ndi, o kota nggwok me, ndi ambik wunuk agan nage nagaarak nogo yogondak ambiriluk ambi wunuk agan nage kogo logogun mondok lek o,” yinuk, ari naruk konenggirak.

Pasal 19

1 Ti konengge nagarik, wonage me, o mbogut paga time aakumi ambik abu alik negen komaarak inoone nggwok ambugwi yogo mengga kwak yogo logonet, “Kat kalik komaawi ambik ninagap ndaka kendage mondok tiyanak, ninogoba Ala wa.

2 Kwe yawukak mondok iya eerit nage nogo nen, Ee’nabi woraanip o, ari kenok,Yi aap ndi aap abok aret eeppi unggwagak eekwi paga o nggween paga time maluk eerogo pege nagagerak nogo onggo kwe nogo oba kwippege, Ndi, kwe nogo nen kat kayeloman mini inooreegerak inane’me wake, Eekendak me, Kat kalik mondok obeelom iripkunduk eerogo aakumi liirogon inowak loongge logonet, Kwe nogo owak loonogo maluk onggo eeppegendak me, Wa!” yinuk,

3 yogo nagaarik, ambi yogo logonet, “O kota nggwok kwe yawukak pogom nogo, Kani nengge logonet, ka’luk mondok-mondok yarugu-parugu lagangge logogin o,” yinuk, Ne ambi paga, “Wa,” yinuk, yogo mbaka,

4 it mbogut paga wonogwe inoweewi ineebe 24 inom, aakumi nen iigulik mendek ineebe 4 nogo inom, at wone lengganogo yorage menggim Ala time kwi’ndak wonage kagak abu’me tebe yinuk, alut eeko logonet, “Ninogoba wa, wa,” yinuk, “Amin,” yogwi naruk konenggirak.

Ndomba Aagaluk akwe lambumbogo logonet, eeriyak wone

5 Yogwi naruk konengge nagarik, wonage me, wone lengganogo yorage menggim nen oone ambi ari logonet, “Kit Ala ayeloman mini nen at ayuk wuko monggotak kinendage warak inom, kinendage lek inom, abok aret ninogoba Ala mban alut eeko logonip o,” yinuk, ari mbaki,

6 niyoraakut nggwok oonebu ari, o ngguurubu alik negen ari, it yi aakumi ndi aakumi ambik kuwak eerak ambugwi inoone nggwok yogwe, eeko mengga kwak, yogo logonet, “At Omaawi Lombok Menggerak ninogoba Ala nogo, Yi aap ndi aap inowe endagembogut logokit nduk, mi’nagagerak wonage me, Ninogoba Wa, yinuk, alut eeruwok o.

7 At Ndomba Aagaluk nogo akwe lambumbuurak eyom age mbaki, akwe nogo amindik-amendek li’luk eekko’nok wage me, Ninale’nggen nen ndawi lubuk wako logonet, endage tiyappogo logowok o,” yinuk,

8 inoone yogwe iigak, akwe nogo wage mbaki, ayum ambi abu yawenak kikak naka’lek abe laambu yanggwi negen lan aago yikkolawak nduk, wogoge kagarak. Ndi, ayum abe yawenak nogo ti, it Ala apuri ake leenak nen maluk eeka’lek obeelom mban eerit nugwi nogo kwak aret kagarak.

9 Kage mbaki, malayikat nogo nen an yo’nege logonet, “Ndomba Aagaluk akwe lambumbogo logonet, abugo larak inom nawak nduk, yonggo piyareegerak nogo, iniki ale’nggen mbako logowak o,” yinuk, yo’nege nagaarik, ambinom yo’nege logonet, “Wone ti, Ala nen abet aret yegerak me, liiru mbanu o,” yinuk, yo’negerak.

10 Yo’nege mbaki, abu’me tebe yinuk, alut eerikit nduk eeke me, at nen yo’nege logonet, “Togop eeriyak mage o. At Yetut wage nagagerik, Ala ndogop menggerak o, yinuk, paganogo yoragagerak wone koreewi waganggo nogogwaarik, porogo wonogwe nogo inom, kat inom, an kit pogom Ala ayeloman aret me, Ala abu’me tebe yinuk, at mban alut eeke logot o. At Yetut nen paganogo yorage nagagerak wone nogo ti, nitabok Aberiniki nen yo’nirage kagak yorogo monggoorak me nduk, yokkigi o,” yinuk, yo’nege kagarak.

Aap kuda amborowak paga kwi’ndak wagagerak wone

11 Yo’nege kage nagarik, mbogut paga tungga paarak wonage kagak, aap ambi endage Abet Mban Ari, Liirogon Eeke, Eeka nogo, kuda yanggwi negen amborowak paga kwi’- ndak wage kagarak. Wage nagaarik, liirogon inowak loonogo a’me nggelok mban onggo wogorage, wim liirogon aret nambuke, eerit nage kagarak.

12 At enegen ti, kani omoonuk wunuk ari pogom. At anobak paga nggare-nggare mendaarak apit yirik, ndi, at endage toonak eebe paga liiru mbanak wonage nogo, aakumi nen maleniyak meek at mban eenu wonagaarak kwe,

13 “At endage ti, Ala Wone aret o,” yinuk, an yo’nege kagarak. At ambogoyum nggorek paga aakumi inamiya labunik yikko’nok nage kagak,

14 it yigin unde mbogut paga wonogwe nogo abok aret inayum abe yawenak kikak naka’lek abu laambu yanggwi negen yirik logonet, inalitik-inalitak kuda ineeruwak yanggwi negen inamborowak paga kwi’na’nuk, inom nogwe iigirak.

15 Inom nogo logonet, at yi aakumi ndi aakumi inanebunu lombok abok aret tebenogo piyoorak nduk, paloowi ngget ambik ambeme nggelenak wonok nage logonet, tebenogo piinok, mbim obate mbanak ineenggime logonet, inoone omaawi paga yorogo mengga kwak, at oone omaawi paga wone lengganogo yorage kagarak. At omaawi lombok menggerak Ala anini nen aakumi eeppiyoorak nogo ti, anggur amburu aambiranggo mengga kwak aret me, at nogo nen aakumi togop aret aambiranogo piinet nage kagarak.

16 Ndi, at endage nogo ti, Aap Inendagembogut Inowe Endagembogut inom, Aakumi Inoweewi Inowe inom, nogo ti aret me, ambogoyum paga inom, ambulok paga inom, at endage ti, liiru mbanak wonage kagarak.

17-18 Kage nagarik, at malayikat ambi oonegen paga mi’ndak logonet, yi towe ndi towe o oolo yime wuga agan nugu menggaarak nogo yorage logonet, “It aap inendagembogut inom, aap wim eeka inoweewi inom, aap waka’ngget inom, kuda inom, it kuda amborowak paga kwi’na’nuk wim namburi nogo menggaarak inom, aap inendage warak inendage lek inom, aakumi inayeloman mini inom, aakumi weelek mendek inom, yi aakumi ndi aakumi abok aret Ala nen inoorogo punuk, kinake pipuk eerogo pegerak me, Inenggaanggum namunggup nduk, kuwak eeri wogo logonip o,” yinuk, yorage kagarak o.

19 Yorage mbaki, nggeewo anini warak nogo inom, aakumi inoweewi inendagembogut inom, inawuri yigin unde inom, nen at kuda amborowak paga kwi’ndak wonage nogo awuri inom wim namburuwok nduk, kuwak eeppunuk, inom perenggolaawok nduk eekwi iigirak.

20 Ti eekwi iigak kwe, at nggeewo anini warak aa’nduk lagi wagaarak eebe nogo inom, ndi, it aakumi inenggaawak paga nggeewo aa’nduk lagi wagaarak endage liiru mbanak wonok nugwi, at ogut eerak nogo alut eekwi, eeruwak nduk, awone kilirik paga inagabiti warak mendek eerit nage logonet, inambokan lagangge menggerak nggeewo peebi lagi wagaarak eebe nogo inom, imbirak ineenik ngge-ngge pigogo kani omoonuk wunuk mban ari menggim nogome nappiige kagarak.

21 Nappiige kage nagarik, at kuda amborowak paga kwi’ndak paloowi ambeme nggelenak nogo paga inawuri ando nogo inoorogo piinet nagembaki, yi towe ndi towe abok wogo nagaarik, aakumi inoorak nogo inenggaanggum inaanoma’le nggaruk yogorak nonggo nagaarik, kumunuk ndan agan nogwe iigirak.

20 Tahun seribu paga eeko logorak wone

1 Ti’nuk, malayikat ambi Kambunuk Nogo Menggam mbuun ambena tu paariyak nduk, kunci inom, mbutigeele nggwok inom, eenggime wonok, mbogut paga nen wambi wage kagarak.

2 Wambi wage nagaarik, at waalo nggwok tinambe negen o maan togon aakumi inambokan lagangge menggerak Tile ti, Ibilit aret me, at pigogo mbutigeele nogo paga maappunuk, tahun seribu logowak nduk,

3 mbuun ambena wuppege logonet, “O peebi ne ambiriluk piinogo teppagarak kwe, yogondak aakumi inambokan lagangga’- lek tahun seribu paga keele maarak yime aret logot o,” yinuk, mbo wuppunuk, tu kunci narogo pege kagarak.

4 Pege mbaki, wone lengganogo yorogo menggam eyo ndoonogo pit nagaarak nogo kage nagarik, it ti paga kwi’ndak wonogwe nogo aakumi inowak loonggo logowak nduk, unde eeppiige kagarak. Ti kage nagarik, it Ala wone mugurok nogo logonet, Yetut wone paganogo yoragagerak nogo abet mba’nuk, yoranet nogwe iigak, inenggaanok mbanogo piyareegwaarak inogoma nogo iigirak. It ti nen, “At nggeewo aa’nduk lagi wagaarak eebe inom, ogut ogobakkigirik nogo inom, nit alut eerugun lek o. Ndi, nggeewo endage nogo ti, nit ninenggaawak paga inom, nineenggi paga inom, ti kunduk, liiru mbanogo puurak lek mban o,” yinuk, yogwi iinok, inenggaanok mbanogo piyareegwaarak inogoma nogo ineenik a’nuk Keritut inom tiyanak logonet, wone lengganogo yorogwe iigak, tahun seribu aret age kagarak.

5 Aa’nduk ineenik agago mippiyoorak nogo it aret o. Ndi, it ando kambeegwaarak nogo perak, tahun seribu eeppunuk, ineenik agago mippiyoorak nduk wonogwe iigirak.

6 It inaa’nduk ineenik agago mippiyamenggerak nogo, maluk eeka’lek Ala ake leenak logonet, iniki ale’- nggen nggwok aret logogun o. It aa’nduk muk kambeegwaarak me, peebi kambugun lek o. It ti, Ala unde a’nuk, Keritut Ala imbirak inake eerit nugwi, ndi, Keritut inom tiyanak logonet, wone lengganogo yorogwe, eekwi iigak, tahun seribu aret age kagarak.

Tile kani omoonu’me nappuurak wone

7-8 Ti kage nagarik, tahun seribu eeppunuk, yi aakumi ndi aakumi inanebunu lombok o Magok inom, o Nggok inom, irip-irip time abok aret kuwak eeppunuk, wim eeriyak inikime nggaganogo mambiinet nege logowak nduk, Tile keele maarak mbuun ambena wonage nogo piinogo nippi wage kagarak. Piinogo nippi wage mbaki, aakumi inikime nggaganogo manabit nage kenok, aakumi mbini-kale’ngga pogom togop aret kuwak eekwi iigirak.

9 Iige nagarik, o kobak nonggologo pereegim time aakumi mbini negen togop aret kuwak eeppunuk, it abet mbareegwaarak Ala apuri nogo inookwi, ndi, o kota Ala inikilom mbake menggim nogo lek eerogo pugwi, eeruwok nduk, oo’nggut panggeko mbaka, kani mbogut paga nen wunuk agan wambi wage logonet, aakumi nogo tigitogon nenet nage kagarak.

10 Ndi, at aakumi inambokan lagangga Tile nogo, pigogo kani omoonuk wunuk mban ari menggim at nggeewo anini warak aa’nduk lagi wagaarak inom, at ore peebi lagi wagaarak pilit wone agan nege nagaarak nogo inom, imbirak wonogwe me nogome mbo nappege mbaki, liingge-kiyoma kani eyakandi nen mondok-mondok yagan yobak-nggolak wakwi iigirak.

Age yobok paga inowak looniyak wone

11 Ti eekwi iige nagarik, wone lengganogo yorage menggim eyo nggwok ndoonak yanggwi lombok lan ari nogo paga aap ambi kwi’- nage kagarak. Awo kwi’nage kagak, mbogut-nggween eenggi-iyok lek, lek age mbaki, ti’nuk, peebi obaane’me ari wage koolik mondok-mondok lek aret age kagarak.

12-13 Lek age mbaki, it aap inendage lek inendage warak kambeegwaarak inom, it niyo nen ndonggoninabeegerak niyo yenggenak laut inikime wonogwe inom, kambit nogogwaarak kambunuk nogo menggam wonogwe nogo inom, abok aret, wone lengganogo yorage menggim eyo nggwok ogobakkigirik yanggwi lombok lan ari nogo paga aap ambi kwi’- ndak wonage nogo, owagam mi’nari wogo mbaka, at eyo ndoonak paga kwi’ndak wonage nogo nen it inalitik- inalitak eeko nogogwaarak inom, aakumi mondok-mondok ineenik aganaburak inendage inom, mbuku alitak paga mbanak wonage me, imbirak waganogo piingge nagaarik, it kangga’lek ineenik logonet eeko nogogwaarak liiru mbanak nogo pekkagak inowak loonogo onggo ndakndak eeppiige kagarak.

14-15 Ti eeke kage nagarik, it ando ineenik aganaburak mbuku nogo paga inendage mbanak lek kenok, kani omoonu’me nappiige logonet, kanggo menggaarak alom inom, kambunuk nogo menggam inom, abok aret waganogo kani omoonuk wunuk mban ari menggim nogome mbo nappiige kagarak o. “Ne mbere kambuurak o,” yinuk, liiru mbanak nogo ti, ambi, we ineenik logonuk, laalu kanggwi, ndi, ambi, kani omoonu’me mondok-mondok nappiige, eeriyak ti nduk aret liiru mbanak o.

21 Mbogut-nggween ngget ogobakkigirik kagagerak wone

1 Ti eeke kage nagarik, wonage me, mbogut-nggween aa’nduk wakkagagerak nogo inom, yi nggwok yenggenak laut nogo inom, lek age kagak, obaane’me mbogut-nggween ngget ogobakkigirik nogo ari wage kagarak.

2 Kage nagarik, kwe ambi ogonggelo kolaakit nduk, amindik-amendek li’luk eekko’nok wage menggi kwak, o kota abu alik leenak Yerutalem ngget ogobakkigirik nogo, Ala wonage me mbogut paga nen wambi wage kagarak.

3 Wambi wage mbaki, wone lengganogo yorage menggim time nen oone nggwok ambi ari logonet, “Ala at apuri inenggela’me logowam nogome logokit nduk, eebe wambi wage ti, kaanip o. At eebe nogo apuri inom logonet, it nen, Kat ninogoba Ala aret o, yinuk, yogwi, ndi, at nen, Kit an napuri aret o, yinuk, yorage, eeko logogun o.

4 Mbogutnggween aa’nduk ogobakkigirik nogo paga logonet, iniki aaninggin kogo nogogwaarak nogo, lek agaarak me, ngget ogobakkigirik nogo paga inogoba Ala inom logonet, inale amburu mbanogo piyamenggerak me, kanggwi, tabun ndoombunuk le yogwe, iniki wakkologwe, andi kogwe, eeko logogun abu lek o,” yinuk, ari naruk konenggirak.

5 Ari naruk konembunuk, wonage me, at wone lengganogo yorage menggim eyo ndoonak paga kwi’ndak wonage nogo nen an yo’nege logonet, “Wone yi, liirogon karuk konengge logot o. An nen yi mendek ndi mendek abok aret ngget ogobakkigirogo pege yi, abet aret a’me nggelok yigin me, liiru mbanu o.”

6 Yo’nege nagaarik, ambinom yo’- nege logonet, “O maan aa’nduk togon wonagagirak alom Alpa inom, ndi, irip paga mondok logorakOmega inom, ti an aret me, yokkigirak nogo ti, muk eeke me nduk yokkigi o. It aakumi niyo abu eeginake kenok, an nen niyo ineenik aganake menggerak eneeri wungge me nen onggo lek we aret toologo wogorage logogin o.

7 It an noone mbo pega’- lek inogogumbuk logonet, liirogon mugurok nogwe iinok, ineyate wogorogo mengga kwak, eeginaburak wone karuk konenggendak nogo eeginake logominggirik, an inogoba Ala aret age, ndi, it an napuri aret ogwe, eeko logogun kwe,

8 it Ala wone mugurok noorak inagabiti mbaka inom, abet mbariyak ineebi mbaka inom, maluk peyak wurik kagak ugun eerit nega inom, aakumi inooka inom, kumi ugun wurinaka inom, magagirak iyagalo inom, kugiwak amili kungga inom, pilit pugungga inom, it abok aret it logowam pipuk eerogo pereegim kani omoonuk wunuk mban ari menggim nogome mbo nappiyaagin o. Aa’nduk ineenik logonuk, kambemenggaarak kwe, kani omoonu’me nappiyoorak nogo ti, peebi ne ambi kanggwi nogo kokwak aret o,” yinuk, yo’nege kagarak.

O Yerutalem ngget ogobakkigirik kagagerak wone

9 Yo’nege mbaki, malayikat ineebe 7 nogo nen aakumi andi aganaburak kugi alom 7 togolowa’na toolak porogo wonagaarak nogo, ambi nen nowagam wage nagaarik, yo’nege logonet, “Ndomba Aagaluk akwe kolegerak kolaga nogo, kenegen kaanok nduk, mok o.”

10 Yo’nege nagaarik, Aberiniki ninikime lik ari mbaki, neebe wo’neren puut nggwok tiyarogon nogo paga pani lagangge nagaarik, o kota abu alik leenak Yerutalem ngget ogobakkigirik Ala wonage me mbogut paga nen wambi wage, “Ti ket o,” yinuk, yo’negerak.

11 Yo’nege mbaki, yugum onggo nggwok pugagi pogom endage yatipit nogo mendek pindan-pindan eeke menggi kwak, o kota ngget ogobakkigirik pindanpindan eeke ti, Ala tiyanak logonet, eya ndelenak-welenak aago menggerak nogo nen aret eeke kagarak.

12 Ndi, o wa’nagat wurik ti, mondok iya tiyarogon wurik me, tu pak mbanak 12, ndi, tu pak mbanak unde nogo ti, it malayikat ineebe 12 mban wonogwe iigirak. Ndi, tungga eebe paga aakumi Iterali inanebunu 12 nogo inendage liiru mbanak wonage kagarak.

13 O wa’nagat wurik oonegen lagi wage menggim pa’nggwe tu pak kenagan mbanak, ndi, oonegen kilu yi nage menggim pa’nggwe tu pak kenagan mbanak, ndi, o ame kwi’nari nage menggim pa’nggwe tu pak kenagan mbanak, ndi, o omarip paga kwi’nari wambi wage menggim pa’nggwe nogo ti, tu pak kenagan mbanak mban wonage kagarak.

14 O wa’nagat wurik ogowa pugu yugum 12 wonage nogo paga at Ndomba Aagaluk awuri nappiigak mendek ineebe 12 inendage mbanak wonage kagarak.

15 Ndi, at wone yo’negerak nogo nen o kota inom, tu pak mbanak nogo inom, o wa’nagat wurik inom, wakkaakit nduk, wakkagak mbuti emas paga ogobakkigirik eenggime wonage kagarak.

16 Nenegen neegak, at nogo nen o kota nogo wakkagak nogo paga wakkage logonet, irip agi-ogu inom, aru-ogwe inom, o eyak kirin nippugu inom, ti dua ribu dua ratus kilometer negen wakkagak wurik kagarak.

17 At malayikat nogo nen o kota wurik wakkage nagaarik, ti’nuk, o wa’nagat eebe wurik ambe mban wakkage mbaki, at wakkagak nogo paga wakkagagerak nogo ti, nit aakumi wakkogo monggo kwak meter 65 paga wakkagak wurik aret kagarak.

18 O wa’nagat nogo ti, yugum yatipitnogo paga wurik, ndi, o kota nogo ti, mbuti emas at mendek paga mban pugagi abu kin lombok pogom nogo paga wurik kagarak.

19 O kota nogo, yi yugum ndi yugum abe kigirikwe kenok mban obaga lu’luk eerak ogowa pugu kagarak. Yugum tabak woneemaluk abena ndoonak ti, yugum yatipit. Ndi, yugum yatipit obaga pugu nogo ti, yugum nilan, ndi, yugum nilan obaga pugu nogo ti, yugum mira, ndi, yugum mira obaga pugu nogo ti, yugum tamurut,

20 ndi, yugum tamurut obaga pugu nogo ti, yugum unam, ndi, yugum unam obaga pugu nogo ti, yugum taririt, ndi, yugum taririt obaga pugu nogo ti, yugum era’na tembaka, ndi, yugum era’na tembaka obaga pugu nogo ti, yugum mberin, ndi, yugum mberin obaga pugu nogo ti, yugum kiritolit, ndi, yugum kiritolit obaga pugu nogo ti, yugum kiritoparat, ndi, yugum kiritoparat obaga pugu nogo ti, yugum latuwariri, ndi, yugum latuwariri obaga pugu irip paga nogo ti, yugum ketubun, yugum etenggen abe kigirikwe paga mban ta’mban-mban aago wurik kagarak.

21 Tungga eebe 12 nogo ti, yugum kundali negen ambit tabak paga mban alitik-alitak ogobakkigirik kagarak. Ndi, o kota oolo tu yarak ti, mbuti emas at mendek mban pugagi abu kin lombok pogom ndoonak kagarak kwe,

22 at Omaawi Lombok Menggerak ninogoba Ala inom, at Ndomba Aagaluk inom, Ala awi wurik negen ineebe inenggela’me inom aret wonogwe me, it aakumi Ala ninom wonage mbaruwak nduk, awi wurik nogo lek aret kagarak.

23 At Ala abu tiyanak eebe eya ndelenak-welenak eeke nogo paga o kota ti, eya eeke, ndi, ndi wuninik pogom ti, Ndomba Aagaluk nen aret eya eeke, eekwi me, it aakumi nen, “Oonegen inom, tut inom, eya aruwak lak ao,” yinuk, yaga’lek aret iigirak.

24 Yi aakumi ndi aakumi inanebunu lombok abok aret o eya ti paga nugwi, ndi, yi aap ndi aap inendagembogut nggween paga menggaarak abok aret o eya ti paga logowok nduk, inamindik-inamendek mbelenggo’nok unggwi nogwe, eekwi iigirak o.

25 O kota time o kiip age, o weege, eeka’lek mondok-mondok liingge mban wonage me, tu mondokmondok paarak aret wonage kagarak.

26 Yi aakumi ndi aakumi inanebunu lombok abok aret inendage abu obeelom tiyanak logonet, inamindik- inamendek mbelenggo’nok, o kota time logowok nduk, unggwi nogwe iigirak.

27 Ndi, it maluk inikime porogo wonogwe, maluk peyak wurik kagak ugun eerit nugwi, pilit pugunggwi, eeko menggaarak nogo kenok perak, unggwi nogwe iyoolik o. Ata, it aakumi ineenik mondok-mondok aganaburak inendage mbuku paga liiru mbanak Ndomba Aagaluk porogo wonage kenok mban unggwi nogwe iigirak o.

22 Niyo ineenik aganaka nage kagagerak wone

1-2 Ti kage nagarik wonage me, malayikat nogo nen, an yo’nege logonet, “Niyo aakumi ineenik aganaka eneeri mili lombok mbini kin nogo, Ndomba Aagaluk Ala imbirak wone lengganogo yorogo menggam abu’me nen, kilak togon wungge nagaarik, o kota tu yarak eraaninu nage ti, kenegen pekket o,” yinuk, yo’nege mbaki, pekkage me, niyo nggwok nage nogo aa’nggi yibagan-enebagan eyo aakumi ineenik aganake menggerak awi yarak me, tut ambi penengge paga ne ambit paga anggen yi’nage, tut ambi penengge paga ne ambit paga anggen yi’nage, togoparet eerit tahun ambit eerak paga ne 12 paga aret anggen yi’nage kagarak. Ndi, eyoongga nogo ti, yi aakumi ndi aakumi andi aganake kero, obeelom aganaka inake aret wonage kagarak.

3 Yi mendek ndi mendek pulunogo pereegerak maluk wonage nogo tigitogon obeelom eerogo pegerak me, o nogo ti, obeelom mban aret wonage kagarak. Ndi, at Ala inom, Ndomba Aagaluk inom, imbirak it wone lengganogo yorogo menggam eyo ndoonak o oolo taati wonage kagak, at Ala ayeloman mini abok aret at owagam ninggippunuk logonet, at mban alut eekwi iigirak.

4 At mban alut eeko logonet, etenggen liippugwi iigak, at endage inenggaawak paga liiru mbanak wonage kagarak o.

5 Time o kiip age, o weege, eeka’lek o liingge mban wonage kagak, it aakumi nen Ala eya paga nugu logogun me, nugu logonet, “O eya aruwak nduk, oonegen wundi wage, ndi, ndi wuninggwi, eeruwak lak ao,” mbaka’lek it aap inendagembogut negen logonet, mondok-mondok wone lengganogo yorogo logogun o.

Yetut woroorak wone

6 Ti’nuk, at wone yo’nege nogo nen ambinom yo’nege logonet, “At Aberiniki nogo it aap Ala yorage kagak yoraga inikime logonet yorage kagak, aakumi yorogo logowak nduk, nappi wagagerak ninogoba Ala nogo nen logonuk lek mbet-mbet eeriyak wone nogo, at ayeloman mini ineenu aruwak nduk, ayonggo nage menggerak malayikat ambi nappi wagaarak. Nappi wagaarak nogo nen wone yokkegerak nogo abok aret, Yi abet aret, yo’negerak me a’me nggelok yigin, mbake logot o.

7 An mbet-mbet woraagin o, yinuk, yegerak me yokkigi o. Ndi, peebi eeriyak wone an yokkege neegak, liiru mbanggendak nogo, it aakumi liippunuk, mugurok nogwe iinok, iniki ale’nggen aret kogo logogun o,” yinuk, yo’nege kagarak.

8 Wone agan wagaarak naruk konengge, eerit wagaarak nenegen kage, eekirak nogo ti, an Yaya aret me, naruk konengge, nenegen kage, eeke nagarik, at peebi eeriyak wone yo’negerak malayikat nogo alut eerikit nduk, abu’me tebe ari mbaki,

9 at nen an yo’nege logonet, “Togop eerugun o. It koreewi Ala nen yorage kagak yoraga inom, it wone liiru mbanggendak liippunuk mugurok nogo logomenggaarak nogo inom, kat inom, an kit pogom Ala ayeloman aret me, Ala mban alut eeke logot o,” yinuk, yo’negerak.

10 Yo’nege nagaarik, “Peebi eeriyak wone yokkege neegak liiru mbanggendak nogo, eeriyak abu aret panggo yi wagaarak me, wone ti, kumaapporogo logorak mage o. Ata, yi aap ndi aap yoranet nege logot o.

11 Yoranet nege keegak kwe, it maluk eeko logorak mbakwi kenok, maluk aret eekwi, ndi, eeriyak lek mendek kagak ugun-ugun eerit nogo logorak mbakwi kenok, ugun aret eerit nogwe, ndi, it ando maluk eeka’lek obeelom mban eeko logorak mbakwi kenok, obeelom mban eerit nogwe, ndi, it ando kikak naka’lek Ala ake mban leenak logorak mbakwi kenok, Ala ake leenak wonogwe, eekkologo logowak o,” yinuk, yo’nege kagarak.

12-13 Yo’nege kage nagarik, at Yetut nen, “O maan aa’nduk togon wonagagirak alom Alpa inom, peebi irip paga mondok logorak Omega inom, ti an mban aret me, an logonuk lek mbet-mbet wage logominggirik, yi aap ndi aap eeko logomenggaarak paga onggo wogoroorak mbakirak nogo inalitik-inalitak ndak-ndak wogora woraagin me, liippogo logowak o,” yinuk, yo’nege kagarak.

14 Yo’nege kage nagarik, “It inambogoyum laambu kookkologo me-nggaarak nogo, Eyo ineenik aganaka anggen nunggwi, ndi, o kota tu paarak mban wonage yime nowagam unggwi wogwe, eeko logonip o, yinuk, yorage neenok, iniki ale’nggen mbakak o kota unggwi nogwe iigak kwe,

15 it nggeewo pogom eeko menggaarak inom, magagirak iyagalo inom, yawukak mbabilu inom, aap inooka inom, kugi eeka inom, ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga’lek yagat endekem logogun o.

16 Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo’negerak.

17 Yo’nege mbaki, malayikat nogo nen ambi yo’nege logonet, “It aakumi niyo abu aganake kenok, niyo ineenik aganaka nogo mendek onggo lek we aret tookkola woraawak nduk, Aberiniki inom, Ndomba Aagaluk akwe nogo inom, imbirak nen, Wa’nip o, yinuk, muk yorogo agaarik o. Ndi, it wone yi, konembunuk abet mbakwi iinok, Na wa’nip o, yinuk, wiirogo logowak nduk, yoret o,” yinuk, yo’nege kagarak.

Irip paga yoge kagagerak wone

18 Ti yo’nege nagaarik, ambinom yo’nege logonet, “Peebi eeriyak wone yokkege neegak liiru mbanggendak nogo, aakumi konembunuk, wone alik ambi inom nabenogo pugwi iinok, andi-pandi aganaburak kugi alom 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o.

19 Ndi, at Ala nen, Ineenik aganaka anggen nunggwi, o kota obeelom alik leenak nogome unggwi nogwe, eeko logorak o, yinuk, yereegerak mbuku yi paga liiru mbanak wonage kwe, peebi eeriyak wone yokkege neegak liiru mbanggendak yi, aakumi nen konembunuk, ando waganggo logonet, Ando ti woorak lek o, yinuk, mbo pugwi iinok, at Ala nen it aap ti, anggen nogo nunggwi, ndi, o kota nogome unggwi nogwe, eerugun lek, Kit endekem aret logonip o, yinuk, yoraagin.

20 Kat keenu a’nok nduk, wone yi, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone ti, abu aret yokkigi o,” yinuk, yo’nege kagarak. Yo’nege mbaki, an nen, “Noweeluk Yetut mbet-mbet woraawak lak ao,” yinuk, “Amin,” yagarak.

21 Kit kinowe Yetut nogo iniki kunik en obeelom eeppinagage logonet, kinarum aret logogin o. Amin.

@@@@@@@@@@@@@@@@@@@@@@@@@@@@@@@@@@@@@@@@@@

Mbuku wakkagagerak kuli nen nok wayu kuli, malenit wage, Blog yi paga mbanogo mambege, Bulan Januari tgl 1 mulai eeregirak kuli nen nok Hari selasa september tgl 7 2010 Jam 5:00 selesai baca eeki o.

Nogoba Kaliku Ala kat kawone kinikime nen wunabi wagagindak mbuku paga mbanak wonage nogo, mamunirit wagandak me, kalut eeke logonet, ne ambinom wa lombok yokege. tiyappagage, eeki o. Nogoba Ala wa!

YURAT

Yurat Wone Mbuku Yurat yi, eebe mbanak pekkaga’lek logonet, aa’nduk pekkoorak nogo yi o.

Mbuku Yurat mbanak yi, it aap wone alik mendek mamuninabit nugwi, inoone amburu paga, “Lek o. Nit Ala apuri aret me, nit eekwi ndak-ndak ee’nip o,” yinuk, yorogwe, eekwi iinok, inoone konembunuk mugurok nookwak, liirogon tum wako logowak nduk, yoragagerak.

Ndi, mbuku kuwagaluk Yurat nen liiru mbaneegerak yi, mbuku 2 Peterut liiru mbangge logonet yereegerak nogo ndak-ndak, it mbuku yi, lunggo logonet, iniki abet mbareegwaarak nogo mbo pukwak, liirogon porogo logonet eeko logowak nduk, yoragagerak.

---------------------

YURAT YURAT NEN LIIRU MBANEEGERAK WONE

1 Kit ninogoba Ala nen yonggo pinagareegerak kinom kunik Yetut Keritut kinarum wonage nogo, an Yakobut ore Yetut Keritut ayeloman Yurat nogo nen aret keyage wappinagi o.

2 At Ala kinabuwa nen obeelom eeppinagage, kiniki ugun tayenak ale’- nggen logobagip nduk, eeppinagage, iniki kunik eekkinake, eeke menggerak nogo ti, kulinik-kalinik eeppinagagak mban eeke logowak o.

Pilit pugunogo yorogo menggaarak wone

3-4 Noreewi o. Kit an niniki kunik me, wone ambi yokkira o. Kit ugun kineenggo’lek kiigak, it aap ando kinenggela’me unggwi wogo nagaarik, Ala iniki kunik en obeelom eeppinanege menggerak wone nogo, abut laganogo, “Ala iniki kunik ee’ninake menggerak me, nit maluk eekwi niinok, maluk ninoba pinanigin lek o,” yinuk, iniki liirak lek iniki nengge kenok ugun-ugun eerit nogo logonet, at Aliku ninowe Yetut Keritut nogo ti, “Nit ninowe lek o,” yinuk, yogo menggaarak. Togop me, Ala nen it maluk eekwi onggo muk inoba piyoorak nduk, punogo piyareegerak wonage kagak, we ugun kobak logonet, agan nugwi me, nit ninagap ndareegerak wone ndak-ndak waganeegurak nogo, amburu mbanogo liiru mbanggiraakit mbakirak kwe, it togop agan nugwi iinok, abet mbakwi wone ambit at Ala nen o maan nit at apuri ake leenak mondok-mondok unde eeppinaneegerak wone nogo, taganogo mbo pugwi kiyo, “Yi Ala wone aret me, taganiyak lek o,” yinuk, mondok kinogogumbuk logonet, pipporogo logobagip nduk, liiru yi, mbanggiragi o.

5 Ninogoba Ala nen maan it at apuri Iterali mendek o Metit nen inagap ndarogo wumbiya wage nagagerik, ti’nuk, it ando abet mbaka’lek iinok, Ala nen inooke logonet, lek eerogo piyareegerak wone nogo ti, kit muk kinaruk koneneegutak kwe, aberak logobagip nduk, ambinom yokkiragi o.

6 Ndi, at Ala nen it malayikat ando, “Yogop eeko logonip o,” yinuk, o unde eeppiyareegerak kagak, “O yi mban unde logorak nineebi o,” yinuk, mbo pogo mbareegwa, at Ala nen, “An mondok iya tit eeke neyoorak nogo eyom paga inawone amburu mbanogo maluk eekwi onggo inoba piyaakit o,” yinuk, ineebe mondok-mondok mbutigeele paga maarogo o apit me mambiyareegerak wonogwe nogo, kiniki abeko logonip o.

7 Ndi, it malayikat eeppiyareegerak nogo pogom, it aakumi o Torom inom, o Nggomora inom, yi kota ndi kota enaagan-ambokan wonogwe nogo inom, nen nggeewo negen kumi ugun wurinabit nogwe, iniki aganggen eeginake kenok eekulik mendek kagak ugun-ugun eeginabit nogwe, eeko mbareegwa, “It aakumi maluk eekwi iinok, Ala nen kani omoonu’me mondok- mondok nappiyaagin kogo o,” yinuk, nineenu ogo logowok nduk, kani paga inooreegerak nogo o.

8 It aap kinenggela’me ugun unggwi wagaarak nogo ti, aakumi o Torom inom, Nggomora inom, eeko nogogwaarak nogo ndak-ndak eerit nogo logonet, “Nabinggaanggo paga yogop eeriyak op aret kagarak o,” yinuk, iniki aganggen eeginake kenok, eekulik mendek kagak ugun-ugun eeginabit nogwe, Ala wone konenggo logorak, “Nineebi o,” yinuk, taganogo mbo pugwi, ndi, it inayuk warak mbogut paga menggaarak malayikat nogo kunduk, miyuk-meya eerogo piigwi, eerit nogo menggaarak.

9 Muta kangge mbareegi, at yonggo mbogut paga nugu menggaarak inowe Mikayen Tile imbirak, “Eebe an koloorak kat koloorak,” nili-kili yogo logonet, at Mikayen nen, “Kat abu maluk lombok me, kambu o,” yinuk, Tile yoriyak op aret kwe, agabiti nen, “Nogoba nen mban mbekkirigin o,” yinuk, yoreegerak kwe,

10 it aap kinenggela’me unggwi wagaarak wonogwe ti perak, wone alom liirogon ineenggo’lek kagak miyukmeya eerogo pogo logonet, nggeewo iniki lek ugun eerit nogo mengga kwak, it togop aret iniki aganggen eeginake kenok eerit nogwe nogo mban ineenu logonet eerit nogwe me, ineebe aret lek eerogo patit nogo agaarik o.

11 It nogo nen at Kayin eereegerak nogo ndak-ndak eerit nogwe, aap Mbileyam maluk eereegerak nogo kokwak, it togon iniki lek negen wu koloorak mban iniki lunik logonet mugurok nogwe, ndi, aap Kora awuri inom Muta wone taganogo mbo pogo mbareegwa, Ala nen lek eerogo piyareegerak nogo pogom, it ndak-ndak ineebe lek eerogo piyaawak nduk, eekkologwe, eerit nogwe me, inabuwa o.

12 Niniki-kiniki kunik paga mbi nawok nduk, kuwak eekwi me, it aap ti, inageerok abe mendek ko’nok wa’- nuk, it ando abu iigak, inagabiti mbaka’lek inalik mban nonggo menggaarak me, yum abu laambu kwe, oololuk mili eerak menggi kwak logonet, eeko menggaarak o. Mayu ndugwi paga luurik lek me, ndugwi o wiya nen wonok nage, eyoonggen abe yuwak nduk, awi yakaatak kwe, anggen abe yega’lek kanenep age kenok, kinogo pegaatak me, mondok mbuk age,

13 niyo kilaarak-mogonik eeke logonet, eyak-nggoyak eerogo nippit wage menggi kwak, it aap ti, eekulik mendek kagak togop aret ugunugun eerit nugwi, ndi, laaluguragan inobaane’me lombok wonogwe iigak, ambiret ambi nggigik togon, pinda agan lek ari nage menggi kwak, eerit nugwi, eeko menggaarak me, at Ala nen o apit aago me mondok-mondok logowak nduk, inake ogobakkigirogo piyareegerak wonage agaarik o.

14-15 Aram ombowologwe ambo’- me-ambo’me nda’narit wundi wogo logonet, 7 nda’nagagerak Enok nogo, Ala nen at yoge kagak aakumi yorage logonet, “It aakumi Ala wone woorak, Nineebi o, yinuk, Ala miyukmeya eerogo pugwi, oone taganogo punuk, iniki liirak lek maluk ugun eerit nugwi, eekwi nogo ninowe nen inowak loonogo maluk onggo inoba piyaakit nduk, at awuri ake leenak malayikat nogo ineebe ambik lombok aago at inom wogwe iigirak o,” yinuk, yoragagerak nogo ti, it aap kinenggela’me agan nugwi nogo, aret eeppiyoorak nduk, yoragagerak o.

16 It aap ti nen ineebi-ineeba yogwe, inoreewi meek inombakwi, eeriyak iniki nengge kenok eerit nugwi, “An aap nggwok o,” yinuk, wogoppatit nugwi, inamendek kolaawok nduk, inoone amburu ndik-ndik agan nugwi, eeko menggaarak o.

Aberak logonet, eeko logorak wone

17 Togop kwe, noreewi o. Kit an niniki kunik wonogwe me, wone ambi yokkira o. At ninowe Yetut Keritut nen nappiigak mendek agago mippiyareegerak nogo nen wone aa’nduk yokkirogo nogogwaarak nogo abeko logonip o.

18 It nogo nen kit yokkirogo logonet, “O age yobok paga it aakumi iniki liirak lek nogo nen iniki nengge kenok mban eerit nogo logonet, kit miyuk-meya eerogo pinagarak nogo kin ari woraagun o,” yinuk, yokkirogo nogogwaarak nogo, abeko logonip o.

19 It aap ti, Aberiniki inikime lek me, nggween paga mendek mban iniki nengge kenok mugurok nogo logonet, Ala apuri ogoorogo piinet nogo menggaarak it aret.

20-21 Togop kwe, noreewi niniki kunik kit perak, kit kiniki kole aruwak nduk, wone abu alik leenak kit abet mbareegutak wone nogo mban eerit nogo logonip o. Ninowe Yetut Keritut ninabuwa nen mondok-mondok nineenik eeppinaniyak nogo, eeppinanuwak nduk, tokkogo logonet, Ala iniki kunik eekkinake nogo eeppinagagak mban eeke kogo logomunggup nduk, Aberiniki yokkirage kagak tamban eeko logonip o.

22 It ando iniki yungguppegak eeko menggaarak nogo inabuwa mbako logonet, yanggorogon yorogwe, 23 it ando nen kani omoonu’me nogwe me, kinagabiti mbaka’lek inagap ndarogo piya wogwe, ndi, it ando perak, iniki nengge mugurok nogo logonet, mbogoyum laambu abe me mili mondok nabek yi unggwage menggi kwak maluk eekwi ti, ogole warak me, ninom lambunggologwe niyo, “Ninagabiti o,” mbakwi kwe, kagak, inabuwa mbako logonet yorogwe, eeko logonip o.

Irip paga keyage wappiyareegerak wone

24-25 Ninowe Yetut Keritut eereegerak paga ninagap ndareegerak at Ala nogo nen nit abet mbareegurak nogo mbo punuk, alik eerit nogwe niyo, ninarum liirogon logomenggerik, “Kit wone ambi kinoba wonage lek abu obeelom aret me, nowagam mi’nari woraanip o,” yinuk, yo’nirage mbaremenggi, nit niniki ale’nggen mbakak at mondok tiyanak menggerak enggaanom mi’- nari nawok nduk, wo’niren pinani nagin aret me, yi aakumi ndi aakumi aa’nduk nda’nogogwaarak inom, yogondak ndarak inom, peebi nda’- nariyak inom, nit abok ninogoba ambit ninagap ndaka kat aret me, kat aap nggwok kendagembogut komaawi ambik yi aakumi ndi aakumi abok kabu’me logonet, kat koone mban konenggwi, kat kendage mban tiyappagagwi, eeko logowak o. Amin.

3 YAYA

Mbuku 3 Yaya yi, eebe mbanak pekkaga’lek logonet, aa’nduk pekkoorak nogo yi o.

Mbuku 3 Yaya yi, at Ala apuri kuwak eekwi inarum menggerak nogo nen Ala apuri inenggela’me tiyanak menggerak ambi endage Nggayut nogo pekkaawak nduk, liiru mbaneegerak.

At Nggayut nen it aakumi Ala apuri ando yeenggwaarage nagagerak kenok, keyage wake logonet, tiyappege, ndi, ambi, aap endage Ndemeteriyut obaabut eerit nage nogo liippege, eeke logowak nduk, at Nggayut ake liiru yi mbaneegerak.

------

YAYA NEN LIIRU MBERE MBAMBUNUK, AMBI MBANEEGERAK WONE

1 1 Noreeluk Nggayut wae. “Ala ndogop menggerak o,” yinuk, wone nimbirak waganeegurak paga kat niniki kunik me, an Ala apuri inarum logokit nduk, mippaneegerak nogo nen wone ambi yokkiri o.

2 Noreeluk o. Kat an niniki kunik me, kat Ala wone liirogon mugurok nage logonet, kiniki abe koonogo patit nage menggendak nogo kwak, keebe andi lek obeelom aret logonet, yi mendek ndi mendek eeke menggendak nogo obeelom mban age kage logonok nduk, kake tamban eeke minggirak o.

3 “Ala ndogop menggerak o,” yinuk, wone nogo woppunuk, eerit nage menggendak nogo, noreewi ando neya wogo nagaarik, “Nogo ndak-ndak aret eerit nage agaarik o,” yinuk, mbininogo yo’niri wogo mbaka, an niniki ale’nggen ambik aret mbakirak o. 4 Yi mendek ndi mendek eerit nage nogo ti, nale’nggen mbuuluk mbake minggirak kwe, an napuri nogo nen, “Ala ndogop menggerak o,” yinuk, wone woppunuk, mondok ndak-ndak eerit nogwe naruk konengge kenok perak, niniki ale’- nggen nggwok lombok mbake minggirak o.

Ala apuri yeenggwa-yeenggwa eeko logorak wone

5 Noreeluk o. Kat an niniki kunik me, wone ambi yokkiri o. Kat kulinik- kalinik ninoreewi Ala apuri nogo obeelom eeppiige logonet, ninoreewi ando nggiru wogwe iigak kwe, abu iya tit eeppiige nogo paga, “Wa!” lombok yokkigi o.

6 It nogo nen Ala apuri yime kuwak eeko menggaarak inenggaanom mbininggo logonet, “Aap Nggayut iniki kunik ee’ninake logonet, ndogop eeppinanege menggerak o,” yinuk, yo’niragaarak me, aap togoti mendek ambi keya wogwe iinok, Ala inikilom kombaruwak nduk, inamendek ambi lek kenok, wogorage logomenggendik, nappiyoorak ti op aret o.

7 It aap ti, Keritut wone yoranet nawok nduk, nogo logonet, “It aap abet mbaka’lek inamendek woorak nineebi o,” yinuk yagaarak me, kat yeenggwaaragak yuurak ti, op aret nduk, yokkigi o, noreeluk.

8 It aap Ala ndogop menggerak wone nogo nggwok wiganit nage logowak nduk, eerit nogwe nogo nen, “Ninom ndakndak yoranet nogwe o,” yinuk, ninombaruwak nduk, yeenggwaarogo logorak ti op aret o.

Ndiyoterepet, Ndemeteriyut imbirak eereegwaarak wone

9 Ala apuri time kuwak eeko menggaarak nogo, inake liiru mbuuluk ambi mbanogo nappi wagarak kwe, aap Ndiyoterepet nogo nen, “Inenggela’me an mban tiyanak logokit o,” yinuk, inikilom mbake menggerak me, noone woolik o.

10 Togop me, nit eerulik kagak oone abu maluk ninoba pinaneegerak me, an wage logominggirik, at yereegerak nogo liirogon mbininogo yokkege neyaamunggun o. Oone maluk ti mban ninoba punuk, puk age ti lek o. Ata, ninoreewi wogwe iinok, ineebe wogonaka’lek logonet, it wogonaburak mbakwi nogo, “Wogonaburak lek o,” yinuk, inenggela’me nen wumbiige menggerak me, liirogon yokkege neyaamunggun o.

11 Noreeluk niniki kunik yi wae! It maluk eeko menggaarak nogo katndak-ndak eeke logogun o. Ata, it aap obeelom eeko menggaarak nogo ndak-ndak mban eerit nage logot o. Aap ambi obeelom eeke menggerak kenok ti, Ala nen ndareegerak aret mbariyak kwe, at maluk mban eeke menggerak nogo nen perak, Ala mondok liippega’lek aret menggerak o.

12 Aap Ndemeteriyut nogo, “Ala ndogop menggerak o,” yinuk, wone yugu nogo liippunuk, ndak-ndak eerit nage kenok, Ala inom, it aakumi abok aret inom, nen, “Aap ti, abu obeelom aret o,” yinuk, yogo menggaarak. Ndi, nit pilit lek, abet aret yogo monggoorak kat keenu me, nit kunduk, aap ti, iya tit eeke kogo monggoorak me, yokkogo o.

Irip paga keyage wappereegerak wone

13 An wone ambik yokkiriyak mbakirak kwe, liiru mbanggiriyak anggon ee’nake me,

14 an mbet-mbet keya wage logominggirik, nimbirak ninengga kunna’nuk, wone li’lak mbaniyak uugwe mbake agarik o.

15 Ala karum wonage me, kiniki ugun tayenak ale’nggen aret logomunggun o. Koreewi ninom wonogwe nogo nen keyage wappagaga o. Ndi, an noreewi kinom wonogwe nogo ti, “Kinendage kunogombo mban keyage wappinagagi,” yegerak, yoret o. Abu aret yokkigi o. Noreeluk wa!

2 YAYA

Mbuku 2 Yaya yi, eebe mbanak pekkaga’lek logonet, aa’nduk pekkoorak nogo yi o.

At Ala apuri inarum menggerak nogo nen kwe Ala miireegerak nogo aagalogwe inom inake liiru yi mbaneegerak. Ndi, “kwe at aagalogwe inom” wone liiru mbanak ti, it Ala apuri kuwak eeko nogogwaarak at inarum menggerak inom inake liiru mbaneegerak mbako ogoorik o.

Liiru kuwagaluk mbanogo nappereegerak yi nogo it wone yi lunggo logonet, wone alom mbere eeko logowak nduk yoragagerak. Ambi, it aakumi ando iniki kunik aganako logowak nduk yorage, ndi, ambi, it aap wone maluk mendek mamuninaka nogo nen, it iniki ugun koombunuk mamuninakwi iyo, liippogo logowak nduk yorage, eereegerak nogo liiru mbanak wonage o.

--------

YAYA NEN LIIRU AMBI MBAMBUNUK, AMBO’ME MBANEEGERAK WONE

1 1 Ala nen miikkabeegerak niriluk kat kaagalogwe kinom an Ala apuri inarum logokit nduk, mippaneegerak nogo nen, kit abet aret niniki kunik eekkinake minggirak me, wone ambi yokkira o. An nen mban niniki kunik eekkinake ti lek o. Ata, it aakumi nen Ala ndogop menggerak wone waganeegwaarak nogo abok ninom nen niniki kunik eekkinako o.

2 Ala ndogop menggerak wone waganeegurak ninikime wonage nogo ti, mondok-mondok logogin aret me,

3 nit, “Ala ndogop menggerak,” wone nogo woppunuk, mugurok nogo logonet, ninoreewi ninom niniki-kiniki kunik eerit nogwe niigak, ninogoba Ala at aput Yetut Keritut imbirak iniki kunik en wo’nirogwe, ninabuwa nen obeelom eeppinanugwi, niniki ugun tayenak ale’nggen logowok nduk, eeppinanugwi, eeko logowak o.

Keritut wone mamunik eeko logorak wone

4 At ninogoba Ala nen, “Yogop ee’- nip o,” yo’niragagerak nogo kat kaagalogwe ando kinom ndak-ndak eerit nogwe konengge nagarik, an niniki abu ale’nggen mbakirak o.

5 Ndi, niriluk o. Yogondak ambi eeke logonok nduk, yokkiri. “Ninikikiniki kunik eeko logonip o,” yinuk, yokkege yi nogo ti, wone ngget mendek lek o. O maan aa’nduk togon konenggo nogogutak nogo aret yokkigi o.

6 Niniki-kiniki kunik eeko logorak nogo ti, Ala wone yugu ndak-ndak eeko logorak ti aret. Niniki-kiniki kunik eerit nogo logorak wone ti, maan aa’nduk togon yo’niragagerak koneneegutak nogo aret yokkiragi o.

7 It aap ando nen, “Yetut Keritut ti, aap kwak nggween paga yime nda’- narulik o,” yinuk, aakumi inambo’- me laganuwok nduk yoranet nogo menggaarak mendek yi o ndi o ineebe ambik aret wonogwe o. It aap ti, Pilit Keritut negen logonet, pilit-pilit aret aakumi inambo’me laganggo menggaarak me, 8 nit nen yokkirogogurak waganeegutak nogo, kobak eerogo mbo pugwi kiinok, obeelom eekwi paga Ala nen onggo ndak-ndak wokkiroorak mbareegerak nogo, lek eerogo patukwak, kiniki liirogon tum wakkologo logonip o.

9 Aap ambi Keritut wone mamunniragagerak nogo mban ari lek at iniki koombunuk, alik inom nabenogo yoranet nage kenok, at Ala imbirak kunik logonet ari lek o. Ndi, Keritut wone mamunniragagerak nogo ndakndak eeke kenok perak, ninogoba Ala aput imbirak inom kunik aret logonet ari mbaruwok o.

10 Aap ambi wone yi mendek lek alik mendek wonok yokkira wage kenok, keyage warogo kiname mambuurak mage o.

11 Keyage warogo kiname mambugwi kiinok, at omaluk kit kinom ndak-ndak aret nabenggolaamunggup o.

Irip paga keyage wappiyareegerak wone

12 An wone ambik yokkiroorak nduk wonage kwe, liiru mbanggiroorak anggon ee’nake me, kiya wage logominggirik, ninom ninengga kunna’- nuk, ninale’nggen paga wone li’lak aret mbaniyak uugwe mbake agarik o.

13 Koweeluk Ala miireegerak aagalogwe nogo ninom nen keyage wakkinako o. Wa!

1 YAYA

Mbuku 1 Yaya yi, eebe mbanak pekkaga’lek logonet, aa’nduk pekkoorak nogo yi o.

Mbuku Yaya nen liiru aa’nduk mbaneegerak yi, alom mbere wonage. Ambi, Ala apuri mbuku yi lunggo logonet, Ala inom, at aput Yetut Keritut inom, iniki kunik eeko logonet, iniki ambit eeppunuk, logowak nduk yorage, ndi, ambi yorage logonet, it Ala apuri nen Yetut Keritut iniki kunik logonet, eerit nogwe nogo mbo punuk, wone alik mendek mugurok nogwe iyo, liirogon tum wako logowak nduk, yorage, eereegerak nogo liiru mbanak wonage.

“Wone maluk mendek mamunggirogwe ti, abe wone mamunggirogwe lek o. Ata, aakumi nggween paga iniki koombunuk nen agan nugwi nogo mendek iniki oba panggombunuk eerit nugwi iinok, anggen maluk mendek aret yege menggerak me, wone ti mendek mamunggirogwe iinok, mugurok noorak mage o. It aakumi nggween paga mendek inobaabut maluk logonet eerit nugwi ti mendek nit Ala apuri nen mugurok nogwe niinok, Yetut mugurok noorak meek aret o,” yinuk, yoragagerak.

It aap wone maluk mendek mamuninabit nugwi nogo nen wone ti mendek mamuninako logonet, “Kit kinagap ndakkinake nogo ti, Ala nen kinagap ndakkinabuwak o, yinuk, yogwe, Aakumi kiniki kunik aganaburak o, yinuk, yogwe, eekwi nogo ti lek o. Ata, kit kinagap ndakkinaburak nogo ti, o nggween paga yime logonet, Yi eeri, ilik, Yi eeri a? yinuk, kiniki aaninggin nen eerit nugwi nogo lek age logonet, kinale’nggen mbakwi ti paga kinagap ndarak aret mbako logonip o,” yinuk, mamuninako nogogwaarak. Wone maluk mendek mamunirogwe nogo ti, mugurok nogwe iyo, at Yaya liiru mbangge logonet. “Yetut Keritut aakumi pogom abet aret age nagagerik, ninagap ndareegerak o,” yinuk, kin paga yorage, ndi, “Nit aakumi abok aret niniki Yetut oba panggombunuk mugurok nogo logonet at Yetut niniki kunik eekwi, aakumi alik niniki kunik eeginakwi, eeko logowok o,” yinuk, yorage, eereegerak nogo liiru mbanak wonage o.

--------------

AT YAYA NEN LIIRU AA’NDUK MBANEEGERAK WONE

1 At Wone nen nineenik ee’ninake menggerak wone

1 Mbogut-nggween yi, awo wakkaga’lek kagak aa’nduk togon wonagagerak aakumi ineenik eeginake menggerak at Wone nogo, abok paganogo yokkirogo ogoorik o. At oone ninaruk konenggwi, eebe ninigen abe nen kogwe, eerit nage nogo liippugwi, eereegurak eebe lombok nogo aret nineenggi pigaganeegurak o.

2 Ndi, eebe nineenggi pigaganeegurak nogo kin age mbareegi, ninigen kogogurak nogo aret paganogo yokkirogwe, ndi, nit mondok-mondok nineenik logowok nduk, ee’ninake menggerak ninogoba imbirak wonagagerak eebe nineenu aruwok nduk, kin agagerak nogo, “Yi aret o,” yinuk, yokkirogwe, eeko ogoorik o.

3 Nit ninogoba Ala aput Yetut Keritut imbirak ninom kunik wonogwe me, kit kunduk, ninom niniki ambit kunik logowok nduk, ninigen kogwe, ninaruk konenggwi, eereegurak nogo aret yokkirogo ogoorik o.

4 Ndi, paganogo yokkirogwe yi nogo abok aret, nit niniki ale’nggen mondok nggwok aruwak nduk, liiru yi, mbanggirogo ogoorik o.

At Ala o eya kwak aret menggerak wone

5 “At Ala ti, o eya kwak menggerak me, at inikime o apit aago kwak wonage abu lek o,” yinuk, at Wone nogo nen yo’niragagerak ninaruk konembunuk, yokkirogwe nogo ti aret.

6 Togop me, nit o apit paga nugu logonet, “An Ala nimbirak kunik wonage o,” yogwe kwe, Ala ari menggerak wone ndak-ndak eeka’lek logonet yogwe me, pilit aret pugunggo monggoorak.

7 Togop kwe, at Ala o eya paga wonage menggi kwak, nit o eya paga nogwe niinok perak, ninoreewi ninom kunik aret logogun me, at aput Yetut amiya paga ninomaluk abok aret lek eerogo pinanegak mban eeke logogin o.

8 Nit maluk eeko logonet kwe, “Nit maluk eekulik o,” yogwe niinok, pilit aret ninambokan laganggologwe me, Ala ndogop menggerak wone nogo ninikime wonage abu lek aret o.

9 Ndi, ninomaluk abet aret paganggwi niinok perak, at Ala yegetak mbeyok ariilik, a’me liirogon mban eeke menggerak me, nit obeelom eeka’lek maluk eerit nugwi nogo lek eerogo pege, ndi, maluk ninikime wonage nogo koo’ninake, eeke logogin o.

10 “Nit maluk abu eekulik aret o,” yogwe niinok, at Ala pilit pugungga negen eerogo pugwi me, at ari menggerak wone nogo nit ninikime wonage abu lek aret mbako logowok o.

2 Keritut ninake eeke menggerak wone

1 Napuri o. Kit an niniki kunik me, maluk eekwi kiyo, wone yi, liiru mbanggiragi o. Togop kwe, nit ambi nen maluk eekwi niinok, at a’me nggelok eeke menggerak Yetut Keritut nogo nen nit ninake wone wonok ninogoba yori nagak eeke menggerak o.

2 Ala iniki yanggo yuwak nduk, ninomaluk lek eerogo punuk, Ala ninom lambunogo pinaniyak ninake eeka ti, at Yetut aret o. Nit mban ninomaluk lek eerogo punuk, Ala ninom lambunogo pinaniyak nduk, ninake eeke ti lek o. Ata, nit yi aakumi ndi aakumi o nggween paga yime monggoorak abok aret ninomaluk lekeerogo punuk, Ala ninom lambunogo pinaniyak nduk, ninake eeke menggerak o.

3 Ala nen, “Yogop ee’nu, ndogop ee’nu,” wone yo’nirage nogo ndakndak eekwi paga, “Nit Ala apuri abet aret wonogwe kogo o,” yinuk, yogo monggoorak kwe,

4 aap ambi nen Ala wone yo’nirage nogo eeka’lek logonet, “An Ala aput aret o,” ari kenok perak, Ala ndogop menggerak wone nogo at inikime lek kagak ari me, aap ti pilit pugungga aret o.

5-6 Ndi, aap ambi nen Ala wone yugu nogo ndak-ndak eeke kenok perak, aap ti mondok abet aret Ala iniki kunik lombok eeke menggerak. “Nit Ala ninom kunik wonogwe o,” yogo logonet, at Yetut eeke nagagerak ndakndak eekwi ti paga, Ala ninom abet aret kunik wonogwe nineenu ogo monggoorak.

Wone ngget mendek eeko logorak wone

7 Noreewi o. Kit an niniki kunik me, an nen, “Yogop eeko logonip o,” yinuk, liiru mbanggirage yi ti, wone ngget mendek liiru mbanggirage lek o. Wone yi, o maan togon kinaruk konenit wundi wogo monggotak nogo aret liiru mbanggirage kwe,

8 o apit lek age kagak o eya abe lombok unggwi wage logonet, wone maan yugu nogo aret Keritut nen eerit nage, ndi, kit nen niniki-kiniki kunik eekko’net nugwi, eekwi paga kin age me, wone ngget yugu negen aret kenok, liiru mbanggiragi o.

9 Aap ambi nen, “An o eya paga nage agarik o,” ari logonet kwe, awot eebi mbake kenok, aap ti, iniki o apit pogom yogondak wonage aret o.

10 Ndi, aap ambi nen at awot iniki kunik eeke kenok perak, at o eya paga nage me, nage logonet, aganak kolaagin lek kwe,

11 aap ambi nen at awot eebi mbake kenok perak, aap ti, iniki o apit pogom logonet, o apit paga wonage menggerak o. O apit nen at enegen mbuk eerogo pereegerak me, “An o ndime aret nage agarik,” mbaka’lek aret menggerak o.

12 Napuri niniki kunik yi wae. At Keritut eereegerak nogo paga Ala nen kinomaluk lek eerogo pinagareegerak me, Kinake liiru yi, mbanggirage,

13 Nogobamini yi wae. At o aa’nduk nen nok-nok yogondak kuli itok mondok menggerak kit kineenu ogogutak me, Kinake liiru yi, mbanggirage, Nawuri yi, wae. At maluk ee’ninaka nogo tebenogo pogotak me, Kinake liiru yi mbanggirage, Eeke agarik o. Kit an napuri niniki kunik yi, wae. Ninogoba Ala kineenu ogogutak me, Liiru yi, mbanggirage,

14 Kit an nogobamini yi wae. At o aa’nduk nen nok-nok, yogondak kuli itok mondok-mondok menggerak kineenu ogogutak me, Liiru yi, mbanggirage, Kit an nawuri yi wae. Kit Ala wone kinikime kologo nogogutik, kiniki kole ogogutak nogo nen at maluk ee’ninaka nogo tebenogo pereegutak me, Liiru yi, mbanggirage, Eeke agarik o.

15 It aap nggween paga mendek nen iniki koombunuk eeko menggaarak inom, yi mendek ndi mendek nggween paga mendek inom, abok aret kiniki kunik eerugup o. It aap nggween paga mendek nen iniki koombunuk eekwi nogo kinikilom mbakwi kiinok, ninogoba kiniki kunik eeko logomunggup lek aret o.

16 It aap nggween paga mendek nen iniki nengge kenok mugurok nogwe nogo inom, inigen pekkenok, uugwe mbakwi nogo inom, “An koongge mban iya o,” yinuk, wogoppatit nugwi nogo inom, ti eeko menggaarak abok aret eerit nugu logowaknduk ninogoba nen koonggeelik o. Ata, it aap nggween paga mendek nen aret iniki koombunuk, eeko menggaarak o.

17 It aap nggween paga mendek nen iniki koombunuk eekwi inom, yi mendek ndi mendek iniki nengge kenok mugurok nogwe inom, abok aret lek arigin kwe, Ala iniki mbake menggerak nogo, kit ndakndak eekwi kiinok perak, mondokmondok kineenik aret logomunggup o.

Pilit Keritut nen agan woroorak wone

18 Napuri niniki kunik yi wae. O age yobok paga eeriyak nogo muk panggo yegerak o. Ndi, “Pilit Keritut woraagin,” koneneegutak nogo, yogondak ti mendek ineebe ambik muk mi’nagaarak wonogwe ti paga, “Ie! O age yobok paga eeriyak nogo muk panggo yegerak kagi,” yinuk, mbako ogoorik o.

19 It aap ti, aa’nduk ninom kuwak eeko nogogurak kwe, “It ti, nit mendek lek o,” yinuk, mbo pinaninuk mbaganeegwaarak. “It aap ti, nit mendek aret,” mba’netak en, ninom aret logonetak kwe, “It ti, nit mendek lek,” kin aruwak nduk, mbo pinaninuk mbaganeegwaarak o.

20 Kit perak, aap ambi eeke logowak nduk, leenogo punuk amburu kilippogo mengga kwak, at maluk eekeelik alik leenak menggerak nogo nen, kit leenogo pinaganuk, Aberiniki wokkiragagerak me, wone abe wone mamunggirage nogo, kit abok kineenu aret kiigi o.

21 Ala ndogop menggerak wone nogo kit kineenggo’lek me nduk liiru yi mbanggirage lek o. Kineenu aret me, it aap nen Ala ndogop menggerak wone yogo logonet, alik ambi inom nabenogo yogwe iinok, “Yi pilit aret yogwe o,” yinuk, yelok kaabagip nduk liiru yi, mbanggirage agarik o.

22 Aap pilit pugungga ti, ta mbakop? Lek o. Aap ambi nen, “Yetut ti, Keritut lek o,” ari kenok, pilit pugungga at aret o. “Yetut ti, Keritut lek o,” yogwe ti paga Ala aput Yetut inom, ogoba Ala inom, “Nineebi o,” yinuk, mbo pugwi me, Pilit Keritut nogo it aret o.

23 Aput Yetut mbo pugwi kenok, ogoba kunduk mbo pugwi, ndi, “Yetut ti, Ala aput Keritut aret o,” yinuk, waganggwi iinok perak, ogoba kunduk waganggwi, eeko menggaarak o.

24 Kit perak, o maan aa’nduk togon wone konembunuk, waganeegutak nogo, kinikime mondok aberak logonet, porogo logonip o. Mondok nu’- lek porogo wonogwe kiinok, ninogoba Ala aput imbirak kinom kunik aret logomunggup o.

25 Nit ee’ninaburak Ala nen koonogo pereegerak nogo ti, “Kit mondok-mondok kineenik logobagip nduk, eekkinabigin o,” yinuk, yo’niragagerak ti aret o.

26 It nen kit kinambo’me laganggo logonet, nomonggiren nogwe iyo, liiru yi mbanggiragi o.

27 Napuri o. Aberiniki kinoba wuppinagi wagagerak kinikime wonage me, aap ambi nen kit mamunggiroorak lek aret o. At nen yi wone ndi wone abok aret mamunggirage logonet, pilit mamunggirageelik abet mban mamunggirage menggerak me, at mamunggirage nogo ti, ndak-ndak eekwi kiinok, Keritut kinom kunik aret logomunggup o.

28 Ndi, napuri niniki kunik yi wae. Peebi at woroorak nogo eyom paga nit ninenggali lek niniki teeluk logowok nduk, yogondak nen niniki ambit a’nuk Yetut ninom kunik aret logowok o.

29 At Keritut ti, abe koonak mban eeke menggerak kineenu me, it aap obeelom eeko menggaarak nogo, “Yi at Ala nen aret ndaganabeegerak kagi o,” yinuk, abet aret mbarumunggup o.

3 “Kit Ala apuri aret,” yoragagerak wone

1 Nit at apuri abet aret wonogwe me, at Ala nen, “Kit an napuri aret o,” yo’nirage ti paga at ninogoba ninabuwa nggwok mondok alik negen mbake menggerak ti, kaanip o. It aakumi nggween paga mendek mban mugurok nogwe nogo nen aa’nduk Ala yelok kaga’lek wonogogwaarak kwak, yogondak at apuri nit kunduk yelok niiga’lek aret agaarik o.

2 Noreewi o. Kit an niniki kunik me, wone ambi yokkira o. Nit yogondak aret Ala apuri ogoorik o. Ndi, peebi nonggop eeppinanege kenok wonogo logorak nogo, nit awo kin kaga’lek kwe, at wage kenok, “Etenggen yi kwak eeppinaniyak nduk, wonogoorak kagi,” yinuk, mbakwi niigak, “At etenggen kokwak eeppinanigin, nineenu aret ogoorik o.”

3 Nit eeppinaniyak nogo niniki lunik wonogwe niinok, at Keritut iniki kikak naka’lek wonage nogo pogom, nit ndak-ndak niniki kikak naka’lek aret eekkologo logowok o.

4 Maluk eekwi ti, Ala wone yugu aret taganggwi me, aap ambi maluk eeke kenok ti, Ala wone yugu nogo aret taganogo punuk eeke menggerak o.

5 At Keritut maluk abu eekeelik aret me, nit ninomaluk lek eerogo pinanikit nduk, wambi wagagerak nogo kineenu aret mbako o.

6 Aap ambi at Keritut imbirak kunik wonage kenok, at maluk eerit nageelik aret o. Ndi, aap ambi maluk eerit nage menggerak kenok perak, Keritut enegen kage, eebe eenu age, eeka’- lek aret wonage menggerak o.

7 Napuri niniki kunik yi, wae. It aakumi ugun nen kit nomonggiren nogwe iyo, liippogo logonip o. Aap ambi maluk eeka’lek obeelom mban eeke kenok, at Keritut maluk eekeelik mondok obeelom mban wonage nogo pogom aret menggerak o.

8 At Tile o maan iyaalok nen maluk eerit wundi wage menggerak me, aap ambi maluk mban eeke menggerak kenok, at Tile aput aret menggerak. Ndi, at Ala aput wambi wagagerak nogo ti, at Tile nen yi eekak ndi eekak eeke menggerak nogo abok aret, mondok lek eerogo pikit nduk, wambi wagagerak.

9 Aap ambi Ala nen ndake kenok, at Ala obaabut aret wagangge me, at maluk eeke logogin lek o. At Ala nen aret ndaremenggerak me, at maluk eeke logorak ti meek o.

10 Ala apuri inom, Tile apuri inom, nano paga nineenu ariyak nogo yi aret. It aakumi obeelom eeka’lek maluk mban eekwi, inowe-inawot iniki kunik eekwi lek ineebi mbakwi, eekwi iinok ti, Ala apuri lek aret yelok iigo monggoorak.

Niniki-kiniki kunik eeko logorak wone

11 O maan aa’nduk nen wone konenggo nogogutak nogo ti, “Ninikikiniki kunik eeko logonip o,” yinuk, yo’niragagerak ti aret.

12 At Kayin nen eereegerak nogo pogom, kit togop eeriyak mage o. Maluk eeriyak ee’ninake menggerak aput at aret me, awuluk mondok wareegerak. Nonggop nduk awuluk wareegerak mbakop? Lek o. At Kayin maluk mban eeke menggerak me, awuluk obeelom mban eeke kage nagagerik, anini nen aret awuluk wareegerak.

13 Togop kenok, noreewi o. It aakumi nggween paga mendek mban mugurok nogwe nogo nen ineebi kinombakwi iinok, “Ie,” yinuk, kinagabiti mbarugup o.

14 Nit ninoreewi ninom niniki kunik eeginakwi ti paga, kanggo menggam nen nineenik ee’- ninake menggim muk pinani wagagerak wonogwe nineenu ogoorik o. Aap ambi nen aakumi iniki kunik aganake lek kenok, at kanggo menggam time awo aret wonage agaarik o.

15 Aap ambi at awot eebi lombok mbake kenok, at aakumi inooka aret o. Ndi, aakumi inooka nogo ti, at mondok-mondok ineenik logorak mendek unde eekkolaga’lek ti, kineenu aret o.

16 Nano eekwi paga ninoreewi niniki kunik eeginakwi nogo nineenu ariyak mbakop? Lek o. At Yetut iniki nen, “An aakumi inake nooruwak aret o,” mba’nuk, ninake kambeegerak ti kokwak, nit togon, ninoreewi inabuwa nen inake kambuu-rak op aret mbakwi kenok, aakumi iniki kunik eeginakwi nogo ti aret.

17 Aap ambi eenggi warak nen ore aaninggin oba agaarak enegen kage kwe, abuwa mbaka’lek, “Obaalombok o,” yinuk, mbo pege kenok, Ala nen aakumi inabuwa mbake menggerak nogo mendek inikime wonage abu lek aret mbako logowok o.

18 Napuri niniki kunik yi wae. Nit ninoone paga nen mban, “Aakumi ninom niniki kunik wonogwe o,” yinuk, yuurak mage o. Ata, niniki paga nen aret inabuwa lombok mbako logonet, obeelom eeppiinet nogo logowok o.

Ala enggaanom paga ninagabiti lek logonet yoriyak wone

19-20 Nit eeko monggoorak nogo Ala enggaanom paga abe’nage logonet, maluk ambi eekoorak paga niniki nen ninenggali wappinanege kenok, ninagabiti mbariyak kwe, nit yi eekak ndi eekak eeko monggoorak nogo inom, ninikime ee’ninake menggerak nogo inom, abok aret at Ala eenu me, nit Ala enggaanom paga, “An aakumi inabuwa nen obeelom eeppiinet nage nagagirak nogo paga kat Ala ari menggendak nogo an ndak-ndak eeke nagagirak o,” mba’nuk, ninagabiti lek logonet, at yoriyak op aret o.

21 Noreewi niniki kunik yi wae. Nit ambi eekoorak paga ninikime nen ninenggali wappinanega’lek kenok, Ala enggaanom paga ninagabiti mbariyak lek o.

22 At Ala nen, “Yogop ee’nu, ndogop ee’nu,” yinuk, yo’nirage menggerak wone inom, at eeriyak inikilom mbake menggerak nogo inom, ndak-ndak eekwi me, nit yi mendek ndi mendek wo’niraawak nduk, nggino yogwi nogo, at wo’nirage logogin aret o.

23 “Kit kiniki an naput Yetut Keritut oba panggombunuk abet mbakwi, ndi, an nen yokkiragagirak nogo ndak-ndak kinoreewi kiniki kunik aganakwi, eeko logonip o,” yinuk, wone lengganogo yo’nirage nogo ti aret.

24 Wone, “Yogop ee’nu, ndogop ee’nu,” yo’nirage menggerak wone nogo, kit ambi nen ndak-ndak eekwi kiinok, Ala kit kinom kunik wonage, ndi, kit at kinom kunik wonogwe, eeko logomunggup o. Ndi, Aberiniki wo’niragagerak ninikime wonage ti paga at Ala abet aret nit ninom ku nik wonage nogo nineenu ogo o.

4 “Aberiniki ari kenok yogwe a, Pilit Keritut ari kenok yogwe a?” wone

1 Noreewi niniki kunik yi wae. “Aberiniki nen yo’nirage kenok, yokkira wogo o,” yogwe iinok, inoone abet mba’nuk ugun woorak mage o. It pilit wone yoraga nogo nen yi awi ndi awi abok aret yoranet nugwi me, “At Ala nen abet aret nappiya wagaarak agan wogwe ilik, it iniki koombunuk nen agan wogwe a?” yinuk, inabut mbambunuk inoone konenggo logomunggup o.

2 “Ala Aberiniki inikime logonet, agan wogwe ilik,” yinuk, yelok kogo logorak nogo yi aret. “Yetut Keritut abet aret nggween paga wambi wage nagagerik, aap aret nda’nagagerak o,” yinuk, paganggwi iinok, “Aap ti, Ala nen abet aret nappiya wagagerak Aberiniki inikime logonet, yogwe iigo o,” yinuk, inoone konenggo logorak op kwe,

3 it aap ti nen wone ti, paganggwi lek iinok perak, “Aap ti, Ala nen nappiya woroolik iniki mba’nuk aret wagaarak,” mbarumunggup o. “O age yobok togon Pilit Keritut wage logomenggerik, ndogop agan wage logogin o,” yinuk, yogwe koneneegutak nogo, “Muk wagaarak yi aret iigo o,” yinuk, mbarumunggup o.

4 Napuri niniki kunik yi wae. Kit Ala apuri aret o. Ndi, kit Ala apuri aret me, at omaawi ambik Aberiniki wokkiragagerak kinikime wonage nogo ti, omaawi ambik, ndi, it aap nggween paga mendek mban mugurok nugwi inikime wonage nogo ti, omaawi mbuuluk me, it Ala nen yoragekagak yoraga inetenggen kumbunuk agan wogwe ti, muk tebenogo piyareegutak o.

5 It aap ti, nggween paga mendek mban mugurok nugwi nogo mendek aret me, it aap nggween paga mendek mban mugurok nugu menggaarak nen inoone yogwe iinok, it aap nggween paga mendek mban mugurok nugwi nogo nen inoone yogwe nogo inaruk konenggo menggaarak.

6 Ndi, nit perak, Ala apuri mbogut paga mendek aret me, nit ninoone yogwe nogo, it Ala inom kunik nogo nen mban inaruk konenggo menggaarak. Ndi, Ala apuri lek kenok perak, nit ninoone yogwe nogo konenggulik aret o. Nit ninoone konengga’lek ti paga, “Aberiniki nen yorage kenok yogwe ilik, iniki koombunuk nen pilit yogwe a?” yinuk, nineenu ogo monggoorak.

Ala nen aakumi iniki kunik aganake menggerak wone

7 Noreewi niniki kunik yi, wae. Aakumi niniki kunik aganako logowok nduk, Ala nen aret eeppinanege menggerak me, niniki-kiniki kunik eeko logowok o. Ninoreewi niniki kunik aganakwi niinok, “It yi ti, Ala nen aret ndaganabeegerak me, inogoba Ala ineenu aret iigo o,” yinuk, yogo logogun o.

8 Ndi, at Ala nen yi aap ndi aap abok aret inabuwa mbake logonet, iniki kunik lombok aganake kagak kwe, nit ninoreewi niniki kunik aganakwi lek niinok perak, “It aap yi, Ala ineenggo’lek aret iigo o,” yinuk, mbako logogun.

9 Nit nineenik logowok nduk, Ala nen at aput ambolom nggween paga nappi wagagerak ti paga, Ala abet aret ninabuwa mbake logonet, iniki kunik ee’ninake menggerak nogo ti, yelok kogo ogoorik o.

10 Ninoreewi niniki kunik aganaburak nogo ti, ngge kokwak mbakop? Lek o. Nit nen Ala niniki kunik eerulik o. Ata, Ala ninabuwa nen iniki kunik ee’ninake nagagerik, ninomaluk lek eerogo pege logonet, ninom lambumbinanuwak nduk, at aput aret nappi wagagerak nogo kwak, nit togop aret ninoreewi niniki kunik aganako logowok o.

11 Noreewi niniki kunik yi, wae! At Ala nen togop aret ninabuwa mbake logonet, iniki kunik ee’ninabeegerak me, nit togon ndak-ndak niniki-kiniki kunik eeko logowok o.

12 Nit abok aret Ala eebe ninigen kaga’lek aret wonogwe kwe, ninikikiniki kunik eekwi niinok perak, Ala ninom kunik logonet, aakumi ando eebi mbake, ando inikilom mbake, eekeelik abok aret inabuwa mbake menggi kwak, nit togop aret aakumi abok niniki kunik aganako logowok nduk, ee’ninake menggerak o.

13 At Ala nen Aberiniki wo’niragagerak ti paga at nit ninom kunik wonage, ndi, nit at ninom kunik wonogwe, eekwi nogo nineenu aret o.

14 Ndi, ninogoba nen yi aakumi ndi aakumi abok aret inagap ndaruwak nduk, at aput nappi wagagerak nogo ninigen kogo nogogurik, paganogo yokkirogo monggoorak.

15 Kit nen, “Yetut ti, Ala aput aret o,” yinuk, paganggwi kiinok, at Ala kit kinom kunik wonage, ndi, kit at kinom kunik wonogwe, eeko logomunggup o.

16 At Ala ninabuwa mbake nagagerik, iniki kunik ee’ninabeegerak nogo, nineenu ogo nogoorik, “Abet aret,” mba’nuk, niniki ti paga panggombunuk, ogoorik o. At Ala nen nit yi aakumi ndi aakumi abok ninabuwa mbake logonet, iniki kunik ee’ninake menggerak me, kit kinoreewi kiniki kunik aganakwi kiinok, Ala kit kinom kunik wonage, ndi, kit Ala kinom kunik wonogwe, eeko logomunggup o.

17 O peebi age yobok ninowak loonninaburak eyom paga, “At Yetut eeke nagagerak nogo kwak, nit o nggween paga yime logonet, ndakndak eeko nogogurak o,” mba’nuk, ninagabiti mbaka’lek niniki teeluk logowok nduk, Ala nen ambi eebimbake, ndi, ambi abuwa mbake, eekeelik abok aret ninabuwa mbake menggerak nogo pogom, nit yogondak ti ndak-ndak aret eeko logowok o.

18 Aap ambi nen oreewi inabuwa mba’nuk iniki kunik aganake kenok, oreewi nen at paga inagabiti ombarugun lek o. At aap nogo nen abet aret inabuwa mbake me, inabuwa mbake ti paga inagabiti mbakwi nogo lek aret age menggerak kwe, ninagabiti mbakwi kenok ti perak, “Ninoreeluk maluk eeppogoorak me, onggo ninooke kaamun ilik,” yinuk, ninagabiti mbakwi me, ninom niniki kunik lek aret mbako logowok o.

19 Aa’nduk at Ala nen nit ninabuwa mba’nuk, iniki kunik ee’ninabeegerak me, yogondak nit togon togop aret aakumi inabuwa mba’nuk, niniki kunik aganako logowok o.

20 Aap ambi at awot enegen kage logonet kwe, iniki kunik eekeelik kenok, at Ala enegen kaga’lek me nonggop togon iniki kunik eeriyak mbakop? Meek me, awot eebi ombake logonet, “An Ala niniki kunik eeke o,” ari kenok, aap ti pilit pugungga aret o.

21 At Ala nen ari logonet, “Kit an kiniki kunik ee’nakwi kiinok, kinoreewi kunduk inabuwa mbako logonet, kiniki kunik aganako logonip o,” yinuk, wone lengganogo yo’niragagerak nogo ti aret.

5 Abet mbakwi paga tebenogo piigo logorak wone

1 Kit nen, “Yetut ti, Keritut aret o,” yinuk, abet mbakwi kiinok, Ala nen aret ndakkinabeegerak me, kit at apuri aret ogotik o. Ndi, kinogoba Ala kiniki kunik eekwi kiinok ti, apuri ndarak nogo inom kiniki kunik eeginako logorak me,

2 nit nonggop eekwi paga Ala apuri niniki kunik aganakwi nineenu ariyak mbakop? Lek o. Ala nen, “Yogop ee’nu, ndogop ee’nu,” wone yo’nirage nogo eeko logonet, Ala niniki kunik eekwi ti paga at apuri niniki kunik aganakwi mbako monggoorak.

3 At Ala niniki kunik eekwi nogo ti, at nen, “Yogop ee’nu, ndogop ee’nu,” yinuk, wone yo’nirage eekwi nogo ti aret. Ndi, at Ala nen wone, “Yogop ee’nu, ndogop ee’nu,” yo’nirage nogo ti, aaninggin lek aret o.

4 Nit Ala nda’ninabeegerak nogo nen it aakumi nggween paga mendek mban mugurok nogwe nogo tebenogo piigo monggoorak. It aakumi nggween paga mendek mban mugurok nogwe tebenogo piigwi nogo ti, nit abet mbakwi paga nen aret tebenogo piinok, nit tiyanak aret ogoorik.

5 Taani nen it aap nggween paga mendek mban mugurok nogwe nogo, tebenogo piigo menggaarak mbakop? Lek o. Nit nen, “Yetut ti, Ala aput aret o,” yinuk, abet mbakwi nogo nen aret tebenogo piigo monggoorak kogo o.

“Yetut ti, Keritut aret,” yorogo logorak wone

6 At niyome wuppege kogogurak nogo inom, ndi, kangge logonet, amiya wangge kogogurak nogo inom, ti, Yetut Keritut eebe aret o. Niyome wuppege kogogurak nogo mban ti lek o. Ata, at amiya wangge nogo inom kogo nogogurik, “Yi Yetut Keritut abet aret o,” yinuk, mbareegurak. Ndi, Aberiniki nogo ti, Ala ari menggerak ndak-ndak abet mban ari menggerak me, at nen kunduk, “Yi Yetut Keritut abet aret o,” yinuk, abok paganogo yo’nirage menggerak.

7-8 Togop me, Aberiniki nen yo’nirage inom, niyome wuppege kogogurak nogo inom, ndi, amiya wangge ninigen kogogurak nogo inom, wone kenagan ti aret eereegerak kwe, alom ambit, “Yetut ti, Keritut aret o,” yinuk, nineenu aruwok nduk, eereegerak.

9 Aakumi nen paganogo yo’- nirogwe iinok ti, abet mba’nuk woorak op mbakwi kwe, nit abet mbaruwok nduk Ala nen alom kenagan paga, “Yetut ti, an naput aret o,” yinuk, eereegerak ti, mondok iya me,“Yi abet aret o,” yinuk, waganggo logowok o.

10 Nit niniki Ala aput oba panggombunuk, abet mbakwi niinok, ninikime nen, “Yi Ala aput abet aret waganggoorak kogo o,” yinuk, mbako logogun o. Ndi, it Ala abet mbaka’- lek logonet, at aput iniki oba panggombunuk, abet mbaruwak nduk, paganogo yoragagerak nogo, abet mbaka’lek me, Ala pilit pugungga negen agago pogo logogun o.

11 At Ala nen wone paganogo yo’niragagerak nogo yi aret o. Nit nineenik mondok-mondok logowok nduk, Ala nen nabelan-kabelan wo’niragagerak me, at aput waganggwi niinok, nit mondok-mondok nineenik logogun ti aret.

12 Nit Ala aput waganggwi niinok, nineenik mondok-mondok logogun kwe, wagangga’lek niinok perak, nineenik logogun abu lek aret o.

Nineenik mondok logorak wone

13 Kit kiniki Ala aput oba panggombunuk abet mbakwi nogo, Ala nen kineenik mondok-mondok logorak unde eeppinagareegerak kineenu arubagip nduk, liiru yi mbanggiragi o.

14 At Ala iniki mbake nogo ndak-ndak wo’niraawak nduk, nggino yogwi niinok, at aruk konembunuk, wo’nirage menggerak nineenu me, ninagabiti mbaka’lek, “Wo’niraagin aret,” mba’nuk, at nggino yogo logowok o.

15 Nit nen at nggino yogwi nogo, at abet aret aruk konengge menggerak nineenu me, wo’niraawak nduk, nggino yogwi nogo ti, “Wo’- niraagin aret,” mbako logowok o.

16 Aap ambi nen maluk eeriyak iniki miippatinuk eerit nage kinigen kogo logomonggotik, at kani omoonu’me noorak nduk, eekwi nogo mendek eerit nage me, ake Ala yorubagip nduk, yokkirage ti lek o. Ata, kinore ambi Ala nen ninomaluk lek eerogo pinaniyak nogo mendek eeke kinigen kogwe kenok, Ala nen omaluk lek eerogo punuk, eenik mondok logorak mendek unde logowak nduk, “Ake Ala yogo logonip o,” yinuk, yokkiragi o.

17 Yi maluk ndi maluk eekwi nogo ti, abok endage maluk aret kwe, ambi kani omoonu’me noorak nduk, miippunuk eekwi nogo mendek wonage kenok, yokkiragi o, noreewi.

18 Aap ambi Ala nen ndareegerak kenok, at maluk eerit nageelik ti, nineenu aret o. Ala aput Yetut nen aap ti, liirogon aret porogo menggerak me, at maluk eeka nogo nen aap ti, maluk eeppuurak mondok meek aret o.

19 Yi aakumi ndi aakumi maluk eeko menggaarak nogo abok aret at maluk eeka Tile nogo abu’- me wonogwe nineenu kwe, nit perak, Ala apuri aret ogoorik o.

20 At Ala aput wambi wage nagagerik, Ala ambit alik lombok menggerak nogo nit liippuwok nduk nineenu eeppinaneegerak o. Ndi, at alik lombok menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at alik lombok menggerak Ala nogo aret me, nineenik mondok logorak unde eeppinanege menggerak alom at aret o.

21 Napuri niniki kunik yi wa! At Ala alik lombok menggerak nogo mbo punuk, obaane’me alik ambi mippunuk, alut eekwi kiyo, liippogo logonip o. Abu aret yokkiragi o. Napuri wa!